ປະທານແລ່ນ-ລານ ນວ ມອບເງິນຊຸກຍູ້ນັກກີລາ ຊຸດກຽມ “ຊຽງຂວາງ ເກມ”

375 18 ຕ.ລ. 2018 ວົງຈອນກີລາ
ປະທານແລ່ນ-ລານ ນວ ມອບເງິນຊຸກຍູ້ນັກກີລາ ຊຸດກຽມ “ຊຽງຂວາງ ເກມ”

    ພິ­ທີ​ມອບ-ຮັບ​ເງິນ​ຊຸກ­ຍູ້​ໃຫ້​ກັບ​ທັບ​ນັກ­ກີ­ລາ​ແລ່ນ-ລານ ນະ­ຄອນ­ຫຼວງ​ວຽງ​ຈັນ (ນວ) ຊຸດ​ກຽມ​ຄວາມ​ພ້ອມ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ຫຼື “ຊຽງ​ຂວາງ ເກມ” ໄດ້​ຈັດ​ຂຶ້ນ​ວັນ​ທີ 15 ຕຸ­ລາ 2018 ຜ່ານ​ມາ ທີ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ ນວ ໂດຍ​ຕາງ­ໜ້າ​ກ່າວ​ມອບ​ຂອງ​ທ່ານ ອາ​ຕີ້ ເທບ​ພະ​ວົງ ຮອງ​ປະ­ທານ​ສະ­ຫະ­ພັນ​ກີ­ລາ​ແລ່ນ-ລານ ນວ ແລະ ກ່າວ​ຮັບ​ແມ່ນ​ທ່ານ​ນາງ ສຸກ​ສະ­ຫວັນ ມາ­ລີ​ວັນ ເລ­ຂາ­ທິ­ການ​ສະ­ຫະ­ພັນ​ກີ­ລາ​ແລ່ນ-ລານ ນວ ມີ​ທ່ານ ສິດ­ທິ­ໄຊ ສັກ​ປະ­ເສີດ ຄູ​ເຝິກ​ກີ­ລາ​ແລ່ນ-ລານ ນວ ພ້ອມ​ດ້ວຍ​ຄູ​ເຝິກ ແລະ ນັກ­ກີ­ລາ ເຂົ້າ​ຮ່ວມ​ເປັນ​ສັກ­ຂີ​ພິ­ຍານ.

    ໂອ­ກາດ​ນີ້ ທ່ານ ອາ​ຕີ້ ເທບ​ພະ​ວົງ ກ່າວ​ວ່າ: ສຳ­ລັບ​ເງິນ​ຈຳ­ນວນ​ດັ່ງ­ກ່າວ ແມ່ນ​ມອບ​ໃຫ້​ກັບ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ​ແລ່ນ-ລານ ນວ ຈຳ­ນວນ 46 ຄົນ ໃນ​ນີ້ ຄູ​ເຝິກ ຈຳ­ນວນ 7 ທ່ານ ຍິງ 2 ທ່ານ ແລະ ນັກ­ກີ­ລາ ຈຳ­ນວນ 39 ຄົນ ຍິງ 18 ຄົນ ເພື່ອ​ເປັນ​ຄ່າ​ໃຊ້​ຈ່າຍ​ເປັນ​ຄ່າ​ນ້ຳ­ມັນ ຈັດ​ຊື້​ອຸ­ປະ­ກອນ ແລະ ອື່ນໆ ເຂົ້າ​ໃນ​ການ​ເຝິກ­ຊ້ອມ​ຂອງ​ທັບ​ນັກ­ກີ­ລາ​ແລ່ນ-ລານ ນວ ເຊິ່ງ​ເລີ່ມ​ເກັບ​ຕົວ​ເຝິກ­ຊ້ອມ​ມາ​ແຕ່​ວັນ​ທີ 17 ກໍ­ລະ­ກົດ ຫາ ວັນ​ທີ 16 ກັນ­ຍາ 2018 ເພື່ອ​ກຽມ​ຄວາມ​ພ້ອມ​ເຂົ້າ​ຮ່ວມ ຊຽງ​ຂວາງ ເກມ ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ ລະ­ຫວ່າງ​ວັນ​ທີ 11-21 ພະ­ຈິກ 2018 (ທີ່​ກຳ­ນົດ​ໄວ້​ໃນ​ເບື້ອງ​ຕົ້ນ) ກ່ອນ​ງານ​ແຂ່ງ­ຂັນ​ກີ­ລາ​ດັ່ງ­ກ່າວ ຈະ​ຖືກ​ເລື່ອນ​ໃຫ້​ໄປ​ຈັດ​ໃນ​ທ້າຍ​ປີ 2019 ແທນ​ໃນ​ເວ­ລາ​ຕໍ່​ມາ.

ຂ່າວທີ່ກ່ຽວຂ້ອງ