ຂ່າວຫຼ້າສຸດ

ໝູ່ບ້ານເຮືອນລາວ ເພີ່ມຫຼາຍກິດຈະກຳທີ່ໜ້າສົນໃຈ ຮອງຮັບແຂກໂອກາດບຸນທາດຫຼວງ

151 09 ພ.ຈ. 2018 ຂ່າວໜ້າ​ໜຶ່ງ
ໝູ່ບ້ານເຮືອນລາວ ເພີ່ມຫຼາຍກິດຈະກຳທີ່ໜ້າສົນໃຈ ຮອງຮັບແຂກໂອກາດບຸນທາດຫຼວງ

    ໝູ່​ບ້ານ​ເຮືອນ​ລາວ ໄດ້​ຖືກ​ຕົບ­ແຕ່ງ​ໃຫ້​ມີ​ສີ­ສັນ ແລະ ສ້າງ​ຄວາມ​ປະ​ທັບ​ໃຈ​ໃຫ້​ຜູ້​ທີ່​ຈະ​ເຂົ້າ​ມາ​ຢ້ຽມ​ຊົມ​ຫຼາຍ​ຂຶ້ນ​ກວ່າ​ປີ­ຜ່ານ­ມາ ເພື່ອ​ຮອງ​ຮັບ​ຜູ້​ຈະ​ມາ​ທ່ຽວ​ຊົມ​ທັງ​ພາຍ​ໃນ ແລະ ຕ່າງ­ປະ­ເທດ ໃນ​ໄລ­ຍະ​ບຸນ​ນະ­ມັດ­ສະ­ການ​ບຸນ​ພະ​ທາດ­ຫຼວງ ປະ­ຈຳ​ປີ 2018 ທັງ​ເປັນ​ການ​ຊຸກ­ຍູ້-ສົ່ງ­ເສີມ​ການ­ທ່ອງ­ທ່ຽວ​ໂອ­ກາດ​ປີ​ທ່ອງ​ທ່ຽວ​ລາວ 2018 ໃຫ້​ມີ​ບັນ­ຍາ­ກາດ​ຄຶກ­ຄື້ນ ແລະ ຮັກ­ສາ​ໄດ້​ປະ­ເພ­ນີ ວັດ­ທະ­ນະ­ທຳ​ອັນ​ດີ­ງາມ​ຂອງ​ຊາດ ແລະ ປະ­ຊາ­ຊົນ​ລາວ​ບັນ­ດາ­ເຜົ່າ.

    ທ່ານ​ນາງ ຈັນ​ນະ­ພາ ວົງ​ສະ­ໝໍ­ລະ­ພູມ ປະ­ທານ​ບໍ­ລິ­ສັດ ຊີ​ເອັນ​ພີ​ຂາ​ອອກ-ຂາ​ເຂົ້າ​ສຳ​ຫຼວດ ແລະ ຂຸດ​ຄົ້ນ​ບໍ່​ແຮ່ ຈຳ­ກັດ (ໃນ​ນາມ​ຜູ້​ມີ​ສ່ວນ​ຮ່ວມ​ໃນ​ການ​ປະ­ກອບ­ສ່ວນ​ໃນ​ງານ​ບຸນ​ນະ­ມັດ­ສະ­ການ​ພະ​ທາດ­ຫຼວງ) ໃຫ້​ສຳ­ພາດ​ໃນ​ວັນ​ທີ 7 ພະ­ຈິກ 2018 ວ່າ: ໝູ່​ບ້ານ​ເຮືອນ​ລາວ ເປັນ​ກິດ­ຈະ­ກຳ​ໜຶ່ງ​ຂອງ​ງານ​ບຸນ​ນະ­ມັດ­ສະ­ການ​ພະ​ທາດ­ຫຼວງ ໂດຍ​ໄດ້​ສ້າງ​ເຮືອນ​ໃຫ້​ມີ​ຄວາມ​ໂດດ​ເດັ່ນ​ດ້ານ​ລັກ­ສະ­ນະ ຮູບ­ຊົງ ແລະ ການ​ຕົບ­ແຕ່ງ ສ່ອງ​ແສງ​ໃຫ້​ເຫັນ​ປະ­ເທດ​ລາວ ຄວາມ​ເປັນ​ລາວ​ທີ່​ມີ​ບາດ­ກ້າວ​ການ​ພັດ­ທະ­ນາ​ດີ​ຂຶ້ນ ໄປ​ຄຽງ​ຄູ່​ກັບ​ການ​ພັດ­ທະ­ນາ ແລະ ປົກ​ປັກ​ຮັກ­ສາ​ພະ​ທາດ­ຫຼວງ​ວຽງ​ຈັນ​ໃຫ້​ມີ​ຄວາມ​ຍືນ​ຍົງ ໝູ່​ບ້ານ​ເຮືອນ​ລາວ​ໄດ້​ສ້າງ​ຂຶ້ນ​ປີ 2016 ໂດຍ​ເບື້ອງ​ຕົ້ນ​ມີ 2 ຫຼັງ ແລະ ສ້າງ​ເພີ່ມ​ເປັນ 8 ຫຼັງ ເຊິ່ງ​ແອ້ມ ປູ ມຸງ ດ້ວຍ​ໄມ້ ແລະ ດິນ­ຂໍ ທີ່​ມີ​ຮູບ­ຊົງ​ແຕກ​ຕ່າງ​ກັນ ມີ​ການ​ຕົບ­ແຕ່ງ​ແບບ​ຊົງ​ລາວ​ດັ້ງ­ເດີມ​ທີ່​ສວຍ​ງາມ ເພື່ອ​ແນ­ໃສ່​ອະ­ນຸ​ຮັກ​ວັດ​ທະ​ທຳ ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ລາວ ແລະ ເຜີຍ­ແຜ່​ໃຫ້​ລູກ​ຫຼານ ກໍ່​ຄື​ແຂກ​ພາຍ​ໃນ ແລະ ຕ່າງ­ປະ­ເທດ​ຮັບ​ຮູ້​ເຮືອນ​ຊົງ​ລາວ​ເດີມ ວິ­ຖີ​ຊີ­ວິດ ສ່ອງ​ແສງ​ເຖິງ​ວັດ­ທະ­ນະ­ທຳ ຮີດ­ຄອງ​ອັນ​ດີ­ງາມ ນອກ​ນີ້ ຍັງ​ມີ​ການ­ສະ­ແດງ​ສິ­ລະ​ປະ​ວັດ­ທະ­ນະ­ທຳ​ພື້ນ­ເມືອງ ໝໍ​ລຳ ລະ­ນາດ ການ​ຂັບ​ງື່ມ ອາ­ຫານ​ພື້ນ­ເມືອງ​ລາວ ສວນ​ຈຳ­ປາ ສວນ​ພຶກ­ສາ ການ​ຕ່ຳ­ຫູກ​ທໍ​ໄໝ ການ​ຕຳ​ເຂົ້າ​ດ້ວຍ​ຄົກ­ມອງ ແລະ ອື່ນໆ.

    ສຳ­ລັບ​ປີ​ນີ້ ພວກ​ເຮົາ​ໄດ້​ລົງ­ທຶນ​ຕົບ­ແຕ່ງ ແລະ ມີ​ການ​ເສີມ​ກິດ­ຈະ­ກຳ​ທີ່​ໜ້າ​ສົນ­ໃຈ​ເພີ່ມ​ຂຶ້ນ ໂດຍ​ສະ­ເພາະ​ກາ­ນວາງ­ສະ­ແດງ​ພາບ​ຈຳ­ລອງ​ຂອງ​ເມືອງ​ມໍ­ລະ­ດົກ​ໂລກ​ຫຼວງ​ພະ​ບາງ ມໍ­ລະ­ດົກ​ໂລກ​ວັດ​ພູ​ຈຳ­ປາ​ສັກ ລວມ​ທັງ​ສະ­ຖານ­ທີ່ ທີ່​ກຳ­ລັງ​ກະ­ກຽມ​ເຂົ້າ​ເປັນ​ມໍ­ລະ­ດົກ​ໂລກ ເປັນ­ຕົ້ນ ທົ່ງ​ໄຫ​ຫີນ ແລະ ສະ­ຖານ­ທີ່​ອື່ນໆ ເພື່ອ​ໃຫ້​ຜູ້​ທີ່​ຍັງ​ບໍ່​ທັນ​ເຫັນ​ຕົວ​ຈິງ ກໍ່​ສາ­ມາດ​ສຳ­ຜັດ​ໄດ້ ພິ­ເສດ ຈະ​ມີ​ກາ­ນວາງ­ສະ­ແດງ​ຮູບ​ພາບ​ກ່ຽວ​ກັບ​ພະ​ທາດ­ຫຼວງ ນັບ​ແຕ່​ມື້​ສ້າງ​ການ​ປະ­ຕິ­ສັງ­ຂອນ​ແຕ່​ລະ​ໄລ­ຍະ ສະ­ແດງ​ສິ­ລະ​ປະ-ວັນ­ນະ­ຄະ­ດີ ເພື່ອ​ໃຫ້​ຜູ້​ທີ່​ມາ​ຢ້ຽມ​ຊົມ​ໄດ້​ສຳ­ຜັດ​ກັບ​ວັດ­ທະ­ນະ­ທຳ​ອັນ​ດີ­ງາມ​ຂອງ​ຊາດ ທ້ອງ­ຖິ່ນ ກໍ່​ຄື​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ພ້ອມ​ທັງ​ຈຳ­ໜ່າຍ​ເຄື່ອງ​ທີ່​ລະ­ນຶກ​ຂອງ​ລາວ​ສະ­ເພາະ ເປັນ­ຕົ້ນ ເຄື່ອງ​ເກົ່າ​ຂອງ​ແກ່ ຜ້າ­ໄໝ ໂອ ຂັນ ແລະ ອື່ນໆ ປັດ­ຈຸ­ບັນ ພວກ​ເຮົາ​ໄດ້​ມີ​ການ​ກະ­ກຽມ​ໄດ້​ປະ­ມານ 70% ຄາດ​ວ່າ​ຈະ​ສຳ­ເລັດ 100% ແລະ ເປີດ​ໃຫ້​ບໍ­ລິ­ການ​ໃນ​ວັນ​ທີ 14 ພະ­ຈິກ 2018 ໂດຍ​ຜູ້​ທີ່​ມາ​ເຂົ້າ​ຢ້ຽມ​ຊົມ ຈະ​ບໍ່​ໄດ້​ເສຍ​ຄ່າ​ຜ່ານ​ປະ­ຕູ ແຕ່​ເປັນ​ການ​ປະ­ກອບ­ສ່ວນ​ຊື້​ປີ້ 10.000 ກີບ​ຕໍ່​ຄົນ (ຜູ້​ເຖົ້າ ແລະ ເດັກ­ນ້ອຍ​ບໍ່​ໄດ້​ເສຍ) ແລ້ວ​ເອົາ​ຂວັ້ນ​ປີ້​ແລກ​ນ້ຳ​ດື່ມ (ຄ້າຍໆ​ກັບ​ການ​ຊື້​ນ້ຳ​ດື່ມ) ເພື່ອ​ນຳ­ໄປ​ຊຸກ­ຍູ້​ສິ­ລະ​ປະ ປ້ອງ​ກັນ ໄຟ­ຟ້າ ອະ­ນາ­ໄມ ແລະ ອື່ນໆ ໂອ­ກາດ​ນີ້ ຂ້າ­ພະ­ເຈົ້າ​ຂໍ​ເຊີນ­ຊວນ​ບັນ­ດາ​ທ່ານ​ສຳ­ຜັດ​ໝູ່​ບ້ານ​ເຮືອນ​ລາວ​ໄດ້ ພ້ອມ​ນີ້ ພວກ​ເຮົາ​ກໍ່​ຍິນ​ດີ​ຮັບ​ຄຳ​ຕຳ​ນິ­ຕິ​ຊົມ ເພື່ອ​ຈະ​ປັບ­ປຸງ​ໃຫ້​ດີ​ຂຶ້ນ.

ຂ່າວທີ່ກ່ຽວຂ້ອງ