ອົງການໄຈກາ ສືບຕໍ່ສົ່ງອາສາສະໝັກມາເຮັດວຽກຢູ່ລາວ

442 19 ຕ.ລ. 2018 ຂ່າວໜ້າ​ໜຶ່ງ

    ວັນ​ທີ 17 ຕຸ­ລາ 2018 ສະ­ຖານ­ທູດ​ຍີ່­ປຸ່ນ​ປະ­ຈຳ​ລາວ ໄດ້​ຈັດ​ພິ­ທີ​ຕ້ອນ­ຮັບ​ອາ­ສາ​ສະ­ໝັກ​ໄຈ​ກາ (JICA) 4 ຄົນ ຍິງ 1 ຄົນ ຈາກ​ປະ­ເທດ​ຍີ່­ປຸ່ນ ທີ່​ເດີນ­ທາງ​ມາ​ປະ­ຕິ­ບັດ​ໜ້າ­ທີ່​ຢູ່​ລາວ​ເປັນ​ເວ­ລາ 2 ປີ ເພື່ອ​ສະ­ໜັບ­ສະ­ໜູນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ມີ​ທ່ານ ທາ​ເຄ​ຊິ ຮິ​ຄິ​ຮາ​ຣະ ເອກ​ອັກ­ຄະ­ລາ­ຊະ­ທູດ​ຍີ່­ປຸ່ນ​ປະ­ຈຳ​ລາວ ທ່ານ​ນາງ ສີ​ສົມ­ບູນ ອຸ່ນ​ນະ​ວົງ ຫົວ­ໜ້າ​ກົມ​ຮ່ວມ​ມື​ສາ­ກົນ ກະ­ຊວງ​ແຜນ­ການ ແລະ ການ​ລົງ­ທຶນ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ກະ­ຊວງ ສຳ­ນັກ­ງານ ແລະ ຫ້ອງ­ການ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ທູດ​ຍີ່­ປຸ່ນ ໄດ້​ກ່າວ​ວ່າ: ນັບ​ແຕ່​ປີ 1965 ເປັນ­ຕົ້ນ​ມາ ມີ​ອາ­ສາ​ສະ­ໝັກ​ຂອງ​ອົງ­ການ​ໄຈ​ກາ 992 ຄົນ ທີ່​ຖືກ​ສົ່ງ​ມາ​ປະ­ຕິ­ບັດ​ໜ້າ­ທີ່​ຢູ່​ລາວ ໃນ​ຫຼາຍ​ຂະ­ແໜງ­ການ​ຂອບ​ເຂດ​ທົ່ວ​ປະ­ເທດ ແລະ ປັດ­ຈຸ­ບັນ ຈຳ­ນວນ​ອາ­ສາ​ສະ­ໝັກ​ໄຈ​ກາ​ທີ່​ພວມ​ປະ­ຕິ­ບັດ​ໜ້າ­ທີ່​ຢູ່​ລາວ​ມີ​ທັງ​ໝົດ 43 ຄົນ ໃນ​ນັ້ນ ມີ​ອາ­ສາ​ສະ­ໝັກ​ຊາວ​ໜຸ່ມ 38 ຄົນ ແລະ ອາ­ສາ​ສະ­ໝັກ​ຜູ້​ອາ­ວຸ­ໂສ 5 ຄົນ ເຊິ່ງ​ອາ­ສາ​ສະ­ໝັກ​ກຸ່ມ​ນີ້​ຈະ​ສືບ­ຕໍ່​ຊ່ວຍ­ເຫຼືອ ເສີມ​ຂະ­ຫຍາຍ​ມິດ­ຕະ­ພາບ ແລະ ຄວາມ​ຮ່ວມ​ມື​ລະ­ຫວ່າງ​ສອງ​ປະ­ເທດ ໂດຍ​ຜ່ານ​ການ​ຖ່າຍ​ທອດ​ວິ­ຊາ​ຄວາມ​ຮູ້​ຄວາມ​ສາ­ມາດ ແລະ ແລກ­ປ່ຽນ​ປະ­ສົບ​ປະ­ການ​ເຊິ່ງ​ກັນ ແລະ ກັນ.

    ອາ­ສາ​ສະ­ໝັກ​ໄຈ​ກາ 4 ຄົນ​ທີ່​ເດີນ­ທາງ​ມາ​ຄັ້ງ​ນີ້ ຈະ​ມາ​ເຮັດ​ວຽກ​ກ່ຽວ​ກັບ​ການ​ລ້ຽງ­ສັດ​ນ້ຳ (ການ​ປະ­ມົງ) ການ​ກີ­ລາ ສອນ​ພາ­ສາ​ອັງ­ກິດ ແລະ ການ​ພັດ­ທະ­ນາ​ຊຸມ​ຊົນ ເຊິ່ງ​ມີ 3 ຄົນ​ຈະ​ເຮັດ​ວຽກ​ຢູ່​ນະ­ຄອນ­ຫຼວງ​ວຽງ​ຈັນ ແລະ ອີກ 1 ຄົນ​ຈະ​ເຮັດ​ວຽກ​ຢູ່​ແຂວງ​ຫຼວງ​ພະ​ບາງ.

ຂ່າວທີ່ກ່ຽວຂ້ອງ