ເຈົ້າໜ້າທີ່ອາວຸໂສອາຊຽນ ປະກອບຄຳເຫັນໃສ່ຮ່າງເອກະສານຂອບການຮ່ວມມື

121 10 ຕ.ລ. 2018 ຂ່າວໜ້າ​ໜຶ່ງ

    ກອງ​ປະ­ຊຸມ​ເຈົ້າ​ໜ້າ­ທີ່​ອາ­ວຸ­ໂສ​ກົດ­ໝາຍ​ອາ​ຊຽນ ຄັ້ງ​ທີ 18 ຈັດ​ຂຶ້ນ​ວັນ​ທີ 9-10 ຕຸ­ລາ 2018 ຢູ່​ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ບຸນ​ສະ­ຫວາດ ບຸບ­ຜາ ຮອງ​ລັດ­ຖະ­ມົນ­ຕີ​ກະ­ຊວງ​ຍຸ­ຕິ​ທຳ ຫົວ­ໜ້າ​ເຈົ້າ​ໜ້າ­ທີ່​ອາ­ວຸ­ໂສ​ກົດ­ໝາຍ​ອາ​ຊຽນ​ຂອງ ສປປ ລາວ ມີ​ບັນ­ດາ​ກະ­ຊວງ ອົງ​ການ­ຈັດ­ຕັ້ງ​ສາ­ກົນ​ທີ່​ກ່ຽວ­ຂ້ອງ ແລະ ເຈົ້າ​ໜ້າ­ທີ່​ອາ­ວຸ­ໂສ​ກົດ­ໝາຍ 10 ປະ­ເທດ​ສະ­ມາ­ຊິກ​ອາ​ຊຽນ​ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ໄດ້​ພ້ອມ​ກັນ​ປຶກ­ສາ​ຫາ­ລື ແລະ ທົບ​ທວນ­ຄືນ​ຫົວ­ຂໍ້​ຕ່າງໆ​ຂອງ​ກອງ​ປະ­ຊຸມ​ເຈົ້າ​ໜ້າ­ທີ່​ອາ­ວຸ­ໂສ​ກົດ­ໝາຍ​ອາ​ຊຽນ ຄັ້ງ​ທີ 17 ພ້ອມ​ທັງ​ປະ­ກອບ​ຄຳ​ຄິດ​ຄຳ​ເຫັນ​ໃສ່​ຮ່າງ​ເອ­ກະ­ສານ​ຂອບ​ການ​ຮ່ວມ​ມື ປະ­ກອບ​ມີ​ການ​ຍົກ​ລະ­ດັບ​ສົນ­ທິ­ສັນ­ຍາ​ພະ­ຫຸ​ພາ­ຄີ ວ່າ​ດ້ວຍ​ການ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ທາງ​ດ້ານ​ກົດ­ໝາຍ​ໃນ​ເລື່ອງ​ອາ­ຍາ​ເປັນ​ສົນ­ທິ­ສັນ­ຍາ​ອາ​ຊຽນ ການ​ຮ່າງ​ສົນ­ທິ­ສັນ­ຍາ​ຕົວ​ແບບ​ວ່າ​ດ້ວຍ​ການ​ສົ່ງ​ຜູ້​ຮ້າຍ​ຂ້າມ​ແດນ​ຂອງ​ອາ​ຊຽນ ການ​ສ້າງ​ຄວາມ​ເຂັ້ມ­ແຂງ​ໃຫ້​ແກ່​ການ​ຮ່ວມ​ມື​ທາງ​ດ້ານ​ກົດ­ໝາຍ​ແພ່ງ ແລະ ການ​ຄ້າ​ໃນ​ປະ­ເທດ​ສະ­ມາ­ຊິກ​ອາ​ຊຽນ ການ​ພັດ­ທະ­ນາ​ການ​ສ້າງ​ຄວາມ​ກົມ­ກຽວ ແລະ ຄວາມ​ເປັນ​ເອ­ກະ​ພາບ​ໃຫ້​ແກ່​ກົດ­ໝາຍ​ການ​ຄ້າ​ຂອງ​ອາ​ຊຽນ ການ​ໂອນ​ຕົວ​ນັກ­ໂທດ ການ​ເປີດ​ເສລີ​ການ​ບໍ­ລິ­ການ​ດ້ານ​ກົດ­ໝາຍ ແລະ ການ​ສ້າງ​ຄວາມ​ເຂັ້ມ­ແຂງ​ໃຫ້​ຕາ​ໜ່າງ​ຂໍ້​ມູນ​ຂ່າວ­ສານ​ຂອງ​ປະ­ເທດ​ສະ­ມາ­ຊິກ​ອາ​ຊຽນ ແນ­ໃສ່​ໃຫ້​ມີ​ຄວາມ​ເປັນ​ເອ­ກະ​ພາບ​ກັນ ແລະ ນຳ​ສະ­ເໜີ​ຕໍ່​ກອງ​ປະ­ຊຸມ​ລັດ­ຖະ­ມົນ­ຕີ​ກົດ­ໝາຍ​ອາ​ຊຽນ ທີ່​ຈະ​ຈັດ​ຂຶ້ນ​ວັນ​ທີ 12 ຕຸ­ລາ 2018.

    ກອງ​ປະ­ຊຸມ​ເຈົ້າ​ໜ້າ­ທີ່​ອາ­ວຸ­ໂສ​ກົດ­ໝາຍ​ອາ​ຊຽນ ເປັນ​ກອງ​ປະ­ຊຸມ​ວິ­ຊາ​ການ​ທີ່​ປະ­ຕິ­ບັດ​ໜ້າ­ທີ່ ຕາມ​ການ​ມອບ​ໝາຍ​ຂອງ​ກອງ​ປະ­ຊຸມ​ລັດ­ຖະ­ມົນ­ຕີ​ກົດ­ໝາຍ​ອາ​ຊຽນ ເຊິ່ງ​ຈັດ​ຂຶ້ນ​ທຸກໆ 18 ເດືອນ ແລະ ຜັດ­ປ່ຽນ​ກັນ​ເປັນ​ເຈົ້າ­ພາບ ຕາມ​ຮອບ​ວຽນ​ຕົວ​ອັກ­ສອນ ຕາມ​ການ​ຕົກ­ລົງ​ຂອງ​ສະ­ມາ­ຊິກ ແລະ ກົນ​ໄກ​ການ​ປະ­ຕິ­ບັດ​ວຽກ​ງານ​ຂອງ​ອາ​ຊຽນ ປີ 2018 ກະ­ຊວງ​ຍຸ­ຕິ​ທຳ ສປປ ລາວ ໄດ້​ຮັບ​ກຽດ​ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ເຈົ້າ​ໜ້າ­ທີ່​ອາ­ວຸ­ໂສ​ກົດ­ໝາຍ​ອາ​ຊຽນ ຄັ້ງ​ທີ 18 ແລະ ກອງ​ປະ­ຊຸມ​ລັດ­ຖະ­ມົນ­ຕີ​ກົດ­ໝາຍ​ອາ​ຊຽນ ຄັ້ງ​ທີ 10 ໂດຍ​ມີ​ຈຸດ­ປະ­ສົງ​ເພື່ອ​ສືບ­ຕໍ່​ພິ­ຈາ­ລະ­ນາ ປຶກ­ສາ​ຫາ­ລື ແລະ ຄົ້ນ­ຄວ້າ​ຫົວ­ຂໍ້​ຕ່າງໆ​ທີ່​ໄດ້​ຮັບ­ຮອງ​ໂດຍ​ປະ­ເທດ​ສະ­ມາ­ຊິກ ໃນ​ນີ້ ບາງ​ບັນ­ຫາ​ເປັນ​ພຽງ​ການ​ລາຍ​ງານ​ຕໍ່​ກອງ​ປະ­ຊຸມ​ເທົ່າ​ນັ້ນ ແຕ່​ບາງ​ບັນ­ຫາ​ກໍ່​ໄດ້​ສືບ­ຕໍ່​ພິ­ຈາ­ລະ­ນາ ເພື່ອ​ນຳ​ເອົາ​ຜົນ​ຂອງ​ກອງ​ປະ­ຊຸມ​ເຈົ້າ​ໜ້າ­ທີ່​ອາ­ວຸ­ໂສ​ກົດ­ໝາຍ​ອາ​ຊຽນ ລາຍ​ງານ​ໃນ​ກອງ​ປະ­ຊຸມ​ລັດ­ຖະ­ມົນ­ຕີ​ກົດ­ໝາຍ​ອາ​ຊຽນ ແລະ ອອກ​ຖະ­ແຫຼງ­ການ​ຮ່ວມ​ລະ­ຫວ່າງ​ລັດ­ຖະ­ມົນ­ຕີ​ກົດ­ໝາຍ​ອາ​ຊຽນ​ຂອງ​ປະ­ເທດ​ສະ­ມາ­ຊິກ​ອາ​ຊຽນ ພາຍ­ຫຼັງ​ການ​ຮັບ­ຮອງ​ການ​ແກ້​ໄຂ​ບັນ­ຫາ ແລະ ຂໍ້​ສະ­ເໜີ​ຕ່າງໆ.

ຂ່າວທີ່ກ່ຽວຂ້ອງ