ຂ່າວຫຼ້າສຸດ

ໄຈກາ ຊ່ວຍເຫຼືອແນວພັນພືດໃຫ້ກະສິກຳອິນຊີ ເພື່ອຟື້ນຟູນ້ຳຖ້ວມ

171 12 ຕ.ລ. 2018 ຂ່າວໜ້າ​ໜຶ່ງ
ໄຈກາ ຊ່ວຍເຫຼືອແນວພັນພືດໃຫ້ກະສິກຳອິນຊີ ເພື່ອຟື້ນຟູນ້ຳຖ້ວມ

    ພິ­ທີ​ມອບ-ຮັບ​ການ​ຊ່ວຍ­ເຫຼືອ​ສຸກ​ເສີນ​ໃຫ້​ຊາວ​ກະ­ສິ­ກອນ​ອິນ​ຊີ ນະ­ຄອນ­ຫຼວງ​ວຽງ​ຈັນ (ນວ) ທີ່​ຖືກ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ປີ 2018 ຈັດ​ຂຶ້ນ​ວັນ​ທີ 11 ຕຸ­ລາ 2018 ຢູ່​ສະ­ຖາ­ນີ​ກະ­ສິ­ກຳ​ສະ­ອາດ​ໂນນ​ຫວາຍ ເຊິ່ງ​ມອບ​ໂດຍ​ທ່ານ ທາ​ເກ​ໂອະ ມາ​ກິ​ໂນະ ຫົວ­ໜ້າ​ໂຄງ­ການ​ພັດ­ທະ­ນາ​ກະ­ສິ­ກຳ​ສະ­ອາດ ອົງ­ການ​ໄຈ​ກາ ປະ­ຈຳ​ລາວ ແລະ ຮັບ​ໂດຍ​ທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ມີ​ທ່ານ ສົມ​ຫວັງ ພັນ­ທະ​ວົງ ຮອງ​ຫົວ­ໜ້າ​ກົມ​ປູກ­ຝັງ ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ລະ­ດູ­ຝົນ​ປີ 2018 ໄດ້​ມີ​ຝົນ­ຕົກ​ໜັກ​ຕິດ­ຕໍ່​ກັນ​ຫຼາຍ​ວັນ ເຮັດ​ໃຫ້​ເນື້ອ­ທີ່​ການ​ຜະ­ລິດ​ຢູ່ ນວ ຖືກ​ນ້ຳ​ຖ້ວມ​ເສຍ​ຫາຍ​ເປັນ​ຈຳ­ນວນ​ຫຼວງ­ຫຼາຍ ໂດຍ​ເນື້ອ­ທີ່​ປູກ​ພືດ​ຜັກ 1.233,86 ເຮັກ­ຕາ ໃນ​ນີ້​ພືດ​ຜັກ ແລະ ໄມ້​ໃຫ້​ໝາກ​ກະ­ສິ­ກຳ​ອິນ​ຊີ 44,84 ເຮັກ­ຕາ ກວມ​ເອົາ 5 ກຸ່ມ​ຄື: ກຸ່ມ​ໂນນ​ແຕ້ ເມືອງ​ໄຊ​ທາ­ນີ 3 ຄອບ­ຄົວ 21,5 ເຮັກ­ຕາ ກຸ່ມ​ໂພນ​ແກ້ວ ເມືອງ​ນາ​ຊາຍ​ທອງ 1 ຄອບ­ຄົວ 6,76 ເຮັກ­ຕາ ກຸ່ມ​ໜອງ​ດາ ເມືອງ​ສີ​ໂຄດ​ຕະ­ບອງ 9 ຄອບ­ຄົວ 3,2 ເຮັກ­ຕາ ກຸ່ມ​ຊາຍ​ຟອງ ເມືອງ​ຫາດ​ຊາຍ​ຟອງ 1 ຄອບ­ຄົວ 0,48 ເຮັກ­ຕາ ແລະ ກຸ່ມ​ທ່າ​ຊ້າງ ເມືອງ​ປາກ​ງື່ມ 21 ຄອບ­ຄົວ 16,16 ເຮັກ­ຕາ.

    ເພື່ອ​ກະ­ກຽມ​ຟື້ນ​ຟູ​ການ​ຜະ­ລິດ​ຫຼັງ​ນ້ຳ​ບົກ​ແຫ້ງ ຫຼື ລະ­ດູ­ແລ້ງ​ສົກ​ປີ 2018-2019 ທີ່​ຈະ​ມາ​ເຖິງ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ໄດ້​ຂຶ້ນ​ແຜນ​ສະ­ເໜີ​ຫາ​ທາງ​ໂຄງ­ການ​ພັດ­ທະ­ນາ​ກະ­ສິ­ກຳ​ສະ­ອາດ ເຊິ່ງ​ເປັນ​ໂຄງ­ການ​ຮ່ວມ​ມື​ລະ­ຫວ່າງ​ກົມ​ປູກ­ຝັງ ແລະ ອົງ­ການ​ໄຈ​ກາ ເພື່ອ​ຂໍ​ສະ­ໜັບ­ສະ­ໜູນ​ຊ່ວຍ­ເຫຼືອ ດັ່ງ­ນັ້ນ ໂຄງ­ການ​ພັດ­ທະ­ນາ​ກະ­ສິ­ກຳ​ສະ­ອາດ ຈຶ່ງ​ໄດ້​ໃຫ້­ການ​ຊ່ວຍ­ເຫຼືອ​ບັນ­ດາ​ຄອບ­ຄົວ​ກະ­ສິ­ກຳ​ອິນ​ຊີ ທີ່​ຖືກ​ຜົນ​ກະ­ທົບ​ຈາກ​ນ້ຳ​ຖ້ວມ ເຊິ່ງ​ປະ­ກອບ​ມີ​ແນວ​ພັນ​ຜັກ­ກາດ­ຊອມ ສະ­ຫຼັດ ກາດ­ນາ ກາດ​ຂາວ ຮ້ອງ​ເຕ້ ແລະ ໝາກ­ເຂືອ 614 ຊອງ ໝາກ­ແຕງ ແລະ ໝາກ­ຖົ່ວ 27 ປ໋ອງ ຫອມ­ປ້ອມ 26 ຖົງ ຜັກ­ບົ້ງ 20 ກິ​ໂລ ກາກ​ນ້ຳ­ຕານ 145 ກິ​ໂລ ອີ​ເອັມ 145 ລິດ ຂີ້​ໄກ່ 25 ໂຕນ ຜ້າ​ຢາງ​ເຮັດ​ເຮືອນ​ຮົ່ມ 10 ກໍ້ ແລະ ຜ້າ​ຢາງ​ກັນ­ແສງ 10 ກໍ້ ລວມ​ມູນ​ຄ່າ 86 ລ້ານ​ກວ່າ​ກີບ.

ຂ່າວທີ່ກ່ຽວຂ້ອງ