ຂ່າວຫຼ້າສຸດ

ເຈົ້າໜ້າທີ່ຈະລາຈອນ ວາງກຳລັງປ້ອງກັນຫຼາຍຈຸດ ງານບຸນຊ່ວງເຮືອທ່າວັດຈັນ

132 22 ຕ.ລ. 2018 ຂ່າວໜ້າ​ໜຶ່ງ
ເຈົ້າໜ້າທີ່ຈະລາຈອນ ວາງກຳລັງປ້ອງກັນຫຼາຍຈຸດ ງານບຸນຊ່ວງເຮືອທ່າວັດຈັນ

    ວັນ​ທີ 19 ຕຸ­ລາ 2018 ທີ່​ພະ​ແນກ​ຕຳ­ຫຼວດ​ຈະ­ລາ­ຈອນ​ນະ­ຄອນ­ຫຼວງ​ວຽງ​ຈັນ (ນວ) ຈັດ​ກອງ​ປະ­ຊຸມ​ການ​ວາງ​ແຜນ​ບັນ­ຈຸ​ກຳ­ລັງ​ປ້ອງ​ກັນ ງານ​ບຸນ​ອອກ​ພັນ​ສາ​ປະ​ວໍ­ລະ­ນາ ແລະ ບຸນ­ຊ່ວງ­ເຮືອ​ປະ­ເພ­ນີ​ປະ­ຈຳ​ປີ ພສ 2561 ທີ່​ທ່າ​ວັດ​ຈັນ ເມືອງ​ຈັນ­ທະ​ບູ​ລີ ມີ​ທ່ານ ພັນ​ໂທ ຢຸດ​ຕະ​ພົງ ສຸ­ວັນ­ນະ​ສິງ ຮອງ​ຫົວ­ໜ້າ​ຫ້ອງ​ຕຳ­ຫຼວດ ກອງ​ບັນ­ຊາ​ການ ປກສ ນວ ມີ​ເຈົ້າ​ໜ້າ­ທີ່​ຕຳ­ຫຼວດ​ຈະ­ລາ­ຈອນ ພະ​ແນກ​ເຈົ້າ​ໜ້າ­ທີ່​ຈະ­ລາ­ຈອນ​ເມືອງ​ຈັນ­ທະ​ບູ​ລີ ສີ​ສັດ­ຕະ​ນາກ ແລະ ສີ​ໂຄດ​ຕະ­ບອງ ເຂົ້າ​ຮ່ວມ.

    ທ່ານ ພັນ​ໂທ ເພັງ​ສະ­ຫວັນ ທຳ​ມະ​ບູນ ຫົວ­ໜ້າ​ພະ​ແນກ​ຕຳ­ຫຼວດ​ຈະ­ລາ­ຈອນ ນວ ກ່າວ​ວ່າ: ງານ​ບຸນ​ອອກ​ພັນ​ສາ​ປະ​ວໍ­ລະ­ນາ ແລະ ບຸນ­ຊ່ວງ­ເຮືອ​ເປັນ​ງານ​ທາງ​ດ້ານ​ສາ­ສະ­ໜາ​ທີ່​ປະ­ຊາ­ຊົນ​ບັນ­ດາ­ເຜົ່າ ເວົ້າ​ລວມ ເວົ້າ​ສະ­ເພາະ​ຊາວ ນວ ທີ່​ເຄີຍ​ປະ­ຕິ­ບັດ​ສືບ​ທອດ​ກັນ​ມາ​ແຕ່​ດົນ​ນານ ອັນ​ໄດ້​ສະ­ແດງ​ເຖິງ​ຮີດ­ຄອງ​ປະ­ເພ­ນີ ວິ­ຖີ​ຊີ­ວິດ ແລະ ວັດ­ທະ­ນະ­ທຳ​ຂອງ​ຄົນ​ລາວ ງານ​ບຸນ​ດັ່ງ­ກ່າວ ມີ​ການ​ວາງ​ຂາຍ​ສິນ­ຄ້າ ສະ­ແດງ​ສິ­ລະ​ປະ ແລະ ອື່ນໆ ຈະ​ມີ​ການ​ນຳ​ພັກ-ລັດ ແຂກ​ພາຍ​ໃນ ແລະ ຕ່າງ­ປະ­ເທດ ຕະ­ຫຼອດ​ເຖິງ​ມວນ​ຊົນ​ເຂົ້າ​ຮ່ວມ​ຢ່າງ​ຫຼວງ­ຫຼາຍ ເພື່ອ​ຮັບ­ປະ­ກັນ​ໄລ­ຍະ​ບຸນ​ປະ­ເພ­ນີ​ທີ່​ຈະ​ໄດ້​ຈັດ​ຂຶ້ນ​ວັນ​ທີ 22-25 ຕຸ­ລາ ນີ້ ໃຫ້​ມີ​ຄວາມ​ສະ­ຫງົບ​ປອດ​ໄພ ມີ​ຄວາມ​ເປັນ​ລະ­ບຽບ​ຮຽບ​ຮ້ອຍ​ທາງ​ດ້ານ​ສັງ­ຄົມ ແລະ ບໍ່​ໃຫ້​ມີ​ເຫດ­ການ​ທີ່​ຮ້າຍ​ແຮງ​ເກີດ​ຂຶ້ນ ພະ​ແນກ​ຕຳ­ຫຼວດ​ຈະ­ລາ­ຈອນ ນວ ຈຶ່ງ​ໄດ້​ວາງ​ກຳ­ລັງ​ເອົາ​ເຈົ້າ​ໜ້າ­ທີ່​ຕຳ­ຫຼວດ​ຈະ­ລາ­ຈອນ 236 ຄົນ ເຂົ້າ​ປ້ອງ​ກັນ​ຕາມ​ຈຸດ​ສຳ­ຄັນ​ຕ່າງໆ​ຢູ່​ໃນ 3 ເມືອງ​ຄື: ເມືອງ​ສີ​ໂຄດ​ຕະ­ບອງ ຈັນ­ທະ​ບູ​ລີ ແລະ ເມືອງ​ສີ​ສັດ­ຕະ​ນາກ ລວມ​ທັງ​ໝົດ 61 ຈຸດ ໃນ​ນັ້ນ ມີ​ຈຸດ​ປ້ອງ​ກັນ​ວົງ​ໃນ ແລະ ວົງ​ນອກ (ປ້ອມ​ສາມ​ແຍກ ສີ່​ແຍກ ແລະ ຕາມ​ທາງ​ຮ່ອມ​ທາງ​ຊອຍ​ຕ່າງໆ).

ຂ່າວທີ່ກ່ຽວຂ້ອງ