ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 18-10-2018

183 18 ຕ.ລ. 2018 ຫົວຂໍ້ຂ່າວອື່ນໆ

      ຄໍ​ລຳ​ປະຈຳ​ວັນ​ນີ້ ມີ​ເລື່ອງ​ທາງ​ການ​ຂອງ​ສິງກະໂປ ເຄັ່ງ​ລະບຽບ​ຄວບ​ຄຸມ​ບັນດາ​ຄຣີ​ນິກ​ປິ່ນປົວ ເລື່ອງ​ຊາຍ​ມາ​ເລ​ເຊຍ​ຖືກ​ຈັບ​ຢູ່​ອົດ​ສະ​ຕຣາ​ລີ ຍ້ອນ​ນຳ​ເຂົ້າ​ຮູບ​ໂປ້​ເດັກ ສຸດ​ທ້າຍ​ແມ່ນ​ຂ່າວ​ເຈົ້າ​ໜ້າທີ່​ຕຳຫຼວດ ບຸກ​ເລີກ​ຮື້​ສື່​ສັງຄົມ​ອອນ​ລາຍ​ທີ່​ເປັນ​ອັນຕະລາຍ.

       ທີ່​ສິງກະໂປ: ໜັງສືພິມ​ວຽງ​ຈັນ​ທາມ ປະຈຳ​ວັນ​ທີ 11 ເດືອນ​ຕຸລາ​ປີ​ນີ້​ໃຫ້​ຮູ້​ວ່າ ເຈົ້າ​ໜ້າທີ່​ຕຳຫຼວດ​ໄດ້​ຕິດຕາມ​ຄຣີ ນິກ​ປິ່ນປົວ​ທົ່ວ​ໄປ 10 ແຫ່ງ ທີ່​ຖືກ​ສົງໄສ​ວ່າ​ມີ​ພຶດຕິ​ກຳ​ຫຼອກ​ລວງ ຄຣີ​ນິກ​ເຫຼົ່າ​ນີ້​ລ້ວນ​ແຕ່​ໄດ້​ຮັບ​ທຶນ​ສະໜັບສະໜູນ​ຈາກ​ລັດຖະບານ​ພາຍ​ໃຕ້​ໂຄງການ​ຊ່ວຍເຫຼືອ​ສຸຂະພາບ​ຊຸມ​ຊົນ (community Health Assist Scheme-char) ການ​ຕິດຕາມ​ຂອງ​ເຈົ້າ​ໜ້າທີ່​ມີ​ຂຶ້ນ​ພາຍຫຼັງ​ມີ​ບັນຫາ​ສົງໄສ​ຫຼາຍໆ​ຢ່າງ ວ່າ​ຄຣີ​ນິກ​ປິ່ນປົວ​ເຫຼົ່າ​ນີ້​ໄດ້​ໃຫ້​ບໍລິການ​ຊຸມ​ຊົນ​ແທ້​ຫຼື ບໍ່ ກະຊວງ​ສາທາລະນະ​ສຸກ​ທີ່​ສະເໜີ​ໃຫ້​ເຈົ້າ​ໜ້າທີ່​ຕຳຫຼວດ​ດຳເນີນ​ການ​ຕິດຕາມ​ນີ້​ຍັງ​ຈະ​ໄດ້​ສະເໜີ​ໃຫ້​ສະພາ​ການ​ແພດ ສິງກະໂປ​ກວດກາ​ການ​ປະພຶດ​ຂອງ​ບັນດາ​ທ່ານໝໍ​ທີ່​ປະຈຳການ​ຢູ່​ຄຣີ​ນິກ​ເຫຼົ່າ​ນີ້ ສະພາ​ການ​ແພດ​ສິງກະໂປ(SMC) ມີໜ້າ​ທີ່​ຕິດຕາມ​ກວດກາ​ຜູ້​ປະກອບ​ອາຊີບ​ເປັນ​ນາຍ​ແພດ​ທັງ​ໝົດ ບົດ​ແຈ້ງ​ການ​ຂອງ​ກະຊວງ​ສາທາລະນະ​ສຸກ​ສິງກະໂປ ທີ່​ໄດ້​ເປີດເຜີຍ​ໃນ​ວັນ​ທີ 10 ເດືອນ​ຕຸລາ​ນີ້​ໃຫ້​ຮູ້​ວ່າ ການ​ກວດ​ສອບ​ຄຣີ​ນິກ​ທັງ 10 ແຫ່ງ ໄດ້​ສະແດງ​ໃຫ້​ເຫັນ​ວ່າ ຄຣີ​ນິກ​ເຫຼົ່າ​ນີ້​ບໍ່​ໄດ້​ປະຕິບັດ​ຕາມ​ຄວາມ​ຮັບຜິດຊອບ​ທີ່​ຖືກ​ມອບ​ໝາຍ​ໂດຍ​ໂຄງການ​ຊ່ວຍເຫຼືອ​ສຸຂະພາບ​ຂອງ​ຊຸມ​ຊົນ ເຊັ່ນ: ຂໍ້​ມູນ​ທີ່​ບໍ່​ມີ​ເອກະສານ ເປັນ​ຫຼັກການ​ຢັ້ງຢືນ​ກ່ຽວ​ກັບ​ການ​ເຂົ້າ​ຮັບ​ການ​ປິ່ນປົວ​ຂອງ​ຄົນ​ເຈັບ ແລະ ກ່ຽວ​ກັບ​ອາການ​ຊຳ​ເຮື້ອ​ຕ່າງໆ ໃນ​ປີ 2017 ທາງ​ກະຊວງ​ສາທາລະນະ​ສຸກ​ສິງກະໂປ ໄດ້​ສັ່ງ​ປິດ​ຄຣີ​ນິກ​ປິ່ນປົວ​ທົ່ວ​ໄປ 3 ແຫ່ງ ແລະ ສັ່ງ​ປິດ​ຄຣີ​ນິກ​ປົວ​ແຂ້ວ 2 ແຫ່ງ ໃນ​ປີ 2016 ໂດຍ​ໄດ້​ມອບ​ບັນຫາ​ຄະດີ​ໃຫ້​ເຈົ້າ​ໜ້າທີ່​ຕຳຫຼວດ​ເຮັດ​ການ​ສອບ​ສວນ.

      ທີ່​ມາ​ເລ​ເຊຍ: ມີ​ຂ່າວ​ຈາກ​ມາ​ເລ​ເຊຍ ໃນ​ທ້າຍ​ເດືອນ​ມີນາ​ປີ​ນີ້​ວ່າ ທາງ​ການ​ຂອງ​ປະເທດ​ອົດ​ສະ​ຕຣາ​ລີ ໄດ້​ຈັບ​ກຸມ​ຄົນ​ມາ​ເລ​ເຊຍ ອາຍຸ 27 ປີ ຍ້ອນ​ໄດ້​ນຳ​ຮູບ​ພາບ ແລະ ວີ​ດີ​ໂອ​ລາມົກ​ອານາ​ຈານ​ເດັກ​ເຂົ້າ​ປະເທດ ຂ່າວ​ບອກ​ວ່າ​ເຈົ້າ​ໜ້າທີ່​ຕຳຫຼວດ​ປະຈຳ​ສະໜາມ​ບິນ​ສາກົນ​ນະຄອນ​ເມວ​ເບີນ ໄດ້​ຄົ້ນ​ພົບ​ຮູບ​ພາບ 900 ຮູບ ແລະ ວີ​ດີ​ໂອ​ດັ່ງກ່າວ​ຢູ່​ຄອມ​ພິວ​ເຕີ ແລບ​ທອບ ແລະ ໂທລະສັບ​ມື​ຖື​ຂອງ​ຜູ້ກ່ຽວ ຊາຍ​ເຈົ້າ​ບັນຫາ​ຜູ້​ນີ້ ໄດ້​ບິນ​ຈາກ​ນະຄອນຫຼວງ​ກົວ​ລາ​ລຳ​ເປີ ສູ່​ສະໜາມ​ບິນ​ເມວ​ເບີນ ຕາມ​ກົດໝາຍ​ຂອງ​ອົດ​ສະ​ຕຣາ​ລີ ຜູ້​ມີ​ຄວາມ​ຜິດ​ຖານ​ໄດ້​ນຳ​ເຂົ້າ​ຮູບ​ພາບ ຫຼື ວີ​ດີ​ໂອ ອານາ​ຈານ​ເດັກ​ຈະ​ຖືກ​ປັບ​ໃໝ​ສູງ​ສຸດ 180.000 ໂດ​ລາ​ສະຫະລັດ ຫຼື ຖືກ​ຈຳ​ຄຸກ​ສູງ​ສຸດ 10 ປີ ຫຼື​ທັງ​ຮັບ​ໂທດ​ຕິດ​ຄຸກ ແລະ ທັງ​ເສຍ​ຄ່າ​ປັບ​ໃໝ.

     ທີ່​ບຣາ​ຊິນ: ໃນ​ພາກ​ພື້ນ​ອາ​ເມ​ຣິ​ກາ​ໃຕ້ ຫຼື ອາ​ເມ​ຣິ​ກາ​ລາ​ຕິນ​ນັ້ນ ບຣາ​ຊິນ ເປັນ​ປະເທດ​ໜຶ່ງ​ທີ່​ປະ​ເຊີນ​ກັບ​ບັນຫາ ອາ​ຊະ​ຍາ​ກຳ​ໃນ​ລະດັບ​ສູງ​ຢ່າງ​ຕໍ່​ເນື່ອງ​ມາ​ເປັນ​ເວລາ​ຫຼາຍ​ທົດ​ສະ​ວັດ ຕົກ​ມາ​ໃນ​ຍຸກ​ປັດຈຸບັນ ບຣາ​ຊິນ​ຕ້ອງ​ໄດ້​ສູ້​ຍັນ​ກັບ​ອາ​ຊະ​ຍາ​ກຳ​ໃນ​ຮູບ​ແບບ​ໃໝ່​ທີ່​ມາ​ພ້ອມໆ​ກັບ​ວິວັດທະນາ​ການ​ດ້ານ​ສື່​ໃນ​ຍຸກ​ດີ​ຈີ​ຕອນ ນັ້ນ ກໍ່​ຄື ການ​ແຜ່​ລະບາດ​ຂອງ​ເວັບ​ໄຊ​ທີ່​ຍຸຍົງ​ສົ່ງເສີມ​ຄວາມ​ລັງ​ກຽດ​ຄຽດ​ຊັງ​ກັນ​ພາຍ​ໃນ​ສັງຄົມ ຂໍ້ຄວາມ​ຂົ່ມຂູ່​ຄວາມ​ສະຫງົບ​ສຸກ ກໍ່​ຄື ການ​ປຸກ ລະດົມ​ການ​ກະທຳ​ກໍ່​ການ​ຮ້າຍ​ຜ່ານ​ໜ້າ​ຈໍ ເພື່ອ​ແກ້​ໄຂ​ເວັບ​ໄຊ​ອັນຕະລາຍ​ນີ້ ກອງ​ບັນຊາ​ການ​ຕຳຫຼວດ​ສູງ​ກາງ ໄດ້​ເປີດ​ບັ້ນ​ກວາດ​ລ້າງ​ຊື່ວ່າ ບຼາ​ວາຕາ(bravata) ໃນ​ຕົ້ນ​ເດືອນ​ພຶດສະພາ ປີ​ນີ້ ໃນ​ເມືອງ​ຣີ​ໂອ​ເດ​ຊານ​ເນ​ໂຣ ເມືອງ​ຊາວ​ໂປໂລ ເຣ​ຊີ​ເຟ ກູ​ຣິ​ຕີ​ບາ ຊານ​ຕາ​ມາ​ເຣຍ ແລະ ວີ​ລາ ເວວ​ຮາ ໜ່ວຍ​ປະຕິບັດ​ງານ ສາມາດ​ຈັບ​ກຸມ​ຫົວ​ໂປ່​ໃຫຍ່​ຊື່ ທ້າວ ໝາກ​ເຊ​ໂລ ພ້ອມ​ດ້ວຍ​ຜູ້​ຮ່ວມ​ງານ​ຂອງ​ເຂົາ​ອີກ 6 ຄົນ ທ້າວ​ມາກ​ເຊ​ໂລ ແມ່ນ​ໂຕ​ການຈັດຕັ້ງ ແລະ ນຳ​ໃຊ້​ສື່​ສັງຄົມ​ອອນ​ລາຍ​ເພື່ອ​ກະຈາຍ​ຄວາມ​ກຽດ​ຊັງ ລະຫວ່າງ ເຊື້ອ​ຊາດ​ເຜົ່າ​ພັນ ແລະ ອຸດົມ​ການ​ຟາດ​ຊິດ​ໃໝ່ ປຸກລະດົມ​ການ​ໃຊ້​ຄວາມ​ຮຸນ​ແຮງ​ຕ້ານ​ຄົນ​ຜິວ​ດຳ ກຸ່ມ​ຄົນ​ຮັກ​ຮ່ວມ​ເພດ ແລະ ແມ່ຍິງ​ພ້ອມ​ທັງ​ຊຸກຍູ້​ການ​ຄາຕະກຳ ແລະ ຂົ່ມຂືນ ຜ່ານ​ການ​ສອບ​ສວນ​ເຈົ້າ​ໜ້າທີ່​ໄດ້​ພົບ​ວ່າ​ກຸ່ມ​ຄົນ​ບໍ່​ດີ​ດັ່ງກ່າວ​ເປັນ​ຕົວ​ການ​ຂູ່​ວາງ​ລະເບີດ​ຕາມ​ມະຫາວິທະຍາໄລ​ຕ່າງໆ​ໃນ​ທົ່ວ​ປະເທດ​ຫວ່າງ​ບໍ່​ດົນ​ມາ​ນີ້.

ຂ່າວທີ່ກ່ຽວຂ້ອງ