ທ່ານ ທອງລຸນ ສີສຸລິດ ນໍາສະເໜີນະໂຍບາຍ 3 ເປີດ ຕໍ່ນັກທຸລະກິດຍີ່ປຸ່ນ

180 11 ຕ.ລ. 2018 ຂ່າວໜ້າ​ໜຶ່ງ

    ທ່ານ​ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ໄດ້​ນຳ​ສະ­ເໜີ​ນະ­ໂຍ­ບາຍ 3 ເປີດ ຄື: ເປີດ​ປະ­ຕູ ເປີດ​ສິ່ງ​ກີດ­ຂວາງ ແລະ ເປີດ​ໃຈ​ຕໍ່​ນັກ­ທຸ­ລະ­ກິດ​ຍີ່­ປຸ່ນ ໃນ​ກອງ​ປະ­ຊຸມ​ເວ­ທີ​ປືກ​ສາ​ການ​ລົງ­ທຶນ​ແມ່­ນ້ຳ​ຂອງ-ຍີ່­ປຸ່ນ ໃນ​ວັນ​ທີ 9 ຕຸ­ລາ 2018.

    ທ່ານ ທອງ​ລຸນ ສີ​ສຸ​ລິດ ກ່າວ​ວ່າ: ເພື່ອ​ຕ້ອນ­ຮັບ ແລະ ຮອງ​ຮັບ​ນັກ​ລົງ­ທຶນ ແລະ ນັກ​ພັດ­ທະ­ນາ​ຂອງ​ຍີ່­ປຸ່ນ​ໃນ​ປັດ­ຈຸ­ບັນ ແລະ ຕໍ່­ໜ້າ ເພື່ອ​ໃຫ້​ບັນ­ດາ​ນັກ­ທຸ­ລະ­ກິດ​ໄດ້​ພິ­ຈາ­ລະ­ນາ​ເອົາ ສປປ ລາວ ເປັນ​ປະ­ເທດ​ໜຶ່ງ​ໃນ​ການ​ລົງ­ທຶນ ແລະ ຂະ­ຫຍາຍ​ທຸ­ລະ​ກິດ​ໃນ​ອາ­ນາ​ຄົດ​ອັນ​ໃກ້​ນີ້ ສປປ ລາວ ກໍ່​ຈະ​ເອົາ­ໃຈ­ໃສ່​ໃຫ້​ຄວາມ​ສຳ­ຄັນ​ເປັນ​ຢ່າງ​ຍິ່ງ ຕໍ່​ການ​ນຳ​ໃຊ້​ທ່າ­ແຮງ ແລະ ການ​ປະ­ກອບ­ສ່ວນ​ຂອງ​ພາກ​ເອ­ກະ​ຊົນ​ທັງ​ພາຍ​ໃນ ແລະ ຕ່າງ­ປະ­ເທດ ອົງ​ປະ­ກອບ​ໜຶ່ງ​ສຳ­ຄັນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ ສປປ ລາວ ນອກ​ນີ້ ລັດ­ຖະ­ບານ ກໍ່​ຈະ​ສົ່ງ­ເສີມ​ການ​ລົງ­ທຶນ​ທີ່​ມີ​ຄຸ­ນະ­ພາບ ນຳ​ໃຊ້​ພູມ​ປັນ­ຍາ ແລະ ແຮງ​ງານ​ຢ່າງ​ມີ​ປະ­ສິດ­ທິ­ພາບ ນຳ​ໃຊ້​ຊັບ­ພະ­ຍາ­ກອນ​ທຳ​ມະ​ຊາດ​ຢ່າງ​ປະ­ຢັດ ແລະ ເປັນ​ມິດ​ກັບ​ສິ່ງ­ແວ­ດລ້ອມ ພ້ອມ​ນີ້ ກໍ່​ຈະ​ສືບ­ຕໍ່​ປັບ­ປຸງ​ສະ­ພາບ​ແວດ​ລ້ອມ​ການ​ລົງ­ທຶນ ລວມ​ທັງ​ການ​ປັບ­ປຸງ​ນະ­ໂຍ­ບາຍ ນິ­ຕິ​ກຳ ແລະ ກົນ​ໄກ​ການ​ປະ­ສານ​ງານ​ພາຍ​ໃນ​ໃຫ້​ມີ​ຂັ້ນ​ຕອນ​ກະ­ທັດ​ຮັດ ວ່ອງ­ໄວ ໂປ່ງ​ໃສ ແລະ ຜ່ານ​ປະ­ຕູ​ດຽວ ເພື່ອ​ຫຼຸດ­ຜ່ອນ​ອຸ­ປະ­ສັກ​ໃນ​ການ​ສ້າງ­ຕັ້ງ ແລະ ດຳ­ເນີນ​ທຸ­ລະ​ກິດ​ຢູ່ ສປປ ລາວ.

    ທ່ານ​ນາ­ຍົກ­ລັດ­ຖະ­ມົນ­ຕີ ກ່າວ​ຕື່ມ​ວ່າ: ສປປ ລາວ ມີ​ຂໍ້​ໄດ້​ປຽບ​ທາງ​ດ້ານ​ຊັບ­ພະ­ຍາ­ກອນ​ທຳ​ມະ​ຊາດ​ທີ່​ອຸ­ດົມ­ສົມ­ບູນ ມີ​ທ່າ­ແຮງ​ທາງ​ດ້ານ​ກະ​ສີ​ກຳ ໂດຍ​ສະ­ເພາະ ການ​ຜະ­ລິດ​ກະ​ສີ​ກຳ​ທີ່​ສະ­ອາດ ແລະ ມີ​ແຫຼ່ງ​ທ່ອງ​ທ່ຽວ​ທີ່​ຫຼາກ​ຫຼາຍ ການ­ທ່ອງ­ທ່ຽວ​ຂອງ​ລາວ ຈະ​ເນັ້ນ​ແບບ​ການ­ທ່ອງ­ທ່ຽວ​ວັດ­ທະ­ນະ­ທຳ ປະ­ຫວັດ­ສາດ ທຳ​ມະ​ຊາດ ໂດຍ​ຕິດ​ພັນ​ກັບ​ການ​ປົກ​ປັກ​ຮັກ­ສາ​ສິ່ງ­ແວ­ດລ້ອມ ແລະ ພັດ­ທະ­ນາ​ຂະ­ແໜງ­ການ​ອື່ນ​ໄປ​ພ້ອມ​ກັນ ເປັນ­ຕົ້ນ: ພື້ນ­ຖານ​ໂຄງ​ລ່າງ ການ​ບໍ­ລິ­ການ ອຸດ­ສາ­ຫະ­ກຳ ຫັດ­ຖະ­ກຳ ສາ­ທາ­ລະ­ນະ​ສຸກ ແລະ ອື່ນໆ ພ້ອມ​ດຽວ​ກັນ ລາວ​ຍັງ​ມີ​ທ່າ­ແຮງ​ທາງ​ດ້ານ​ການ​ຜະ­ລິດ​ພະ­ລັງ­ງານ​ໄຟ­ຟ້າ​ທີ່​ສະ­ອາດ ແລະ ສົ່ງ­ເສີມ​ການ​ຜະ­ລິດ​ພະ­ລັງ­ງານ​ທາງ​ເລືອກ​ອື່ນໆ ທີ່​ເປັນ​ມິດ​ຕໍ່​ສິ່ງ­ແວ­ດລ້ອມ ຂະ­ນະ​ດຽວ​ກັນ ລັດ­ຖະ­ບານ​ໄດ້​ອະ­ນຸ­ມັດ​ສ້າງ­ຕັ້ງ​ເຂດ​ເສດ­ຖະ­ກິດ​ພິ­ເສດ ແລະ ເຂດ​ເສດ­ຖະ­ກິດ​ສະ­ເພາະ 12 ເຂດ ໃນ​ທົ່ວ​ປະ­ເທດ ເພື່ອ​ສົ່ງ­ເສີມ​ການ​ລົງ­ທຶນ ແລະ ດຶງ​ດູດ​ນັກ​ລົງ­ທຶນ​ຈາກ​ພາຍ​ໃນ ແລະ ຕ່າງ­ປະ­ເທດ ປັດ­ຈຸ­ບັນ ເຂດ​ທີ່​ນັກ​ລົງ­ທຶນ​ຍີ່­ປຸ່ນ ກຳ­ລັງ​ໃຫ້​ຄວາມ​ສົນ­ໃຈ​ຫຼາຍ​ແມ່ນ​ເຂດ​ເສດ­ຖະ­ກິດ​ພິ­ເສດ ສະ­ຫວັນ-ເຊ​ໂນ ເຂດ​ເສດ­ຖະ­ກິດ​ພິ­ເສດ​ຈຳ­ປາ​ສັກ ແລະ ນິ­ຄົມ​ອຸດ​ສະ­ຫະ​ກຳ ແລະ ການ​ຄ້າ​ວຽງ​ຈັນ​ໂນນ​ທອງ.

    ໃນ​ໂອ­ກາດ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ ຍັງ​ໄດ້​ເຊີນ­ຊວນ​ໃຫ້​ບັນ­ດາ​ນັກ­ທຸ­ລະ­ກິດ​ເດີນ­ທາງ​ໄປ​ຢ້ຽມ­ຢາມ ແລະ ທ່ອງ​ທ່ຽວ​ລາວ ເພື່ອ​ຈະ​ໄດ້​ສຶກ​ສາ​ຄວາມ​ເປັນ​ໄປ​ໄດ້​ໃນ​ການ​ລົງ­ທຶນ ແລະ ປີ​ນີ້ ລາວ​ໄດ້​ເປີດ​ເປັນ​ປີ​ທ່ອງ​ທ່ຽວ 2018 ຕື່ມ​ອີກ.

ຂ່າວທີ່ກ່ຽວຂ້ອງ