ຂ່າວຫຼ້າສຸດ

ການແຂ່ງຂັນກີລາຍິງປືນ ໄອພີເອັດຊີ ຊີງຂັນທ່ານນາຍົກ ກຽມຈັດທ້າຍເດືອນນີ້

269 15 ຕ.ລ. 2018 ວົງຈອນກີລາ
ການແຂ່ງຂັນກີລາຍິງປືນ ໄອພີເອັດຊີ ຊີງຂັນທ່ານນາຍົກ ກຽມຈັດທ້າຍເດືອນນີ້

    ພິທີ​ຖະແຫຼງ​ຂ່າວ ແລະ ມອບ-ຮັບ​ການ​ອຸປະຖຳ​ເງິນ​ຈັດ​ແຂ່ງຂັນ​ກີລາ​ຍິງ​ປືນ ໄອ​ພີ​ເອັດ​ຊີ ນາໆຊາດ ເລ​ໂວ 3 ຊີງ​ຂັນ​ທ່ານ​ນາຍົກລັດຖະມົນຕີ ​ສປປ ລາວ ຄັ້ງ​ທີ 1 ປະຈຳ​ປີ 2018 ຈັດ​ຂຶ້ນ​ວັນ​ທີ 11 ຕຸລາ 2018 ຢູ່​ສະໜາມ​ກີລາ​ຍິງ​ປືນ 5 ເມສາ ນະຄອນຫຼວງ​ວຽງ​ຈັນ ໂດຍ​ມີ​ທ່ານ ພຸດ​ທະ​ສັກ ສຸກ​ອາ​ລຸນ ປະທານ​ສະໂມສອນ​ກີລາ​ຍິງ​ປືນ​ໄອ​ພີ​ເອັດ​ຊີ​ລາວ ຜູ້ອຳນວຍການ​ສະໜາມ​ເຝິກ​ກີລາ​ຍິງ​ປືນ 5 ເມສາ ທ່ານ ປີ​ຊາ​ໄຊ ແກ້ວ​ໄຊ​ຍະ​ຈັກ ປະທານ​ບໍລິສັດ ບໍລິການ​ເຝິກຊ້ອມ​ກີລາ​ຍິງ​ປືນ ຈຳກັດ ພ້ອມ​ດ້ວຍ​ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

    ທ່ານ ພຸດ​ທະ​ສັກ ສຸກ​ອາ​ລຸນ ກ່າວ​ວ່າ: ປັດຈຸບັນ​ພວກ​ເຮົາ​ມີ​ຄວາມ​ພ້ອມ​ຮອບດ້ານ ແລະ ຍິນ​ດີ​ທີ່​ຈະ​ໄດ້​ຕ້ອນຮັບ​ນັກກີລາ​ຈາກ​ປະເທດ​ຕ່າງໆ​ເຂົ້າ​ສູ່ ​ສປປ ລາວ ໂດຍ​ການ​ແຂ່ງຂັນ​ລາຍການ​ນີ້​ຈະ​ມີ 6 ລາຍການ​ຄື: ປືນ​ສະ​ແຕນ​ດາດ ປືນ​ໂປ​ດັກ​ຊັນ ປືນ​ໂປ​ດັກ​ຊັນ​ອັອບ​ຕິກ ປືນ​ໂອ​ເພັນ ປືນ​ຣີ​ໂວ​ເວີ ແລະ ປືນ​ຄາດ​ຊິກ ແຂ່ງຂັນ 15 ສະໜາມ ໂດຍ​ມີ​ການ​ປັບປຸງ ແລະ ແປງ​ຮູບ​ແບບ​ການ​ແຂ່ງຂັນ​ແຕກ​ຕ່າງ​ກວ່າ​ປີຜ່ານມາ ໂດນ​ຈະ​ແຂ່ງຂັນ​ວັນ​ທີ 26-28 ຕຸລາ 2018 ຢູ່​ສະໜາມ​ກີລາ​ເຝິກຊ້ອມ​ຍິງ​ປືນ 5 ເມສາ​ຄາດ​ວ່າ​ຈະ​ມີ​ນັກກີລາ​ຈາກ 6 ປະເທດ​ເຂົ້າ​ຮ່ວມ ສະເພາະ​ລາວ​ຈະ​ເຂົ້າ​ຮ່ວມ 30 ກວ່າ​ຄົນ.

    ສຳລັບ​ຜູ້​ທີ່​ນຳ​ເງິນ​ມາ​ມອບ​ເງິນ​ສະໜັບສະໜູນ​ການ​ຈັດ​ງານ​ຄັ້ງ​ນີ້ ມີ​ບໍລິສັດ ນໍ​ລິງ​ໂກ​ປະຈຳ​ລາວ 255 ລ້ານ​ກີບ ບໍລິສັດ ລ້ານ​ຊ້າງ​ອິນ​ທຣາ​ຄອບ​ໂປຣ​ເຣ​ຊັນ 50 ລ້ານ​ກີບ ບໍລິສັດ ໂຕ​ໂຢ​ຕາ​ລາວ​ທານີ 50 ລ້ານ​ກີບ ຮ້ານ​ຂາຍ​ລົດ PPST PERMIUM 40 ລ້ານ​ກີບ ບໍລິສັດ ເລັດ​ວິງ​ຮັກສາ​ຄວາມ​ປອດ​ໄພ 25 ລ້ານ​ກວ່າ​ກີບ ບໍລິສັດ ເບຍ​ລາວ 423 ລ້ານ​ກວ່າ​ກີບ.

ຂ່າວທີ່ກ່ຽວຂ້ອງ