ຂ່າວຫຼ້າສຸດ

ວຽງຈັນສະອາດ

316 24 ຕ.ລ. 2018 ນານາສາລະ

    ຜ່ານ​ມາ​ພວກ​ເຮົາ​ໄດ້​ຮັບ​ຮູ້​ເຖິງ​ນະ­ໂຍ­ບາຍ​ຂອງ​ອົງ­ການ​ປົກ­ຄອງ ນະ­ຄອນ­ຫຼວງ​ວຽງ​ຈັນ ທີ່​ມຸ່ງ​ເນັ້ນ​ສ້າງ​ນະ­ຄອນ­ຫຼວງ​ໃຫ້​ເປັນ​ເມືອງ​ທີ່​ມີ​ຄວາມ​ສະ­ອາດ ສະ­ຫງົບ ແລະ ສີ­ຂຽວ ຜູ້​ຂຽນ​ຜ່ານ​ທາງ​ຫຼຽວ​ເຫັນ​ເຈົ້າ​ໜ້າ­ທີ່ ແລະ ພະ­ນັກ­ງານ​ຈັດ​ສັນ​ລະ­ບຽບ​ປ້າຍ ກຳ­ລັງ​ລົງ­ມື​ປະ­ຕິ­ບັດ​ໜ້າ­ທີ່​ໃຫ້​ຂອບ​ເຂດ​ທາງ​ຍ່າງ ສ່ວນ​ບຸກ­ຄົນ​ໄດ້​ທຽວ​ທາງ​ໄປ​ວຽກ​ໄດ້​ສະ­ດວກ ນີ້​ຄື​ສັນ­ຍານ​ເອົາ​ຈິງ​ກັບ​ນະ­ໂຍ­ບາຍ​ສະ­ອາດ ພ້ອມ​ນີ້ ຜູ້​ຂຽນ​ຍັງ​ຄິດ​ຜູ້​ດຽວ​ທີ່​ໄດ້​ສັງ­ເກດ​ເຫັນ​ຕາມ​ຖະ­ໜົນ​ຫົນ­ທາງ​ທີ່​ຍັງ​ຂາດ​ຕົ້ນ­ໄມ້​ໃຫ້​ຮົ່ມ​ເງົາ ໃຫ້​ຄວາມ​ຊຸ່ມ​ຊື່ນ​ເຢັນ​ໃຈ​ຕໍ່​ຜູ້​ທຽວ​ທາງ.

    ຫາກ​ເວົ້າ​ເຖິງ​ການ​ປູກ​ຕົ້ນ­ໄມ້​ແຄມ​ທາງ ກໍ່​ຕ້ອງ​ໄດ້​ເວົ້າ​ເຖິງ​ການ​ປູກ​ຈິດ​ສຳ­ນຶກ ແລະ ຄ່າ​ນິ­ຍົມ​ຂອງ​ຄົນ​ໃນ​ຊາດ​ໄປ​ພ້ອມ​ກັນ ວັດ­ທະ­ນະ­ທຳ​ຂອງ​ຊາດ ຍ່ອມ​ມີ​ຄວາມ​ສັບ​ຊ້ອນ​ແຕກ​ຕ່າງ​ກັນ ແຕ່​ເອ­ກະ​ພາບ ແລະ ເອ­ກະ­ລັກ​ຂອງ​ວັດ­ທະ­ນະ­ທຳ ຍ່ອມ​ຂຶ້ນ​ຢູ່​ກັບ​ການ​ປູກ­ຝັງ​ຈິດ​ສຳ­ນຶກ ແລະ ຄ່າ​ນິ­ຍົມ​ຂອງ​ອົງ​ການ­ຈັດ­ຕັ້ງ​ກ່ຽວ­ຂ້ອງ​ຍົກ​ຕົວ­ຢ່າງ: ຖ້າ­ວ່າ​ກຸ່ມ​ຄົນ​ໃດ​ໜຶ່ງ​ຫາກ​ສ້າງ​ຄ່າ​ນິ­ຍົມ​ຂີ່​ແຕ່​ລົດ​ໃຫຍ່​ລາ­ຄາ​ແພງ​ໄປ​ການ ໄປ​ເຮັດ​ທຸ­ລະ​ກິດ ໄປ​ທ່ຽວ ພ້ອມ​ດ້ວຍ​ຄຳ​ເວົ້າ​ສຽດ​ສີ ແລະ ພຶດ­ຕິ​ກຳ​ໃຫ້​ຄວາມ​ສຳ­ຄັນ ແຕ່​ວັດ­ຖຸ​ລາ­ຄາ​ແພງ​ຢ່າງ​ດຽວ ຄ່າ​ນິ­ຍົມ​ດັ່ງ­ກ່າວ​ກໍ່​ຈະ​ຖືກ​ແຜ່​ລາມ​ໄປ​ຫາ​ຄົນ​ຊັ້ນ​ກາງ ໄປ​ຫາ​ຄົນ​ສ່ວນ​ໃຫຍ່​ຂອງ​ສັງ­ຄົມ ທຸກ​ຄົນ ກໍ່​ຢາກ​ມີ​ລົດ​ໃຫຍ່​ລາ­ຄາ​ແພງ​ຂີ່​ໄປ​ຄົບ​ຄ້າ​ສະ­ມາ­ຄົມ​ກັນ.

    ຜູ້​ຂຽນ​ຈຶ່ງ​ເຫັນ​ຄວາມ​ສຳ­ຄັນ​ຂອງ​ການ​ປູກ​ຈິດ​ສຳ­ນຶກ ແລະ ສ້າງ​ຄ່າ​ນິ­ຍົມ​ໃນ​ທາງ​ສາຍ​ກາງ ແລະ ເປີດ​ຫູ​ເປີດ​ຕາ​ເບິ່ງ​ບ້ານ​ອື່ນ​ເມືອງ​ເພິ່ນ ທີ່​ພວກ​ເຂົາ​ປຸກ­ລະ­ດົມ​ໂຄ­ສະ­ນາ​ໃຫ້​ສັງ­ຄົມ​ໃຊ້​ລົດ ໃຊ້​ຖະ­ໜົນ​ຢ່າງ​ເໝາະ​ສົມ ຖ້າ­ວ່າ​ທາງ​ຍ່າງ​ສະ­ອາດ​ຈົບ­ງາມ ເຂດ​ທາງ​ຍ່າງ​ມີ​ຕົ້ນ­ໄມ້​ຢາຍ​ຕາມ​ແຄມ​ທາງ ບວກ​ກັບ​ການ​ສ້າງ​ຄ່າ​ນິ­ຍົມ​ໄປ​ວຽກ​ໄປ​ການ ຖ້າ​ໃກ້​ແນ່​ອາດ​ຍ່າງ​ເອົາ ຫຼື ຂີ່​ລົດ­ຖີບ ພວກ​ເຮົາ​ກໍ່​ຈະ​ເຫັນ​ການ​ຫຼຸດ­ຜ່ອນ​ລົດ​ຕິດ­ຕາມ​ຖະ­ໜົນ ເຊິ່ງ​ຂະ­ນະ​ດຽວ​ກັນ ຖ້າ​ຍັງ​ຢຶດ​ຕິດ ແລະ ເຫີ່​ຄ່າ​ນິ­ຍົມ​ຂອງ​ໃຊ້​ລາ­ຄາ​ແພງ​ທ່ຽວ​ອວດ​ກັນ ກໍ່​ຄົງ​ມີ​ແຕ່​ທ່າ​ອ່ຽງ​ແອ​ອັດ ແລະ ລົດ​ຕິດ​ຫຼາຍ​ຂຶ້ນ ການ​ສ້າງ​ຄ່າ​ນິ­ຍົມ​ທີ່​ຖືກ­ຕ້ອງ ແລະ ປູກ​ຈິດ​ສຳ­ນຶກ​ໃນ​ການ​ຮັກ­ສາ​ຄວາມ​ສະ­ອາດ ຮັກ​ຕົ້ນ­ໄມ້ ປູກ​ຕົ້ນ­ໄມ້ ພ້ອມ​ຫັນ​ມາ​ຫາ​ວິ­ທີ​ການ​ເດີນ­ທາງ​ແບບ​ໃຊ້​ທາງ​ຍ່າງ​ຫຼາຍ​ຂຶ້ນ ກໍ່​ແມ່ນ​ວິ­ທີ​ຫຼຸດ­ຜ່ອນ​ການ​ຕິດ​ຂັດ​ການ​ສັນ­ຈອນ​ອີກ​ວິ­ທີ​ໜຶ່ງ.

    ຜູ້​ຂຽນ​ຢາກ​ສະ­ຫຼຸບ​ວ່າ: ຫາກ​ທາງ​ຍ່າງ​ຖືກ​ແກ້​ໄຂ​ພ້ອມ​ກັບ​ປັບ​ພູ­ມີ​ທັດ​ປູກ​ຕົ້ນ­ໄມ້ ສ້າງ​ຄ່າ​ນິ­ຍົມ ຫັນ​ມາ​ໃຊ້​ທາງ​ຍ່າງ​ຫຼາຍ​ຂຶ້ນ ຄົງ​ຈະ​ເຮັດ​ໃຫ້​ຕົວ​ເມືອງ​ວຽງ​ຈັນ​ໜ້າ​ຢູ່​ຫຼາຍ​ຂຶ້ນ​ອີກ.

ຂ່າວທີ່ກ່ຽວຂ້ອງ