ລາວ ສົ່ງ 3 ປະເພດ ຮ່ວມກີລາໂອແລມປິກເຍົາວະຊົນ-ໄວໜຸ່ມ 2018

81 10 ຕ.ລ. 2018 ວົງຈອນກີລາ

    ງານ​ມະ​ຫະ​ກຳ​ກີ­ລາ​ໂອ​ແລມ​ປິກ​ລະ­ດູ​ຮ້ອນ​ຂອງ​ເຍົາ­ວະ​ຊົນ-ໄວ​ໜຸ່ມ​ສາ­ກົນ ຄັ້ງ​ທີ 3 ຫຼື 3rd Summer Youth Olympic Games 2018 ທີ່​ນະ­ຄອນ­ຫຼວງ​ບູ​ໂນ​ສ ໄອ​ເຣ​ສ ປະ­ເທດ​ອາກ​ຊັງ​ຕິນ ເປີດ​ສາກ​ທາງ​ການ ໃນ​ວັນ​ທີ 6 ຕຸ­ລາ 2018 ຂະ­ນະ​ທີ່​ລາວ​ເຮົາ​ສົ່ງ​ນັກ­ກີ­ລາ​ຮ່ວມ 3 ປະ­ເພດ ຄື: ລອຍ­ນ້ຳ ແລ່ນ-ລານ ແລະ ດອກ​ປີກ​ໄກ່ ລວມ​ຄະ­ນະ​ທັງ​ໝົດ 8 ຄົນ.

    ສຳ­ລັບ​ລາຍ​ຊື່​ຄະ­ນະ​ນຳ ແລະ ນັກ­ກີ­ລາ ປະ­ກອບ​ມີ ທ່ານ ກະ­ເສມ ອິນ​ທະ­ລາ ຮອງ​ປະ­ທານ​ຄະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ເປັນ​ຫົວ­ໜ້າ​ຄະ­ນະ​ນັກ­ກີ­ລາ ກີ­ລາ​ດອກ​ປີກ​ໄກ່ ທ່ານ ບຸນ​ຍະ​ແສງ ນະ​ຊຽງ​ຄຳ ຄູ​ເຝິກ ທ້າວ ເກດ​ຕິ​ຍະ ແກ້ວ​ໄຊ ນັກ­ກີ­ລາ​ລົງ​ແຂ່ງ​ປະ­ເພດ​ຊາຍ​ດ່ຽວ ກີ­ລາ​ລອຍ­ນ້ຳ ທ່ານ​ນາງ ສຸ​ລຳ​ພອນ ເກີດ​ຫຼ້າ ຄູ​ເຝິກ ນາງ ສົມ​ປາດ​ຖະ​ໜາ ຈຳ​ເບີ​ແລນ ລົງ​ແຂ່ງ​ລາຍ­ການ​ລອຍ​ຟຣີ​ສະ​ໄຕລ໌ 50 ແມັດ ກີ­ລາ​ແລ່ນ-ລານ ທ່ານ ຈະ­ເລີນ​ສຸກ ອ່າວ​ອຸ­ດົມ​ພັນ ຄູ​ເຝິກ ທ້າວ ຫວັດ​ໄຊ ສຸ​ລີ ລົງ​ແຂ່ງ­ຂັນ​ລາຍ­ການ​ແລ່ນ 100 ແມັດ ນາງ ໄພ­ລິນ ຄອນ​ປະ­ເສີດ ລົງ​ແຂ່ງ​ລາຍ­ການ​ແລ່ນ​ຂ້າມ​ຮົ້ວ 400 ແມັດ.

    ການ​ແຂ່ງ­ຂັນ​ຄັ້ງ​ນີ້​ເປັນ​ຄັ້ງ​ທຳ​ອິດ​ທີ່​ອາກ​ຊັງ​ຕິນ ໄດ້​ຮັບ​ກຽດ​ເປັນ​ເຈົ້າ­ພາບ ມີ​ນັກ­ກີ­ລາ​ເຂົ້າ​ຮ່ວມ​ເກືອບ 4.000 ຄົນ ຈາກ 206 ປະ­ເທດ ຊີງ 241 ຫຼຽນ​ຄຳ ໃນ 32 ປະ­ເພດ​ກີ­ລາ ແຂ່ງ­ຂັນ​ໃນ​ວັນ​ທີ 6-18 ຕຸ­ລາ 2018.

ຂ່າວທີ່ກ່ຽວຂ້ອງ