ຂ່າວຫຼ້າສຸດ

ສປປ ລາວ ຄວນລົງທຶນໃສ່ລະບົບເຕືອນໄພລ່ວງໜ້າ ເພື່ອຮັບມືກັບໄພພິບັດ

140 23 ຕ.ລ. 2018 ຂ່າວໜ້າ​ໜຶ່ງ

    ທະ­ນາ­ຄານ​ໂລກ (WB) ຮ່ວມ​ກັບ​ກະ­ຊວງ​ກະ­ສິ­ກຳ ແລະ ປ່າ­ໄມ້ ຈັດ​ກອງ​ປະ­ຊຸມ​ສຳ​ມະ​ນາ ເພື່ອ​ປຶກ­ສາ​ຫາ­ລື​ກ່ຽວ​ກັບ​ຜົນ​ການ​ຄົ້ນ­ຄວ້າ ແລະ ຂໍ້​ສະ­ເໜີ​ແນະ ເພື່ອ​ເສີມ​ສ້າງ​ຄວາມ​ເຂັ້ມ­ແຂງ ໃນ​ການ​ຮັບ​ມື​ຕໍ່​ເຫດ­ການ​ການ​ຜັ່ນ​ຜ່ວນ​ຂອງ​ອຸນ­ຫະ­ພູມ​ລະ­ຫວ່າງ​ມະ­ຫາ​ສະ­ໝຸດ ແລະ ຊັ້ນ​ບັນ­ຍາ­ກາດ (ENSO) ທີ່​ມີ​ຜົນ​ກະ­ທົບ​ອັນ​ໃຫຍ່​ຫຼວງ​ຕໍ່​ຂະ­ແໜງ​ກະ­ສິ­ກຳ ແລະ ເສດ­ຖະ­ກິດ​ຂອງ​ລາວ ຂຶ້ນ​ວັນ​ທີ 19 ຕຸ­ລາ 2018 ຢູ່ WB ປະ­ຈຳ​ລາວ ໂດຍ​ເປັນ​ປະ­ທານ​ຂອງ​ທ່ານ ໄຊ​ປລາ​ເດດ ຈຸ­ລາ­ມະ­ນີ ຫົວ­ໜ້າ​ກົມ​ແຜນ­ການ ແລະ ການ​ເງິນ ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ທ່ານ ນິ​ໂຄ​ລ່າ ພົນ​ທາ​ຣ່າ ຫົວ­ໜ້າ WB ປະ­ຈຳ ສປປ ລາວ ມີ​ນັກ­ວິ­ຊາ­ການ​ທັງ​ສອງ​ຝ່າຍ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ສຳ​ມະ​ນາ​ຄັ້ງ​ນີ້ ໄດ້​ນຳ​ສະ­ເໜີ​ບົດ​ລາຍ​ງານ​ການ​ຄົ້ນ​ຫາ​ຄວາມ​ສົມ​ດູນ ການ​ຄຸ້ມ​ຄອງ​ແອວ​ນີ​ໂນ (El Nino) ແລະ ລາ​ນີ​ນາ (La Nina) ໃນ​ຂະ­ແໜງ​ກະ­ສິ­ກຳ​ຂອງ ສປປ ລາວ ເຊິ່ງ​ບົດ​ລາຍ​ງານ​ດັ່ງ­ກ່າວ ສະ­ແດງ​ໃຫ້​ເຫັນ​ຜົນ​ກະ­ທົບ​ຂອງ El Nino ແລະ La Nina ເຖິງ​ວ່າ​ຈະ​ມີ​ຄວາມ​ແຕກ​ຕ່າງ​ກັນ​ໃນ​ແຕ່​ລະ​ເຂດ ແຕ່​ໂດຍ​ລວມ​ມີ​ຜົນ​ກະ­ທົບ​ທາງ​ລົບ​ຕໍ່​ພາກ​ກະ­ສິ­ກຳ ການ​ດຳ­ລົງ​ຊີ­ວິດ ແລະ ຄວາມ​ໝັ້ນ­ຄົງ​ທາງ​ເສດ­ຖະ­ກິດ El Nino ແມ່ນ​ໄລ­ຍະ​ທີ່​ອົບ​ອຸ່ນ​ຂອງ ENSO ເຊິ່ງ​ເຮັດ​ໃຫ້​ເກີດ​ປະ­ລິ­ມານ​ຝົນ­ຕົກ​ຫຼຸດ​ລົງ ແລະ ມີ​ຄວາມ​ສ່ຽງ​ຕໍ່​ໄພ​ແຫ້ງ­ແລ້ງ ສ່ວນ La Nina ແມ່ນ​ໄລ­ຍະ​ທີ່​ເຢັນ​ຂອງ ENSO ໂດຍ​ປົກ­ກະ­ຕິ​ຈະ​ເຮັດ​ໃຫ້​ເກີດ​ຝົນ­ຕົກ​ເພີ່ມ​ຂຶ້ນ​ໃນ​ປີ​ຕໍ່​ມາ ແລະ ສ່ຽງ​ຕໍ່​ການ​ເກີດ​ໄພ​ນ້ຳ​ຖ້ວມ ຫຼາຍ​ກວ່າ 70% ຂອງ​ໄພ​ແຫ້ງ­ແລ້ງ ຫຼື ໄພ​ນ້ຳ​ຖ້ວມ​ຢູ່ ສປປ ລາວ ເກີດ​ຂຶ້ນ​ພາຍ​ໃນ​ປີ​ທີ່​ມີ El Nino ແລະ La Nina ເຊິ່ງ​ສ້າງ​ຜົນ​ກະ­ທົບ​ອັນ​ໃຫຍ່​ຫຼວງ​ຕໍ່​ຂະ­ແໜງ​ກະ­ສິ­ກຳ ແລະ ເສດ­ຖະ­ກິດ​ຂອງ​ລາວ​ໂດຍ​ລວມ ນັບ​ແຕ່​ປີ 1996 ເປັນ­ຕົ້ນ​ມາ.

    ທ່ານ ໄຊ​ປລາ​ເດດ ຈຸ­ລາ­ມະ­ນີ ກ່າວ​ວ່າ: ພວກ​ເຮົາ​ມີ​ຄວາມ​ຈຳ­ເປັນ​ໃນ​ການ​ເພີ່ມ ຂີດ​ຄວາມ​ສາ­ມາດ​ການ​ຮັບ​ມື​ຕໍ່​ເຫດ­ການ ENSO ເຊິ່ງ​ບົດ​ລາຍ​ງານ​ດັ່ງ­ກ່າວ ໄດ້​ໃຫ້​ຂໍ້​ມູນ​ທີ່​ມີ​ປະ­ໂຫຍດ​ຕໍ່​ການ​ພັດ­ທະ­ນາ​ໃນ​ອະ­ນາ­ຄົດ​ຂອງ ສປປ ລາວ.

    ທ່ານ ນີ​ໂຄ​ລ່າ ພົນ​ທາ​ຣ່າ ກ່າວ​ວ່າ: ຜົນ​ການ​ຄົ້ນ­ຄວ້າ​ນີ້ ແມ່ນ​ກົງ​ກັບ​ເວ­ລາ​ທີ່​ເຫດ­ການ​ຫຼ້າ​ສຸດ​ຂອງ El Nino ປີ 2014-2016 ມີ​ຄວາມ​ຮຸນ​ແຮງ​ຕໍ່ ສປປ ລາວ ເຮັດ​ໃຫ້​ເກີດ​ການ​ຂາດ­ແຄນ​ນ້ຳ​ໃນ​ທົ່ວ​ປະ­ເທດ ຈາກ​ການ​ພະ­ຍາ­ກອນ​ຄັ້ງ​ຫຼ້າ​ສຸດ​ບົ່ງ​ບອກ​ວ່າ ສປປ ລາວ ອາດ​ຈະ​ປະ­ສົບ​ກັບ El Nino ອີກ ເຊິ່ງ​ອາດ​ຈະ​ເລີ່ມ​ຕົ້ນ​ພາຍ​ໃນ​ເດືອນ​ພະ­ຈິກ 2018 ຮູບ​ແບບ​ສະ­ພາບ​ອາ­ກາດ​ທີ່​ຮ້າຍ​ແຮງ​ນີ້ ມີ​ຜົນ​ກະ­ທົບ​ຢ່າງ​ຫຼວງ­ຫຼາຍ​ຕໍ່​ແມ່­ຍິງ ແລະ ຄອບ­ຄົວ​ທຸກ​ຍາກ ລວມ​ທັງ​ເປັນ​ອຸ­ປະ­ສັກ​ໄລ­ຍະ​ຍາວ​ຕໍ່​ຄວາມ​ກ້າວ­ໜ້າ ແລະ ການ​ຫຼຸດ­ຜ່ອນ​ຄວາມ­ທຸກ​ຍາກ​ຂອງ ສປປ ລາວ.  

    ສຳ­ລັບ​ຂໍ້​ສະ­ເໜີ​ແນະ​ໃນ​ການ​ກະ­ກຽມ​ໂຕ​ເພື່ອ​ຮັບ​ມື​ກັບ El Nino ແລະ La Nina ມີ: ການ​ລົງ­ທຶນ​ໃນ​ລະ­ບົບ​ເຕືອນ​ໄພ​ລ່ວງ​ໜ້າ ສ້າງ​ຈຸດ​ປະ­ສານ​ງານ ແລະ ແຜນ­ການ​ດຳ­ເນີນ​ງານ ສຳ​ຫຼັບ ENSO ສ້າງ​ແຜນ­ທີ່​ຄວາມ​ສ່ຽງ​ໄພ ກຳ­ນົດ​ເຂດ​ເປົ້າ​ໝາຍ​ທີ່​ມີ​ຄວາມ​ສ່ຽງ​ທີ່​ສຸດ ປັບ­ປຸງ​ກົນ​ໄກ​ການ​ເງິນ​ຂອງ ENSO ແລະ ການ​ຮ່ວມ​ມື​ກັບ​ປະ­ເທດ​ອື່ນໆ​ໃນ​ອາ­ຊີ​ຕາ­ເວັນ​ອອກ­ສຽງ​ໃຕ້ ເພື່ອ​ກຽມ​ຮັບ​ມື​ກັບ​ສິ່ງ​ທ້າ​ທາຍ​ທີ່​ກ່ຽວ­ຂ້ອງ​ກັບ ENSO ຂະ­ແໜງ​ກະ­ສິ­ກຳ ສາ­ມາດ​ຫຼຸດ​ການ​ສູນ​ເສຍ​ໄດ້​ໂດຍ​ການ​ສົ່ງ­ເສີມ​ການ​ລົງ­ທຶນ ໃນ​ຂອບ​ເຂດ​ການ​ຜະ­ລິດ ເຊັ່ນ: ແນວ​ພັນ​ທີ່​ທົນ​ທານ​ຕໍ່​ໄພ​ແຫ້ງ­ແລ້ງ ການ​ຂະ­ຫຍາຍ​ໂຄງ​ລ່າງ​ຊົນ­ລະ­ປະ­ທານ​ຂະ­ໜາດ​ນ້ອຍ.

    ທ່ານ William R. Sutton ຫົວ­ໜ້າ​ທິມ​ເສດ­ຖະ­ສາດ-ກະ­ສິ­ກຳ WB ກ່າວ​ວ່າ: ພວກ​ເຮົາ​ຫວັງ​ວ່າ​ບົດ​ລາຍ​ງານ​ນີ້ ຈະ​ສະ­ໜອງ​ຂໍ້​ມູນ​ທີ່​ສຳ­ຄັນ ເພື່ອ​ຊຸກ­ຍູ້​ການ​ຮັບ​ມື​ຂອງ ສປປ ລາວ ແລະ ປະ­ເທດ​ອ້ອມ​ຂ້າງ ຍິ່ງ​ໄປ​ກວ່າ​ນັ້ນ ສປປ ລາວ ສາ­ມາດ​ຮຽນ​ຮູ້​ການ​ຕອບ​ສະ­ໜອງ​ທາງ​ບວກ​ຂອງ La Nina ເພື່ອ​ຈະ​ຫຼຸດ­ຜ່ອນ​ການ​ສູນ​ເສຍ​ທາງ​ດ້ານ​ສັງ­ຄົມ ເສດ­ຖະ­ກິດ ແລະ ກະ­ສິ­ກຳ​ຈາກ El Nino.

ຂ່າວທີ່ກ່ຽວຂ້ອງ