ສີສັດຕະນາກ ແຂ່ງຂັນກີລາເປຕັງ ສະຫຼອງວັນຄູແຫ່ງຊາດ

422 04 ຕ.ລ. 2018 ວົງຈອນກີລາ

    ຫ້ອງ­ການ​ສຶກ​ສາ​ທິ​ການ ແລະ ກີ­ລາ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ຈັດ​ແຂ່ງ­ຂັນ​ກີ­ລາ​ເປ​ຕັງ​ທີມ​ຍິງ ແລະ ຊາຍ ສຳ­ລັບ​ພະ­ນັກ­ງານ​ຄູ-ອາ­ຈານ ພາຍ​ໃນ​ເມືອງ​ປະ­ຈຳ​ປີ 2018 ຂຶ້ນ​ວັນ​ທີ 29 ກັນ­ຍາ 2018 ຜ່ານ​ມາ​ທີ່​ເດີ່ນ​ເປ​ຕັງ­ໂອ​ທູ ມີ​ທ່ານ ຄຳ​ສິງ ດວງ​ດາ­ລາ ຫົວ­ໜ້າ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ​ເມືອງ​ສີ​ສັດ­ຕະ​ນາກ ພ້ອມ​ດ້ວຍ​ຄະ­ນະ​ພະ­ນັກ­ງານ​ຄູ-ອາ­ຈານ ທີ່​ມາ​ຈາກ​ໂຮງ­ຮຽນ​ທັງ​ພາກ​ລັດ ແລະ ເອ­ກະ​ຊົນ ພາຍ​ໃນ​ເມືອງ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ຄຳ​ສິງ ດວງ​ດາ­ລາ ກ່າວ​ວ່າ: ການ​ແຂ່ງ­ຂັນ​ຄັ້ງ​ນີ້ ເພື່ອ​ສ້າງ​ຂະ​ບວນ​ການ​ຕ້ອນ­ຮັບ​ວັນ​ຄູ​ແຫ່ງ​ຊາດ ຄົບ­ຮອບ 24 ປີ (7/10/1994-7/10/2018) ໃຫ້​ມີ​ບັນ­ຍາ­ກາດ​ຟົດ­ຟື້ນ​ເບີກ­ບານ​ມ່ວນ­ຊື່ນ ແລະ ມີ​ຄວາມ​ໝາຍ​ສຳ­ຄັນ​ຍິ່ງ​ຂຶ້ນ ພ້ອມ​ນັ້ນ​ຍັງ​ເປັນ​ການ​ປະ­ຕິ­ບັດ​ຕາມ 3 ລັກ­ສະ­ນະ ແລະ 5 ຫຼັກ​ມູນ​ຂອງ​ການ​ສຶກ​ສາ​ທີ່​ກະ­ຊວງ​ສຶກ​ສາ​ທິ​ການ ແລະ ກີ­ລາ​ວາງ​ອອກ ໃຫ້​ປາ­ກົດ​ຜົນ​ເປັນ​ຈິງ​ເທື່ອ​ລະ​ກ້າວ ຄຽງ​ຄູ່​ກັນ​ນີ້​ຍັງ​ເປັນ​ການ​ສ້າງ​ຄວາມ​ສາ­ມັກ­ຄີ​ຮັກ­ແພງ​ລະ­ຫວ່າງ​ພະ­ນັກ­ງານ​ຄູ-ອາ­ຈານ ແລະ ນັກ­ຮຽນ​ພາຍ​ໃນ​ເມືອງ​ໃຫ້​ມີ​ຄວາມ​ແໜ້ນ​ແຟ້ນ​ຍິ່ງ​ຂຶ້ນ.

    ການ​ແຂ່ງ­ຂັນ​ກີ­ລາ​ເປ​ຕັງ​ຄັ້ງ​ນີ້ ມີ​ທີມ​ທີ່​ມາ​ຈາກ​ໂຮງ­ຮຽນ​ອະ­ນຸ­ບານ​ຈົນ​ເຖິງ​ມັດ­ທະ­ຍົມ​ທັງ​ພາກ​ລັດ ແລະ ເອ­ກະ​ຊົນ​ພາຍ​ໃນ​ເມືອງ ເຂົ້າ​ຮ່ວມ​ທັງ​ໝົດ 68 ທີມ ຍິງ 32 ທີມ ຈັບ​ສະ­ຫຼາກ​ປະ​ກົບ​ຄູ່​ແຂ່ງ​ແບບ​ເສຍ​ຕົກ​ຮອບ ຄັດ​ເອົາ​ທີມ​ຊະ­ນະ​ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຕໍ່​ໄປ ຜ່ານ​ການ​ແຂ່ງ­ຂັນ​ປະ­ເພດ​ທີມ​ຊາຍ ອັນ​ດັບ 1 ໂຮງ­ຮຽນ​ລ້ຽງ​ເດັກ​ອະ­ນຸ­ບານ​ປະ­ຖົມ ແລະ ມັດ­ທະ­ຍົມ​ສຶກ​ສາ​ຕອນ​ຕົ້ນ​ສະ­ຖາ­ພອນ ອັນ​ດັບ 2 ໂຮງ­ຮຽນ​ປະ­ຖົມ​ສຶກ​ສາ​ໂພນ​ສີ​ນວນ ອັນ​ດັບ 3 ໂຮງ­ຮຽນ​ມັດ­ທະ­ຍົມ​ສຶກ​ສາ​ເພຍ​ວັດ ແລະ ອັນ​ດັບ 4 ໂຮງ­ຮຽນ​ປະ­ຖົມ​ສຶກ​ສາ​ໂພນ​ສະ­ຫວ່າງ ສ່ວນ​ປະ­ເພດ​ທີມ​ຍິງ​ອັນ​ດັບ 1 ໂຮງ­ຮຽນ​ລ້ຽງ​ເດັກ​ອະ­ນຸ­ບານ ແລະ ປະ­ຖົມ​ສຶກ​ສາ​ໄຊ​ພອນ​ສົມ­ບູນ ອັນ​ດັບ 2 ໂຮງ­ຮຽນ​ອະ­ນຸ­ບານ​ຈອມ​ເພັດ ອັນ​ດັບ 3 ໂຮງ­ຮຽນ​ປະ­ຖົມ​ສຶກ​ສາ​ພະ​ໄຊ ແລະ ອັນ​ດັບ 4 ໂຮງ­ຮຽນ​ມັດ­ທະ­ຍົມ​ສຶກ​ສາ​ຕອນ​ປາຍ​ສີ​ສັດ­ຕະ​ນາກ.

ຂ່າວທີ່ກ່ຽວຂ້ອງ