ນັກ​ວິໄຈ ຄິດ​ຄົ້ນ​ແຜນທີ່​ເຂດ​ທີ່​ສ່ຽງ​ດິນ​ຖະ​ຫຼົ່ມ​ທົ່ວ​ໂລກ​ເພື່ອ​ຊ່ວຍ​ເຕືອນ​ໄພ​ລ່ວງ​ໜ້າ

211 16 ຕ.ລ. 2018 ຫົວຂໍ້ຂ່າວອື່ນໆ
ນັກ​ວິໄຈ ຄິດ​ຄົ້ນ​ແຜນທີ່​ເຂດ​ທີ່​ສ່ຽງ​ດິນ​ຖະ​ຫຼົ່ມ​ທົ່ວ​ໂລກ​ເພື່ອ​ຊ່ວຍ​ເຕືອນ​ໄພ​ລ່ວງ​ໜ້າ

     ໄພ​ທຳ​ມະ​ຊາດ ດິນ​ຖະ​ຫຼົ່ມ ສ້າງ​ຄວາມ​ເສຍ​ຫາຍ​​ແກ່​ທັງ​ຊີວິດ ແລະ ຊັບ​ສິນ ໂດຍ​ສະເພາະ​ໃນ​ປະເທດ​ທຸກ​ຍາກ​ທົ່ວ​ໂລກ ໃນ​ກໍລະນີ​ສ່ວນ​ໃຫຍ່ ເຫດ​ດິນ​ຖະ​ຫຼົ່ມ​ມັກ​ເກີດ​ຂຶ້ນ​ຫຼັງ​ຝົນຕົກ​ໜັກ ຊຶ່ງ​ຈະ​ເຮັດ​ໃຫ້​ໜ້າດິນ​ທີ່​ເປັນ​ເນີນ​ສູງ​ຊຸ່ມ​ນ້ຳ ແລະ ຖະ​ຫຼົ່ມ​ລົງ​ມາ​ຕາມ​ແຮງ​ດຶງ​ດູດ​ຂອງ​ໂລກ ​ແຕ່​ເຫດ​ດິນ​ຖະ​ຫຼົ່ມ​ຍັງ​ອາດ​ມີ​ສາເຫດ​ຈາກ​ແຜ່ນດິນ​ໄຫວ ໜ້າດິນ​ຖືກ​ກັດ​ເຊາະ ຫຼື ການ​ຂຸດ​ດິນ​ຂອງ​ຄົນ​ເຮົາ.

     ທ່ານ ໂທມ​​ັສ ສະ​ແຕນ​ລີ່ (Thomas Stanley) ນັກວິທະຍາສາດ​ແຫ່ງ​ສະມາຄົມ​ມະຫາວິທະຍາໄລ​ດ້ານ​ການ​ວິໄຈ​ທາງ​ອະວະກາດ (Universities Space Research Association) ຊຶ່ງ​ຮ່ວມ​ມື​ກັບ​ອົງການ​ສຳ​ຫຼວດ​ອະວະກາດ​ແຫ່ງ​ສະຫະລັດ ຫຼື ນາ​ຊ່າ (NASA) ດຳເນີນ​ການ​ສຶກ​ສາ​ຄວາມ​ສຳພັນ​ລະຫວ່າງ​ຝົນຕົກ ກັບ​ເຫດ​ດິນ​ຖະ​ຫຼົ່ມ ເພື່ອ​ພະຍາຍາມ​ຈັດ​ສ້າງ​ແຜນທີ່​ທີ່​ມີ​ລາຍ​ລະອຽດ​ສູງ​ກ່ຽວ​ກັບ​ພື້ນ​ທີ່​ຕ່າງໆ​ທົ່ວ​ໂລກ​ທີ່​ສ່ຽງ​ຫຼາຍ​ທີ່​ສຸດ​ຕໍ່​ເຫດ​ດິນ​ຖະ​ຫຼົ່ມ.

ທີມ​ງານ​ໄດ້​ຂໍ້​ມູນ​ກ່ຽວ​ກັບ​ປະລິມານ​ຝົນຕົກ ຈາກ​ດາວ​ທຽມ​ວັດ​ປະລິມານ​ຝົນຕົກ​ທົ່ວ​ໂລກ ທີ່​ເອີ້ນ​ວ່າ ດາວ​ທຽມ Global Precipitation Metric Measurement ທີ່​ສົ່ງ​ຂຶ້ນ​ໄປ​ເຮັດ​ວຽກ​ດ້ວຍ​ຄວາມ​ຮ່ວມ​ມື​ຂອງ​ນາ​ຊ່າ ກັບ​ອົງການ​ສຳ​ຫຼວດ​ອະວະກາດ​ແຫ່ງ​ຍີ່ປຸ່ນ ຫຼື JAXA ໃນ​ປີ 2014 ແລະ ຍັງ​ໃຊ້​ຂໍ້​ມູນ​ຈາກ​ດາວ​ທຽມ​ທີ່​ສຶກ​ສາ​ປັດ​ໄຈ​ອື່ນໆ ນອກ​ເໜືອ​ຈາກ​ຝົນ.

    ທ່ານ ໂທມ​​ັສ ສະ​ແຕນ​ລີ່ ກ່າວ​ວ່າ ທີມ​ງານ​ຍັງ​ສຶກ​ສາ​ບັນຫາ​ປ່າ​ຖືກ​ທຳລາຍ​ຄວບ​ຄູ່​ໄປ​ດ້ວຍ ທັ້ງ​ທີ່​ເກີດ​ຈາກ​ການ​ຕັດ​ໄມ້​ທຳລາຍ​ປ່າ ໄຟ​ປ່າ ຫຼື​ການ​ກໍ່ສ້າງ ແລະ ທີມ​ງານ​ຍັງ​ສຶກ​ສາ​ວ່າ​ມີ​​ແນວ​ຮອຍ​ຕໍ່​ທາງ​ທໍລະນີ​ພາກ​ຫຼື​ບໍ່ ຊຶ່ງ​ສ່ຽງ​ຕໍ່​ການ​ເກີດ​ແຜ່ນດິນ​ໄຫວ ແລະ ລັກສະນະ​ດິນ ເພາະ​ດິນ​ຈາກ​ພູເຂົາ​ໄຟ​ຈະ​ສ່ຽງ​ຕໍ່​ການ​ຖະ​ຫຼົ່ມ​ຫຼາຍ​ກວ່າ​ດິນ​ຊະນິດ​ອື່ນໆ ດ້ວຍ​ເຫດຜົນ​ຫຼາຍ​ປະການ.

ຂໍ້​ມູນ​ເຫຼົ່າ​ນີ້ ນຳໄປ​ລວມ​ກັບ​ແຜນທີ່​ການ​ເກິດ​ຝົນ ເພື່ອ​ສະແດງ​ຊັດ​ເຈນ​ວ່າ​ພື້ນ​ທີ່​ໃດ​ແດ່ ທີ່​ສ່ຽງ​ທີ່​ສຸດ​ທີ່​ຈະ​ເກີດ​ດິນ​ຖະ​ຫຼົ່ມ.

    ທ່ານ ສະ​ແຕນ​ລີ່ ກ່າວ​ວ່າ ມີ​ຫຼາຍ​ສ່ວນ​ຂອງ​ໂລກ​ທີ່​ສ່ຽງ​ຕໍ່​ການ​ເກີດ​ດິນ​ຖະ​ຫຼົ່ມ ແຕ່​ມີ​ພື້ນ​ທີ່​ຂະໜາດ​ໃຫຍ່​ລະຫວ່າງ​ອາຊີ​ໃຕ້ ກັບ​ອາຊີ​ຕາເວັນ​ອອກ ພູເຂົາ​ຫິ​ມາໄລ ແລະ ພູເຂົາ​ທີ່​ຕໍ່​ເນື່ອງ​ກັນ ກິນ​ພື້ນ​ທີ່​ລົງ​ມາ​ເຖິງ​ມຽນ​ມາ ແລະ ຕັດ​ຈິ​ກິ​​ສ​ຖານ ພື້ນ​ທີ່​ພູເຂົາ​ເຫຼົ່າ​ນີ້ ມີ​ຄວາມ​ສູງ​ຫຼາຍ ແລະ ແຕກ​ຫັກ ນອກຈາກ​ນີ້ ຍັງ​ມີ​ການ​ເຄື່ອນ​ຕົວ​ຂອງ​ຮອຍ​​ແຍກ​ເປືອກ​ໂລກ​ຫຼາຍ​ກວ່າ​ຈຸດ​ອື່ນໆ​ຂອງ​ໂລກ.

    ທ່ານ ສະ​ແຕນ​ລີ່ ຊີ້​ແຈງ​ວ່າ ດາວ​ທຽມ​ເຫຼົ່າ​ນີ້​ບໍ່​ສາມາດ​ຖ່າຍ​ພາບ​ຂອງ​ເຫດ​ດິນ​ຖະ​ຫຼົ່ມ​ແທ້​ຈິງ​ໄດ້ ດັ່ງນັ້ນ ລາຍ​ງານ​ທີ່​ໄດ້​ຈາກ​ຄົນ​ທົ່ວ​ໄປ ຈະ​ຊ່ວຍ​ໃຫ້ການ​ສຶກ​ສາມີ​ຄວາມ​ສົມບູນ​ຫຼາຍ​ຂຶ້ນ ວ່າ​ຈຸດ​ໃດ​ສ່ຽງ​ຕໍ່​ເຫດ​ດິນ​ຖະ​ຫຼົ່ມ.

 ເຂົາ​ກ່າວ​ວ່າ ທີມ​ງານ​ໄດ້​ຈັດ​ສ້າງ​ໜ້າ​ເວັບ​ໄຊ​ເພື່ອ​ໃຫ້​ປະຊາຊົນ​ສາມາດ​ເປິດ​ເຂົ້າ​ໄປ​ລາຍ​ງານ​ເຫດ​ດິນ​ຖະ​ຫຼົ່ມ​ທີ່​ເກີດ​ຂຶ້ນ​ໃກ້​ກັບ​ຊຸມ​ຊົນ​ຂອງ​ພວກ​ເຂົາ ແລະ ດາວ​ທຽມ​ກວດ​ບໍ່​ພົບ.

ລາຍ​ງານ​ເຫດການ​ດິນ​ຖະ​ຫຼົ່ມ​ທີ່​ໄດ້​ຈາກ​ປະຊາຊົນ ສາມາດ​ຊ່ວຍ​ໃຫ້​ຜົນ​ການ​ວິໄຈ​ດີ​ຫຼາຍ​ຂຶ້ນ ແລະ ມີ​ຄວາມ​ແມ່ນ​ຢຳ​ຫຼາຍ​ຂຶ້ນ ໜ້າ​ເວັບ​ໄຊ​ເພື່ອ​ລາຍ​ງານ​ເຫດການ​ດິນ​ຖະ​ຫຼົ່ມ ຄື www.landslides.nasa.gov.

 

ຂ່າວທີ່ກ່ຽວຂ້ອງ