ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 09-10-2018

113 09 ຕ.ລ. 2018 ຫົວຂໍ້ຂ່າວອື່ນໆ

       ພົບ​ກັນ​ປະຈຳ​ວັນ​ນີ້ ຂໍ​ເລີ່ມ​ຕົ້ນ​ກັບ​ຂ່າວ​ສົງຄາມ​ຕ້ານ​ຖົງ ​ປລັສ​ຕິກ ຢູ່​ນິວ​ຊີ​ແລນ ແລະ ຂ່າວ​ກ່ຽວ​ກັບ ກົດໝາຍ​ຂໍ​ຕາຍ​ດ້ວຍ​ຄວາມ​ສະໝັກ​ໃຈ​ຂອງ​ຄົນ​ເຈັບ​ຂັ້ນ​ສຸດ​ທ້າຍ​ທີ່ ອົດ​ສະ​ຕຣາ​ລີ.

      ທີ່​ນິວ​ຊີ​ແລນ: ໃນ​ປັດຈຸບັນ​ຫຼາຍ​ປະເທດ​ໄດ້​ເຂົ້າ​ສູ່​ທາງ​ເລິກ​ໃນ​ການ​ຈຳກັດ ແລະ ກຳຈັດ​ຜະລິດ​ຕະ​ພັນ​ທີ່​ເຮັດ​ດ້ວຍ​ຢາງ ຫຼື ​ປລັສ​ຕິກ ດ້ວຍ​ວິທີ​ການ​ຕ່າງໆ ບາງ​ປະເທດ​ຂຶ້ນ​ພາສີ​ຖົງ​​ປລັສ​ຕິກ ບາງ​ປະເທດ​ໄດ້​ກຳນົດ​ໃຫ້​ຮ້ານ​ຄ້າ​ຕ່າງໆ​ງົດ​ຈ່າຍ​ຖົງ​​ປລັສ​ຕິກ​ໃຫ້​ລູກ​ຄ້າ​ລ້າໆ ເພື່ອ​ບັນຈຸ​ສິ່ງ​ຂອງ ບາງ​ປະເທດ​ກຳນົດ​ປະເພດ​ຜະ ລິດ​ຕະ​ພັນ ​ປລັສ​ຕິກ ວ່າ​ຊະນິດ​ໃດ​ຄວນ​ຫຼຸດຜ່ອນ ຫຼື ງົດ​ໃຊ້​ກ່ອນ ແຕ່​ສິ່ງ​ທີ່​ທຸກໆ​ປະເທດ​ເອົາໃຈໃສ່ ຈຳກັດ ແລະ ກຳຈັດ ນັ້ນ​ແມ່ນ​ປະເພດ​ຖົງ​​ປລັສ​ຕິກ ປະເພດ​ໃຊ້​ເທື່ອ​ດຽວ​ລະຖິ້ມ​ໂລດ ເຊິ່ງ​ສ່ວນ​ໃຫຍ່​ແມ່ນ​ຊະນິດ​ໃຊ້​ບັນຈຸ​ສິ່ງ​ຂອງ​ທີ່​ຊື້​ຕາມ​ຮ້ານ ສຳລັບ​ຢູ່​ນິວ​ຊີ​ແລນ ຫຼື ນູ​ແວນ​ເຊ​ລັງ ນັ້ນ ໄດ້​ກາຍເປັນ​ປະເທດ​ຫຼ້າ​ສຸດ (ມາ​ຮອດ​ປັດຈຸບັນ) ທີ່​ໄດ້​ສັ່ງ​ຫ້າມ​ໃຊ້ ຖົງ​​ປລັສ​ຕິກ ແບບ​ໃຊ້​ເທື່ອ​ດຽວ​ແລ້ວ​ຖິ້ມ ເບື້ອງ​ຫຼັງ​ການ​ສັ່ງ​ຫ້າມ​ນີ້ ແມ່ນ​ຍ້ອນ​ວ່າ​ຖົງ​​ປລັສ​ຕິກ ຊະນິດ​ນີ້​ມີ​ຄົນ​ໃຊ້​ເປັນ​ຈຳນວນ​ຫຼາຍ​ລ້ານ​ຖົງ​ໃນ​ແຕ່​ລະ​ປີ ເຮັດ​ໃຫ້​ຊາຍ​ຫາດ ແລະ ພື້ນ​ທະເລ ນິວ​ຊີ​ແລນ ເຕັມ​ອະ​ຍະ​ດ້ວຍ​ຖົງ​ຂີ້​ເຫ​ຍື້​​ອຍປລັສ​ຕິກ ນີ້​ເປັນ​ອັນຕະລາຍ​ຕໍ່​ສັດ​ນ້ຳ ມາດ​ຕະການ​ຫ້າມ​ໃຊ້​ຖົງ​​ປລັສ​ຕິກ​ຊະນິດ​ນີ້​ຍັງ​ຈະ​ຊ່ວຍ​ເຊີດ​ໜ້າ​ຊູ​ຕາ ນິວ​ຊີ​ແລນ​ໄດ້​ຮັບ​ນາມມະຍົດ​ວ່າ​ເປັນ​ປະເທດ​ສະອາດ ແລະ ເປັນ​ມິດ​ຕໍ່​ກັບ​ສິ່ງແວດລ້ອມ​ລະດັບ​ແນວ​ໜ້າ​ຂອງ​ໂລກ​ອີກ​ດ້ວຍ.

      ທີ່​ອົດ​ສະ​ຕຣາ​ລີ : ມີ​ຂ່າວ​ອ່າວ​ເກົ່າ​ເວົ້າ​ມາ​ແຕ່​ທ້າຍ​ປີ 2017 ກ່ຽວ​ກັບ​ທາງ​ການ​ຂອງ​ລັດ​ວິກ​ຕໍ​ເຣຍ ອົດ​ສະ​ຕຣາ​ລີ ຜ່ານ​ກົດໝາຍ​ຊ່ວຍ​ຄົນ​ເຈັບ​ໄລຍະ​ສຸດ​ທ້າຍ​ຈົບ​ຊີວິດ​ຂອງ​ຕົນ​ເອງ ກົດໝາຍ​ຊ່ວຍ​ໃຫ້​ຄົນ​ຕາຍ​ຕາມ​ການ​ຂໍ​ຮ້ອງ​ສະບັບ​ທຳ​ອິດ​ໃນ ອົດ​ສະ​ຕຣາ​ລີ ນີ້​ຄວບ​ຄຸມ​ສະເພາະ​ຄົນ​ເຈັບ​ໄລຍະ​ສຸດ​ທ້າຍ​ເທົ່າ​ນັ້ນ ແລະ ຄົນ​ເຈັບ​ທີ່​ຈະ​ໄດ້​ຮັບ​ອະນຸຍາດ​ໃຫ້​ຕາຍ​ໄດ້ ຕ້ອງ​ມີ​ອາຍຸ​ຕ່ຳ​ສຸດ18 ປີ ທີ່ຢູ່​ໃນ​ອາການ​ຮ້າຍ​ແຮງ​ສຸດ​ຂີດ ຂັ້ນ​ບໍ່​ສາມາດ​ປິ່ນປົວ​ໃຫ້​ຫາຍ​ໄດ້ ຄົນ​ເຈັບ​ດັ່ງກ່າວ​ຕ້ອງ​ໄດ້​ຮັບ​ການ​ຢັ້ງຢືນ​ຈາກ ແພດ-ໝໍ ວ່າ​ຈະ​ເສຍ​ຊີວິດ​ໄວ​ກວ່າ 6 ເດືອນ ຄົນ​ເຈັບ​ໄລຍະ​ສຸດ​ທ້າຍ ສາມາດ​ໃຊ້​ຢາ​ປິດ​ຊີວິດ​ຕົນ​ເອງ​ໄດ້​ພາຍ​ໃນ 10 ວັນ ຫຼັງ​ຈາກ​ຍື່ນ​ຄຳ​ສະເໜີ ແລະ ຕ້ອງ​ເປັນ​ຄົນ​ສີດ​ຢາ​ມໍລະນະ​ດັ່ງກ່າວ​ດ້ວຍ​ຕົນ​ເອງ ແຕ່​ໃນ​ກໍລະນີ​ມີ​ອາການ​ອ່ອນເພຍ ບໍ່​ສາມາດ​ສັກ​ເອງ​ໄດ້ ກໍ່​ຈະ​ແມ່ນ​ແພດ​ເປັນ​ຜູ້​ຊ່ວຍ​ສັກ​ໃຫ້ ອີກ​ເງື່ອນໄຂ​ໜຶ່ງ​ຈຳເປັນ​ສຳລັບ​ຄົນ​ເຈັບ​ຂັ້ນ​ສຸດ​ທ້າຍ ທີ່​ຂໍ​ອະນຸ ຍາດ​ປິດ​ຊີວິດ​ຕົນ​ເອງ ຄື​ຜູ້ກ່ຽວ​ຕ້ອງ​ມີ​ສະຕິ​ສົມບູນ ປົກກະຕິ ແລະ ຜ່ານ​ການ​ຍື່ນ​ຄຳ​ສະເໜີ 3 ຄັ້ງ ຕໍ່​ແພດ​ທີ່​ຮັບຜິດຊອບ​ກ່ຽວ​ກັບ​ເລື່ອງ​ນີ້ ແນວໃດ​ກໍ່​ດີ ກົດໝາຍ​ສະບັບ​ນີ້​ກໍ່​ມີ​ທັງ​ຜູ້​ສະໜັບສະໜູນ ແລະ ຜູ້​ຄັດຄ້ານ ຜູ້​ສະໜັບສະໜູນ​ນັ້ນ​ບອກ​ວ່າ ເປັນ​ກົດໝາຍ​ແຫ່ງ​ບາດ​ລ້ຽວ​ໃໝ່ ທີ່​ເຂົ້າ​ເຖິງ​ຈິດໃຈ​ຄົນ​ເຈັບ​ໄລຍະ​ສຸດ​ທ້າຍ ສ່ວນ​ຜູ້​ບໍ່​ເຫັນ​ດີ​ນັ້ນ​ກໍ່​ມີ​ຂໍ້​ອ້າງ​ຍາວ​ຄ່າ​ສອກ​ວ່າ ຈະ​ເປັນ​ຊ່ອງ​ທາງ​ໃຫ້​ມີ​ການ​ກະທຳ​ຜິດ​ຕໍ່​ຜູ້​ອາຍຸ​ສູງ ແລະ ຍັງ​ເປັນ​ການ​ບ່າຍ​ບ່ຽງ​ສິດ​ຂອງ​ຄົນ​ເຈັບ​ໄລຍະ​ສຸດ​ທ້າຍ​ໃນ​ການ​ຮັບ​ການ​ປິ່ນປົວ​ເຕັມ​ຄວາມ​ສາມາດ​ຕາມ​ອາການ​ຈົນ​ເຖິງ​ທີ່​ສຸດ ຮ່າງ​ກົດໝາຍ​ນີ້​ໄດ້​ໃຊ້​ເວລາ​ຜ່ານ​ກອງ​ປະຊຸມ​ລັດ​ຖະ​ສະພາ​ເປັນ​ເວລາ 100 ຊົ່ວໂມງ ກ່ອນ​ຖືກ​ຮັບຮອງ​ເອົາ ແລະ ຈະ​ມີ​ຜົນ​ສັກສິດ​ໃນ​ທາງ​ປະຕິບັດ ນັບ​ແຕ່​ກາງ​ປີ 2019 ເປັນຕົ້ນ​ໄປ.

ຂ່າວທີ່ກ່ຽວຂ້ອງ