ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 30-10-2018

133 30 ຕ.ລ. 2018 ຫົວຂໍ້ຂ່າວອື່ນໆ

      ມື້ນີ້​ຂໍ​ເລີ່ມ​ຈາກ​ຂ່າວ​ກ່ຽວ​ກັບ​ຮ່າງ​ລັດ​ຖະ​ທຳ​ມະນູນ​ສະບັບ​ໃໝ່​ຂອງ​ກູ​ບາ ເລື່ອງ​ສິງກະໂປ​ໂອນ​ເງິນ​ທີ່​ຢຶດ​ໄດ້ ຄືນ​ໃຫ້​ມາ​ເລ​ເຊຍ ແລະ ເຫດຜົນ​ທີ່​ທາງ​ການ​ຮ່າ​ໂນ້ຍ ຫ້າມ​ປະຊາຊົນ​ກິນ​ຊີ້ນ​ໝາ.

     ທີ່​ກູ​ບາ: ຫຼາຍ​ທ່ານ​ຄົງ​ຊາບ​ເລື່ອງ​ທີ່​ໂດ່ງ​ດັງ​ໄປ​ທົ່ວ​ໂລກ​ກ່ຽວ​ກັບ​ຮ່າງ​ລັດ​ຖະ​ທຳ​ມະນູນ​ສະບັບ​ໃໝ່​ຂອງ​ກູ​ບາ ເຊິ່ງ​ພວມ​ຢູ່​ໃນ​ໄລຍະ​ທາບ​ທາມ​ຄຳ​ຄິດ​ເຫັນ​ຢ່າງ​ກວ້າງຂວາງ ຈາກ​ທົ່ວ​ສັງຄົມ ກ່ອນ​ຈະ​ມີ​ການ​ລົງ​ປະຊາ​ມະຕິ​ຮັບຮອງ​ເອົາ ໃນ​ວັນ​ທີ 24 ກຸມພາ ປີ 2019 ຮ່າງ​ລັດ​ຖະ​ທຳ​ມະນູນ​ສະບັບ​ນີ້​ໄດ້​ກຳນົດ​ຫຼາຍ​ເນື້ອ​ໃນ​ທີ່​ມີ​ລັກສະນະ​ບາດ​ລ້ຽວ​ໃໝ່ ໃນ​ນັ້ນ ລວມ​ທັງ​ນະໂຍບາຍ​ໃຫ້​ຜູ້​ປະກອບ​ທຸລະ​ກິດ ແລະ ນັກ​ລົງທຶນ ເອກະ​ຊົນ​ເຂົ້າ​ມາ​ມີ​ບົດບາດ​ໃນ​ລະບົບ​ເສດຖະກິດ​ແຫ່ງ​ຊາດ ມາ​ພ້ອມໆ​ກັບ​ຂ່າວ​ນີ້ ກໍ່​ມີ​ເລື່ອງ​ທາງ​ການ ກູ​ບາ​ປະກາດ​ໃຫ້​ໂອກາດ​ບໍລິສັດ​ຕ່າງປະເທດ​ເຂົ້າ​ໄປ​ດຳເນີນ​ໂຄງການ​ລົດໄຟ ເຊິ່ງ​ເປັນ​ສ່ວນ​ໜຶ່ງ​ຂອງ​ມາດ​ຕະການ ປະຕິ​ຮູບ​ເສດຖະກິດ​ຂອງ​ປະເທດ ອີງ​ຕາມ​ການ​ເປີດເຜີຍ​ຂອງ​ເຈົ້າ​ໜ້າທີ່​ກະຊວງ​ຂົນສົ່ງ​ກູ​ບາ​ຕໍ່​ໜັງສືພິມ ແກຼນ​ມາກ (Granma) ຫວ່າງ​ບໍ່​ດົນ​ມາ​ນີ້ ພວກ​ເຮົາ​ຮູ້​ວ່າ​ທາງ​ການ​ກູ​ບາ ກຽມພ້ອມ​ອະນຸຍາດ​ໃຫ້​ຜູ້​ປະກອບ​ການ ນັບ​ແຕ່​ໜຶ່ງ​ລາຍ​ຂຶ້ນ​ໄປ​ເຂົ້າ​ດຳເນີນ​ໂຄງການ​ລົດໄຟ ທັງ​ໝົດ ຫຼື ພຽງ​ບາງ​ສ່ວນ ທັງ​ຈະ​ອະນຸຍາດ​ໃຫ້​ບໍລິສັດ​ຕ່າງ ປະເທດ​ເຂົ້າ​ຮ່ວມ​ການ​ປະມູນ​ໂຄງການ​ດັ່ງກ່າວ​ອີກ​ດ້ວຍ ແຜນການ​ອະນຸຍາດ​ດັ່ງກ່າວ ມີ​ມາ​ໄດ້ 1 ປີ​ແລ້ວ ແຕ່​ໄດ້​ເປີດເຜີຍ​ຢ່າງ​ເປັນ​ທາງ​ການ​ໃນ​ວັນ​ທີ 21 ເດືອນ​ສິງຫາ​ປີ​ນີ້​ເອງ ໃນ​ປັດຈຸບັນ​ລະບົບ​ລົດໄຟ​ກູ​ບາ ແມ່ນ​ກົມ​ລົດໄຟ​ຮັບຜິດຊອບ​ຄຸ້ມ​ຄອງ.

   ທີ່​ສິງກະໂປ: ມີ​ຂ່າວ​ຈາກ​ສິງກະໂປ​ທີ່​ບອກ​ວ່າ ບໍລິສັດ​ກົດໝາຍ ຕັນ​ລາຊາ ແລະ ເຈຍ (Tan Ruja & Cheah) ໄດ້​ແຈ້ງ​ກ່ຽວ​ກັບ​ເງິນ​ຈຳນວນ 11,1 ລ້ານ​ໂດ​ລາ​ສະຫະລັດ ທີ່​ທາງ​ການ​ສິງກະໂປ​ຢຶດ​ໄດ້ ວ່າ​ເປັນ​ເງິນ​ຜິດ​ກົດໝາຍ​ທີ່​ມາ​ຈາກ​ຄະດີ​ສໍ້​ໂກງ ກອງ​ທຶນ 1 MDB ຂອງ​ມາ​ເລ​ເຊຍ 1 MDB ແມ່ນ​ກອງ​ທຶນ​ການ​ລົງທຶນ​ທີ່​ທ່ານ ນາ​ຈິບ​ຣາ​ຊັກ ອະດີດ​ນາຍົກລັດຖະມົນຕີ ມາ​ເລ​ເຊຍ ສ້າງຕັ້ງ​ຂຶ້ນ ໃນ​ປີ 2009 ເພື່ອ​ພັດທະນາ ເສດຖະກິດ-ສັງຄົມ ແຕ່​ໃນ​ປັດຈຸບັນ​ກອງ​ທຶນ​ດັ່ງກ່າວ​ໄດ້​ກາຍເປັນ​ຕົ້ນ​ເຫດ​ແຫ່ງ​ຄວາມ​ຫຍຸ້ງ     ເຫຍີງ ເພາະ​ຢູ່​ບໍ່​ຢູ່​ກໍ່​ມີ​ເງິນ​ຫາຍ​ໄປ​ຈາກ​ກອງ​ທຶນ​ດັ່ງກ່າວ ຈຳນວນ 3,7 ຕື້​ໂດ​ລາ​ສະຫະລັດ ລັດຖະບານ​ຊຸດ ໃໝ່​ຂອງ​ມາ​ເລ​ເຊຍ​ຖື​ວ່າ​ເປັນ​ເງິນ​ສໍ້​ລາດ​ບັງ​ຫຼວງ ຜ່ານ​ຂະ​ບວນ​ການ​ຟອກ​ເງິນ ດັ່ງນັ້ນ ທາງ​ການ​ມາ​ເລ​ເຊຍ​ຈິ່ງ​ຂຸ້ນຂ້ຽວ ສືບສວນ ສອບ​ສວນ ຊອກ​ຫາ​ຈຳນວນ​ເງິນ​ທີ່​ຫາຍ​ໄປ​ຢູ່​ປະເທດ​ຕ່າງໆ ເຊັ່ນ: ​ສປ ຈີນ ສະ​ວິດ ສິງກະໂປ ແລະ ສະຫະລັດ​ອາ​ເມ​ຣິ​ກາ ເປັນຕົ້ນ​ຕໍ ຂ່າວ​ບອກ​ວ່າ​ສານ​ຂອງ​ສິງກະໂປ ໄດ້​ອອກ​ຄຳ​ສັ່ງ​ໃຫ້​ໂອນ​ເງິນ​ຈຳນວນ​ກວ່າ 11 ລ້ານ​ໂດ​ລາ​ສະຫະລັດ​ນີ້​ຄືນ​ໃຫ້​ທາງ​ການ ມາ​ເລ​ເຊຍ ເປັນ​ທີ່​ຮຽບ​ຮ້ອຍ​ແລ້ວ.

      ທີ່​ຫວຽດນາມ: ໃນ​ຕົ້ນ​ເດືອນ​ກັນຍາ​ປີ​ນີ້ ທາງ​ການ​ນະຄອນຫຼວງ​ຮ່າ​ໂນ້ຍ ໄດ້​ອອກ​ມາ​ຮຽກຮ້ອງ​ໃຫ້​ປະຊາຊົນ​ຢຸດ​ກິນ​ຊີ້ນ​ໝາ ໂດຍ​ອ້າງ​ສອງ​ເຫດຜົນ​ຕົ້ນຕໍ ຄື: ເພື່ອ​ຮັກສາ​ພາບ​ພົດ​ອັນ​ດີງາມ​ຂອງ ຮ່າ​ໂນ້ຍ ທີ່​ເປັນ​ໜຶ່ງ​ໃນ​ບັນດາ​ນະຄອນ ທີ່​ນຳ​ສະໄໝ​ສີວິໄລ ແລະ ມີ​ອາ​ລິ​ຍະ​ທຳ​ຂອງ​ໂລກ ສ່ວນ​ເຫດຜົນ​ອັນ​ທີ​ສອງ​ແມ່ນ​ເພື່ອ​ປ້ອງ​ກັນ​ພະຍາດ​ວໍ້ ເພາະວ່າ​ທາງ​ການ​ຫວຽດນາມ​ມີ​ເປົ້າ​ໝາຍ​ກຳຈັດ​ພະຍາດ​ວໍ້​ໃຫ້​ໝົດ​ໄປ​ຈາກ​ປະ ເທດ ພາຍ​ໃນ​ອີກ 3 ປີ​ຕໍ່ໜ້າ (ປີ 2021) ຮ່າ​ໂນ້ຍ ມີ​ໝາ ແລະ ແມວ ປະມານ 493.000 ໂຕ ໃນ​ນັ້ນ ຫຼາຍ​ກວ່າ 10% ແມ່ນ​ລ້ຽງ​ໄວ້​ເພື່ອ​ຈຸດປະສົງ​ບໍລິໂພກ​ຊີ້ນ ທາງ​ການ​ນະຄອນຫຼວງ​ຮ່າ​ໂນ້ຍ​ເຕືອນ​ວ່າ ການ​ລ້ຽງ ແລະ ຂ້າ​ໝາ​ເພື່ອ​ບໍລິໂພກ​ທີ່​ບໍ່​ຖືກຕ້ອງ​ຕາມ​ຫຼັກ​ອະນາໄມ​ນັ້ນ​ຈະ​ສາມາດ​ແຜ່​ເຊື້ອ​ວໍ້​ໄດ້.

ຂ່າວທີ່ກ່ຽວຂ້ອງ