ຂ່າວຫຼ້າສຸດ

ທູດຍີ່ປຸ່ນ ຢ້ຽມຢາມລັດວິສາຫະກິດ ນ້ຳປະປານະຄອນຫຼວງ

131 08 ພ.ຈ. 2018 ຂ່າວໜ້າ​ໜຶ່ງ
ທູດຍີ່ປຸ່ນ ຢ້ຽມຢາມລັດວິສາຫະກິດ ນ້ຳປະປານະຄອນຫຼວງ

    ເພື່ອ​ຕິດ­ຕາມ​ບັນ­ດາ​ໂຄງ­ການ​ຮ່ວມ​ມື​ວຽກ​ງານ​ນ້ຳ​ປະ­ປາ ທີ່​ນະ­ຄອນ­ຫຼວງ​ວຽງ​ຈັນ ໃນ​ວັນ​ທີ 2 ພະ­ຈິກ 2018 ຜ່ານ​ມາ ທ່ານ ຄຳ​ເຜີຍ ວົງ­ສາ​ຄຳ​ຜຸຍ ຜູ້­ອຳ­ນວຍ­ການ​ຂອງ​ລັດ​ວິ​ສາ​ຫະ​ກິດ ນ້ຳ​ປະ­ປາ​ນະ­ຄອນ­ຫຼວງ ໄດ້​ໃຫ້​ກຽດ​ຕ້ອນ­ຮັບທ່ານ ທາ​ເຄ​ຊິ ຮິ​ຄິ​ຮາ​ຣະ ເອກ​ອັກ​ຄະ​ຣາ​ຊະ​ທູດ​ວິ­ສາ­ມັນ​ຜູ້​ມີ​ອຳ­ນາດ​ເຕັມ​ແຫ່ງ ສປປ ລາວ ທີ່​ໂຮງ­ງານ​ຜະ­ລິດ​ນ້ຳ​ປະ­ປາ​ຈີ່­ນາຍ​ໂມ້ ແລະ ໂຮງ­ງານ​ຜະ­ລິດ​ນ້ຳ​ປະ­ປາ​ດົງ​ໝາກ­ຄາຍ ເພື່ອ​ນຳ​ສະ­ເໜີ​ກ່ຽວ​ກັບ​ສະ­ຖາ­ນະ​ການ​ນ້ຳ​ໃນ​ປັດ­ຈຸ­ບັນ ໃນ​ນະ­ຄອນ­ຫຼວງ​ວຽງ​ຈັນ ແລະ ລາຍ​ງານ​ສະ­ພາບ​ການ​ໂດຍ​ຫຍໍ້​ຂອງ​ລັດ​ວິ​ສາ​ຫະ​ກິດ ນ້ຳ​ປະ­ປາ​ນະ­ຄອນ­ຫຼວງ ໃຫ້​ທ່ານ​ທູດ​ໄດ້​ຮັບ​ຊາບ.

    ລັດ​ວິ​ສາ​ຫະ​ກິດ ນ້ຳ​ປະ­ປາ​ນະ­ຄອນ­ຫຼວງ ມີ​ປະ­ຫວັດ­ສາດ​ອັນ​ຍາວ​ນານ ​ໃນ​ການ​ຮ່ວມ​ມື​ກັບ​ລັດ­ຖະ­ບານ​ຍີ່­ປຸ່ນ​ໃນ​ໄລ­ຍະ 50 ປີ­ຜ່ານ­ມາ ໄດ້​ຮັບ​ທຶນ​ຊ່ວຍ­ເຫຼືອ​ລ້າ (ໂຮງ­ງານ​ຜະ­ລິດ​ນ້ຳ​ປະ­ປາ​ຈີ່­ນາຍ​ໂມ້ ແລະ ໂຮງ­ງານ​ຜະ­ລິດ​ນ້ຳ​ປະ­ປາ​ເກົ້າ​ລ້ຽວ) ເງິນ​ກູ້​ຢືມ​ດອກ​ເບ້ຍ​ຕ່ຳ (ການ​ຂະ­ຫຍາຍ​ໂຮງ­ງານ​ຜະ­ລິດ​ນ້ຳ​ປະ­ປາ​ຈີ່­ນາຍ​ໂມ້) ການ​ຮ່ວມ​ມື​ດ້ານ​ວິ­ຊາ​ການ (ໂຄງ­ການ​ປັບ­ປຸງ​ການ​ຄຸ້ມ​ຄອງ​ຄວາມ​ສາ­ມາດ​ຂອງ​ຂະ­ແໜງ­ການ​ນ້ຳ​ປະ­ປາ (Ma WaSU 2) ແລະ ອື່ນໆ) ໂຄງ­ການ​ຄູ່​ຮ່ວມ​ງານ​ຍີ່­ປຸ່ນ (2 ໂຄງ­ການ​ທີ່​ກຳ­ລັງ​ດຳ­ເນີນ​ຢູ່) ແລະ ນັກ​ອາ­ສາ​ສະ­ໝັກ​ຜ່ານ​ອົງ­ການ​ຮ່ວມ​ມື​ຍີ່­ປຸ່ນ (JICA).

    ທ່ານ​ທູດ​ຍີ່­ປຸ່ນ ກ່າວ​ວ່າ: ນ້ຳ​ແມ່ນ​ໜຶ່ງ​ໃນ​ບັນ­ດາ​ໂຄງ​ລ່າງ​ທີ່​ສຳ­ຄັນ​ທີ່​ສຸດ​ ສຳ­ລັບ​ຊີ­ວິດ​ຂອງ​ປະ­ຊາ­ຊົນ ແລະ ຊົມ­ເຊີຍ​ຕໍ່​ລັດ​ວິ​ສາ​ຫະ​ກິດ ນ້ຳ​ປະ­ປາ​ນະ­ຄອນ­ຫຼວງ ສຳ­ລັບ​ການ​ຜະ­ລິດ​ນ້ຳ​ປະ­ປາ ແລະ ການ​ບຳ­ລຸງ​ຮັກ­ສາ​ໂຮງ­ງານ​ຜະ­ລິດ​ນ້ຳ​ປະ­ປາ​ຈີ່­ນາຍ​ໂມ້​ທີ່​ດີ ຊຶ່ງ​ລັດ­ຖະ­ບານ​ຍີ່­ປຸ່ນ​ຈະ​ເຮັດ​ວຽກ​ຮ່ວມ​ກັບ JICA ກັບ​ໂຄງ­ການ​ຂະ­ຫຍາຍ​ໂຮງ­ງານ​ຜະ­ລິດ​ນ້ຳ​ປະ­ປາ​ຈີ່­ນາຍ​ໂມ້ ທີ່​ກຳ­ລັງ​ຈະ​ເລີ້ມ​ຈັດ​ຕັ້ງ​ປະ­ຕິ­ບັດ ແລະ ໂຄງ­ການ​ຮ່ວມ​ມື​ດ້ານ​ວິ­ຊາ​ການ Ma WaSU 2.

    ທ່ານ ຄຳ​ເຜີຍ ວົງ­ສາ​ຄຳ​ຜຸຍ ຕາງ­ໜ້າ​ລັດ​ວິ​ສາ​ຫະ​ກິດ ນ້ຳ​ປະ­ປາ​ນະ­ຄອນ­ຫຼວງ ຂໍ​ຂອບ­ໃຈ​ສຳ­ລັບ​ການ​ລົງ​ມາ​ຢ້ຽມ­ຢາມ​ຄັ້ງ​ນີ້​ຂອງ​ທ່ານເອກ​ອັກ​ຄະ​ຣາ​ຊະ​ທູດຍີ່­ປຸ່ນ ແລະ ການ​ສະ­ໜັບ­ສະ­ໜູນຂອງ​ຍີ່­ປຸ່ນ​ເປັນ​ເວ­ລາ​ຍາວ​ນານ ​ໃນ​ຂະ­ແໜງ​ນ້ຳ​ປະ­ປາ​ໃນ​ປະ­ເທດ​ລາວ ກໍ່​ຄື​ລັດ​ວິ​ສາ​ຫະ​ກິດ​ນ້ຳ​ປະ­ປາ​ນະ­ຄອນ­ຫຼວງ​ໃນ​ຫຼາຍໆ​ດ້ານ ລວມ​ເຖິງ​ຜົນ​ປະ­ໂຫຍດ​ຂອງ​ການ​ຖ່າຍ​ທອດ​ວຽກ​ງານ​ດ້ານ​ວິ­ຊາ​ການ ໂດຍ​ຜູ້​ຊ່ຽວ­ຊານ​ຍີ່­ປຸ່ນ ແລະ ປະ­ສົບ​ການ​ການ​ເຝີກ​ອົບ­ຮົມ​ໃນ​ປະ­ເທດ​ຍີ່­ປຸ່ນ ພ້ອມ​ນີ້ ຍັງ​ສະ­ເໜີ​ໃຫ້​ລັດ­ຖະ­ບານ​ຍີ່­ປຸ່ນ​ສືບ­ຕໍ່​ສະ­ໜັບ­ສະ­ໜູນ ລັດ​ວິ​ສາ​ຫະ​ກິດ​ນ້ຳ​ປະ­ປາ​ນະ­ຄອນ­ຫຼວງ ຕື່ມ​ອີກ.

ຂ່າວທີ່ກ່ຽວຂ້ອງ