ຂ່າວຫຼ້າສຸດ

ຢູ-19 ສາວລາວ ຕົກຮອບຄັດເລືອກບານເຕະຊີງແຊັມອາຊີ 2019

202 31 ຕ.ລ. 2018 ວົງຈອນກີລາ
ຢູ-19 ສາວລາວ ຕົກຮອບຄັດເລືອກບານເຕະຊີງແຊັມອາຊີ 2019

    ທັບ​ນັກ­ກີ­ລາ​ເຕະ­ບານ​ຍິງ​ທີມ​ຊາດ​ລາວ ຮຸ່ນ​ອາ­ຍຸ​ບໍ່​ເກີນ 19 ປີ ລົງ​ສະ­ໜາມ​ນັດ​ສຸດ​ທ້າຍ (ນັດ​ທຳ​ອິດ​ເສຍ​ໃຫ້​ທີມ​ຊາດ​ອີ​ຣານ 1-4) ສາ­ມາດ​ເອົາ​ຊະ­ນະ ທີມ​ຊາດ​ມຽນ​ມາ ເຈົ້າ­ພາບ ໄປ​ໄດ້​ແບບ​ຫວຸດ​ຫວິດ 4-3 ປະ­ຕູ ແຕ່​ກໍ່​ບໍ່​ພຽງ­ພໍ​ທີ່​ຈະ​ຜ່ານ​ສູ່​ຮອບ​ຕໍ່​ໄປ ສົ່ງ​ຜົນ​ໃຫ້​ຕົກ​ຮອບ​ໄປ​ຕາມ​ລະ­ບຽບ ໃນ​ການ​ແຂ່ງ­ຂັນ​ເຕະ­ບານ​ຍິງ ຮຸ່ນ​ອາ­ຍຸ​ບໍ່​ເກີນ 19 ປີ ຊີງ​ແຊັມ​ອາ­ຊີ 2019 ຮອບ​ຄັດ​ເລືອກ ຮອບ​ທີ 1 ກຸ່ມ F ຫຼື “AFC U-19 Championship Thailand 2019 Qualifiers” ທີ່​ປະ­ເທດ​ມຽນ​ມາ​ເປັນ​ເຈົ້າ­ພາບ ໃນ​ວັນ​ທີ 26 ຕຸ­ລາ 2018 ຜ່ານ​ມາ ທີ່​ສະ­ໜາມ Thuwunna Stadium ນະ­ຄອນ​ຢາງ​ກຸ້ງ.

    ເກມ​ໃນ​ນັດ​ນີ້ ປະ­ຕູ​ຂອງ​ທີມ​ຊາດ​ລາວ ແມ່ນ​ໄດ້​ມາ​ຈາກ ອາ​ພັດ­ສະ­ລາ ຈັນ­ທະ​ວົງ​ໄຊ 2 ປະ­ຕູ ໃນ​ນາ­ທີ 29 ແລະ 84 ແລະ ເປ້ 2 ປະ­ຕູ ໃນ​ນາ­ທີ 57 ແລະ 81 ສ່ວນ​ປະ­ຕູ​ຂອງ​ທີມ​ມຽນ​ມາ ແມ່ນ​ໄດ້​ມາ​ຈາກ ສັງ ທໍ​ທໍ ເໝົາ​ຍິງ​ຄົນ​ດຽວ 3 ປະ­ຕູ ໃນ​ນາ­ທີ 9 77 ແລະ 90 ຈາກ​ຜົນ​ການ​ແຂ່ງ­ຂັນ​ດັ່ງ­ກ່າວ ສົ່ງ​ຜົນ​ໃຫ້​ໃນ​ກຸ່ມ F ທັງ 3 ທີມ​ມີ 3 ຄະ­ແນນ​ເທົ່າ​ກັນ ຈາກ​ການ​ລົງ​ສະ­ໜາມ 2 ນັດ ແຕ່​ປະ­ຕູ​ໄດ້​ເສຍ​ຂອງ​ທີມ​ຊາດ​ລາວ​ເປັນ​ຮອງ​ທັງ ອີ​ຣານ ແລະ ມຽນ​ມາ ເລີຍ​ຕົກ​ຮອບ​ໄປ​ຕາມ​ລະ­ບຽບ.

    ສະ­ຫຼຸບ​ຜົນ​ການ​ແຂ່ງ­ຂັນ ກຸ່ມ F ອັນ​ດັບ​ທີ 1 ທີມ​ຊາດ​ອີ​ຣານ ແຂ່ງ­ຂັນ 2 ນັດ ຊະ­ນະ 1 ນັດ ເສຍ 1 ນັດ ຍິງ​ໄດ້ 4 ປະ­ຕູ ແລະ ເສຍ 2 ປະ­ຕູ ມີ 3 ຄະ­ແນນ ອັນ​ດັບ​ທີ 2 ທີມ​ຊາດ​ມຽນ​ມາ ເຈົ້າ­ພາບ ແຂ່ງ­ຂັນ 2 ນັດ ຊະ­ນະ 1 ນັດ ເສຍ 1 ນັດ ຍິງ​ໄດ້ 4 ປະ­ຕູ ແລະ ເສຍ 4 ປະ­ຕູ ມີ 3 ຄະ­ແນນ ແລະ ອັນ​ດັບ​ທີ 3 ທີມ​ຊາດ​ລາວ ແຂ່ງ­ຂັນ 2 ນັດ ຊະ­ນະ 1 ນັດ ເສຍ 1 ນັດ ຍິງ​ໄດ້ 5 ປະ­ຕູ ແລະ ເສຍ 7 ປະ­ຕູ ມີ 3 ຄະ­ແນນ.

    ສຳ­ລັບ​ທີມ​ທີ່​ຜ່ານ​ເຂົ້າ​ສູ່​ຮອບ​ທີ 2 ຫຼື ຮອບ 8 ທີມ​ສຸດ​ທ້າຍ ປະ­ກອບ​ມີ: ອົດ​ສະ​ຕຣາ​ລີ ເນ​ປານ ອຸ​ຊະ​ເບ​ກິດ​ສະ­ຖານ ສ ເກົາ­ຫຼີ ຫວຽດ­ນາມ ອີ​ຣານ ແລະ ທີມ​ອັນ​ດັບ 2 ທີ່​ດີ​ທີ່​ສຸດ 2 ທີມ ເລ​ບາ​ນອນ ແລະ ມຽນ​ມາ ໂດຍ​ໃນ​ຮອບ​ຕໍ່​ໄປ​ນັ້ນ ແມ່ນ​ຈະ​ແບ່ງ​ອອກ​ເປັນ 2 ກຸ່ມ ກຸ່ມ​ລະ 4 ທີມ ເພື່ອ​ຫາ​ທີມ​ທີ່​ມີ​ຄະ­ແນນ​ທີ່​ດີ​ທີ່​ສຸດ ເຂົ້າ​ສູ່​ຮອບ​ຮອງ​ຊະ­ນະ​ເລີດ ແລ້ວ​ຄັດ​ຕໍ່​ຈົນ​ຮອດ​ຮອບ​ຊີງ​ຊະ­ນະ​ເລີດ.

ຂ່າວທີ່ກ່ຽວຂ້ອງ