ຂ່າວຫຼ້າສຸດ

ການປະຕິບັດນິຕິກຳ ລະບຽບການຕ່າງໆ ຍັງເປັນສິ່ງທ້າທາຍວຽກງານປົກຄອງ

163 08 ພ.ຈ. 2018 ຂ່າວໜ້າ​ໜຶ່ງ
ການປະຕິບັດນິຕິກຳ ລະບຽບການຕ່າງໆ ຍັງເປັນສິ່ງທ້າທາຍວຽກງານປົກຄອງ

    ການ­ຈັດ­ຕັ້ງ​ປະ­ຕິ­ບັດ​ນິ­ຕິ​ກຳ ແລະ ລະ­ບຽບ​ການ​ຕ່າງໆ ຍັງ​ເປັນ​ສິ່ງ​ທ້າ​ທາຍ​ສຳ­ລັບ ສປປ ລາວ ໃນ​ການ​ປະ­ຕິ­ບັດ​ວຽກ​ງານ​ການ​ປົກ­ຄອງ ເນື່ອງ​ຈາກ​ຍັງ​ມີ​ຂໍ້​ຈຳ­ກັດ​ຫຼາຍ​ຢ່າງ ເປັນ­ຕົ້ນ ລະ­ດັບ​ຄວາມ​ຮູ້-ຄວາມ​ສາ­ມາດ​ຂອງ​ພະ­ນັກ­ງານ-ລັດ­ຖະ­ກອນ ແລະ ດ້ານ​ງົບ­ປະ­ມານ ໃນ​ການ­ຈັດ­ຕັ້ງ​ປະ­ຕິ­ບັດ​ແຜນ​ໂຄງ­ການ​ຕ່າງໆ​ຂອງ​ລັດ­ຖະ­ບານ​ທີ່​ກຳ­ນົດ​ໄວ້ ຈຶ່ງ​ເຮັດ​ໃຫ້­ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ໃນ​ກົງ­ຈັກ​ລັດ ແລະ ງົບ­ປະ­ມານ​ຊ່ວຍ­ເຫຼືອ​ຂອງ​ສາ­ກົນ ຍັງ​ມີ​ຄວາມ​ຕ້ອງ­ການ​ສຳ­ລັບ​ຂະ­ແໜງ​ປົກ­ຄອງ​ຂອງ​ລາວ.

    ເພື່ອ​ແນ­ໃສ່​ປຶກ­ສາ​ຫາ­ລື​ກັບ​ພາກ­ສ່ວນ​ກ່ຽວ­ຂ້ອງ​ພາກ​ລັດ ແລະ ອົງ​ການ­ຈັດ­ຕັ້ງ​ສາ­ກົນ ກະ­ຊວງ​ພາຍ​ໃນ ຈຶ່ງ​ໄດ້​ຈັດ​ກອງ​ປະ­ຊຸມ​ໜ່ວຍ​ງານ​ດ້ານ​ການ​ປົກ­ຄອງ​ປະ­ຈຳ​ປີ 2018 ຈັດ​ຂຶ້ນ​ວັນ​ທີ 7 ພະ­ຈິກ 2018 ຢູ່​ຫໍ​ປະ­ຊຸມ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ ຄຳ​ໝັ້ນ ສູນ​ວິ​ເລີດ ລັດ­ຖະ­ມົນ­ຕີ​ກະ­ຊວງ​ພາຍ​ໃນ ມີ​ທ່ານ ໄຊ​ສີ ສັນ­ຕິ​ວົງ ລັດ­ຖະ­ມົນ­ຕີ​ກະ­ຊວງ​ຍຸ­ຕິ​ທຳ ພ້ອມ​ດ້ວຍ​ຜູ້­ຕາງ­ໜ້າ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ ທ່ານ​ເອກ​ອັກ​ຄະ​ລັດ​ຖະ​ທູດ​ປະ­ເທດ​ສະ​ວິດ ປະ­ຈຳ​ລາວ ແລະ ພາກ­ສ່ວນ​ກ່ຽວ­ຂ້ອງ​ທັງ​ສູນ​ກາງ-ທ້ອງ­ຖິ່ນ​ເຂົ້າ​ຮ່ວມ.

    ທ່ານ ຄຳ​ໝັ້ນ ສູນ​ວິ​ເລີດ ກ່າວ​ວ່າ: ກອງ​ປະ­ຊຸມ​ນີ້ ນອກ­ຈາກ​ເປັນ​ກອງ​ປະ­ຊຸມ​ປະ­ຈຳ​ປີ ທີ່​ຜູ້​ເຂົ້າ​ຮ່ວມ​ຈະ​ໄດ້​ຮັບ​ຟັງ​ລາຍ​ງານ​ກ່ຽວ​ກັບ ການ​ທົບ​ທວນ​ກາງ​ສະ­ໄໝ​ຂອງ​ການ­ຈັດ­ຕັ້ງ​ປະ­ຕິ­ບັດ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ທີ່​ຕິດ​ພັນ​ກັບ​ວຽກ​ງານ​ການ​ປົກ­ຄອງ​ແລ້ວ ສຳ­ລັບ​ປີ 2018 ໜ່ວຍ​ງານ​ດ້ານ​ການ​ປົກ­ຄອງ ກໍ່​ຄື 2 ໜ່ວຍ​ງານ​ຍ່ອຍ (ໜ່ວຍ​ງານ​ຍ່ອຍ​ການ​ປັບ­ປຸງ​ບໍ­ລິ­ຫານ​ລັດ ແລະ ໜ່ວຍ​ງານ​ຍ່ອຍ​ດ້ານ​ນິ­ຕິ​ກຳ) ຍັງ​ຈະ​ໄດ້​ພ້ອມ​ກັນ​ປຶກ­ສາ​ຫາ­ລື​ແລກ­ປ່ຽນ​ຂໍ້​ມູນ​ຂ່າວ­ສານ ໂດຍ​ສະ­ເພາະ​ເນື້ອ​ໃນ​ຈິດ­ໃຈ​ຂອງ​ບົດ​ລາຍ​ງານ​ແບບ​ສະ­ໝັກ​ໃຈ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ເປົ້າ​ໝາຍ​ພັດ­ທະ­ນາ​ແບບ​ຍືນ​ຍົງ ເປັນ­ຕົ້ນ ການ​ຊ່ວຍ​ກັນ​ຄົ້ນ­ຄວ້າ​ກ່ຽວ​ກັບ​ການ​ກຳ­ນົດ​ຕົວ​ຊີ້​ວັດ​ຂອງ​ເປົ້າ​ໝາຍ 16 ທີ່​ຕິດ​ພັນ​ກັບ​ການ​ສ້າງ​ຄວາມ​ເຂັ້ມ­ແຂງ​ໃຫ້​ອົງ​ການ­ຈັດ­ຕັ້ງ ແລະ ສະ​ຖາ​ບັນ​ຂອງ​ລັດ ຄວາມ​ຍຸ­ຕິ​ທຳ​ໃນ​ສັງ­ຄົມ ເພື່ອ​ຫັນ​ຕົວ​ຊີ້​ວັດ​ຂອງ​ສາ­ກົນ​ທີ່​ກຳ­ນົດ​ຢູ່​ໃນ​ເປົ້າ​ໝາຍ​ທີ 16 ມາ​ເປັນ​ຕົວ​ຊີ້​ວັດ​ທີ່​ສອດ­ຄ່ອງ ແລະ ແທດ­ເໝາະ​ກັບ​ເງື່ອນ­ໄຂ​ການ​ພັດ­ທະ­ນາ​ຢູ່ ສປປ ລາວ ໃຫ້​ຫຼາຍ​ທີ່​ສຸດ.

ຂ່າວທີ່ກ່ຽວຂ້ອງ