ຍີ່ປຸ່ນ​ຊ່ວຍເຫຼືອ​ມຽນ​ມາ ຍົກ​ລະດັບ​ທ່າ​ກຳປັ່ນ

89 12 ຕ.ລ. 2018 ຂ່າວຕ່າງປະເທດ
ຍີ່ປຸ່ນ​ຊ່ວຍເຫຼືອ​ມຽນ​ມາ ຍົກ​ລະດັບ​ທ່າ​ກຳປັ່ນ

     ຂ່າວສານ​ກຽວ​ໂດ ລາຍ​ງານ​ວ່າ ຍີ່ປຸ່ນ​ໄດ້​ເຫັນ​ດີ​ຊ່ວຍເຫຼືອ​ເງິນ​ປະມານ 53 ລ້ານ​ໂດ​ລາ ສະຫະລັດ ໃຫ້​ແກ່​ມຽນ​ມາ ເພື່ອ​ຊ່ວຍເຫຼືອ​ໃນ​ການ​ຫັນ​ທ່າ​ກຳປັ່ນ​ການ​ຄ້າ​ຢູ່​ໃນ​ປະເທດ​ນີ້ ໃຫ້​ທັນ​ສະໄໝ.

   ຕາມ​ຂໍ້​ຕົກລົງ​ກັບ​ອົງການ​ຮ່ວມ​ມື​ສາກົນ​ຍີ່ປຸ່ນ (JICA) ນັ້ນ​ກໍ​ແມ່ນ ມຽນ​ມາ​ມີ​ແຜນການ​ກໍ່ສ້າງ​ບັນດາ​ພື້ນຖານ​ທ່າ​ກຳປັ່ນ ແລະ​ຫັນ​ໄປ​ສູ່​ການ​ໃຊ້​ກົນ​ຈັກ​ໃນ​ການ​ຂົນ​ຂ່ຽນ​ສິນຄ້າ​ຢູ່​ໃນ​ທ່າ​ກຳປັ່ນ​ແຫ່ງ​ໜຶ່ງ ໃນ​ແມ່ນ້ຳ ອີ​ຣາ​ວະ​ດີ ຢູ່​ໃນ​ພື້​​ນ​ທີ່​ນະຄອນ ມັນ​ດາ​ເລ ທີ່​ເປັນ​ເມືອງ​ໃຫຍ່​ອັນ​ດັບ​ສອງ​ຂອງ​ມຽນ​ມາ.   ແຜນການ​ດັ່ງກ່າວ ນອນ​ຢູ່​ໃນ​ຄວາມ​ພະຍາຍາມ​ຂອງ​ມຽນ​ມາ ເພື່ອ​ພັດທະນາ​ເຂດ​ເສດຖະກິດ ທາງ​ທິດເໜືອ.

    JICA ໃຫ້​ຮູ້​ວ່າ ທ່າ​ກຳປັ່ນ​ດັ່ງກ່າວ ມີ​ບົດບາດ​ຕົ້ນຕໍ ໃນ​ການ​ຂົນສົ່ງ​ຜູ້ໂດຍສານ ແລະ​ສິນຄ້າ ເຊັ່ນ​ເຂົ້າ ໄມ້ ວັດ​ສະ​ດຸ​ກໍ່ສ້າງ ລະຫວ່າງ​ນະຄອນ​ມັນ​ດາ​ເລ ກັບ​ນະຄອນ​ຢາງ​ກຸງ. ຄາດ​ວ່າ ເມື່ອ​ໄດ້​ຮັບ​ການ​ຍົກ​ລະດັບ​ແລ້ວ ທ່າ​ກຳປັ່ນ​ດັ່ງກ່າວ ຈະ​ຍົກ​ກຳລັງ​ການ​ແກ້​ໄຂ​ສິນຄ້າ ໄດ້​ຈາກ 200.000 ໂຕນ/ປີ ໃນ​ປັດຈຸບັນ ຂຶ້ນ​ເປັນ 800.000 ໂຕນ/ປີ. ການ​ຫັນ​ເອົາ​ກົນ​ຈັກ​ເຂົ້າ​ມາ​ໃຊ້ ຈະ​ເຮັດ​ໃຫ້​ເພີ່ມ​ຄວາມ​ສາມາດ ໃນ​ການ​ຂົນ​ຂ່ຽນ​ສິນຄ້າ​ໄດ້​ຈາກ 17 ໂຕນ/ຊົ່ວໂມງ ຂຶ້ນ​ເປັນ 100 ໂຕນ/ຊົ່ວໂມງ ແລະ ຫຼຸດຜ່ອນ​ເວລາ​ຈອດ​ຂອງ​ກຳປັ່ນ ເຮືອ​ແພ ຈາກ​ສອງ​ອາທິດ​ໃນ​ປັດຈຸບັນ ລົງ​ໄປ​ຍັງ​ເຫຼືອ 24 ຊົ່ວໂມງ.

 

ຂ່າວທີ່ກ່ຽວຂ້ອງ