ຂ່າວຫຼ້າສຸດ

ສຳຫຼວດສະຖິຕິເນື້ອທີ່ກະສິກຳທົ່ວປະເທດ ປະເມີນເປົ້າໝາຍການພັດທະນາແບບຍືນຍົງ

196 08 ພ.ຈ. 2018 ຂ່າວໜ້າ​ໜຶ່ງ
ສຳຫຼວດສະຖິຕິເນື້ອທີ່ກະສິກຳທົ່ວປະເທດ ປະເມີນເປົ້າໝາຍການພັດທະນາແບບຍືນຍົງ

    ກອງ​ປະ­ຊຸມ​ຄະ­ນະ​ຊີ້​ນຳ​ລະ­ດັບ​ຊາດ ຄັ້ງ​ທີ 2 ຂອງ​ການ​ສຳ​ຫຼວດ​ສະ­ຖິ­ຕິ​ກະ­ສິ­ກຳ​ທົ່ວ​ປະ­ເທດ ຈັດ​ຂຶ້ນ​ວັນ​ທີ 6 ພະ­ຈິກ 2018 ທີ່​ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ໂດຍ​ເປັນ​ປະ­ທານ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ມີ​ທ່ານ ສະ­ໄໝ​ຈັນ ບຸບ­ຜາ ຫົວ­ໜ້າ​ສູນ​ສະ­ຖິ­ຕິ​ແຫ່ງ​ຊາດ ກະ­ຊວງ​ແຜນ­ການ ແລະ ການ​ລົງ­ທຶນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ໄດ້​ສືບ­ຕໍ່​ຈາກ​ຄັ້ງ​ທີ 1 ກ່ຽວ​ກັບ​ການ​ຊີ້​ນຳ​ສຳ​ຫຼວດ​ສະ­ຖິ­ຕິ​ກະ­ສິ­ກຳ​ທົ່ວ​ປະ­ເທດ ທີ່​ຈັດ​ຂຶ້ນ​ທ້າຍ​ປີ 2017 ເພື່ອ​ຮັບ​ຟັງ​ການ​ລາຍ​ງານ​ຄວາມ​ຄືບ​ໜ້າ ການ​ກະ­ກຽມ​ການ​ສຳ​ຫຼວດ ພິ­ຈາ­ລະ­ນາ​ແກ້​ໄຂ​ບັນ­ຫາ ແລະ ຂໍ້­ຄົງ­ຄ້າງ ເພື່ອ​ເຮັດ​ໃຫ້­ການ​ສຳ​ຫຼວດ​ສະ­ຖິ­ຕິ​ກະ­ສິ­ກຳ​ທົ່ວ​ປະ­ເທດ ຄັ້ງ​ທີ 3 ຖືກ​ຈັດ​ຕັ້ງ​ປະ­ຕິ­ບັດ​ຢ່າງ​ມີ​ປະ​ສິດ­ທິ​ຜົນ ເຊິ່ງ​ໄດ້​ຄົ້ນ­ຄວ້າ ແລະ ພິ­ຈາ­ລະ­ນາ​ກ່ຽວ​ກັບ​ການ​ເລື່ອນ​ໄລ­ຍະ​ລົງ​ສຳ​ຫຼວດ​ພາກ​ສະ­ໜາມ ຈາກ​ເດືອນ​ພຶດ­ສະ­ພາ ເປັນ​ເດືອນ​ຕຸ­ລາ-ພະ­ຈິກ 2019 ເນື່ອງ​ມາ​ຈາກ​ປັດ­ຈຸ­ບັນ ລາວ​ໄດ້​ປະ­ສົບ​ກັບ​ໄພ­ພິ­ບັດ​ທາງ​ທຳ​ມະ​ຊາດ ໂດຍ​ສະ­ເພາະ​ໃນ​ຂະ­ແໜງ­ການ​ຜະ­ລິດ​ກະ­ສິ­ກຳ ໄດ້​ຮັບ​ຜົນ​ກະ­ທົບ​ໜັກ ຫາກ​ສຳ​ຫຼວດ​ໄລ­ຍະ​ດັ່ງ­ກ່າວ ຈະ​ບໍ່​ເໝາະ​ສົມ​ໃນ​ການ​ສ້າງ​ຖານ​ຂໍ້​ມູນ​ຕົວ​ຈິງ​ດ້ານ​ພື້ນ​ທີ່​ການ​ຜະ­ລິດ​ກະ­ສິ­ກຳ ພ້ອມ​ນີ້ ຍັງ​ໄດ້​ພິ­ຈາ­ລະ­ນາ​ຮັບ­ຮອງ​ເອົາ​ແຜນ​ດຳ­ເນີນ​ງານ ເພື່ອ​ໃຫ້­ການ​ສຳ​ຫຼວດ​ຖືກ​ຈັດ​ຕັ້ງ​ປະ­ຕິ­ບັດ​ໄປ​ຕາມ​ແຜນ­ການ ແລະ ມີ​ຂໍ້​ມູນ​ດ້ານ​ເນື້ອ​ໃນ​ທີ່​ເລິກ­ເຊິ່ງ ໂດຍ​ສະ­ເພາະ​ການ​ສຳ​ຫຼວດ​ເນື້ອ­ທີ່ ແລະ ການ​ນຳ​ໃຊ້​ພາບ​ຖ່າຍ​ດາວ​ທຽມ​ເປັນ​ຕົວ​ກຳ­ນົດ​ໃນ​ແຜນ­ການ​ດຳ­ເນີນ​ງານ ເພື່ອ​ເປັນ​ຕົວ​ກຳ­ນົດ​ຂໍ້​ມູນ​ໃຫ້​ຈະ­ແຈ້ງ ແລະ ຖືກ­ຕ້ອງ​ຊັດ​ເຈນ​ຕາມ​ຄວາມ​ເປັນ​ຈິງ.

    ທ່ານ ສົມ​ດີ ດວງ​ດີ ໄດ້​ເນັ້ນ​ຕໍ່​ກັບ​ສະ­ພາບ​ການ​ຂອງ​ປະ­ເທດ​ເຮົາ​ປັດ­ຈຸ­ບັນ ທີ່​ໄດ້​ຮັບ​ຜົນ​ກະ­ທົບ​ທາງ​ໄພ​ທຳ​ມະ​ຊາດ​ຢ່າງ​ໜັກ­ໜ່ວງ ເຊິ່ງ​ພັກ ແລະ ລັດ­ຖະ­ບານ ໄດ້​ສຸມ​ໃສ່​ຟື້ນ​ຟູ​ເສດ­ຖະ­ກິດ-ສັງ­ຄົມ​ໃຫ້​ມີ​ການ​ຂະ­ຫຍາຍ­ຕົວ​ສູ່​ສະ­ພາບ​ປົກ­ກະ­ຕິ ນອກ​ນີ້​ຍັງ​ໄດ້​ຊີ້​ນຳ​ຄະ­ນະ​ສຳ​ຫຼວດ​ລະ­ດັບ​ຊາດ ເອົາ­ໃຈ­ໃສ່​ສຳ​ຫຼວດ​ຮັບ­ປະ­ກັນ​ໃຫ້​ແຜນ​ງານ​ດັ່ງ­ກ່າວ ດຳ­ເນີນ​ໄປ​ຕາມ​ແຜນ­ການ​ຢ່າງ​ມີ​ຜົນ­ສຳ­ເລັດ ແລະ ຕອບ​ສະ­ໜອງ​ໃຫ້​ໄດ້​ຕໍ່​ຄຳ​ຖາມ​ຂອງ​ລັດ­ຖະ­ບານ ກ່ຽວ​ກັບ​ການ​ປະ­ກອບ­ສ່ວນ​ຂອງ​ຂະ­ແໜງ​ກະ­ສິ­ກຳ ດ້ານ​ການ​ຄ້ຳ­ປະ­ກັນ​ສະ­ບຽງ​ອາ­ຫານ ການ​ຟື້ນ​ຟູ​ຈາກ​ສະ­ພາບ​ໄພ­ພິ­ບັດ ໂດຍ​ສະ­ເພາະ​ການ​ຕອບ​ສະ­ໜອງ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ກໍ່​ຄື​ການ​ພັດ­ທະ­ນາ​ຊົນ­ນະ­ບົດ​ຄວາມ­ທຸກ​ຍາກ ແລະ ການ​ປະ​ເມີນ​ການ­ຈັດ­ຕັ້ງ​ປະ­ຕິ­ບັດ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ​ຂອງ​ພັກ ແລະ ລັດ­ຖະ­ບານ ໃຫ້​ມີ​ຜົນ­ສຳ­ເລັດ​ເປັນ​ກ້າວໆ.

ຂ່າວທີ່ກ່ຽວຂ້ອງ