ຂ່າວຫຼ້າສຸດ

ສ້າງຄວາມເຂົ້າໃຈການສ້າງເມືອງເຂັ້ມແຂງຮອບດ້ານ ແລະ ພະແນກການ 5 ດີ

354 23 ຕ.ລ. 2018 ຂ່າວໜ້າ​ໜຶ່ງ

    ພະ​ແນກ​ພາຍ​ໃນ ນະ­ຄອນ­ຫຼວງ​ວຽງ​ຈັນ (ນວ) ຈັດ​ກອງ​ປະ­ຊຸມ​ເຊື່ອມ​ຊຶມ ແລະ ຈັດ​ຕັ້ງ​ຜັນ​ຂະ­ຫຍາຍ​ການ​ທົດ​ລອງ​ສ້າງ​ເມືອງ​ເຂັ້ມ­ແຂງ​ຮອບ­ດ້ານ ແລະ ພະ­ແນກ­ການ 5 ດີ ຂຶ້່ນ​ວັນ​ທີ 22 ຕຸ­ລາ 2018 ຢູ່​ຫ້ອງ​ວ່າ­ການ​ປົກ­ຄອງ ນວ ໂດຍ​ເປັນ​ປະ­ທານ​ຂອງ​ທ່ານ ບຸນ​ໜາ ຜາ​ທຸມ​ມະ​ວົງ ຫົວ­ໜ້າ​ພະ​ແນກ​ພາຍ​ໃນ ນວ ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ການ­ຈັດ­ຕັ້ງ​ຜັນ​ຂະ­ຫຍາຍ​ການ​ທົດ​ລອງ​ສ້າງ​ເມືອງ​ເຂັ້ມ­ແຂງ​ຮອບ­ດ້ານ ແລະ ພະ­ແນກ­ການ 5 ດີ​ຈະ​ຈັດ​ຕັ້ງ​ປະ­ຕິ­ບັດ​ໃນ 7 ເມືອງ ຄື: ຈັນ­ທະ​ບູ​ລີ ສີ​ສັດ­ຕະ​ນາກ ສີ​ໂຄດ​ຕະ­ບອງ ໄຊ​ເຊດ​ຖາ ໄຊ​ທາ­ນີ ນາ​ຊາຍ​ທອງ ເມືອງ​ຫາດ​ຊາຍ​ຟອງ ແລະ 6 ພະ­ແນກ­ການ ຄື: ການ​ເງິນ ແຜນ­ການ ແລະ ການ​ລົງ­ທຶນ ໂຍ­ທາ​ທິ​ການ ແລະ ຂົນ­ສົ່ງ ອຸດ­ສາ­ຫະ­ກຳ ແລະ ການ​ຄ້າ ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ກະ­ສິ­ກຳ ແລະ ປ່າ­ໄມ້ ການ​ຈັດ​ເຊື່ອມ​ຊືມ​ດັ່ງ­ກ່າວ ເພື່ອ​ແນ­ໃສ່​ໃຫ້​ຜູ້​ເຂົ້າ​ຮ່ວມ​ມີ​ຄວາມ​ຮັບ​ຮູ້-ເຂົ້າ­ໃຈ​ຢ່າງ​ເລິກ­ເຊິ່ງ​ຕໍ່​ວຽກ​ງານ​ດັ່ງ­ກ່າວ ແລະ ສາ­ມາດ​ນຳ​ເອົາ​ໄປ​ຈັດ​ຕັ້ງ​ຜັນ​ຂະ­ຫຍາຍ​ໃຫ້​ເກີດ​ດອກ​ອອກ​ຜົນ ມີ​ຜົນ­ສຳ­ເລັດ​ຕາມ​ລະ­ດັບ​ຄາດ­ໝາຍ ໂດຍ​ການ​ທົດ​ລອງ​ແມ່ນ​ຈະ​ເລີ່ມ​ຈັດ​ຕັ້ງ​ປະ­ຕິ­ບັດ​ພາຍ­ຫຼັງ​ສຳ­ເລັດ​ກອງ​ປະ­ຊຸມ​ຄັ້ງ​ນີ້.

    ການ­ຈັດ­ຕັ້ງ​ປະ­ຕິ­ບັດ​ການ​ສ້າງ​ເມືອງ ແລະ ພະ­ແນກ­ການ 5 ດີ ແມ່ນ​ເພື່ອ​ປັບ­ປຸງ​ກົນ​ໄກ​ການ​ຄຸ້ມ​ຄອງ-ບໍ­ລິ­ຫານ​ລັດ ເສີມ​ຂະ­ຫຍາຍ​ສິດ​ເປັນ​ເຈົ້າ ແລະ ຍົກ​ສູງ​ຄວາມ​ຮັບ­ຜິດ­ຊອບ​ຂອງ​ເມືອງ ແລະ ພະ­ແນກ­ການ ຫ້ອງ­ການ​ທຽບ​ເທົ່າ​ຂັ້ນ​ພະ​ແນກ​ໃນ ນວ ແລະ ຮາກ​ຖານ​ບ້ານ​ໃນ​ການ​ຂຸດ​ຄົ້ນ ນຳ​ໃຊ້​ທ່າ­ແຮງ ແລະ ຄວາມ​ອາດ​ສາ­ມາດ​ບົ່ມ​ຊ້ອນ​ໃນ​ການ​ຄຸ້ມ​ຄອງ-ບໍ­ລິ­ຫານ​ດ້ານ​ການ­ເມືອງ-ການ​ປົກ­ຄອງ ເສດ­ຖະ­ກິດ ວັດ­ທະ­ນະ­ທຳ-ສັງ­ຄົມ ແລະ ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ບົນ​ຈິດ­ໃຈ​ເປັນ​ເຈົ້າ​ຕົນ​ເອງ ເພິ່ງ​ຕົນ​ເອງ ສ້າງ​ຄວາມ​ເຂັ້ມ­ແຂງ​ດ້ວຍ​ຕົນ​ເອງ ສ້າງ ແລະ ຍົກ​ລະ­ດັບ​ຄວາມ​ສາ­ມາດ​ການ​ຄຸ້ມ​ຄອງ​ບໍ­ລິ­ຫານ​ລັດ​ຂັ້ນ​ທ້ອງ­ຖິ່ນ ແລະ ຮາກ​ຖານ​ໃຫ້​ສູງ​ຂຶ້ນ ເພື່ອ​ນຳ​ເອົາ​ແນວ­ທາງ​ນະ­ໂຍ­ບາຍ​ຂອງ​ພັກ-ລັດ ໄປ​ຜັນ​ຂະ­ຫຍາຍ​ໃຫ້​ທົ່ວ​ເມືອງ ພະ­ແນກ­ການ ຫ້ອງ­ການ​ທຽບ​ເທົ່າ​ຂັ້ນ​ພະ​ແນກ​ໃນ ນວ ປຸກ­ລະ­ດົມ​ພະ­ນັກ­ງານ-ລັດ­ຖະ­ກອນ ສະ­ມາ­ຊິກ​ພັກ​ມີ​ຄວາມ​ຫ້າວ­ຫັນ​ປະ­ຕິ­ບັດ​ໜ້າ­ທີ່​ການ­ເມືອງ ທີ່​ໄດ້​ຮັບ​ມອບ​ໝາຍ​ໃຫ້​ສຳ­ເລັດ ຈັດ​ຕັ້ງ​ລະ­ບຽບ​ລັດ­ຖະ­ກອນ​ທີ່​ວາງ​ອອກ​ໃຫ້​ບັນ­ລຸ​ຕາມ​ຄາດ­ໝາຍ.

    ເນື້ອ​ໃນ​ສ້າງ​ເມືອງ​ເຂັ້ມ­ແຂງ​ຮອບ­ດ້ານ ມີ 5 ມາດ­ຖານ ຄື: ດ້ານ​ກໍ່­ສ້າງ​ພັກ-ພະ­ນັກ­ງານ​ດ້ານ​ປົກ­ຄອງ ແລະ ຄຸ້ມ​ຄອງ​ບໍ­ລິ­ຫານ ເສດ­ຖະ­ກິດ-ການ​ເງິນ ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ດ້ານ​ວັດ­ທະ­ນະ­ທຳ-ສັງ­ຄົມ ແລະ ດ້ານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ສ່ວນ​ເນື້ອ​ໃນ​ສ້າງ­ຕັ້ງ​ພະ​ແນກ 5 ດີ ມີ: ເປັນ​ຫົວ­ໜ່ວຍ​ຄຸ້ມ​ຄອງ-ບໍ­ລິ­ການ​ດີ ປະ­ຕິ­ບັດ​ລາຍ​ຮັບ​ວິ­ຊາ​ການ​ດີ ລົງ​ຮາກ​ຖານ​ດີ ລັດ­ຖະ­ກອນ​ດີ ແລະ ພະ​ແນກ​ປະ­ຢັດ​ດີ.

ຂ່າວທີ່ກ່ຽວຂ້ອງ