ຫາລືກຽມສົ່ງກີລາ 2 ປະເພດ ໄປເຝິກຊ້ອມຢູ່ຍີ່ປຸ່ນ

412 04 ຕ.ລ. 2018 ວົງຈອນກີລາ
ຫາລືກຽມສົ່ງກີລາ 2 ປະເພດ ໄປເຝິກຊ້ອມຢູ່ຍີ່ປຸ່ນ

    ຄະ­ນະ​ກຳ­ມະ­ການ​ກີ­ລາ​ພາ​ຣາ​ແລມ​ປິກ​ແຫ່ງ​ຊາດ​ລາວ (ຄພລ) ແລະ ໂຄງ­ການ​ນັກ­ກີ­ລາ ເພື່ອ​ສັງ­ຄົມ​ຈາກ​ປະ­ເທດ​ຍີ່­ປຸ່ນ ໄດ້​ຮ່ວມ​ກັນ​ປຶກ­ສາ​ຫາ­ລື​ກ່ຽວ​ກັບ​ການ​ກະ­ກຽມ​ແຜນ​ສົ່ງ​ນັກ­ກີ­ລາ 2 ປະ­ເພດ​ຄື: ກີ­ລາ​ແລ່ນ-ລານ ແລະ ກີ­ລາ​ລອຍ­ນ້ຳ​ຄົນ​ພິ­ການ​ທີມ​ຊາດ​ລາວ ໄປ​ເກັບ​ຕົວ​ເຝິກ­ຊ້ອມ​ທີ່​ເມືອງ​ອິ​ຕາ​ເຕະ ແຂວງ​ຟູ​ກູ​ຊິ​ມາ ປະ­ເທດ​ຍີ່­ປຸ່ນ ເພື່ອ​ກຽມ​ຄວາມ​ພ້ອມ​ກ່ອນ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ພາ​ຣາ​ແລມ​ປິກ​ເກມ 2020 ທີ່​ປະ­ເທດ​ຍີ່­ປຸ່ນ​ເປັນ​ເຈົ້າ­ພາບ.

    ກອງ​ປະ­ຊຸມ​ຈັດ​ຂຶ້ນ​ວັນ​ທີ 28 ກັນ­ຍາ 2018 ທີ່​ກົມ​ກີ­ລາ​ມວນ​ຊົນ ມີ​ທ່ານ ສີ­ທາດ ຈັນ­ທະ​ບູ​ຣີ ຫົວ­ໜ້າ​ກົມ​ກີ­ລາ​ມວນ​ຊົນ ທັງ​ເປັນ​ຮອງ​ປະ­ທານ ແລະ ເລ­ຂາ­ທິ­ການ ຄພລ ທ່ານ ໄດ​ທາ​ເມະ ຊຶ​ເອະ ຜູ້​ບໍ­ລິ­ຫານ​ໂຄງ­ການ​ນັກ­ກີ­ລາ​ເພື່ອ​ສັງ­ຄົມ​ຈາກ​ປະ­ເທດ​ຍີ່­ປຸ່ນ ພ້ອມ​ດ້ວຍ​ບັນ­ດາ​ຫົວ­ໜ້າ​ພະ​ແນກ ແລະ ຕາງ­ໜ້າ​ກົມ​ວິ­ຊາ​ການ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ສີ­ທາດ ຈັນ­ທະ​ບູ​ຣີ ກ່າວ​ວ່າ: ກອງ​ປະ­ຊຸມ​ຄັ້ງ​ນີ້ ເພື່ອ​ເປັນ​ການ­ຈັດ­ຕັ້ງ​ຜັນ​ຂະ­ຫຍາຍ​ຜົນ­ສຳ­ເລັດ​ຂອງ​ການ​ຢ້ຽມ­ຢາມ​ຂອງ​ຄະ­ນະ​ນຳ​ຈາກ​ເມືອງ​ອິ​ຕາ​ເຕະ ແຂວງ​ຟູ​ກູ​ຊິ​ມາ​ປະ­ເທດ​ຍີ່­ປຸ່ນ ກ່ຽວ​ກັບ​ການ​ສຳ​ຫຼວດ​ສິ່ງ​ອຳ­ນວຍ​ຄວາມ​ສະ­ດວກ ໃນ​ການ​ກະ­ກຽມ​ການ​ເຂົ້າ​ເກັບ​ຕົວ​ເຝິກ­ຊ້ອມ​ຂອງ​ນັກ­ກີ­ລາ​ຄົນ​ພິ­ການ 2 ປະ­ເພດ ຈະ​ໄດ້​ເຮັດ​ວຽກ​ຮ່ວມ​ກັນ​ຢ່າງ​ໃກ້­ຊິດ ເພື່ອ​ໃຫ້​ບັນ­ລຸ​ເປົ້າ​ໝາຍ​ຮ່ວມ​ກັນ ກໍ່​ຄື ການ​ສະ­ແຫວງ­ຫາ​ຄວາມ​ເປັນ​ເລີດ​ທາງ​ດ້ານ​ກີ­ລາ.

ຂ່າວທີ່ກ່ຽວຂ້ອງ