ຂ່າວຫຼ້າສຸດ

ຜູ້ນຳຂອງປະເທດແມ່ນ້ຳຂອງ-ຍີ່ປຸ່ນ ຮັບຮອງເອົາຍຸດທະສາດໂຕກຽວ 2018

253 10 ຕ.ລ. 2018 ຂ່າວໜ້າ​ໜຶ່ງ
ຜູ້ນຳຂອງປະເທດແມ່ນ້ຳຂອງ-ຍີ່ປຸ່ນ ຮັບຮອງເອົາຍຸດທະສາດໂຕກຽວ 2018

    ໃນ​ວັນ​ທີ 9 ຕຸ­ລາ 2018 ຄະ­ນະ​ຜູ້​ແທນ ສປປ ລາວ ນຳ​ໂດຍ​ພະ­ນະ​ທ່ານ ທອງ​ລຸນ ສີ​ສຸ​ລິດ ນາ­ຍົກລັດ­ຖະ­ມົນ­ຕີ ແຫ່ງ ສປປ ລາວ ແລະ ຄະ­ນະ​ຜູ້​ແທນ​ໄດ້​ເຂົ້າ​ຮ່ວມ​ກອງ​ປະ­ຊຸມ​ສຸດ​ຍອດ​ແມ່­ນ້ຳ​ຂອງ-ຍີ່­ປຸ່ນ ຄັ້ງ​ທີ 10 ທີ່ ໂຕ​ກຽວ ຍີ່­ປຸ່ນ ພາຍ​ໃຕ້​ການ​ເປັນ​ປະ­ທານ​ຂອງ​ພະ­ນະ​ທ່ານ ຊິນ​ໂຊ ອາ​ເບະ ນາ­ຍົກ­ລັດ­ຖະ­ມົນ­ຕີ​ຍີ່­ປຸ່ນ ແລະ ມີ​ບັນ­ດາ​ຜູ້­ນຳ​ຂອງ 5 ປະ­ເທດ​ແມ່­ນ້ຳ​ຂອງ​ຄື: ກຳ­ປູ­ເຈຍ ສປປ ລາວ ມຽນ​ມາ ໄທ ແລະ ສສ ຫວຽດ­ນາມ ເຂົ້າ​ຮ່ວມ​ຢ່າງ​ພ້ອມ­ພຽງ.

    ກອງ​ປະ­ຊຸມ​ໄດ້​ຕີ​ລາ­ຄາ​ຄືນ ຄວາມ​ຄືບ​ໜ້າ​ຂອງ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ໂຄງ­ການ ແລະ ແຜນ​ວຽກ​ຕ່າງໆ​ພາຍ​ໃຕ້​ຍຸດ​ທະ​ສາດ​ໂຕ​ກຽວ 2015 ແລະ ແຜນ​ປະ­ຕິ­ບັດ​ງານ​ສຳ­ລັບ​ປີ 2016-2018 ຂອງ​ຂອບ​ການ​ຮ່ວມ​ມື​ແມ່­ນ້ຳ​ຂອງ-ຍີ່­ປຸ່ນ ໃນ​ໄລ­ຍະ​ຜ່ານ​ມາ ແລະ ຮ່ວມ​ກັນ​ປຶກ­ສາ​ຫາ­ລື​ກ່ຽວ​ກັບ​ທິດ​ທາງ​ເສີມ​ຂະ­ຫຍາຍ​ການ​ຮ່ວມ​ມື​ໃນ­ຕໍ່­ໜ້າ ໃນ​ໂອ­ກາດ​ດັ່ງ­ກ່າວ ບັນ­ດາ​ຜູ້­ນຳ​ຂອງ​ປະ­ເທດ​ແມ່­ນ້ຳ​ຂອງ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ລັດ­ຖະ­ບານ​ຍີ່­ປຸ່ນ ທີ່​ໄດ້​ມີ​ຄວາມ​ພະ­ຍາ­ຍາມ​ສຸມ​ໃສ່​ການ​ຊ່ວຍ­ເຫຼືອ ເພື່ອ​ພັດ­ທະ­ນາ​ພື້ນ­ຖານ​ໂຄງ​ລ່າງ​ອຸດ­ສາ­ຫະ­ກຳ​ພາກ​ພື້ນ​ແມ່­ນ້ຳ​ຂອງ​ໃນ​ໄລ­ຍະ 3 ປີ­ຜ່ານ­ມາ ໂດຍ​ສະ­ເພາະ ການ​ສະ­ໜັບ­ສະ­ໜູນ​ງົບ­ປະ­ມານ ຈຳ­ນວນ 750 ຕື້​ເຢັນ ເຂົ້າ​ໃນ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ຕ່າງໆ​ຂອງ​ແຜນ​ຍຸດ​ທະ​ສາດ​ໂຕ​ກຽວ 2015 ແລະ ສະ­ເໜີ​ໃຫ້​ຍີ່­ປຸ່ນ​ສືບ­ຕໍ່​ໃຫ້­ການ​ສະ­ໜັບ­ສະ­ໜູນ ສຳ­ລັບ ສປປ ລາວ ພະ­ນະ​ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ແລກ­ປ່ຽນ​ທັດ­ສະ­ນະ​ຕໍ່​ກອງ​ປະ­ຊຸມ​ວ່າ ສປປ ລາວ ມີ​ຄວາມ​ເພິ່ງ​ພໍ­ໃຈ​ຕໍ່​ໝາກ­ຜົນ​ຂອງ​ການ­ຈັດ­ຕັ້ງ​ປະ­ຕິ­ບັດ​ຍຸດ​ທະ​ສາດ​ໂຕ​ກຽວ 2015 ກໍ່​ຄື ການ­ຈັດ­ຕັ້ງ​ຜັນ​ຂະ­ຫຍາຍ​ບັນ­ດາ​ແຜນ​ວຽກ ແລະ ໂຄງ­ການ​ຕ່າງໆ ຕະ­ຫຼອດ​ໄລ­ຍະ 3 ປີ­ຜ່ານ­ມາ ເຫັນ​ວ່າ​ຫຼາຍ​ໂຄງ­ການ​ຢູ່ ສປປ ລາວ ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ມີ​ປະ​ສິດ­ທິ​ຜົນ ເປັນ­ຕົ້ນ​ແມ່ນ​ໃນ​ຂົງ­ເຂດ​ການ​ເຊື່ອມ​ຈອດ ແລະ ການ​ພັດ­ທະ­ນາ​ພື້ນ­ຖານ​ໂຄງ​ລ່າງ​ທີ່​ມີ​ຄຸ­ນະ­ພາບ​ເຊັ່ນ: ໂຄງ­ການ​ຂະ­ຫຍາຍ​ອາ­ຄານ​ສະ­ໜາມ​ບິນ​ສາ­ກົນ​ວັດ​ໄຕ ໂຄງ­ການ​ປັບ­ປຸງ​ເສັ້ນ­ທາງ​ໝາຍ​ເລກ 9 ໂຄງ­ການ​ສ້າງ​ຂົວ​ເຊ​ກອງ​ຢູ່​ເສັ້ນ­ທາງ​ຫຼວງ​ແຫ່ງ​ຊາດ​ໝາຍ​ເລກ 16 B ໂຄງ­ການ​ເຂື່ອນ​ໄຟ­ຟ້າ​ນ້ຳ​ງຽບ 1 ແລະ ອື່ນໆ ບັນ­ດາ​ໂຄງ­ການ​ເຫຼົ່າ​ນີ້ ບໍ່​ພຽງ​ແຕ່​ປະ­ກອບ­ສ່ວນ​ອັນ​ສຳ­ຄັນ​ໃຫ້​ແກ່​ການ​ເຊື່ອມ​ໂຍງ​ເສດ­ຖະ­ກິດ ລະ­ຫວ່າງ​ບັນ­ດາ​ປະ­ເທດ​ແມ່­ນ້ຳ​ຂອງ​ດ້ວຍ​ກັນ​ເທົ່າ​ນັ້ນ ແຕ່​ຍັງ​ເປັນ​ການ​ສ້າງ​ພື້ນ­ຖານ​ໂຄງ​ລ່າງ ໃຫ້​ແກ່​ການ​ເຊື່ອມ​ຈອດ​ຂອງ​ພາກ​ພື້ນ​ອີກ​ດ້ວຍ.

    ພ້ອມ​ດຽວ​ກັນ​ນີ້ ບັນ­ດາ​ຜູ້­ນຳ​ຂອງ​ປະ­ເທດ​ແມ່­ນ້ຳ​ຂອງ ແລະ ຍີ່­ປຸ່ນ ຍັງ​ໄດ້​ເຫັນ​ດີ​ເປັນ​ເອ­ກະ​ພາບ​ກັນ​ຮັບ­ຮອງ​ເອົາ​ຍຸດ​ທະ​ສາດ​ໂຕ​ກຽວ 2018 ເພື່ອ​ສືບ­ຕໍ່​ເສີມ​ຂະ­ຫຍາຍ​ການ​ຮ່ວມ​ມື​ລະ­ຫວ່າງ​ບັນ­ດາ​ປະ­ເທດ​ແມ່­ນ້ຳ​ຂອງ ແລະ ຍີ່­ປຸ່ນ ຂຶ້ນ​ສູ່​ລະ­ດັບ​ຄູ່​ຮ່ວມ​ຍຸດ​ທະ​ສາດ ແລະ ຮັບ­ປະ­ກັນ​ຜົນ​ປະ­ໂຫຍດ​ລວມ​ແຫ່ງ​ສັນ­ຕິ­ພາບ ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ຍົກ​ສູງ​ຄຸ­ນະ­ພາບ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ໃນ​ພາກ​ພື້ນ​ແມ່­ນ້ຳ​ຂອງ​ໃຫ້​ນັບ​ມື້​ນັບ​ດີ​ຂຶ້ນ ທັງ​ເປັນ​ການ​ສືບ­ຕໍ່​ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ລະ­ຫວ່າງ​ປະ­ເທດ​ແມ່­ນ້ຳ​ຂອງ ລວມ​ທັງ ສປປ ລາວ ກັບ ຍີ່­ປຸ່ນ ໃຫ້​ແໜ້ນ​ແຟ້ນ​ຍິ່ງ​ຂຶ້ນ.

    ນອກ­ຈາກ​ເຂົ້າ​ຮ່ວມ​ກອງ​ປະ­ຊຸມ​ສຸດ​ຍອດ ແມ່­ນ້ຳ​ຂອງ-ຍີ່­ປຸ່ນ ຄັ້ງ​ທີ 10 ພະ­ນະ​ທ່ານ​ນາ­ຍົກ­ລັດ­ຖະ­ມົນ­ຕີ ກໍ່​ໄດ້​ເຂົ້າ​ຢ້ຽມ​ຄຳ­ນັບ​ເຈົ້າ​ຈັກ­ກະ­ພັດ​ຍີ່­ປຸ່ນ ເຂົ້າ​ຮ່ວມ​ກອງ​ປະ­ຊຸມ​ພົບ​ປະ​ສອງ​ຝ່າຍ ລະ­ຫວ່າງ ສປປ ລາວ-ຍີ່­ປຸ່ນ ຮ່ວມ​ພົບ​ປະ​ກັບ​ຄະ­ນະ​ຮັບ­ຜິດ­ຊອບ ແລະ ນັກ​ກິ­ລາ​ບານ­ເຕະ​ທີມ​ຊາດ​ຂອງ​ບັນ­ດາ​ປະ­ເທດ​ແມ່­ນ້ຳ​ຂອງ ເຂົ້າ​ຮ່ວມ​ເປັນ​ສັກ­ຂີ​ພິ­ຍານ​ພິ­ທີ​ເຊັນ​ສັນ­ຍາ ແລະ ແລກ­ປ່ຽນ​ເອ­ກະ­ສານ​ວ່າ​ດ້ວຍ​ການ​ຊ່ວຍ­ເຫຼືອ​ດ້ານ UXO ລົງ​ນາມ​ໂດຍ​ລັດ­ຖະ­ມົນ­ຕີ​ຕ່າງ­ປະ­ເທດ​ຂອງ​ລາວ ແລະ ຍີ່­ປຸ່ນ ເຂົ້າ​ຮ່ວມ​ພົບ​ປະ​ກັບ​ສະ­ມາ­ຄົມ​ມິດ­ຕະ­ພາບ​ຝ່າຍ​ລັດ​ຖະ​ສະ­ພາ ຍີ່­ປຸ່ນ-ແມ່­ນ້ຳ​ຂອງ ແລະ ເຂົ້າ​ຮ່ວມ​ເວ­ທີ​ສົນ­ທະ­ນາ​ການ​ລົງ­ທຶນ​ຢູ່​ພາກ​ພື້ນ​ແມ່­ນ້ຳ​ຂອງ ຊຶ່ງ​ຈັດ​ຂຶ້ນ​ໂດຍ​ອົງ­ການ​ສົ່ງ­ເສີມ​ການ​ຄ້າ​ຍີ່­ປຸ່ນ ເພື່ອ​ເພີ່ມ​ທະ­ວີ​ການ​ຮ່ວມ​ມື ແລະ ສົ່ງ­ເສີມ​ການ​ຄ້າ ການ​ລົງ­ທຶນ ແລະ ທ່ອງ​ທ່ຽວ ລະ­ຫວ່າງ​ບັນ­ດາ​ປະ­ເທດ​ແມ່­ນ້ຳ​ຂອງ ແລະ ຍີ່­ປຸ່ນ ພ້ອມ​ທັງ​ໄດ້​ຕ້ອນ­ຮັບ​ການ​ຢ້ຽມ​ຄຳ­ນັບ​ຂອງ​ໂຮງ­ໝໍ ກິ​ຕາ​ຮາ​ຣາ ບໍ­ລິ­ສັດ Hitachi ແລະ ບໍ­ລິ­ສັດ TEPCO ເພື່ອ​ປືກ​ສາ​ຫາ­ລື​ແຜນ­ການ​ຮ່ວມ​ມື​ສອງ​ຝ່າຍ​ໃນ­ຕໍ່­ໜ້າ.

ຂ່າວທີ່ກ່ຽວຂ້ອງ