ຂ່າວຫຼ້າສຸດ

ກະສິກຳອິນຊີທົ່ງມັ່ງ ສະໜອງພືດຜັກໃຫ້ຕະຫຼາດ 100 ກິໂລ

174 19 ຕ.ລ. 2018 ຂ່າວໜ້າ​ໜຶ່ງ
ກະສິກຳອິນຊີທົ່ງມັ່ງ ສະໜອງພືດຜັກໃຫ້ຕະຫຼາດ 100 ກິໂລ

    ກຸ່ມ​ກະ­ສິ­ກຳ​ອິນ​ຊີ​ບ້ານ​ທົ່ງ​ມັ່ງ ເມືອງ​ໄຊ​ທາ­ນີ ເປັນ​ກຸ່ມ​ກະ­ສິ­ກຳ​ກຸ່ມ​ໜຶ່ງ​ທີ່​ນອນ​ຢູ່​ໃນ​ກຸ່ມ​ກະ­ສິ­ກຳ​ອິນ​ຊີ ນະ­ຄອນ­ຫຼວງ​ວຽງ​ຈັນ (ນວ) ເຊິ່ງ​ສາ­ມາດ​ສະ­ໜອງ​ຜົນ​ຜະ­ລິດ​ພືດ​ຜັກ ແລະ ໝາກ​ໄມ້​ອາ­ທິດ​ໜຶ່ງ​ບໍ່​ຫຼຸດ 100 ກິ​ໂລ​ປ້ອນ​ຕະ­ຫຼາດ​ກະ­ສິ­ກຳ​ອິນ​ຊີ ແລະ ໃນ​ອະ­ນາ­ຄົດ​ມີ​ແຜນ​ຂະ­ຫຍາຍ​ເນື້ອ­ທີ່​ປູກ ເພື່ອ​ເພີ່ມ​ຈຳ­ນວນ​ຜົນ​ຜະ­ລິດ​ໃຫ້​ສາ­ມາດ​ສະ­ໜອງ​ຕະ­ຫຼາດ​ໄດ້​ຢ່າງ​ພຽງ­ພໍ.

    ທ່ານ​ນາງ ຄຳ​ມອນ ຫຼວງ​ລາດ ປະ­ທານ​ກຸ່ມ​ກະ­ສິ­ກຳ​ອິນ​ຊີ​ບ້ານ​ທົ່ງ​ມັ່ງ ໄດ້​ໃຫ້​ສຳ­ພາດ​ວັນ​ທີ 18 ຕຸ­ລາ 2018 ວ່າ: ໃນ​ເມື່ອ​ກ່ອນ​ຊາວ​ກະ­ສິ­ກອນ​ບ້ານ​ທົ່ງ​ມັ່ງ ໄດ້​ປູກ​ພືດ​ຜັກ​ກະ­ສິ­ກຳ​ອິນ​ຊີ​ແບບ​ປະ­ຖົມ​ປະ​ຖານ​ບໍ່​ມີ​ເຕັກ­ນິກ​ທີ່​ແນ່­ນອນ ຈຶ່ງ​ສົ່ງ​ຜົນ​ໃຫ້​ບໍ່​ສາ­ມາດ​ນຳ​ເອົາ​ຜົນ​ຜະ­ລິດ​ເຂົ້າ​ໄປ​ຈຳ­ໜ່າຍ​ໃນ​ຕະ­ຫຼາດ​ກະ­ສິ­ກຳ​ອິນ​ຊີ​ໄດ້ ກໍ່​ຄື​ບໍ່​ສາ­ມາດ​ເຂົ້າ​ຮ່ວມ​ກຸ່ມ​ກະ­ສິ­ກຳ​ອິນ​ຊີ ນວ ໄດ້ ຈຶ່ງ​ໄດ້​ຢຸດ​ເຊົາ ຕົກ​ມາ​ປີ 2016 ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ​ໄຊ​ທາ­ນີ ຈຶ່ງ​ໄດ້​ລົງ​ມາ​ຊຸກ­ຍູ້​ສົ່ງ­ເສີມ​ໃຫ້​ປະ­ຊາ­ຊົນ​ປູກ ໃນ​ຮູບ​ແບບ​ກະ­ສິ­ກຳ​ອິນ​ຊີ​ອີກ​ຄັ້ງ​ໜຶ່ງ ໂດຍ​ໄດ້​ນຳ​ເຕັກ​ວິ­ຊາ​ການ ມາ​ເຝິກ­ອົບ­ຮົມ​ໃຫ້​ຊາວ​ກະ­ສິ­ກອນ​ປູກ​ໃນ​ຮູບ​ແບບ​ດັ່ງ­ກ່າວ​ໃຫ້​ຖືກ​ຕາມ​ມາດ­ຖານ ຫຼັງ​ຈາກ​ນັ້ນ ຈຶ່ງ​ໄດ້​ສ້າງ­ຕັ້ງ​ກຸ່ມ​ກະ­ສິ­ກຳ​ທົ່ງ​ມັ່ງ​ຂຶ້ນ​ແລ້ວ­ໄປ​ເຊົ່າ​ດິນ 2 ເຮັກ­ຕາ ເພື່ອ​ປູກ​ພືດ​ຜັກ ແລ້ວ​ກໍ່​ໄດ້​ສະ­ໝັກ​ເຂົ້າ​ກຸ່ມ​ກະ­ສິ­ກຳ​ອິນ​ຊີ ນວ ໄດ້​ສຳ­ເລັດ​ໂດຍ​ມີ​ສະ­ມາ­ຊິກ​ເຂົ້າ​ຮ່ວມ​ກຸ່ມ 22 ຄອບ­ຄົວ ຈາກ​ນັ້ນ ກໍ່​ໄດ້​ຂະ­ຫຍາຍ​ເນື້ອ­ທີ່​ປູກ​ໄດ້​ທັງ​ໝົດ 22 ເຮັກ­ຕາ ໃນ​ນັ້ນ ລວມ​ທັງ​ເນື້ອ­ທີ່​ປູກ​ຜັກ ແລະ ໄມ້​ໃຫ້​ໝາກ​ຕ່າງໆ​ເຊັ່ນ: ໝາກ­ກ້ວຍ ໝາກ​ເງາະ ໝາກ​ລີ້ນ­ຈີ່ ປັດ­ຈຸ­ບັນ​ມີ 45 ເຮືອນ​ຮົ່ມ ສະ­ເລ່ຍ​ອາ­ທິດ​ໜຶ່ງ​ສາ­ມາດ​ສະ­ໜອງ​ພືດ​ຜັກ ແລະ ໝາກ​ໄມ້​ໄດ້ 100 ກິ​ໂລ ໃນ​ການ­ຈຳ­ໜ່າຍ​ສ່ວນ​ໜຶ່ງ​ໄດ້​ມີ​ແມ່​ຄ້າ​ຄົນ​ກາງ​ມາ​ຊື້​ກັບ​ທີ່ ແລະ ອີກ​ສ່ວນ​ໜຶ່ງ​ໄດ້​ນຳ­ໄປ​ຂາຍ​ຢູ່​ຕະ­ຫຼາດ​ກະ­ສິ­ກຳ​ອິນ​ຊີ ຢູ່​ໜ້າ​ສູນ​ການ​ຄ້າ​ວຽງ​ຈັນ​ເຊັນ​ເຕີ ສະ­ເລ່ຍ​ລາຍ​ຮັບ​ຂອງ​ສະ­ມາ­ຊິກ​ກຸ່ມ ຄື: ໄລ­ຍະ​ລະ­ດູ­ຝົນ​ຈະ​ສາ­ມາດ​ສ້າງ​ລາຍ​ຮັບ​ໄດ້​ສູງ​ກວ່າ​ລະ­ດູ­ແລ້ງ​ນັ້ນ ກໍ່​ຍ້ອນ​ລະ­ດູ​ນີ້​ການ​ຜະ­ລິດ​ພືດ​ຜັກ​ຂອງ​ຊາວ​ກະ­ສິ­ກອນ ໄດ້​ຮັບ​ຜົນ​ຜະ­ລິດ​ບໍ່​ຫຼາຍ​ສົ່ງ​ຜົນ​ໃຫ້​ພືດ​ຜັກ​ໃນ​ຕະ­ຫຼາດ​ມີ​ໜ້ອຍ ຈຶ່ງ​ເຮັດ​ໃຫ້​ລາ­ຄາ​ພືດ​ຜັກ​ສູງ​ຂຶ້ນ ສະ­ເລ່ຍ​ເດືອນ​ໜຶ່ງ​ສ້າງ​ລາຍ​ຮັບ​ໄດ້​ບໍ່​ຕ່ຳ​ກວ່າ 4,5 ລ້ານ​ກີບ​ຕໍ່​ຄອບ­ຄົວ ສ່ວນ​ລະ­ດູ­ແລ້ງ​ຈະ​ໄດ້​ລາຍ​ຮັບ​ປະ­ມານ 3 ລ້ານ​ກີບ​ຕໍ່​ຄອບ­ຄົວ.

    ສຳ­ລັບ​ທິດ​ທາງ​ແຜນ­ການ​ຕໍ່­ໜ້າ ຈະ​ໄດ້​ຂະ­ຫຍາຍ​ເນື້ອ­ທີ່​ປູກ​ເພີ່ມ​ຂຶ້ນ​ຄຽງ​ຄູ່​ກັບ​ຂະ­ຫຍາຍ​ສະ­ມາ­ຊິກ​ກຸ່ມ ພ້ອມ​ທັງ​ເພີ່ມ​ການ​ປູກ​ພືດ​ສະ​ໜຸນ​ໄພ​ເຊັ່ນ: ຫຍ້າ​ລີ​ແພ ຫວ້ານ​ຊັກ​ມົດ​ລູກ ແລະ ຫວ້ານ​ຫອມ ເພື່ອ​ຫວັງ​ຈະ​ນຳ​ເອົາ​ພືດ​ສະ​ໝູນ​ໄພ​ດັ່ງ­ກ່າວ ມາ​ແປ​ຮູບ​ເປັນ​ຜະ­ລິດ​ຕະ​ພັນ​ເພີ່ມ​ທາງ​ເລືອກ ໃຫ້​ແກ່​ຜູ້​ບໍ­ລິ­ໂພກ​ໃນ​ການ​ຮັກ­ສາ​ສຸ­ຂະ­ພາບ.

ຂ່າວທີ່ກ່ຽວຂ້ອງ