ເບີ່ງບ້ານເຂົາເອົາບົດຮຽນ 04-10-2018

    ຄໍ​ລຳ​ປະຈຳ​ວັນ​ນີ້ ເລີ່ມ​ຈາກ​ຂ່າວ​ອົງການ​ອະນາໄມ​ໂລກ​ແນະນຳ​ໃຫ້ ຊາວ​ໂລກ​ມີ​ເວລາ​ອອກກຳລັງ​ກາຍ​ຢ່າງ​ເໝາະ​ສົມ ແລະ ເລື່ອງ​ບໍລິສັດ​ໃຈ​ຈີນ ປະກາດ​ຍົກເລີກ​ການ​ໃຊ້​ແຮງ​ງານ​ນັກຮຽນ​ເຝິກ​ງານ.   

    ທີ່​ອົງການ​ອະນາໄມ​ໂລກ:  ຄວາມ​ກ້າວໜ້າ​ແບບ​ກະໂດດ​ຂັ້ນ​ທາງ​ດ້ານ​ວິທະຍາສາດ​ເຕັກ​ໂນ​ໂລ​ຊີ ໄດ້​ເຮັດ​ໃຫ້​ຊີວິດ​ຊາວ​ໂລກ​ສະບາຍ​ຂຶ້ນ ຍ້ອນ​ມີ​ຄວາມ​ສະດວກ​ສະບາຍ​ຮອບດ້ານ ເຊັ່ນ:  ມີ​ລົດ​ຕາງ​ຕີນ​ຍ່າງ ມີ​ຫຸ່ນ​ຍົນ​ຊ່ວຍ​ວຽກ ມີ​ໂທລະສັບ​ມື​ຖື ແລະ ເຄື່ອງມື​ສື່ສານ​ຊ່ວຍ​ຕິດຕໍ່​ພົວພັນ​ກັນ ໂດຍ​ບໍ່​ຈຳເປັນ​ໄດ້​ອອກແຮງ​ຫອບ​ສັງຂານ​ໄປ​ພົບ​ກັນ ຢາກ​ຊື້​ເຄື່ອງ ຫຼື ອາຫານ​ກໍ່​ອາໄສ​ອິນ​ເຕີ​ເນັດ​ສັ່ງ​ທາງ​ອອນ​ລາຍ​ກໍ່​ມາ​ພ້ອມ​ກັນ ຄວາມ​ສະດວກ​ສະບາຍ​ເຫຼົ່າ​ນີ້ ຊາວ​ໂລກ​ພັດ​ປະ​ເຊີນ​ກັບ​ບັນຫາ​ສຸຂະພາບ​ຍ້ອນ​ຂາດ​ການເຄື່ອນໄຫວ​ຮ່າງກາຍ​ເຮັດ​ໃຫ້​ລະບົບ​ປະສາດ​ອ່ອນແອ ຍ້ອນ​ແນວ​ນັ້ນ​ເອງ ຈຶ່ງ​ມີ​ຂ່າວ​ອອກ​ມາ​ໃນ​ຕອນ​ຕົ້ນ​ເດືອນ​ກັນຍາ​ປີ​ນີ້​ວ່າ: ອົງການ​ອະນາໄມ​ໂລກ​ໄດ້​ອອກ​ມາ​ແນະນຳ​ໃຫ້​ຊາວ​ໂລກ ໃນ​ເກນ​ອາຍຸ​ຜູ້​ໃຫຍ່ ອອກກຳລັງ​ກາຍ​ຢ່າງ​ໜ້ອຍ​ອາທິດ​ລະ 150 ນາທີ (ປະມານ​ມື້​ລະ 20 ນາທີ​ກວ່າ) ດ້ວຍ​ຮູບ​ການ​ຍ່າງ ລອຍນ້ຳ ຫຼື ຂີ່​ລົດຖີບ ຖ້າ​ຫຼິ້ນ​ກິລາ​ແບບ​ໃຊ້​ແຮງ​ຫຼາຍ ເຊັ່ນ: ແລ່ນ ຫຼື ກິລາ​ປະເພດ​ທິມ ແມ່ນ 75 ນາທີ ຕໍ່​ອາທິດ​ເປັນ​ຢ່າງ​ໜ້ອຍ.

  ໃນ​ປີ 2016 ອົງການ​ອະນາໄມ​ໂລກ ໄດ້​ເຮັດ​ການ​ສຶກ​ສາ​ກ່ຽວ​ກັບ​ກິດຈະກຳ​ຂອງ​ປະຊາກອນ​ຈຳນວນ 1,900 ລ້ານ​ຄົນ​ໃນ 168 ປະເທດ ແລະ ພົບ​ວ່າ​ຄົນ​ໃນ​ປະເທດ​ຮັ່ງມີ ທີ່​ມີ​ຊີວິດ​ການ​ເປັນ​ຢູ່​ດີ​ຂຶ້ນ​ນັ້ນ​ໄດ້​ແຕ່​ນັ່ງ​ຢູ່​ນອນ​ກິນ ບໍ່​ໄດ້​ເຄື່ອນ​ໄຫວ​ຮ່າງກາຍ​ເຮັດ​ໃຫ້ ໜຶ່ງ​ໃນ​ສາມ​ຂອງ​ແມ່ຍິງ ແລະ ໜຶ່ງ​ໃນ​ສີ່​ຂອງ​ຜູ້​ຊາຍ​ສ່ຽງ​ເປັນ​ພະຍາດຫົວໃຈ ເບົາຫວານ ແລະ ມະ​ເຮັງ ອົງການ​ອະນາໄມ​ໂລກ​ໄດ້​ຮຽກຮ້ອງ​ໃຫ້​ລັດຖະບານ​ຂອງ​ທຸກໆ​ປະເທດ​ສ້າງ​ສິ່ງ​ອຳນວຍ​ຄວາມ​ສະດວກ​ສຳລັບ​ໃຫ້​ພົນລະເມືອງ​ໄດ້​ອອກກຳລັງ​ກາຍ ເຊັ່ນ: ການ​ຂີ່​ລົດຖີບ ແລະ ຍ່າງ ຈັດ​ກິດຈະກຳ​ອອກກຳລັງ​ກາຍ​ລວມ​ໝູ່​ຕາມ​ສະຖານທີ່ ກາງເດີ່ນ ຕາມ​ສວນ​ສາທາລະນະ ຕາມ​ບ່ອນ​ເຮັດ​ວຽກ ແລະ ຕາມ​ເຂດ​ຊຸມ​ຊົນ.

    ທີ່ ​ສປ ຈີນ:  ມີ​ຂ່າວ​ຈາກ ​ສປ ຈີນ ໃນ​ທ້າຍ​ປີ 2017 ວ່າ:  ບໍລິສັດ​ຂະໜາດ​ໃຫຍ່​ແຫ່ງ​ໜຶ່ງ​ຂອງ​ຈີນ ທີ່​ເປັນ​ບໍລິສັດ​ຕົ້ນຕໍ​ຂອງ​ໄອ​ໂຟນ ແອັບ​ເປິ້ນ ໄດ້​ສັ່ງ​ຢຸດ​ການ​ເຮັດ​ວຽກ​ລ່ວງ​ເວລາ​ແບບ​ຜິດ​ກົດໝາຍ​ຂອງ​ນັກ​ສຶກ​ສາ​ເຝິກ​ງານ ພາຍຫຼັງ​ໄດ້​ມີ​ຂ່າວ​ຮົ່ວ​ໄຫຼ​ອອກ​ມາ​ວ່າ ມີ​ນັກ​ສຶກ​ສາ​ເຝິກ​ງານ​ຢ່າງ​ໜ້ອຍ 6 ຄົນ​ໄດ້​ເຮັດ​ວຽກ​ຫຼາຍ​ກວ່າ 11 ຊົວ​ໂມງ​ຕໍ່​ວັນ​ໃນ​ໂຮງງານ​ຜະລິດ ໄອ​ໂຟນ ສິບ (iphone x) ທີ່​ມົນທົນ​ເຫີ​ນານ ຢູ່ ​ສປ ຈີນ ກົດໝາຍ​ແຮງ​ງານ​ໄດ້​ກຳນົດ​ຫ້າມ​ເດັກນ້ອຍ ເຮັດ​ວຽກ​ຫຼາຍ​ກວ່າ 40 ຊົ່ວໂມງ​ຕໍ່​ອາທິດ ຕໍ່​ບັນຫາ​ນີ້​ທາງ​ບໍລິສັດ​ໄດ້​ເປີດເຜີຍ​ວ່າ ເດັກ​ນັກຮຽນ​ມັດທະຍົມ​ໄດ້​ເຂົ້າ​ມາ​ເຮັດ​ວຽກ​ຢູ່​ບໍລິສັດ​ດ້ວຍ​ຄວາມ​ສະໝັກ​ໃຈ ແຕ່​ພວກ​ເຂົາ​ບໍ່​ໄດ້​ຮັບ​ອະນຸຍາດ​ໃຫ້​ເຮັດ​ວຽກ​ລ່ວງ​ເວລາ ສຳລັບ​ກໍລະນີ​ທີ່​ເດັກ ນັກຮຽນ​ໄດ້​ເຮັດ​ວຽກ​ລ່ວງ​ເວລາ​ທີ່​ໄດ້​ກ່າວ​ມາ​ຂ້າງ​ຕົ້ນ​ນັ້ນ ທາງ​ບໍລິສັດ​ໄດ້​ຈ່າຍ​ຄ່າ​ຊົດ​ເຊີຍ​ພ້ອມ​ທັງ​ໄດ້​ປະກາດ​ວ່າ ທາງ​ບໍລິສັດ ແອັບ​ເປິ້ນ ໄດ້​ທຸ້ມເທ​ເພື່ອ​ຮັບປະກັນ​ໃຫ້​ທຸກໆ​ຄົນ​ໃນ​ຂະ​ບວນ​ການ​ຜະລິດ​ໄດ້​ຮັບ​ການ​ປະຕິບັດ​ຕໍ່​ດ້ວຍ​ກຽດ​ສັກ​ສີ ແລະ ຄວາມ​ເຄົາລົບ ທີ່​ສົມຄວນ​ໄດ້​ຮັບ ສ່ວນ​ບໍລິສັດ ຮັບຜິດຊອບ​ການ​ເຝິກ​ງານ​ຂອງ​ຈີນ ກໍ່​ໄດ້​ອອກ​ມາ​ປະກາດ​ວ່າ ຈະ​ດຳເນີນ​ການ​ຢ່າງ​ເຄັ່ງ​ຄັດ ເພື່ອ​ຮັບປະກັນ​ບໍ່​ໃຫ້​ນັກຮຽນ​ເຝິກ​ງານ​ເຮັດ​ວຽກ​ລ່ວງ​ເວລາ ເພາະ​ເປັນ​ການ​ລະເມີດ​ກົດໝາຍ ແລະ ບໍ່ ສອດຄ່ອງ​ກັບ​ນະໂຍບາຍ​ຂອງ​ບໍລິສັດ ຂ່າວ​ບອກ​ວ່າ ທາງ​ບໍລິສັດ​ໄດ້​ຈ້າງ​ນັກຮຽນ​ເຝິກ​ງານ​ເຂົ້າ​ມາ​ເຮັດ​ວຽກ​ໃນ​ເດືອນ​ກັນຍາ ປີ 2017 ເພື່ອ​ຜະລິດ ໄອ​ໂຟນ 10 (iphone x) ໃຫ້​ທັນ​ກັບ​ຄວາມ​ຕ້ອງການ​ຂອງ​ຕະຫຼາດ.