ຂ່າວຫຼ້າສຸດ

ພ້ອມກັນຫັນມານຳໃຊ້ລົດເມ ທີ່ຈະເປັນທາງອອກໃນສະພາບລາຄານ້ຳມັນເພີ່ມຂຶ້ນ

246 19 ຕ.ລ. 2018 ຂ່າວໜ້າ​ໜຶ່ງ
ພ້ອມກັນຫັນມານຳໃຊ້ລົດເມ ທີ່ຈະເປັນທາງອອກໃນສະພາບລາຄານ້ຳມັນເພີ່ມຂຶ້ນ

    ລັດ​ວິ​ສາ​ຫະ​ກິດ​ລົດ­ເມ​ນະ­ຄອນ­ຫຼວງ​ວຽງ​ຈັນ (ນວ) ເປັນ​ບໍ­ລິ­ສັດ​ຂອງ​ລັດ​ທີ່​ດຳ­ເນີນ​ທຸ­ລະ​ກິດ​ບໍ­ລິ­ການ ຂົນ­ສົ່ງ​ໂດຍ­ສານ​ທາງ­ບົກ ດ້ວຍ​ລົດ­ເມ​ສາ­ທາ­ລະ­ນະ​ຢູ່​ຕົວ​ເມືອງ ນວ ປັດ­ຈຸ­ບັນ​ມີ​ສາຍ​ທາງ​ແລ່ນ​ຄື: ສາຍ​ທາງ​ທ່າ​ເດື່ອ ທ່າ​ງ່ອນ ເດີ່ນ​ບິນ​ສາ­ກົນ​ວັດ​ໄຕ ລົດ­ເມ​ສາຍ​ເໜືອ ລົດ­ເມ​ສາຍ​ໃຕ້ ທົ່ງ​ປົ່ງ ດົງ​ໂດກ ດົງ​ຄຳ​ຊ້າງ ແລະ ໂພນ​ຕ້ອງ ນອກ​ນີ້​ຍັງ​ມີ​ແຂວງ​ຄຳ​ມ່ວນ ສະ­ຫວັນ​ນະ​ເຂດ ແລະ ແຂວງ​ຈຳ­ປາ​ສັກ ໃຊ້​ນ້ຳ­ມັນ​ຮັບ​ໃຊ້​ການ​ຂົນ­ສົ່ງ​ປະ­ມານ 140.000 ລິດ​ຕໍ່​ເດືອນ ຖື​ວ່າ​ເປັນ​ບໍ­ລິ­ສັດ​ໜຶ່ງ​ທີ່​ນຳ​ໃຊ້​ນ້ຳ­ມັນ​ຫຼາຍ​ສົມ­ຄວນ ແລະ ໃນ​ເມື່ອ​ນ້ຳ­ມັນ​ມີ​ການ​ປັບ​ລາ­ຄາ​ສູງ​ຂຶ້ນ​ເລື້ອຍໆ ແນ່­ນອນ​ມັນ​ຕ້ອງ​ກະ­ທົບ​ຕໍ່​ທຸ­ລະ​ກິດ​ບໍ່​ຫຼາຍ​ກໍ່​ໜ້ອຍ.

    ທ່ານ ຄຳ​ພູນ ເຕ​ເມ​ລາດ ຜູ້­ອຳ­ນວຍ­ການ​ບໍ­ລິ­ສັດ ລັດ​ວິ​ສາ​ຫະ​ກິດ​ລົດ­ເມ ນວ ໃຫ້​ສຳ­ພາດ​ອາ­ທິດ​ຜ່ານ​ມາ​ນີ້​ວ່າ: ໃນ​ສະ­ພາບ​ປັດ­ຈຸ­ບັນ ມີ​ສິ່ງ​ທ້າ​ທາຍ​ຫຼາຍ​ຢ່າງ​ຕໍ່​ທຸ­ລະ​ກິດ​ລົດ­ເມ​ສາ­ທາ­ລະ­ນະ ເນື່ອງ​ຈາກ​ສະ­ພາບ​ການ​ແອ​ອັດ​ຂອງ​ລົດ​ນັບ​ມື້​ເພີ່ມ​ຂຶ້ນ ເຮັດ​ໃຫ້​ລົດ­ເມ​ບາງ​ສາຍ​ທາງ​ແລ່ນ​ບໍ່​ຖືກ​ຕາມ​ຕາ­ຕະ­ລາງ​ໂມງ ແລະ ຢູ່​ປະ­ເທດ​ເຮົາ ຍັງ​ບໍ່​ທັນ​ມີ​ເລນ​ສະ­ເພາະ​ລົດ­ເມ​ແລ່ນ​ຄື​ກັບ​ຢູ່​ຕ່າງ­ປະ­ເທດ ເຮັດ​ໃຫ້​ລົດ­ເມ​ຊ້າ​ໃນ​ເວ­ລາ​ເລັ່ງ​ດ່ວນ ນອກ​ນີ້ ລາ­ຄາ​ນ້ຳ­ມັນ​ກໍ່​ປັບ​ຕົວ​ຂຶ້ນ​ເລື້ອຍໆ ສົ່ງ​ຜົນ​ກະ­ທົບ​ຕໍ່​ລາຍ​ຈ່າຍ​ເພີ່ມ​ຂຶ້ນ​ແຕ່​ລາຍ​ຮັບ​ຍັງ​ຄື­ເກົ່າ ນັບ​ແຕ່​ປີ 2011 ເປັນ­ຕົ້ນ​ມາ ການ​ຂຶ້ນ​ລາ­ຄາ​ນ້ຳ­ມັນ​ຫຼາຍ​ຄັ້ງ​ແຕ່​ການ​ຂຶ້ນ​ລາ­ຄາ​ຜູ້­ໂດຍ­ສານ​ລົດ­ເມ​ນັບ​ແຕ່​ປີ 2011 ມາ​ຫາ­ກໍ່​ຂຶ້ນ​ເດືອນ​ເມ­ສາ 2018 ຕາມ​ການ​ຕົກ­ລົງ​ເຫັນ​ດີ​ຂອງ​ທ່ານ​ເຈົ້າ​ຄອງ ນວ ຄື: ສາຍ​ທາງ​ດົງ​ໂດກ​ຈາກ 3.000 ກີບ​ເປັນ 4.000 ກີບ ທ່າ​ງ່ອນ 5.000 ກີບ ເປັນ 7.000 ກີບ ທ່າ​ເດື່ອ 6.000 ກີບ ເປັນ 8.000 ກີບ ການ​ຄິດ­ໄລ່​ຂຶ້ນ​ລາ­ຄາ​ຜູ້­ໂດຍ­ສານ​ແມ່ນ​ອີງ­ໃສ່​ລາ­ຄາ​ນ້ຳ­ມັນ​ໃນ​ທ້າຍ​ປີ 2017 ເອົາ​ລາ­ຄາ​ນ້ຳ­ມັນ​ກາ​ຊວນ 6.705 ກີບ​ຕໍ່​ລິດ​ມາ​ຄິດ­ໄລ່ ແຕ່​ມາ​ຮອດ​ເດືອນ​ຕຸ­ລາ 2018 ລາ­ຄາ​ນ້ຳ­ມັນ​ກາ​ຊວນ 8.505 ກີບ​ຕໍ່​ລິດ (ລາ­ຄາ​ຂາຍ­ຍົກ​ນ້ຳ​ມາ​ລົງ​ປ້ຳ​ຂອງ​ບໍ­ລິ­ສັດ​ລົດ­ເມ) ແຕ່​ໄປ​ຕ່າງ​ແຂວງ​ໃຊ້​ລາ­ຄາ​ຂາຍ­ຍ່ອຍ​ທົ່ວ​ໄປ​ຕາມ​ປ້ຳ 8.690 ກີບ ທຽບ­ໃສ່​ເພີ່ມ​ຂຶ້ນ 1.805 ກີບ ແຕ່​ການ​ຈະ​ຂຶ້ນ​ລາ­ຄາ​ລົດ­ເມ​ແຕ່​ລະ​ຄັ້ງ ກໍ່​ຕ້ອງ​ຂໍ­ອະ­ນຸ­ຍາດ​ຈາກ​ເຈົ້າ​ຄອງ ນວ ກ່ອນ ຖ້າ​ເຫັນ​ດີ​ຈຶ່ງ​ເພີ່ມ​ຂຶ້ນ​ໄດ້​ບໍ່​ແມ່ນ​ຈະ​ຂຶ້ນ​ຕາມ­ໃຈ​ໄປ​ກັບ​ລາ­ຄາ​ນ້ຳ­ມັນ ດັ່ງ­ນັ້ນ ຈຶ່ງ​ພົບ​ຄວາມ​ຫຍຸ້ງ­ຍາກ​ໃນ​ໄລ­ຍະ​ຜ່ານ​ມາ.

    ເພື່ອ​ແກ້​ໄຂ​ບັນ­ຫາ​ດັ່ງ­ກ່າວ ຮຽກ­ຮ້ອງ​ມາ​ຍັງ​ສັງ­ຄົມ ກໍ່​ຄື​ປະ­ຊາ­ຊົນ​ຫັນ​ມາ​ນຳ​ໃຊ້​ລົດ­ເມ​ສາ­ທາ­ລະ­ນະ​ຫຼາຍ​ຂຶ້ນ​ກວ່າ​ເກົ່າ ທີ່​ຈະ​ເປັນ​ທາງ​ອອກ​ໃນ​ສະ­ພາບ​ລາ­ຄາ​ນ້ຳ­ມັນ​ຂຶ້ນ ໃຫ້​ຖືກ​ກັບ​ນະ­ໂຍ­ບາຍ​ຂອງ​ລັດ­ຖະ­ບານ ໃຫ້​ນຳ​ໃຊ້​ລົດ­ເມ​ສາ­ທາ­ລະ­ນະ​ຫຼາຍ​ຂຶ້ນ​ຫຼຸດ­ຜ່ອນ​ການ​ນຳ​ໃຊ້​ລົດ​ສ່ວນ​ຕົວ​ລົງ ປັດ­ຈຸ­ບັນ ບໍ­ລິ­ສັດ​ລົດ­ເມ​ໄດ້​ມີ​ການ​ປັບ­ປຸງ​ການ​ບໍ­ລິ­ການ​ຫຼາຍ​ຢ່າງ​ດີ​ຂຶ້ນ ໂດຍ​ສະ­ເພາະ​ເສັ້ນ­ທາງ​ສາຍ​ຫຼັກ​ດົງ​ໂດກ ທ່າ​ງ່ອນ ຊຽງ​ຄວນ ດອນ​ປ່າ​ໃໝ່ ຜູ້​ມີ​ເຮືອນ​ຢູ່​ເຂດ​ນອກ​ແຕ່​ບ່ອນ​ເຮັດ​ວຽກ​ຢູ່​ໃນ​ເມືອງ ໃກ້​ກັບ​ເສັ້ນ­ທາງ​ສາຍ​ລົດ­ເມ​ດັ່ງ­ກ່າວ ກໍ່​ໃຫ້​ຫັນ​ມາ​ໃຊ້​ລົດ­ເມ ແລະ ຕໍ່​ໄປ​ຈະ​ໄດ້​ສຳ​ຫຼວດ​ຄືນ­ໃໝ່ ຕ້ອງ​ໄດ້​ປັບ­ປຸງ​ຕາ­ຕະ­ລາງ​ແລ່ນ​ລົດ­ເມ​ຄືນ­ໃໝ່ ຈາກ​ເມື່ອ​ກ່ອນ​ລົດ​ໜ້ອຍ​ແຕ່​ປັດ­ຈຸ­ບັນ ລົດ​ຫຼາຍ​ເຮັດ​ໃຫ້­ການ​ແລ່ນ​ບໍ່​ກົງ​ກັບ​ເວ­ລາ​ເຮັດ​ໃຫ້​ຂາດ​ຄວາມ​ເຊື່ອ​ໝັ້ນ​ຂອງ​ພະ­ນັກ­ງານ ແລະ ນັກ​ສຶກ​ສາ​ທີ່​ໃຊ້​ບໍ­ລິ­ການ​ເນື່ອງ​ຈາກ​ບໍ່​ທັນ​ການ ຄູ-ອາ­ຈານ​ບໍ່​ທັນ​ໂມງ​ສອນ​ຮຽນ ແລະ ນັກ​ສຶກ​ສາ​ບໍ່​ທັນ​ເຂົ້າ​ຮຽນ ຖ້າ​ສາ­ມາດ​ຄຸ້ມ​ຄອງ​ເວ­ລາ ແລະ ບໍ­ລິ­ການ​ວ່ອງ­ໄວ ຈະ​ເຮັດ​ໃຫ້​ສາ­ມາດ​ດຶງ​ດູດ​ຜູ້­ໂດຍ­ສານ​ໄດ້​ຢ່າງ​ແນ່­ນອນ.

ຂ່າວທີ່ກ່ຽວຂ້ອງ