ທ່ານນາຍົກ ເຂົ້າຮ່ວມກອງປະຊຸມພົບປະຜູ້ນຳອາຊຽນ ກັບຜູ້ອຳນວຍການໃຫຍ່ ອົງການກອງທຶນສາ¬ກົນ

192 12 ຕ.ລ. 2018 ຂ່າວໜ້າ​ໜຶ່ງ
ທ່ານນາຍົກ ເຂົ້າຮ່ວມກອງປະຊຸມພົບປະຜູ້ນຳອາຊຽນ ກັບຜູ້ອຳນວຍການໃຫຍ່ ອົງການກອງທຶນສາ¬ກົນ

    ໂດຍ​ຕອບ​ສະ­ໜອງ​ຕາມ​ຄຳ​ເຊີນ​ຂອງ​ລັດ­ຖະ­ບານ ສ ອິນ​ໂດ​ເນ​ເຊຍ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ສປປ ລາວ ໄດ້​ນຳ­ພາ​ຄະ­ນະ​ຜູ້​ແທນ​ຂັ້ນ​ສູງ ເດີນ­ທາງ​ໄປ​ຮ່ວມ​ກອງ​ປະ­ຊຸມ​ພົບ​ປະ​ລະ­ຫວ່າງ​ບັນ­ດາ​ຜູ້­ນຳ​ອາ​ຊຽນ ກັບ​ຜູ້­ອຳ­ນວຍ­ການ​ໃຫຍ່​ອົງ­ການ​ກອງ​ທຶນ​ການ​ເງິນ​ສາ­ກົນ ປະ­ທານ​ທະ­ນາ­ຄານ​ໂລກ ແລະ ເລ­ຂາ­ທິ­ການ​ໃຫຍ່​ອົງ­ການ​ສະ­ຫະ​ປະ­ຊາ​ຊາດ ພາຍ​ໃຕ້​ຫົວ­ຂໍ້ “ບັນ­ລຸ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ແລະ ການ​ຫຼຸດ­ຜ່ອນ​ຄວາມ​ແຕກ​ໂຕນ​ດ້ານ​ການ​ພັດ­ທະ­ນາ” ໂດຍ​ການ​ຮ່ວມ​ມື​ກັນ​ລະ­ດັບ​ພາກ​ພື້ນ ແລະ ສາ­ກົນ ວັນ​ທີ 11 ຕຸ­ລາ 2018 ຢູ່​ບາ​ຫຼີ ສ ອິນ​ໂດ​ເນ​ເຊຍ ໂດຍ​ເປັນ​ປະ­ທານ​ຮ່ວມ​ຂອງ​ທ່ານ ໂຈ​ໂກ້ ວິ​ໂດ​ໂດ້ ປະ­ທາ­ນາ­ທິ­ບໍ­ດີ​ອິນ​ໂດ​ເນ​ເຊຍ ໃນ​ນາມ​ເຈົ້າ­ພາບ​ຈັດ​ກອງ​ປະ­ຊຸມ​ກອງ​ທຶນ​ການ​ເງິນ​ສາ­ກົນ ແລະ ກຸ່ມ​ທະ­ນາ­ຄານ​ໂລກ ປະ­ຈຳ​ປີ 2018 ແລະ ທ່ານ ລີ ຊຽນ​ລົງ ນາ­ຍົກ­ລັດ­ຖະ­ມົນ­ຕີ​ສິງ­ກະ­ໂປ ໃນ​ນາມ​ປະ­ທານ​ໝູ­ນວຽນ​ອາ​ຊຽນ.

    ກອງ​ປະ­ຊຸມ​ຄັ້ງ​ນີ້ ເພື່ອ​ປຶກ­ສາ​ຫາ­ລື​ບັນ­ຫາ​ສຳ­ຄັນ​ຕ່າງໆ ທີ່​ຕິດ​ພັນ​ກັບ​ການ​ຮັກ­ສາ​ສະ­ຖຽນ​ລະ​ພາບ​ດ້ານ​ເສດ­ຖະ­ກິດ-ການ​ເງິນ ກໍ່​ຄື ການ​ຊອກ​ຫາ​ຊ່ອງ​ທາງ ແລະ ມາດ​ຕະ­ການ​ຮ່ວມ​ກັນ​ໃນ​ການ​ຊຸກ­ຍູ້​ການ​ເຕີບ​ໂຕ​ດ້ານ​ເສດ­ຖະ­ກິດ​ໃນ​ອາ​ຊຽນ ແລະ ການ​ຮ່ວມ​ມື​ເພື່ອ​ບັນ­ລຸ​ວາ­ລະ 2030 ເພື່ອ​ການ​ພັດ­ທະ­ນາ​ແບບ​ຍືນ​ຍົງ ໃນ​ນີ້ ບັນ­ດາ​ຜູ້­ນຳ​ອາ​ຊຽນ ໄດ້​ເນັ້ນ​ໃຫ້​ເຫັນ​ຄວາມ​ສຳ­ຄັນ ແລະ ບົດ­ບາດ​ຂອງ​ອົງ­ການ​ການ​ເງິນ​ສາ­ກົນ ແລະ ທະ­ນາ­ຄານ​ໂລກ ກໍ່​ຄື ອົງ­ການ​ສະ­ຫະ​ປະ­ຊາ​ຊາດ ໃນ​ການ​ຊ່ວຍ­ເຫຼືອ​ປະ­ເທດ​ສະ­ມາ­ຊິກ ເພື່ອ​ແກ້​ໄຂ​ສິ່ງ​ທ້າ​ທາຍ​ຕ່າງໆ ແລະ ສ້າງ​ເງື່ອນ­ໄຂ​ທີ່​ເອື້ອ​ອຳ­ນວຍ​ໃຫ້​ແກ່​ການ​ເຕີບ​ໂຕ​ຂອງ​ເສດ­ຖະ­ກິດ ແນ­ໃສ່​ຫຼຸດ­ຜ່ອນ​ຄວາມ​ແຕກ​ໂຕນ​ດ້ານ​ການ​ພັດ­ທະ­ນາ​ໃນ​ປະ­ເທດ​ສະ­ມາ­ຊິກ​ອາ​ຊຽນ ກໍ່​ຄື ໃນ​ພາກ​ພື້ນ. 

    ໂອ­ກາດ​ກອງ​ປະ­ຊຸມ ສປປ ລາວ ກໍ່​ໄດ້​ຢ້ຳ​ຄືນ​ການ­ຈັດ­ຕັ້ງ​ປະ­ຕິ­ບັດ​ພັນ­ທະ​ຂອງ​ຕົນ ໃນ​ການ​ເປັນ​ສະ­ມາ­ຊິກ​ຂອງ​ອົງ​ການ­ຈັດ­ຕັ້ງ​ສາ­ກົນ ແລະ ພາກ​ພື້ນ​ຢ່າງ​ຕັ້ງ­ໜ້າ ເຊິ່ງ​ລັດ­ຖະ­ບານ​ລາວ ໄດ້​ຈັດ​ຕັ້ງ​ປະ­ຕິ­ບັດ​ວິ­ໄສ​ທັດ 2030 ແລະ ຍຸດ​ທະ​ສາດ 2025 ແລະ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໄລ­ຍະ 5 ປີ ຄັ້ງ​ທີ 8 ສຳ­ລັບ​ສົກ 2016-2020 ດ້ານ​ການ​ພັດ­ທະ­ນາ​ເສດ­ຖະ­ກິດ-ການ​ເງິນ ກໍ່​ໄດ້​ມີ​ການ​ວາງ​ນະ­ໂຍ­ບາຍ ແລະ ກົນ​ໄກ​ໃນ​ການ​ຊຸກ­ຍູ້​ເພື່ອ​ຮັກ­ສາ​ສະ­ຖຽນ​ລະ​ພາບ​ຂອງ​ເສດ­ຖະ­ກິດ​ມະ­ຫາ​ພາກ ປັບ­ປຸງ​ສະ­ພາບ​ແວດ​ລ້ອມ​ທີ່​ເອື້ອ​ອຳ­ນວຍ​ໃຫ້​ແກ່​ການ​ຄ້າ ແລະ ການ​ລົງ­ທຶນ ເພື່ອ​ສາ­ມາດ​ເຊື່ອມ​ໂຍງ​ເຂົ້າ​ກັບ​ເສດ­ຖະ­ກິດ​ພາກ​ພື້ນ ແລະ ສາ­ກົນ ໂດຍ​ຜ່ານ​ການ​ຮ່ວມ​ມື ແລະ ສະ­ໜັບ­ສະ­ໜູນ​ຈາກ​ອົງ​ການ­ຈັດ­ຕັ້ງ​ສາ­ກົນ​ຕ່າງໆ ໂດຍ​ສະ­ເພາະ ກອງ​ທຶນ​ການ​ເງິນ​ສາ­ກົນ ທະ­ນາ­ຄານ​ໂລກ ແລະ ອົງ­ການ​ສະ­ຫະ​ປະ­ຊາ​ຊາດ.

ຂ່າວທີ່ກ່ຽວຂ້ອງ