ຮອດປີ 2020 ດອນໂຂງ ຈະມີເສັ້ນທາງຄອດກຣີດອ້ອມຮອບ

175 09 ຕ.ລ. 2018 ຂ່າວໜ້າ​ໜຶ່ງ

    ໃນ​ວັນ​ທີ 6 ຕຸ­ລາ 2018 ໄດ້​ມີ​ພິ­ທີ​ວາງ​ສີ​ລາ​ລຶກ​ໂຄງ­ການ​ກໍ່­ສ້າງ​ເສັ້ນ­ທາງ​ຄອນ​ກຣີດ​ອ້ອມ​ດອນ​ໂຂງ ເຊິ່ງ​ມີ​ຄວາມ​ຍາວ 43 ກິ­ໂລ­ແມັດ ຢູ່​ບ້ານ​ກາງ​ໂຂງ ເມືອງ​ໂຂງ ແຂວງ​ຈຳ­ປາ​ສັກ ໂດຍ​ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ການ​ນຳ​ຈາກ​ສູນ​ກາງ ທ້ອງ­ຖິ່ນ ຜູ້​ໃຫ້​ທຶນ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ໃນ​ພິ­ທີ​ດັ່ງ­ກ່າວ ທ່ານ ສອນ​ໄຊ ສີ​ພັນ​ດອນ ແລະ ແຂກ​ທີ່​ເຂົ້າ​ຮ່ວມ​ໄດ້​ພ້ອມ​ກັນ​ຕັດ​ແຖບ​ຜ້າ ພ້ອມ​ທັງ​ລັ່ນ­ຄ້ອງ​ເກົ້າ​ບາດ ເພື່ອ​ເຮັດ​ໃຫ້​ພິ­ທີ​ວາງ​ສີ​ລາ​ລຶກ​ໂຄງ­ການ​ດັ່ງ­ກ່າວ ມີ​ຄວາມ​ໝາຍ​ຄວາມ​ສຳ­ຄັນ​ຍິ່ງ​ຂຶ້ນ.

    ທ່ານ ບຸນ​ຖອງ ດີ​ວິ​ໄຊ ເຈົ້າ­ແຂວງ​ຈຳ­ປາ​ສັກ ກ່າວ​ວ່າ: ໂຄງ­ການ​ກໍ່­ສ້າງ​ເສັ້ນ­ທາງ​ອ້ອມ​ດອນ​ໂຂງ ເປັນ​ໜຶ່ງ​ໃນ 17 ກິດ­ຈະ­ກຳ​ຂອງ​ໄລ­ຍະ​ທີ 1 ຂອງ​ໂຄງ­ການ​ພັດ­ທະ­ນາ​ໃໝ່​ສີ­ທັນ­ດອນ ເຊິ່ງ​ໄດ້​ຮັບ​ການ​ຊ່ວຍ­ເຫຼືອ​ລ້າ​ໃນ​ມູນ​ຄ່າ 25 ລ້ານ​ໂດ​ລາ​ສະ­ຫະ­ລັດ ຈາກ​ບໍ­ລິ­ສັດ ຮ່ວມ​ທຶນ​ພັດ­ທະ­ນາ​ສີ­ທັນ­ດອນ ຈຳ­ກັດ ໂດຍ​ຄາດ​ວ່າ​ຈະ​ສຳ­ເລັດ​ການ​ກໍ່­ສ້າງ​ໃນ​ປີ 2020 ການ​ກໍ່­ສ້າງ​ເສັ້ນ­ທາງ​ດັ່ງ­ກ່າວ ຈະ​ອີງ­ໃສ່​ໂຄງ​ສ້າງ​ພື້ນ­ຖານ​ເສັ້ນ­ທາງ​ທີ່​ມີ​ຢູ່​ແລ້ວ ແຕ່​ຈະ​ສ້າງ​ເປັນ​ເສັ້ນ­ທາງ​ຄອນ​ກຣີດ​ທັງ​ໝົດ ເພື່ອ​ຮອງ​ຮັບ​ໃຫ້​ແກ່​ການ​ເດີນ­ທາງ​ໄປ​ມາ ການ​ຄ້າ ການ​ບໍ­ລິ­ການ ການ​ຂົນ­ສົ່ງ ແລະ ການ­ທ່ອງ­ທ່ຽວ​ໃນ​ເຂດ​ດັ່ງ­ກ່າວ ເຊິ່ງ​ຈະ​ເປັນ​ການ​ດຶງ​ດູດ​ນັກ​ທ່ອງ​ທ່ຽວ​ໃຫ້​ເຂົ້າ​ມາ​ຫຼາຍ​ຂຶ້ນ.

    ໂອ­ກາດ​ນີ້ ທ່ານ ສອນ​ໄຊ ສີ​ພັນ​ດອນ ກໍ່​ໄດ້​ໂອ້​ລົມ ແລະ ມີ​ຄຳ​ເຫັນ​ຊີ້​ນຳ ເພື່ອ​ເຮັດ​ໃຫ້​ອຳ­ນາດ​ການ​ປົກ­ຄອງ​ທ້ອງ­ຖິ່ນ ແລະ ປະ­ຊາ­ຊົນ​ທີ່​ອາ­ໄສ​ຢູ່​ໃນ​ເຂດ​ດັ່ງ­ກ່າວ ມີ​ຄວາມ​ຮັບ​ຮູ້ ແລະ ເຂົ້າ­ໃຈ​ຕໍ່​ແນວ­ທາງ​ນະ­ໂຍ­ບາຍ​ຂອງ​ພັກ-ລັດ ກໍ່​ຄື ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໂດຍ​ສະ­ເພາະ​ແມ່ນ​ໂຄງ­ການ​ພັດ­ທະ­ນາ​ໃໝ່​ສີ­ທັນ­ດອນ ພ້ອມ​ທັງ​ໄດ້​ເນັ້ນ​ໃຫ້​ອຳ­ນາດ​ການ​ປົກ­ຄອງ​ທຸກ​ຂັ້ນ ແລະ ປະ­ຊາ­ຊົນ​ໃຫ້­ການ​ຮ່ວມ​ມື ແລະ ມີ​ສ່ວນ​ຮ່ວມ ເພື່ອ​ເຮັດ​ໃຫ້​ໂຄງ­ການ​ດັ່ງ­ກ່າວ​ດຳ­ເນີນ​ໄປ​ຕາມ​ຈຸດ­ປະ­ສົງ ແລະ ຄາດ­ໝາຍ​ທີ່​ວາງ​ໄວ້.

    ໂຄງ­ການ​ພັດ­ທະ­ນາ​ໃໝ່ ສີ­ທັນ­ດອນ ເປັນ​ໂຄງ­ການ​ໜຶ່ງ​ທີ່​ມີ​ຄວາມ​ສຳ­ຄັນ​ຫຼາຍ ເພື່ອ​ສ້າງ​ໃຫ້​ເປັນ​ບ່ອນ​ສ້າງ​ລາຍ​ຮັບ​ທີ່​ບໍ່​ບົກ​ແຫ້ງ ຍືນ​ຍົງ ແລະ ກະ­ຕຸກ​ຊຸກ­ຍູ້​ເສດ­ຖະ­ກິດ​ຂອງ​ຊາດ ກໍ່​ຄື ເສດ­ຖະ­ກິດ​ຂອງ​ແຂວງ​ຈຳ­ປາ​ສັກ ໃຫ້​ມີ​ການ​ພັດ­ທະ­ນາ ແລະ ມີ​ການ​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ທັງ​ເປັນ​ການ­ຈັດ­ຕັ້ງ​ຜັນ​ຂະ­ຫຍາຍ​ການ​ຕົກ­ລົງ​ຂອງ​ສອງ​ພັກ-ສອງ​ລັດ ກໍ່​ຄື ປະ­ຊາ­ຊົນ​ສອງ​ຊາດ ລາວ-ຈີນ.

    ໂຄງ­ການ​ດັ່ງ­ກ່າວ ໄດ້​ຮັບ​ການ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ ເພື່ອ​ສຶກ​ສາ ແລະ ສຳ​ຫຼວດ ໃນ​ວັນ​ທີ 30 ມິ­ຖຸ­ນາ 2017 ໂດຍ​ແມ່ນ​ບໍ­ລິ­ສັດ ກວາງ​ດົງ​ເຢນ​ໂລ ອິນ​ດັດ​ສ​ຕີ ຈຳ­ກັດ ກໍ່​ຄື ບໍ­ລິ­ສັດ ຮ່ວມ​ທຶນ​ພັດ­ທະ­ນາ​ສີ­ທັນ­ດອນ ຈຳ­ກັດ ເປັນ​ຜູ້​ສຳ​ປະ­ທານ ໃນ​ໄລ­ຍະ 50 ປີ (2018-2050) ໃນ​ເນື້ອ­ທີ່​ທັງ​ໝົດ 9.846 ເຮັກ­ຕາ ເຊິ່ງ​ປະ­ກອບ​ມີ 6 ໄລ­ຍະ ມີ​ຫຼາຍ​ກິດ­ຈະ­ກຳ ລວມ​ມູນ​ຄ່າ​ລົງ­ທຶນ​ທັງ​ໝົດ 9 ຕື້​ກວ່າ​ໂດ​ລາ​ສະ­ຫະ­ລັດ ຖ້າ​ຫາກ​ໂຄງ­ການ​ດັ່ງ­ກ່າວ​ສຳ­ເລັດ​ການ​ກໍ່­ສ້າງ ຄາດ​ຄະ­ເນ​ຈະ​ມີ​ນັກ​ທ່ອງ​ທ່ຽວ​ເຂົ້າ​ມາ​ເຖິງ 15 ລ້ານ​ເທື່ອ​ຄົນ​ຕໍ່​ປີ ແລະ ຈະ​ສ້າງ​ລາຍ​ຮັບ​ໃຫ້​ຂະ­ແໜງ​ການ­ທ່ອງ­ທ່ຽວ​ເຖິງ 2,4 ຕື້​ໂດ​ລາ​ສະ­ຫະ­ລັດ.

ຂ່າວທີ່ກ່ຽວຂ້ອງ