ຂ່າວຫຼ້າສຸດ

ສະຫຼອງວັນອາຫານໂລກ ວັນສາກົນ ແລະ ສັບປະດາລຶບລ້າງຄວາມທຸກຍາກ ໃຫ້ເປັນຂະບວນຟົດຟື້ນ

157 11 ຕ.ລ. 2018 ຂ່າວໜ້າ​ໜຶ່ງ
ສະຫຼອງວັນອາຫານໂລກ ວັນສາກົນ ແລະ ສັບປະດາລຶບລ້າງຄວາມທຸກຍາກ ໃຫ້ເປັນຂະບວນຟົດຟື້ນ

    ກະ­ຊວງ​ກະ­ສິ­ກຳ ແລະ ປ່າ­ໄມ້ ຈະ​ຮ່ວມ​ກັບ​ພາກ­ສ່ວນ​ກ່ຽວ­ຂ້ອງ ກຽມ​ຈັດ​ງານ​ສະ­ເຫຼີມ­ສະ­ຫຼອງ​ວັນ​ອາ­ຫານ​ໂລກ ວັນ​ສາ­ກົນ ແລະ ສັບ­ປະ­ດາ​ແຫ່ງ​ຊາດ ເພື່ອ​ລຶ­ບລ້າງ​ຄວາມ­ທຸກ​ຍາກ ປະ­ຈຳ​ປີ 2018 ພາຍ​ໃຕ້​ຄຳ​ຂວັນ “ການ​ກະ­ທຳ​ຂອງ​ພວກ​ເຮົາ ຄື​ອະ­ນາ­ຄົດ​ຂອງ​ພວກ​ເຮົາ ໂລກ​ທີ່​ປາ­ສະ­ຈາກ​ຄວາມ​ອຶດ­ຫິວ ໃນ​ປີ 2030 ແມ່ນ​ມີ​ຄວາມ​ເປັນ​ໄປ​ໄດ້” ຈະ​ຈັດ​ຂຶ້ນ​ວັນ​ທີ 16-24 ຕຸ­ລາ 2018 ຢູ່​ສະ​ຖາ​ບັນ​ຄົ້ນ­ຄວ້າ​ກະ­ສິ­ກຳ ແລະ ປ່າ­ໄມ້​ແຫ່ງ​ຊາດ ເພື່ອ​ສ້າງ​ຂະ​ບວນ​ການ​ຂອງ​ວັນ​ສຳ­ຄັນ​ດັ່ງ­ກ່າວ ໃຫ້​ມີ​ຄວາມ​ຟົດ­ຟື້ນ ຕິດ​ພັນ​ກັບ​ຊຸກ­ຍູ້​ສົ່ງ­ເສີມ​ການ​ຜະ­ລິດ​ກະ­ສິ­ກຳ​ຂອງ​ຊາວ​ກະ­ສິ­ກອນ ແລະ ຮັບ­ປະ­ກັນ​ການ​ຄ້ຳ­ປະ­ກັນ​ທາງ​ສະ­ບຽງ​ອາ­ຫານ​ໃຫ້​ມີ​ຄວາມ​ໝັ້ນ­ຄົງ ແລະ ເປັນ​ສິນ­ຄ້າ​ໃຫ້​ຫຼາຍ​ຂຶ້ນ.

    ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ຖະ­ແຫຼງ​ຕໍ່​ສື່​ມວນ​ຊົນ ວັນ​ທີ 10 ຕຸ­ລາ ນີ້​ວ່າ: ການ​ສະ­ເຫຼີມ­ສະ­ຫຼອງ​ວັນ​ອາ­ຫານ​ໂລກ​ປີ​ນີ້ ຈັດ​ຂຶ້ນ​ໄລ­ຍະ​ທີ່​ປະ­ເທດ​ເຮົາ​ປະ­ສົບ​ກັບ​ໄພ​ທຳ​ມະ​ຊາດ​ຢ່າງ​ໜັກ­ໜ່ວງ ເຊັ່ນ: ໄພ​ນ້ຳ​ຖ້ວມ ດິນ​ເຊາະ​ເຈື່ອນ ໄດ້​ສ້າງ​ຄວາມ​ເສຍ​ຫາຍ​ໃຫ້​ຊີ­ວິດ ຊັບ​ສິນ ແລະ ຜົນ​ຜະ­ລິດ​ກະ­ສິ­ກຳ​ຂອງ​ປະ­ຊາ­ຊົນ​ທົ່ວ​ປະ­ເທດ​ຢ່າງ​ຫຼວງ­ຫຼາຍ ໃນ​ນີ້ ມີ​ເນື້ອ­ທີ່​ການ​ຜະ­ລິດ​ເສຍ​ຫາຍ​ຫຼາຍ​ກວ່າ 92.000 ເຮັກ­ຕາ ກວມ​ເອົາ 13% ຂອງ​ເນື້ອ­ທີ່​ທຳ​ການ​ຜະ­ລິດ ແລະ ຫຼາຍ​ກວ່າ​ຄ່າ​ມາດ­ຕະ­ຖານ​ຂອງ​ການ​ຮັບ­ປະ­ກັນ​ທາງ​ດ້ານ​ບຽງ​ອາ­ຫານ​ປະ­ເທດ​ເຮົາ ເຊິ່ງ​ບໍ່​ເຄີຍ​ມີ​ມາ​ກ່ອນ ແລະ ຄາດ​ວ່າ​ມີ​ຄວາມ​ສ່ຽງ​ໃນ​ການ​ຕອບ​ສະ­ໜອງ​ສະ­ບຽງ​ອາ­ຫານ​ບໍ່​ພຽງ­ພໍ ໂດຍ​ສະ­ເພາະ​ລະ­ດູ­ແລ້ງ​ຜ່ານ​ມາ ແລະ ລະ­ດູ­ແລ້ງ​ທີ່​ຈະ​ມາ​ເຖິງ ເພື່ອ​ແກ້​ໄຂ​ບັນ­ຫາ​ດັ່ງ­ກ່າວ ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ຮັບ​ການ​ຊີ້​ນຳ​ຈາກ​ລັດ­ຖະ­ບານ ແລະ ໄດ້​ວາງ​ຄາດ­ໝາຍ​ສູ້​ຊົນ​ການ​ຜະ­ລິດ​ນາ­ແຊງ​ໃຫ້​ໄດ້ 100.000 ເຮັກ­ຕາ ຜະ­ລິດ​ພືດ​ລະ­ດູ­ແລ້ງ​ໃຫ້​ໄດ້ 180-1.000 ເຮັກ­ຕາ ເພື່ອ​ນຳ​ເອົາ​ຜົນ​ຜະ­ລິດ​ຊົດ​ເຊີຍ​ເນື້ອ­ທີ່​ຜົນ​ຜະ­ລິດ​ທີ່​ເສຍ​ໄປ ປັດ­ຈຸ­ບັນ ພວກ​ເຮົາ​ໄດ້​ຈັດ​ຕັ້ງ​ຄະ­ນະ​ຮັບ­ຜິດ­ຊອບ​ລົງ​ຕິດ​ຕາ​ຢູ່​ທົ່ວ​ປະ­ເທດ ໃນ​ນີ້ ໄດ້​ສຸມ​ໃສ່​ການ​ຊຸກ­ຍູ້​ການ​ຜະ­ລິດ​ຢູ່​ເຂດ​ແຂວງ​ວຽງ​ຈັນ ແລະ 3 ເມືອງ​ຂອງ​ນະ­ຄອນ­ຫຼວງ​ວຽງ​ຈັນ ທີ່​ຖືກ​ຜົນ​ກະ­ທົບ​ຈາກ​ການ​ປ່ອຍ​ນ້ຳ​ຈາກ​ເຂື່ອນ​ຕ່າງໆ ພ້ອມ​ນີ້ ມີ​ແຂວງ​ບໍ​ລິ​ຄຳ​ໄຊ ຄຳ​ມ່ວນ ສະ­ຫວັນ​ນະ​ເຂດ ແລະ ແຂວງ​ຈຳ­ປາ​ສັກ ເຊິ່ງ​ເປັນ​ເຂດ​ໜຶ່ງ​ທີ່​ມີ​ທ່າ­ແຮງ ແລະ ເປົ້າ​ໝາຍ​ການ​ຕອບ​ສະ­ໜອງ​ດ້ານ​ການ​ຜະ­ລິດ​ສະ­ບຽງ ແລະ ສາ­ມາດ​ຕອບ​ສະ­ໜອງ​ການ​ຜະ­ລິດ​ໄດ້ 2/3 ຂອງ​ການ​ຜະ­ລິດ​ທົ່ວ​ປະ­ເທດ ເພື່ອ​ແນ­ໃສ່​ການ​ຊຸກ­ຍູ້​ສົ່ງ­ເສີມ​ການ​ຜະ­ລິດ​ກະ­ສິ­ກຳ​ໃຫ້​ພຽງ­ພໍ ແລະ ທົ່ວ​ເຖິງ ເນື່ອງ​ໃນ​ໂອ­ກາດ​ວັນ​ອາ­ຫານ​ໂລກ ຄົບ­ຮອບ 38 ປີ ວັນ​ສາ­ກົນ ແລະ ວັນ​ສັບ­ປະ­ດາ​ແຫ່ງ​ຊາດ ເພື່ອ​ລຶ­ບລ້າງ​ຄວາມ­ທຸກ​ຍາກ ຄົບ­ຮອບ 32 ປີ ຂໍ​ຮຽກ­ຮ້ອງ​ມາ​ຍັງ​ອົງ​ການ­ຈັດ­ຕັ້ງ​ພັກ-ລັດ ແລະ ປວງ​ຊົນ​ລາວ​ທັງ​ຊາດ​ອົງ​ການ­ຈັດ­ຕັ້ງ​ສາ­ກົນ​ຕ່າງໆ​ໃນ​ລາວ ຈົ່ງ​ພ້ອມ​ກັນ​ເປັນ​ເຈົ້າ​ການ​ສະ­ເຫຼີມ­ສະ­ຫຼອງ​ວັນ​ສຳ­ຄັນ​ດັ່ງ­ກ່າວ ໃຫ້​ເປັນ​ຂະ​ບວນ​ຟົດ­ຟື້ນ.

    ສຳ­ລັບ​ກິດ­ຈະ­ກຳ​ໃນ​ງານ​ນອກ­ຈາກ​ມີ​ພິ­ທີ​ເປີດ​ງານ​ເປັນ​ທາງ​ການ ຕອນ​ເຊົ້າ​ວັນ​ທີ 16 ຕຸ­ລາ 2018 ແລ້ວ ຍັງ​ຈະ​ມີ​ກາ­ນວາງ­ສະ­ແດງ​ສິນ­ຄ້າ​ຜະ­ລິດ​ກະ­ສິ­ກຳ ແລະ ຮູບ​ພາບ​ຈາກ​ຂະ­ແໜງ­ການ​ຕ່າງໆ​ຂອງ​ກະ­ຊວງ​ກະ­ສິ­ກຳ ແລະ ປ່າ­ໄມ້ ອົງ​ການ­ຈັດ­ຕັ້ງ​ສາ­ກົນ ສຳ​ມະ​ນາ​ກ່ຽວ​ກັບ​ການ​ຄົ້ນ­ຄວ້າ​ວຽກ​ງານ​ກະ­ສິ­ກຳ ແລະ ອື່ນໆ​ອີກ.

ຂ່າວທີ່ກ່ຽວຂ້ອງ