ເງິນ​ເຟີ້​ຂອງ​ເວ​ເນ​ຊູ​ເອ​ລາ ຍັງ​ຄາດ​ວ່າ​ຈະ​ເພີ່ມ​ຂຶ້ນ​ໃນ​ປີ 2019

86 12 ຕ.ລ. 2018 ຂ່າວຕ່າງປະເທດ
ເງິນ​ເຟີ້​ຂອງ​ເວ​ເນ​ຊູ​ເອ​ລາ ຍັງ​ຄາດ​ວ່າ​ຈະ​ເພີ່ມ​ຂຶ້ນ​ໃນ​ປີ 2019

    ໃນ​ບົດ​ລາຍ​ງານ​ກ່ຽວ​ກັບ​ຄວາມ​ຫວັງ​ຂອງ​ເສດຖະກິດ​ໂລກ ທີ່​ມີ​ອອກ​ມາ​ເມື່ອ​ວັນ​ທີ 9 ຕຸລາ​ນີ້ ອົງການ​ກອງ​ທຶນ​ເງິນຕາ​ສາກົນ (IMF) ໃຫ້ການ​ຄາດ​ຄະເນ​ວ່າ ເມື່ອ​ສິ້ນ​ສຸດ​ປີ 2018 ອັດຕາ​ສ່ວນ​ເງິນ​ເຟີ້​ຂອງ​ເວ​ເນ​ຊູ​ເອ​ລາ ຈະ​ຢູ​ທີ່​ລະດັບ 1.370.000% ແລະ​ຕົວ​ເລກ​ດັ່ງກ່າວ ເມື່ອ​ຮອດ​ປີ 2019 ອາດ​ຈະ​ຂຶ້ນ​ເຖິງ 10.000.000% ໂດຍ​ທີ່​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຫຼຸດ​ລົງ 5%.

    ຕາມ​ການ​ຄາດ​ຄະເນ​ຂອງ IMF ແລ້ວ ສະພາບ​ເງິນ​ເຟີ້​ສູງ​ຂອງ​ເວ​ເນ​ຊູ​ເອ​ລາ ຈະ​ນັບ​ມື້ ນັບ​ຂີ້ຮ້າຍ​ໄປ​ອີກ ໃນ​ເມື່ອ​ວ່າ​ຕ້ອງ​ໄດ້​ສະໜອງ​ເງິນ ໃຫ້​ແກ່​ບ້ວງ​ຂາດ​ດຸນ​ງົບປະມານ​ອັນ​ໃຫຍ່​ໂຕ ແລະ​ຄ່າ​ຂອງ​ສະກຸນ​ເງິນ​ພາຍ​ໃນ​ປະເທດ​ກໍ​ຕົກຕ່ຳ. IMF ໃຫ້​ຮູ້​ວ່າ ພື້ນຖານ​ເສດຖະກິດ​ເວ​ເນ​ຊູ​ເອ​ລາ ໃນ​ປີ 2018 ຈະ​ສືບຕໍ່​ຊຸດໂຊມ​ເປັນ​ປີ​ທີ 5 ຕິດຕໍ່​ກັນ ໂດຍ​ຫຼຸດ​ລົງ 18% ເມື່ອ​ທຽບໃສ່​ປີ 2017 ຍ້ອນ​ວ່າ​ປະລິມານ​ການ​ຜະລິດ​ນ້ຳມັນ​ຫຼຸດ​ລົງ ແລະ ສະພາບ​ການ​ດ້ານ​ການເມືອງ-ສັງຄົມ ບໍ່​ມີ​ຄວາມ​ສະ ຫງົບ.

    ບົດ​ລາຍ​ງານ​ຂອງ IMF ກໍ​ໃຫ້ການ​ຄາດ​ຄະເນ​ວ່າ ຂາດ​ດຸນ​ບັນຊີ​ການ​ເງິນ​ໝູນວຽນ​ຂອງ ເວ​ເນ​ຊູ​ເອ​ລາ ຢູ່​ທີ່​ລະດັບ​ເທົ່າ​ກັບ 6,1% ຂອງ GDP ໃນ​ປີ​ນີ້ ແລະ 4% GDP ຂອງ​ປີ 2019. ນອກຈາກ​ນັ້ນແລ້ວ ອັດຕາ​ສ່ວນ​ຄົນ​ຫວ່າງ​ງານ​ໃນ​ເວ​ເນ​ຊູ​ເອ​ລາ ຈະ​ຢູ່​ທີ່​ລະດັບ 34,3% ໃນ​ປີ​ນີ້ ແລະ 39% ໃນ​ປີໜ້າ ຊຶ່ງ​ນັບ​ວ່າ​ສູງ​ກວ່າ​ຫຼາຍ​ພໍ​ສົມຄວນ ເມື່ອ​ທຽບໃສ່​ລະດັບ 27,1% ຂອງ​ປີ 2017./

 

ຂ່າວທີ່ກ່ຽວຂ້ອງ