ຂ່າວຫຼ້າສຸດ

ນະຄອນຫຼວງ ຍັງຂາດງົບໃນການຟື້ນຟູ ແລະ ຍົກລະດັບເສັ້ນທາງ

166 22 ຕ.ລ. 2018 ຂ່າວໜ້າ​ໜຶ່ງ
ນະຄອນຫຼວງ ຍັງຂາດງົບໃນການຟື້ນຟູ ແລະ ຍົກລະດັບເສັ້ນທາງ

    ທ່ານ ເດດ​ສົງ­ຄາມ ທຳ​ມະ​ວົງ ຫົວ­ໜ້າ​ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນະ­ຄອນ­ຫຼວງ​ວຽງ​ຈັນ (ຍທຂ ນວ) ໃຫ້​ສຳ­ພາດ​ວັນ​ທີ 18 ຕຸ­ລາ 2018 ຕໍ່​ນັກ​ຂ່າວ ມີ​ບາງ​ຕອນ​ວ່າ: ປີ 2018 ນວ ເກີດ​ມີ​ຝົນ­ຕົກ​ຕໍ່​ເນື່ອງ​ຫຼາຍ​ວັນ​ມັນ​ໄດ້​ສົ່ງ​ຜົນ​ກະ­ທົບ​ຕໍ່​ເສັ້ນ­ທາງ​ຢູ່ ນວ ຫຼາຍ​ເສັ້ນ ນັບ​ທັງ​ເສັ້ນ­ທາງ​ທີ່​ໄດ້​ກໍ່­ສ້າງ​ຜ່ານ​ມາ ແລະ ກຳ­ລັງ​ກໍ່­ສ້າງ ບາງ​ໄລ­ຍະ​ເກີດ​ມີ​ການ​ເປ່​ເພ​ຈຳ­ເປັນ​ຕ້ອງ​ໄດ້​ຂຶ້ນ​ແຜນ​ສ້ອມ­ແປງ ແລະ ແຜນ​ງົບ­ປະ­ມານ​ທີ່​ພະ​ແນກ ຍທຂ ໄດ້​ຮັບ​ປະ­ຈຳ​ປີ ເພື່ອ​ຊຳ­ລະ​ໃຫ້​ແກ່​ວຽກ​ງານ​ກໍ່­ສ້າງ​ເສັ້ນ­ທາງ​ເບ​ຕົງ ທາງ​ປູ­ຢາງ ແລະ ວຽກ​ສ້ອມ­ແປງ​ທາງ​ປູ­ຢາງ ທາງ​ດິນ​ແດງ​ມີ​ຈຳ­ກັດ ບໍ່​ພຽງ­ພໍ​ຕໍ່​ຄວາມ​ຕ້ອງ­ການ ສະ­ແດງ​ໃຫ້​ເຫັນ​ປີ 2017 ໄດ້​ຮັບ​ງົບ­ປະ­ມານ 1.260 ລ້ານ​ກີບ ປີ 2018 ໄດ້​ຮັບ 818 ລ້ານ​ກີບ ສິ່ງ​ດັ່ງ­ກ່າວ​ໄດ້​ກະ­ທົບ​ໂດຍ​ກົງ​ຕໍ່​ການ​ພັດ­ທະ­ນາ​ພື້ນ­ຖານ​ໂຄງ​ລ່າງ​ເສັ້ນ­ທາງ ແລະ ຮ່ອງ​ລະ­ບາຍ​ນ້ຳ ພ້ອມ​ນັ້ນ ສາ­ເຫດ​ເຮັດ​ໃຫ້​ເສັ້ນ­ທາງ​ເປ່​ເພ ຍ້ອນ​ເສັ້ນ­ທາງ​ຫຼາຍ​ເສັ້ນ​ໃນ​ຕົວ​ເມືອງ​ເປັນ​ທາງ​ປູ­ຢາງ 2 ຊັ້ນ​ທີ່​ໄດ້​ຮັບ​ການ​ກໍ່­ສ້າງ​ມາ​ຫຼາຍ​ປີ ປັດ­ຈຸ­ບັນ ໜ້າ​ທາງ​ແຕກ​ແຫງ ເປັນ​ຂຸມ ໝົດ​ອາ­ຍຸ​ການ​ນຳ​ໃຊ້ ແຕ່​ພັດ​ບໍ່​ໄດ້​ຮັບ​ກາ​ຍົກ​ລະ­ດັບ​ຟື້ນ​ຟູ ເນື່ອງ​ຈາ​ກວ່າ​ບໍ່​ມີ​ງົບ­ປະ­ມານ​ພຽງ­ພໍ.

    ໄລ­ຍະ​ຜ່ານ​ມາ ກໍ່​ຄື​ປັດ­ຈຸ­ບັນ ພະ​ແນກ ຍທຂ ໄດ້​ເອົາ­ໃຈ­ໃສ່​ຕິດ­ຕາມ​ກວດ­ກາ​ເສັ້ນ­ທາງ​ເປັນ​ປົກ­ກະ­ຕິ ຖ້າ​ໜ້າ​ທາງ​ເປ່​ເພ​ເປັນ​ຂຸມ ເປັນ​ບວກ ກໍ່​ໄດ້​ໃຫ້​ໜ່ວຍ​ງານ​ປົກ​ປັກ​ຮັກ­ສາ​ເສັ້ນ­ທາງ​ຮີບ​ຮ້ອນ​ໄປ​ແກ້​ໄຂ​ທັນ­ທີ ຕົ້ນ­ຕໍ​ເລັ່ງ​ໃສ່​ເສັ້ນ­ທາງ​ສາຍ​ຫຼັກ​ໃນ​ຂອບ​ເຂດ 5 ຕົວ​ເມືອງ​ໃນ​ເຊັ່ນ: ເສັ້ນ­ທາງ​ແຕ່​ໄຟ​ແດງ​ສີ​ບຸນ​ເຮືອງ​ຫາ​ຄ້ອຍ​ໄຟ­ຟ້າ​ໂພນ​ຕ້ອງ ເສັ້ນ­ທາງ​ຕະ­ຫຼາດ​ແລງ​ໜອງ​ດ້ວງ-ໜອງ​ບົວ­ທອງ-ໄຟ​ແດງ​ດົງ​ປາ​ແຫຼບ ເສັ້ນ­ທາງ​ນາ​ຄວາຍ-ໄຟ​ແດງ​ຫຼັກ 21 (ທາງ 13 ໃຕ້) ທາງ​ຄຸ້ມ​ສີ​ສະ­ຫວາດ ທົ່ງ​ສ້າງ​ນາງ-ສີ່​ແຍກ​ຊ້າງ​ເຜືອກ ແລະ ເສັ້ນ­ທາງ​ອື່ນໆ ນອກ­ຈາກ​ໄດ້​ຮັບ​ງົບ­ປະ­ມານ​ສ້ອມ­ແປງ​ປະ­ຈຳ​ປີ 2018 ທີ່ ນວ ຈັດ​ສັນ​ໃຫ້​ແລ້ວ​ຍັງ​ໄດ້​ຮັບ​ງົບ­ປະ­ມານ​ສ້ອມ­ແປງ​ຈາກ​ກອງ​ທຶນ​ທາງ​ທີ່​ກະ­ຊວງ ຍທຂ ຈັດ​ສັນ​ໃຫ້​ຈຳ­ນວນ 7 ຕື້​ກວ່າ​ກີບ ເພື່ອ​ນຳ​ໃຊ້​ເຂົ້າ​ໃນ​ການ​ສ້ອມ­ແປງ​ທາງ ເປັນ­ຕົ້ນ ເສັ້ນ­ທາງ​ແຕ່​ບ້ານ​ທ່າ​ສະ­ຫວ່າງ-ເວີນ​ຄຳ-ໂຮງ­ຮຽນ​ຕຳ­ຫຼວດ​ເວີນ​ຄຳ ທາງ​ສະ­ໜາມ​ກີ­ລາ​ຫຼັກ 16-ທາງ 450 ປີ ທາງ​ຫໍ​ພັກ​ຊີ­ເກມ-ບ້ານ​ນາ​ທົ່ມ ແລະ ບັນ­ດາ​ເສັ້ນ­ທາງ​ອື່ນໆ ທີ່​ໄດ້​ມອບ​ໃຫ້​ຫ້ອງ­ການ ຍທຂ ເມືອງ ເປັນ​ຜູ້​ຂຶ້ນ​ແຜນ​ຈັດ​ຕັ້ງ​ປະ­ຕິ­ບັດ​ສ້ອມ­ແປງ​ທາງ​ດິນ​ແດງ ແລະ ທາງ​ປູ­ຢາງ 2 ຊັ້ນ.

    ສຳ­ລັບ​ເສັ້ນ­ທາງ​ທີ່​ກໍ່­ສ້າງ​ຕາມ​ຜັງ­ເມືອງ​ເຊັ່ນ: ເສັ້ນ­ທາງ T6 ແຕ່​ບ້ານ​ພະ​ຂາວ ຖະ­ໜົນ​ໄກ­ສອນ ໂຮງ­ແຮມ​ຄອນ​ປະ­ສົງ-ບ້ານ​ໜອງ​ພະ­ຍາ ໂຮງ­ໝໍ​ແມ່ ແລະ ເດັກ​ທີ່​ການ​ກໍ່­ສ້າງ​ຊັກ​ຊ້າ​ແກ່­ຍາວ ບໍ່​ໄປ​ຕາມ​ສັນ­ຍາ​ທີ່​ກຳ­ນົດ​ໄວ້ ຍ້ອນ​ຜູ້​ຮັບ​ເໝົາ​ຂາດ­ທຶນ​ໜູນ​ວຽນ ແຕ່​ຍ້ອນ​ເຫັນ​ໄດ້​ຄວາມ​ສຳ­ຄັນ​ຂອງ​ເສັ້ນ­ທາງ​ດັ່ງ­ກ່າວ ທາງ​ຂັ້ນ​ເທິງ​ຈຶ່ງ​ໄດ້​ຊີ້​ນຳ​ຢ່າງ​ໃກ້­ຊິດ​ລະ­ດົມ​ຊຸກ­ຍູ້​ໃຫ້​ບໍ­ລິ­ສັດ​ຮີບ​ຮ້ອນ​ສ້ອມ­ແປງ ແລະ ກໍ່­ສ້າງ​ເພື່ອ​ໃຫ້​ໂຄງ­ການ​ສຳ­ເລັດ ຖ້າ​ຫາກ​ບໍ່​ປະ­ຕິ­ບັດ​ສຳ­ເລັດ​ໃນ​ທ້າຍ​ປີ​ນີ້ ຈະ​ໄດ້​ຄົ້ນ­ຄວ້າ​ຍົກ­ເລີກ​ເພື່ອ​ຊອກ​ຫາ​ບໍ­ລິ­ສັດ​ທີ່​ມີ​ເງື່ອນ­ໄຂ ມາ​ສືບ­ຕໍ່​ກໍ່­ສ້າງ ປັດ­ຈຸ­ບັນ​ບໍ­ລິ­ສັດ​ຮັບ​ເໝົາ​ໄດ້​ມີ​ການ​ສ້ອມ­ແປງ​ຖົມ​ຂຸມ​ໃຫຍ່ ເກດ​ໜ້າ​ທາງ​ໃຫ້​ສາ­ມາດ​ໄປ​ມາ​ໄດ້​ສະ­ດວກ ສ່ວນ​ເສັ້ນ­ທາງ​ຕານ​ມີ​ໄຊ​ຫາ​ສີ​ເກີດ ທີ່​ກຳ­ລັງ​ກໍ່­ສ້າງ​ໜ້າ​ທາງ​ບາງ​ໄລ­ຍະ​ເປັນ​ບວກ​ເປັນ​ຂຸມ ການ​ໄປ​ມາ​ພົບ​ຄວາມ​ຫຍຸ້ງ­ຍາກ ພະ​ແນກ ຍທຂ ໄດ້​ຊີ້​ນຳ​ໃຫ້​ຜູ້​ຮັບ​ເໝົາ​ສ້ອມ­ແປງ​ປົກ­ກະ­ຕິ ແຕ່​ຍ້ອນ​ສະ­ພາບ​ຝົນ­ຕົກ​ໜັກ​ຕິດ­ຕໍ່​ກັນ​ຫຼາຍ​ວັນ ຈຶ່ງ​ມີ​ການ​ເປ່​ເພ​ຄືນ ຖ້າ​ສະ­ພາບ​ດິນ​ຟ້າ​ເອື້ອ​ອຳ­ນວຍ​ແລ້ວ ຈະ​ເລັ່ງ​ໃຫ້​ບໍ­ລິ­ສັດ​ຮັບ​ເໝົາ​ສ້ອມ­ແປງ​ຄືນ​ໂດຍ​ໄວ ເພື່ອ​ໃຫ້​ສະ­ດວກ​ຕໍ່​ການ​ສັນ­ຈອນ​ໄປ​ມາ​ຍິ່ງໆ​ຂຶ້ນ.

ຂ່າວທີ່ກ່ຽວຂ້ອງ