ຂ່າວຫຼ້າສຸດ

ມສ ມິດຕະພາບລາວ-ຫວຽດນາມ ເປີດແຂ່ງຂັນກີລາ-ສິລະປະ ສົກຮຽນ 2018-2019

395 24 ຕ.ລ. 2018 ວົງຈອນກີລາ
ມສ ມິດຕະພາບລາວ-ຫວຽດນາມ ເປີດແຂ່ງຂັນກີລາ-ສິລະປະ ສົກຮຽນ 2018-2019

    ພິ­ທີ​ເປິດ​ຂະ​ບວນ​ການ​ແຂ່ງ­ຂັນ​ກີ­ລາ-ສິ­ລະ​ປະ ຄັ້ງ​ທີ IX ສົກ­ຮຽນ 2018-2019 ຂອງ​ໂຮງ­ຮຽນ ມສ ມິດ­ຕະ­ພາບ ລາວ-ຫວຽດ­ນາມ ຈັດ​ຂຶ້ນ​ວັນ​ທີ 23 ຕຸ­ລາ 2018 ຢູ່​ໂຮງ­ຮຽນ​ດັ່ງ­ກ່າວ ໂດຍ​ມີ​ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ ທ່ານ ດອນ ແກ້ວ​ມີ​ໄຊ ຜູ້­ອຳ­ນວຍ­ການ​ໂຮງ­ຮຽນ ມສ ມິດ­ຕະ­ພາບ ລາວ-ຫວຽດ­ນາມ ພ້ອມ​ດ້ວຍ​ຄູ-ອາ­ຈານ ສະ­ມາ­ຄົມ​ພໍ່​ແມ່​ນັກ­ຮຽນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ດອນ ແກ້ວ​ມີ​ໄຊ ກ່າວ​ວ່າ: ການ​ແຂ່ງ­ຂັນ​ກີ­ລາ-ສິ­ລະ​ປະ​ຄັ້ງ​ນີ້ ເພື່ອ​ເປັນ​ການ​ປະ­ກອບ­ສ່ວນ​ໃນ​ການ​ສົ່ງ­ເສີມ​ປີ​ທ່ອງ​ທ່ຽວ​ລາວ 2018 ສ້າງ​ຂະ​ບວນ​ການ​ຟົດ­ຟື້ນ​ເພື່ອ​ຄຳ­ນັບ​ຮັບ​ຕ້ອນ​ວັນ­ຊາດ ຄົບ­ຮອບ 43 ປີ ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 70 ປີ ວັນ​ສ້າງ­ຕັ້ງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ຄົບ­ຮອບ 64 ປີ ແລະ ຈັດ​ຕັ້ງ​ປະ­ຕິ­ບັດ​ເນື້ອ​ໃນ 3 ຂໍ້​ແຂ່ງ­ຂັນ ແລະ 5 ຫຼັກ​ມູນ​ການ​ສຶກ​ສາ​ແຫ່ງ​ຊາດ​ໃຫ້​ປາ­ກົດ​ຜົນ​ເປັນ​ຈິງ ສ້າງ​ໃຫ້​ນັກ­ກີ­ລາ​ມີ​ນ້ຳ­ໃຈ​ນັກ­ກີ­ລາ​ຢ່າງ​ແທ້​ຈິງ ມີ​ຄວາມ​ສາ­ມັກ­ຄີ​ຮັກ­ແພງ​ກັນ ແລະ ຫ່າງ​ໄກ​ຈາກ​ສິ່ງ​ເສບ​ຕິດ ແລະ ອະ­ບາຍ​ຍະ​ມຸກ ນອກ​ນີ້​ຍັງ​ເປັນ​ການ​ອະ­ນຸ​ຮັກ ແລະ ສົ່ງ­ເສີມ​ມູນ­ເຊື້ອ​ວັດ­ທະ­ນະ­ທຳ ສິ­ລະ​ປະ​ວັນ­ນະ­ຄະ­ດີ​ອັນ​ດີ­ງາມ​ຂອງ​ຊາດ ຊອກ​ຫາ​ນັກ­ຮຽນ​ຜູ້​ທີ່​ມີ​ຄວາມ​ສາ­ມາດ ມີ​ພອນ​ສະ­ຫວັນ​ດ້ານ​ການ​ປະ­ດິດ​ຄິດ​ແຕ່ງ ແລະ ການ­ສະ­ແດງ.

    ສຳ­ລັບ​ການ​ແຂ່ງ­ຂັນ​ມີ 9 ປະ­ເພດ​ກີ­ລາ​ຄື: ບານ­ເຕະ ບານ­ສົ່ງ ກະ­ຕໍ້ ປິ່ງ​ປ່ອງ ດອກ​ປີກ​ໄກ່ ໝາກ­ເສິກ ແລ່ນ-ລານ ດຶງ­ເຊືອກ ສ່ວນ​ສິ­ລະ​ປະ​ມີ​ຟ້ອນ ຮ້ອງ­ເພງ ແລະ ຂັບ​ລຳ ເຊິ່ງ​ຈະ​ດຳ­ເນີນ​ການ​ແຂ່ງ­ຂັນ​ຮອດ​ທ້າຍ​ເດືອນ​ກຸມ­ພາ 2019.

ຂ່າວທີ່ກ່ຽວຂ້ອງ