ກວດ ແລະ ຜ່າຕັດແກ່ນຕາຂຸ້ນບໍ່ເສຍຄ່າ ໂອກາດວັນສາຍຕາໂລກ

104 12 ຕ.ລ. 2018 ຂ່າວໜ້າ​ໜຶ່ງ
ກວດ ແລະ ຜ່າຕັດແກ່ນຕາຂຸ້ນບໍ່ເສຍຄ່າ ໂອກາດວັນສາຍຕາໂລກ

    ສູນ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຕາ ກະ­ຊວງ​ສາ­ທາ­ລະ­ນະ​ສຸກ ຈັດ​ພິ­ທີ​ສະ­ເຫຼີມ­ສະ­ຫຼອງ​ວັນ​ສາຍ­ຕາ​ໂລກ ຂຶ້ນ​ວັນ​ທີ 11 ຕຸ­ລາ 2018 ຢູ່​ສູນ​ດັ່ງ­ກ່າວ ໂດຍ​ມີ​ທ່ານ ຄຳ​ພົ້ວ ສຸດ­ທິ​ສົມ­ບັດ ຫົວ­ໜ້າ​ສູນ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຕາ ພ້ອມ​ດ້ວຍ​ບັນ­ດາ​ຜູ້­ຕາງ­ໜ້າ​ຈາກ​ກະ­ຊວງ​ສາ­ທາ­ລະ­ນະ​ສຸກ ພະ­ນັກ­ງານ ແພດ​ໝໍ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ພິ­ທີ​ຄັ້ງ​ນີ້ ໄດ້​ມີ​ການ​ກວດ ແລະ ຜ່າ­ຕັດ​ແກ່ນ​ຕາ​ຂຸ້ນ​ໃຫ້​ປະ­ຊາ­ຊົນ​ໂດຍ​ບໍ່​ເສຍ​ຄ່າ ພ້ອມ​ທັງ​ໃຫ້​ສຸ​ຂະ​ສຶກ​ສາ​ກ່ຽວ​ກັບ​ພະ­ຍາດ​ເບົາ­ຫວານ​ຂຶ້ນ​ຕາ ພະ­ຍາດ​ຕາ​ພະ​ດັນ ພະ­ຍາດ​ແກ່ນ​ຕາ​ຂຸ້ນ ອຸ­ບັດ​ຕິ​ເຫດ​ທາງ​ຕາ ແລະ ສຸ​ຂະ​ສຶກ​ສາ​ກ່ຽວ​ກັບ​ພະ­ຍາດ​ຕາ­ແດງ ຕໍ້​ລົມ ຊີ້ນ​ຕາ​ປົ່ງ ນອກ​ນີ້ ຍັງ​ມີ​ການ​ນຳ​ໃຊ້​ເຄື່ອງ­ມື​ທັນ​ສະ­ໄໝ​ໃນ​ການ​ກວດ​ບົ່ງ­ມະ­ຕິ ແລະ ຜ່າ­ຕັດ​ແກ່ນ​ຕາ​ຂຸ້ນ​ດ້ວຍ​ເຄື່ອງ­ມື​ທັນ​ສະ­ໄໝ​ຜ່ານ​ທໍ່. 

    ທ່ານ ຄຳ​ພົ້ວ ສຸດ­ທິ​ສົມ­ບັດ ກ່າວ​ວ່າ: ວັນ​ສາຍ­ຕາ​ໂລກ ເປັນ​ເຫດ­ການ​ໜຶ່ງ​ປະ­ຈຳ​ປີ ທີ່​ໄດ້​ເລັ່ງ​ໃສ່​ໃຫ້​ມີ​ການ​ຂົນ­ຂວາຍ​ຫຼາຍ​ພາກ­ສ່ວນ​ມີ​ສ່ວນ​ຮ່ວມ ໃນ​ການ​ແກ້​ໄຂ​ບັນ­ຫາ​ຕາ­ບອດ​ຢູ່​ແຕ່​ລະ​ປະ­ເທດ​ທົ່ວ​ໂລກ ເພື່ອ​ເຮັດ​ໃຫ້​ທົ່ວ​ສັງ­ຄົມ​ຍົກ​ສູງ​ຄວາມ​ຮັບ​ຮູ້ ແລະ ເຂົ້າ­ໃຈ​ກ່ຽວ​ກັບ​ບັນ­ຫາ​ການ​ປ້ອງ​ກັນ ແລະ ປິ່ນ­ປົວ ການ​ໃຫ້​ຄວາມ​ສຳ­ຄັນ​ຕໍ່​ສິດ­ທິ​ໃນ​ການ​ເບິ່ງ​ເຫັນ ວັນ​ດັ່ງ­ກ່າວ ຍັງ​ເປັນ​ການ​ເລັ່ງ​ທວງ​ສັນ­ຍາ​ຂອງ​ລັດ­ຖະ­ບານ​ແຕ່​ລະ​ປະ­ເທດ ໃຫ້​ຮັບ­ຮອງ​ເອົາ​ວາ­ລະ​ກອງ​ປະ­ຊຸມ​ໃຫຍ່​ຂອງ​ອົງ­ການ​ອະ­ນາ­ໄມ​ໂລກ ຄັ້ງ​ທີ 56 ເພື່ອ​ແນ­ໃສ່​ໃຫ້​ມີ​ການ​ຂະ­ຫຍາຍ​ການ​ບໍ­ລິ­ການ​ດ້ານ​ການ​ຮັກ­ສາ​ສຸ­ຂະ­ພາບ​ຕາ ລວມ​ທັງ​ການ​ປ້ອງ​ກັນ ແລະ ປິ່ນ­ປົວ​ຢ່າງ​ທົ່ວ​ເຖິງ​ຢູ່​ປະ­ເທດ​ຂອງ​ຕົນ.

ຂ່າວທີ່ກ່ຽວຂ້ອງ