ນ້ຳພຽງໃດ... ດອກບົວພຽງນັ້ນ

176 12 ຕ.ລ. 2018 ນານາສາລະ

    ສະ­ພາບ​ການ​ດຳ­ລົງ​ຊີ­ວິດ​ປະ­ຈຳ​ວັນ​ໃນ​ປັດ­ຈຸ­ບັນ ເຖິງ​ວ່າ​ຈະ​ມີ​ຄວາມ​ຫຍຸ້ງ­ຍາກ​ແດ່​ກໍ່​ຕາມ ເນື່ອງ​ຈາກ​ມີ​ການ​ເໜັງ​ຕີງ​ສິນ­ຄ້າ​ທີ່​ຈຳ­ເປັນ​ບາງ​ຊະ­ນິດ ແຕ່​ຖ້າ​ມີ​ສະ­ຕິ​ບໍ­ລິ­ຫານ​ຈັດ­ການ ກ່ຽວ​ກັບ​ການ​ໃຊ້​ຈ່າຍ​ເງິນ ລະ­ຫວ່າງ ລາຍ​ຮັບ ກັບ ລາຍ​ຈ່າຍ​ໄດ້ ບັນ­ຫາ​ຕ່າງໆ​ມັນ​ຄົງ​ລົງ​ຕົວ ແລະ ດຳ­ເນີນ​ຊີ­ວິດ​ໄປ​ໄດ້​ຕາມ​ປົກ­ກະ­ຕິ ຕາມ​ບູ­ຮານ​ເພິ່ນ​ເວົ້າ​ວ່າ “ນ້ຳ​ພຽງ​ໃດ ດອກ​ບົວ​ພຽງ​ນັ້ນ”.

    ຖ້າ​ການ​ມີ​ລາຍ​ຮັບ​ທີ່​ເປັນ​ເງິນ­ເດືອນ​ກໍ່​ດີ ໃນ​ທາງ​ສ່ວນ​ຕົວ​ຜູ້​ຂຽນ ຢາກ​ແລກ­ປ່ຽນ​ໂດຍ​ຂໍ​ໃຫ້​ພິ­ຈາ­ລະ­ນາ​ການ​ໃຊ້​ຈ່າຍ​ໃຫ້​ຖ້ວນ​ທີ່​ໂດຍ​ແບ່ງ​ພູດ ສົມ­ມຸດ​ວ່າ ກ. ຄວາມ​ຈຳ­ເປັນ​ທີ 1. ໝາຍ​ເຖິງ​ການ​ໃຊ້​ຈ່າຍ​ເພື່ອ​ການ​ດຳ­ລົງ​ຊີ­ວິດ​ປະ­ຈຳ​ວັນ ອາ­ຫານ​ການ​ກິນ ເຄື່ອງ­ນຸ່ງ​ຫົ່ມ ລູກ​ເຂົ້າ​ໂຮງ­ຮຽນ ທີ່​ພັກ​ພາ​ອາ­ໄສ ນ້ຳ-ໄຟ (ພາກ­ສ່ວນ​ນີ້​ຂ້ອນ​ຂ້າງ​ຈ່າຍ​ຫຼາຍ) 2. ຈ່າຍ​ເພື່ອ​ສັງ­ຄົມ (ບຸນ​ສິນ​ກິນ​ທານ ຊ່ວຍ​ດອງ ການ​ແຜ່​ປະ­ຈຳ​ຂອງ​ບ້ານ) 3. ຕ້ອງ​ມີ​ຈຳ­ນວນ​ໜຶ່ງ​ສະ​ສົມ​ໄວ້​ໃນ​ຄັງ ເພື່ອ​ແຮ​ຕົວ ຫຼື ເພື່ອ​ອະ­ນາ­ຄົດ (ສ່ວນ​ການ​ເຈັບ­ເປັນ​ເອັນ​ອຸ່ນ​ນັ້ນ​ມີ​ບັດ​ປະ­ກັນ​ສຸ­ຂະ­ພາບ​ແລ້ວ) ເວົ້າ​ແນວ​ນີ້​ບໍ່​ໝາ­ຍວ່າ​ຈະ​ເຮັດ​ໄດ້​ບາດ​ດຽວ​ໂລດ​ດອກ ຕ້ອງ​ມີ​ໄລ­ຍະ​ຂອງ​ມັນ​ຝັກ​ຕົວ ລໍ­ຖ້າ​ຄວາມ​ຕ້ອງ­ການ ເຖິງ​ວ່າ​ລາຍ​ຮັບ​ຈະ​ນ້ອຍ ແຕ່​ກໍ່​ຄົງ​ຫຼຽວ​ເຫັນ​ຄວາມ​ຈຳ­ເປັນ​ຂອງ​ມັນ​ທີ່​ຈະ​ຕ້ອງ​ຄິດ​ກວມ ຫຼື​ວາງ​ແຜນ​ໄວ້​ກ່ອນ.

    ເງິນ­ເດືອນ​ກໍ່​ນ້ອຍ​ຊ່ຳ​ນີ້ ຊິ​ໄປ​ແບ່ງ​ເຮັດ​ບາດ​ດຽວ ມັນ​ຊິ​ໄດ້​ບໍ ? ອັນ​ນີ້​ຄື​ຄຳ​ຖາມ ແລະ ຜູ້​ຂຽນ​ກໍ່​ໄດ້​ຕອບ​ໄປ​ແລ້ວ ເພາະ​ທຸກ​ຢ່າງ​ບໍ່​ເລີ່ມ​ເດືອນ​ທຳ​ອິດ​ບາດ​ດຽວ ຕ້ອງ​ປ່ອຍ​ໃຫ້​ມີ​ເວ­ລາ​ສະ​ສົມ ຄຽງ​ຄູ່​ກັນ​ນັ້ນ ສິ່ງ​ໃດ​ທີ່​ພໍ​ເຮັດ​ໄດ້ ເປັນ­ຕົ້ນ ການ​ເພິ່ມ​ພູນ​ຜະ­ລິດ­ຜົນ ການ​ປະ­ຢັດ​ມັດ­ທະ­ຍັດ ໃຊ້​ຈ່າຍ​ໃນ​ສິ່ງ​ທີ່​ບໍ່​ຄວນ​ຈ່າຍ ກໍ່​ມີ​ສ່ວນ​ຊ່ວຍ​ເກັບ​ທ້ອນ​ລາຍ​ຈ່າຍ​ເອົາ​ໄວ້​ໄດ້​ໃນ​ຄັງ​ສະ​ສົມ​ຄື​ກັນ.

    ກົງ­ກັນ­ຂ້າມ ເມື່ອ​ມາ​ດຳ­ລົງ​ຊີ­ວິດ​ໃນ​ເມືອງ ແລ່ນ​ຕາມ​ກະ­ແສ ເຂົ້າ​ກຸ່ມ​ກັບ​ຜູ້​ມີ​ພື້ນ­ຖານ ມີ​ເງິນ ມີ​ຄຳ ລ້ຳ​ລວຍ​ຍ້ອນ​ຄ້າ­ຂາຍ ຖືກ​ກົດ­ໝາຍ ແລະ ບໍ່​ຖືກ​ກົດ­ໝາຍ ຜັດ­ປ່ຽນ​ກັນ​ເຮັດ​ງານ ພົບ​ປະ​ສັງ​ສັນ ສະ­ຫຼອງ​ວັນ​ເກີດ ວັນ​ແຕ່ງ­ງານ ວັນ​ອື່ນໆ ແລະ ຈັດ​ງານ​ຕ່າງໆ ເພື່ອ​ໃຫ້​ມີ­ໜ້າ​ມີ​ຕາ ເພື່ອ​ໃຫ້​ສົມ​ກັບ​ສັງ­ຄົມ​ໄຮ​ໂຊ ນອກ­ຈາກ​ນີ້ ການ​ນຸ່ງ​ຖື ການ​ຊົມ­ໃຊ້​ວັດ­ຖຸ​ສິ່ງ​ຂອງ​ກໍ່​ແມ່ນ​ຍີ່­ຫໍ້​ໂດ່ງ​ດັງ​ຂອງ​ຕ່າງ­ປະ­ເທດ ເຊັ່ນ​ດຽວ​ກັບ​ລົດ­ຍົນ​ກໍ່​ຕ້ອງ​ຫຼູ​ຫຼາ ລຸ້ນ​ຫຼ້າ​ສຸດ​ລາ­ຄາ​ແພງ.

    ຖ້າ​ແລ່ນ​ໄປ​ນຳ​ສິ່ງ​ດັ່ງ­ກ່າວ​ໂດຍ​ບໍ່​ເຫັນ​ທີ່​ໄປ​ທີ່​ມາ​ຂອງ​ຕົນ ໂດຍ​ສະ­ເພາະ ຂາດ​ການ​ຢັ້ງ​ຄິດ​ກໍ​ຈະ​ຕົກ​ຢູ່​ໃນ​ພາ­ວະ​ເປັນ​ໜີ້​ເປັນ​ສິນ​ອ້ອມ​ຕົວ “ລັດ­ທິ​ບໍ­ລິ­ໂພກ​ນິ­ຍົມ” ຖ້າ​ເປັນ​ພະ­ນັກ­ງານ​ລັດ ກໍ່​ຈະ​ຊອກ​ທຸກ​ວິ­ທີ​ທາງ “ເພື່ອ​ໃຫ້​ຄື​ໜ້າ​ຄື​ຕາ” ແລະ ກ້າວ​ໄປ​ຫາ​ຊອກ​ວິ­ທີ​ການ​ສໍ້​ລາດ​ບັງ​ຫຼວງ ຫຼື ສົມ­ຮູ້​ຮ່ວມ​ຄິດ​ອື່ນໆ​ກັບ​ຄົນ​ບໍ່​ດີ​ກະ­ທຳ​ການ​ໃນ​ທາງ​ຜິດ​ກົດ­ໝາຍ.

    ດັ່ງ­ນັ້ນ ເວ­ລາ​ນີ້​ມີ​ຄວາມ​ສຳ­ຄັນ​ກວ່າ​ເວ­ລາ​ໃດ​ໝົດ ແມ່ນ​ເວ­ລາ​ທີ່​ການ​ຄຸ້ມ​ຄອງ​ລັດ ຄຸ້ມ​ຄອງ​ສັງ­ຄົມ ດ້ວຍ​ລະ­ບຽບ​ກົດ­ໝາຍ​ພວມ​ຈັດ​ຕັ້ງ​ລົງ​ເລິກ​ໄປ​ສູ່​ພື້ນ­ຖານ​ຂະ­ແໜງ­ການ ການ​ກະ­ທຳ​ສິ່ງ​ໃດ​ທີ່​ຜິດ​ລະ­ບຽບ​ກົດ­ໝາຍ ຍ່ອມ​ໄປ​ບໍ່​ລອດ ເພາະ​ພະ­ຍານ​ຫຼັກ​ຖານ ຫູ ຕາ​ຂອງ​ພັກ​ລັດ ກໍ່​ແມ່ນ​ກົດ­ໝາຍ​ນັ້ນ​ເອງ​ທີ່​ຈະ​ປົກ​ປ້ອງ​ຜົນ​ປະ­ໂຫຍດ​ຂອງ​ລັດ ດັ່ງ­ນັ້ນ ທາງ​ທີ່​ດີ ກໍ່​ຄື “ນ້ຳ​ພຽງ​ໃດ ດອກ​ບົວ​ກໍ​ພຽງ​ນັ້ນ” ປະ­ຕິ­ບັດ​ຕົນ​ໃນ​ກອບ ກໍ່​ຈະ​ກາຍ­ເປັນ​ພະ­ນັກ­ງານ​ລັດ­ຖະ­ກອນ​ທີ່​ດີ​ຜູ້​ໜຶ່ງ​ວ່າ​ຊັ້ນ​ເທາະ !.

ຂ່າວທີ່ກ່ຽວຂ້ອງ