ຂ່າວຫຼ້າສຸດ

ເມືອງວຽງໄຊ-ຖານທີ່ໝັ້ນການປະຕິວັດລາວ ຄົບຮອບ 50 ປີ

242 19 ຕ.ລ. 2018 ຂ່າວໜ້າ​ໜຶ່ງ
ເມືອງວຽງໄຊ-ຖານທີ່ໝັ້ນການປະຕິວັດລາວ ຄົບຮອບ 50 ປີ

    ຄະ­ນະ​ຮັບ­ຜິດ­ຊອບ​ການ​ກະ­ກຽມ​ສະ­ເຫຼີມ­ສະ­ຫຼອງ ວັນ​ສ້າງ­ຕັ້ງ​ເມືອງ​ວຽງ​ໄຊ-ເຂດ​ທີ່​ໝັ້ນ​ການ​ປະ­ຕິ­ວັດ​ລາວ ໄດ້​ຈັດ​ສຳ​ມະ​ນາ​ວິ­ທະ­ຍາ­ສາດ​ພາຍ​ໃຕ້​ຫົວ­ຂໍ້: “ເມືອງ​ວຽງ​ໄຊ-ຖານ​ທີ່​ໝັ້ນ​ການ​ປະ­ຕິ­ວັດ” ຄົບ­ຮອບ 50 ປີ (30/11/1968-30/11/2018) ຂຶ້ນ​ວັນ​ທີ 18 ຕຸ­ລາ 2018 ທີ່​ຫໍ​ປະ­ຊຸມ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ ກິ​ແກ້ວ ໄຂ​ຄຳ​ພິ­ທູນ ຫົວ­ໜ້າ​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ພັນ​ຄຳ ວິ­ພາ​ວັນ ຮອງ​ປະ­ທານ​ປະ­ເທດ ການ​ນຳ​ພັກ-ລັດ ພະ­ນັກ­ງານ​ປະ­ຕິ­ວັດ​ອາ­ວຸ­ໂສ​ບຳ­ນານ ອົງ​ການ­ຈັດ­ຕັ້ງ​ຂັ້ນ​ສູນ​ກາງ ຕະ­ຫຼອດ​ຮອດ​ພະ­ນັກ­ງານ​ຫຼັກ​ແຫຼ່ງ ແລະ ສື່​ມວນ​ຊົນ.

    ການ​ສຳ​ມະ​ນາ​ຄັ້ງ​ນີ້​ເປັນ​ກິດ­ຈະ­ກຳ​ໜຶ່ງ ຢູ່​ໃນ​ການ​ກະ­ກຽມ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ເມືອງ​ວຽງ​ໄຊ ຄົບ­ຮອບ 50 ປີ ທີ່​ຈະ​ໄດ້​ຈັດ​ຂຶ້ນ​ໃນ​ວັນ​ທີ 30 ພະ­ຈິກ 2018 ທີ່​ຈະ​ມາ​ເຖິງ​ນີ້ ເຊິ່ງ​ຫົວ­ຂໍ້​ສຳ​ມະ​ນາ​ຄັ້ງ​ນີ້​ແມ່ນ​ມີ​ຄວາມ​ໝາຍ​ສຳ­ຄັນ​ຫຼາຍ ເພາະ​ເປັນ​ການ​ຄົ້ນ­ຄວ້າ​ສັງ​ລວມ​ທິດ​ສະ​ດີ ແລະ ພຶດ­ຕິ​ກຳ​ແຫ່ງ​ການ​ຊີ້​ນຳ-ນຳ­ພາ​ພາ­ລະ­ກິດ​ປະ­ຕິ­ວັດ ໃນ​ແຕ່​ລະ​ໄລ­ຍະ​ຂອງ​ພັກ​ເຮົາ ໂດຍ​ສະ­ເພາະ​ການ​ວາງ​ແຜນ​ຍຸດ​ທະ​ສາດ​ຍຸດ​ໂທ​ບາຍ ແລະ ວິ­ທີ​ການ​ປະ­ຕິ­ບັດ​ອອກ​ຢ່າງ​ຖືກ­ຕ້ອງ​ສອດ­ຄ່ອງ​ໃນ​ໄລ­ຍະ​ຂອງ​ການ​ຕໍ່­ສູ້​ກູ້​ຊາດ ຕ້ານ​ລັດ­ທິ​ລ່າ​ເມືອງ​ຂຶ້ນ​ແບບ​ເກົ່າ ແລະ ແບບ​ໃໝ່​ເປັນ​ໂອ­ກາດ​ທີ່​ສຳ­ຄັນ​ໃຫ້​ແກ່​ການ​ສຶກ​ສາ​ອົບ­ຮົມ​ພະ­ນັກ­ງານ ສະ­ມາ­ຊິກ​ພັກ ທະ­ຫານ ຕຳ­ຫຼວດ ຕະ­ຫຼອດ​ຮອດ​ປະ­ຊາ­ຊົນ​ບັນ­ດາ­ເຜົ່າ​ໃນ​ທົ່ວ​ປະ­ເທດ ໂດຍ​ສະ­ເພາະ​ຄົນ​ຮຸ່ນ​ໝຸ່ມ​ຮຸ່ນ​ສືບ​ທອດ​ທີ່​ເປັນ​ອະ­ນາ­ຄົດ​ຂອງ​ຊາດ​ໃຫ້​ຮັບ​ຮູ້ ແລະ ເຂົ້າ­ໃຈ​ຢ່າງ​ເລິກ­ເຊິ່ງ ຈະ­ແຈ້ງ​ກ່ຽວ​ກັບ​ເສັ້ນ­ທາງ​ກ້າວ​ເດີນ​ຢ່າງ​ລະ​ອິດ​ລະ​ອ້ຽວ​ຂອງ​ການ​ປະ­ຕິ­ວັດ ເສີມ​ຂະ­ຫຍາຍ​ມູນ­ເຊື້ອ​ຕໍ່­ສູ້​ມີ​ໄຊ ແລະ ການ​ນຳ­ພາ​ອັນ​ສະ­ຫຼາດ​ສ່ອງ​ໃສ​ຂອງ​ພັກ ກໍ່​ຄື​ການ​ຈົດ​ຈຳ​ລ້ຳ​ລຶກ​ຜົນ­ງານ​ຄຸນ­ງາມ­ຄວາມ­ດີ ແລະ ຮ່ຳ­ຮຽນ​ເອົາ​ແບບ­ຢ່າງ​ທີ່​ດີ​ແບບ­ແຜນ​ດຳ­ລົງ​ຊີ­ວິດ ຄຸນ­ສົມ­ບັດ​ສິນ​ທຳ​ປະ­ຕິ­ວັດ​ຂອງ​ບັນ­ດາ​ຜູ້­ນຳ​ການ​ປະ­ຕິ­ວັດ​ຮຸ່ນ​ກ່ອນ ສືບ­ຕໍ່​ປົກ​ປັກ​ຮັກ­ສາ ແລະ ເສີມ​ຂະ­ຫຍາຍ​ມູນ­ເຊື້ອ​ອັນ​ສະ­ຫງ່າ​ອົງ­ອາດ​ຂອງ​ກຳ­ລັງ​ປະ­ກອບ​ອາ­ວຸດ ແລະ ປະ­ຊາ­ຊົນ​ບັນ­ດາ­ເຜົ່າ​ໃນ​ທົ່ວ​ປະ­ເທດ ເວົ້າ​ລວມ ເວົ້າ​ສະ­ເພາະ​ມູນ­ເຊື້ອ​ອົງ­ອາດ​ກ້າ­ຫານ​ຕໍ່­ສູ້​ບໍ່​ຍອມ​ຈຳ­ນົນ​ເດັດ­ດ່ຽວ​ໜຽວ​ແໜ້ນ​ຂອງ​ປະ­ຊາ­ຊົນ​ເມືອງ​ວຽງ​ໄຊ ແຂວງ​ຫົວ­ພັນ ທີ່​ປະ­ກອບ­ສ່ວນ​ຢ່າງ​ຕັ້ງ­ໜ້າ​ຄຽງ​ບ່າ​ຄຽງ​ໄຫຼ່​ກັບ​ກຳ­ລັງ​ປະ­ກອບ​ອາ­ວຸດ ໃນ​ການ​ຕໍ່­ສູ້​ກັບ​ພວກ​ຈັກ­ກະ­ພັດ ແລະ ລູກ­ແຫຼ້ງ​ຕີນ​ມື​ຂາຍ​ຊາດ​ຂອງ​ພວກ​ມັນ ເພື່ອ​ຍາດ​ເອົາ​ເອ­ກະ­ລາດ ປະ­ຊາ­ທິ­ປະ­ໄຕ ແລະ ອິດ­ສະ­ຫຼະ­ພາບ​ມາ­ສູ່​ປະ­ຊາ­ຊົນ​ລາວ​ທັງ​ຊາດ.

    ການ​ສ້າງ­ຕັ້ງ​ເມືອງ​ວຽງ​ໄຊ ໃຫ້​ກາຍ­ເປັນ​ພື້ນ­ຖານ​ທີ່​ແໜ້ນ​ແກ່ນ ແລະ ເປັນ​ແນວ​ຫຼັງ​ອັນ​ໜັກ​ແໜ້ນ​ຂອງ​ການ​ປະ­ຕິ­ວັດ​ເຮົາ ໃນ​ໄລ­ຍະ​ຕໍ່­ສູ້​ຕ້ານ​ການ​ຮຸກ​ຮານ ແລະ ແຊກ​ແຊງ​ຂອງ​ພວກ​ລ່າ​ເມືອງ​ຂຶ້ນ ແລະ ເຮັດ​ສຳ­ເລັດ​ການ​ປະ­ຕິ­ວັດ​ຊາດ​ປະ­ຊາ­ທິ­ປະ­ໄຕ​ນັ້ນ​ເປັນ​ເຫດ­ການ​ອັນ​ໂດດ​ເດັ່ນ ແລະ ໃສ​ແຈ້ງ​ທີ່​ສຸດ​ອັນ​ໜຶ່ງ ທີ່​ສະ­ແດງ​ອອກ​ເຖິງ​ການ​ນຳ­ພາ​ອັນ​ຖືກ­ຕ້ອງ​ສະ­ຫຼາດ​ສ່ອງ​ໃສ​ຂອງ​ພັກ​ເຮົາ ທີ່​ຮູ້​ກຳ­ນົດ​ແນວ­ທາງ​ການ​ຕໍ່­ສູ້​ປະ­ຕິ­ວັດ​ຢ່າງ​ສອດ­ຄ່ອງ​ໂດຍ​ເອົາ​ຈິດ­ໃຈ​ຮັກ​ຊາດ​ອັນ​ດູດ­ດື່ມ ຕິດ​ພັນ​ກັບ​ລັດ­ທິ​ມາກ-ເລ​ນິນ ເອົາ​ຂະ​ບວນ​ການ​ປະ­ຕິ­ວັດ​ຂອງ​ປະ­ເທດ​ເຮົາ ຕິດ​ພັນ​ກັບ​ຂະ​ບວນ​ການ​ປະ­ຕິ­ວັດ​ຂອງ​ປະ­ເທດ​ເພື່ອນ​ມິດ​ຍຸດ​ທະ​ສາດ ແລະ ຂອງ​ໂລກ ນຳ­ພາ​ຂະ​ບວນ​ການ​ປະ­ຕິ­ວັດ​ຂອງ​ປະ­ເທດ​ເຮົາ ຍາດ​ເອົາ​ໄຊ­ຊະ­ນະ​ເທື່ອ​ລະ​ກ້າວ ແລະ ກ້າວ​ໄປ​ເຖິງ​ຍາດ​ເອົາ​ໄຊ­ຊະ­ນະ​ຢ່າງ​ສົມ­ບູນ.

ຂ່າວທີ່ກ່ຽວຂ້ອງ