ກວດສຸຂະພາບຕາ ໂດຍບໍ່ເສຍຄ່າ ໂອກາດສະຫຼອງວັນສາຍຕາໂລກ

127 11 ຕ.ລ. 2018 ຂ່າວໜ້າ​ໜຶ່ງ
ກວດສຸຂະພາບຕາ ໂດຍບໍ່ເສຍຄ່າ ໂອກາດສະຫຼອງວັນສາຍຕາໂລກ

    ມູນ​ນິ­ທິ​ເຟຼດ​ໂຮ​ໂລ (THE FRED HOLLOWS) ຮ່ວມ​ກັບ​ສູນ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຕາ (ທົ່ງ​ປົ່ງ) ແລະ ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ (ສສກ.ນວ) ຈັດ​ພິ­ທີ​ສະ­ເຫຼີມ­ສະ­ຫຼອງ​ວັນ​ສາຍ­ຕາ​ໂລກ ຂຶ້ນ​ວັນ​ທີ 10 ຕຸ­ລາ 2018 ຢູ່​ໂຮງ­ຮຽນ​ວຽງ​ຈັນ-ໂຮ່​ຈີ​ມິງ ໂດຍ​ມີ​ທ່ານ ພູ­ທອນ ແສງ​ດາ​ວົງ ຮອງ​ຫົວ­ໜ້າ​ພະ​ແນກ ສສກ.ນວ ທ່ານ​ນາງ ສຸ​ພອນ​ສາ ໄຊ​ປັນ­ຍາ ຫົວ­ໜ້າ​ມູນ​ນິ­ທິ​ເຟຼດ​ໂຮ​ໂລ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ການ​ສະ­ເຫຼີມ­ສະ­ຫຼອງ​ວັນ​ແຫ່ງ​ສາຍ­ຕາ​ໂລກ ແມ່ນ​ເລັ່ງ​ໃສ່​ໂຄ­ສະ­ນາ​ປຸກ­ລະ­ດົມ​ຊຸມ​ຊົນ​ທຸກ​ພາກ­ສ່ວນ ມີ​ສ່ວນ​ຮ່ວມ​ໃນ​ການ​ແກ້​ໄຂ​ບັນ­ຫາ​ຕາ­ບອດ ເພື່ອ​ໃຫ້​ສັງ­ຄົມ ກໍ່​ຄື ຄູ-ອາ­ຈານ ແລະ ນັກ­ຮຽນ ເຫັນ​ໄດ້​ຄວາມ​ສຳ­ຄັນ​ຂອງ​ວຽກ​ງານ​ຮັກ­ສາ​ສຸ­ຂະ­ພາບ​ຕາ​ຂັ້ນ​ຕົ້ນ ຮັບ​ຮູ້​ເຖິງ​ການ​ປ້ອງ​ກັນ ແລະ ຮັກ­ສາ​ສຸ­ຂະ­ພາບ​ຕາ ເຂົ້າ­ໃຈ​ສະ­ພາບ​ບັນ­ຫາ​ວຽກ​ງານ​ຕາ­ບອດ​ທີ່​ຫຼີກ​ລ່ຽງ​ໄດ້ ແລະ ສາຍ­ຕາ​ຜິດ​ປົກ­ກະ­ຕິ​ຢູ່​ລາວ ສາ­ມາດ​ນຳ​ເອົາ​ຄວາມ​ຮູ້​ດັ່ງ­ກ່າວ​ໄປ​ເຜີຍ­ແຜ່​ຕໍ່­ໃຫ້​ສັງ­ຄົມ ການ​ສະ­ຫຼອງ​ຄັ້ງ​ນີ້ ຍັງ​ເປັນ​ການ​ຊຸກ­ຍູ້​ໃຫ້​ມີ​ການ​ຂະ­ຫຍາຍ­ຕົວ​ຕໍ່​ເນື່ອງ ເອົາ­ໃຈ­ໃສ່​ວຽກ​ງານ​ປົກ​ປ້ອງ ແລະ ປິ່ນ­ປົວ​ຢ່າງ​ທົ່ວ​ເຖິງ ເຊິ່ງ​ການ​ເປີດ​ກວ້າງ​ຮັກ­ສາ​ສຸ­ຂະ­ພາບ​ຕາ​ຢ່າງ​ທົ່ວ​ເຖິງ ເປັນ​ຍຸດ​ທະ​ສາດ​ໜຶ່ງ​ເພື່ອ​ຊ່ວຍ​ຫຼຸດ­ຜ່ອນ​ຈຳ­ນວນ​ຄົນ​ຕາ­ບອດ ແມ່ນ​ພັນ­ທະ​ທີ່​ຈຳ­ເປັນ​ທີ່​ສັງ­ຄົມ ຕ້ອງ​ພ້ອມ​ກັນ​ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ ເພື່ອ​ບັນ­ລຸ​ມາດ­ຕະ­ຖານ​ສູງ​ສຸດ​ຂອງ​ການ​ມີ​ສຸ­ຂະ­ພາບ​ຕາ​ທີ່​ດີ.

    ການ​ສະ­ເຫຼີມ­ສະ­ຫຼອງ​ຄັ້ງ​ນີ້ ປະ­ກອບ​ມີ​ຫຼາຍ​ກິດ­ຈະ­ກຳ ເປັນ­ຕົ້ນ ບໍ­ລິ­ການ​ກວດ ແລະ ວັດ­ແທກ​ສາຍ­ຕາ​ໂດຍ​ຄະ­ນະ​ແພດ ແລະ ພະ­ຍາ­ບານ​ສູນ​ປິ່ນ­ປົວ​ຮັກ­ສາ​ສຸ­ຂະ­ພາບ​ຕາ ກໍ­ລະ­ນີ​ທີ່​ພົບ​ຄົນ​ເຈັບ​ທີ່​ຕ້ອງ​ຜ່າ­ຕັດ​ແກ່ນ​ຕາ​ຂຸ້ນ​ແມ່ນ​ຈະ​ສົ່ງ​ຜ່າ­ຕັດ ໂດຍ​ບໍ່​ເສຍ​ຄ່າ ໃນ​ວັນ​ທີ 11 ຕຸ­ລາ 2018 ຢູ່​ສູນ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຕາ (ທົ່ງ​ປົ່ງ) ເຊິ່ງ​ກິດ­ຈະ­ກຳ​ດັ່ງ­ກ່າວ​ໄດ້​ມີ​ມວນ​ຊົນ ຄູ-ອາ­ຈານ ນັກ­ຮຽນ​ເຂົ້າ​ກວດ ແລະ ວັດ­ແທກ​ສາຍ­ຕາ​ຫຼາຍ​ກວ່າ 200 ຄົນ ນອກ­ຈາກ​ນີ້ ຍັງ​ມີ​ການ​ໃຫ້​ຄວາມ​ຮູ້ ແລະ ຖາມ​ຕອບ​ກ່ຽວ​ກັບ​ສຸ­ຂະ­ພາບ​ຕາ ການ​ອອກ­ກຳ­ລັງ​ກາຍ​ເພື່ອ​ປຸກ­ລະ­ດົມ​ການ​ຮັກ­ສາ​ສຸ­ຂະ­ພາບ​ຕາ ແລະ ບັນ­ຫາ​ສາຍ­ຕາ​ຜິດ​ປົກ­ກະ­ຕິ.

    ມູນ​ນິ­ທິ​ເຟຼດ​ໂຮ​ໂລ ໄດ້​ສະ­ໜັບ­ສະ­ໜູນ​ທຶນ​ການ­ຈັດ­ຕັ້ງ​ໂຄງ­ການ​ເປີດ​ກວ້າງ ແລະ ປິ່ນ­ປົວ​ສຸ­ຂະ­ພາບ​ຕາ ມູນ​ຄ່າ 32 ຕື້​ກວ່າ​ກີບ ຢູ່​ແຂວງ​ຜົ້ງ​ສາ­ລີ ອຸ­ດົມ​ໄຊ ຫຼວງ​ນ້ຳ​ທາ ບໍ່​ແກ້ວ ໄຊ​ຍະ​ບູ​ລີ ຫຼວງ​ພະ​ບາງ ແຂວງ​ວຽງ​ຈັນ ບໍ​ລິ​ຄຳ​ໄຊ ຄຳ​ມ່ວນ ແລະ ສະ­ຫວັນ​ນະ​ເຂດ ໂດຍ​ພະ​ແນກ​ສາ­ທາ­ລະ­ນະ​ສຸກ​ແຂວງ ເປັນ​ຜູ້​ປະ­ຕິ­ບັດ​ໂຄງ­ການ ເພື່ອ​ແນ­ໃສ່​ກວດ ແລະ ປິ່ນ­ປົວ​ສຸ­ຂະ­ພາບ​ຕາ ໂດຍ​ບໍ່​ເສຍ​ຄ່າ.

ຂ່າວທີ່ກ່ຽວຂ້ອງ