ເບີ່ງບ້ານເຂົາເອົາບົດຮຽນ 03-10-2018

303 03 ຕ.ລ. 2018 ຫົວຂໍ້ຂ່າວອື່ນໆ

ມື້ນີ້​ມີ​ເລື່ອງ​ໜ້າ​ໃຫ້​ຮູ້​ກ່ຽວ​ກັບ​ກົດໝາຍ​ການ​ລົງ​ທົງ​ທຶນ​ສະບັບ​ປັບປຸງ​ຂອງ​ມຽນ​ມາ ແລະ ເລື່ອງ​ນະໂຍບາຍ​ຈຳກັດ​ບໍ່​ໃຫ້​ແພດ-ໝໍ​ອິດເມື່ອຍ ຍ້ອນ​ເຮັດ​ວຽກ​ລ່ວງ​ເວລາ ຢູ່​ມາ​ເລ​ເຊຍ.

     ທີ່​ມຽນ​ມາ: ໜຶ່ງ​ໃນ​ບັນດາ​ຂ່າວ​ເດັ່ນ​ດັງ​ຈາກ​ມຽນ​ມາ ໃນ​ໄລຍະ​ຫຼັງໆ​ນີ້​ກໍ່​ແມ່ນ ເລື່ອງ​ການ​ປັບປຸງ​ກົດໝາຍ​ການ​ລົງທຶນ​ເພື່ອ​ເປີດ​ປະຕູ​ກວ້າງ​ອອກ​ກວ່າ​ເກົ່າ ເຮັດ​ໃຫ້​ນັກ​ລົງທຶນ​ຕ່າງປະເທດ ປວດ​ຢາກ​ເຂົ້າ​ໄປ​ລົງທຶນ ເພາະ​ແນມ​ເຫັນ​ອະນາຄົດ​ອັນ​ສົດໃສ​ຂອງ​ກິດຈະການ ກົດໝາຍ​ສະບັບ​ປັບປຸງ​ນີ້ ອະນຸຍາດ​ໃຫ້​ນັກ​ລົງທຶນ​ຕ່າງປະເທດ​ເປັນ​ເຈົ້າ​ຂອງ​ທຸລະ​ກິດ ຂາຍຍົກ ແລະ ຂາຍຍ່ອຍ ໄດ້​ເຖິງ 100% ຫຼື ສາມາດ​ຮ່ວມ​ທຸລະ​ກິດ​ແບບ ”ຈອຍ ເວັນ​ເຈີ້” ກັບ​ນັກທຸລະກິດ​ຂອງ​ປະເທດ​ເຈົ້າພາບ ກົດໝາຍ​ນັ້ນ​ມີ​ຜົນ​ສັກສິດ​ນັບ​ແຕ່​ວັນ​ທີ 1 ເດືອນ​ສິງຫາ ປີ​ນີ້​ເປັນຕົ້ນ​ມາ ນັກ​ລົງທຶນ​ຕ່າງປະເທດ​ສາມາດ​ເປັນ​ເຈົ້າ​ຂອງ​ກິດຈະການ​ຂາຍຍົກ​ໄດ້ 100% ຖ້າ​ມີ​ເງິນ​ລົງທຶນ​ຈຳນວນ​ຢ່າງ​ໜ້ອຍ 5 ລ້ານ ໂດ​ລາ​ສະຫະລັດ ໃນ​ກໍລະນີ​ນັກ​ລົງທຶນ​ຕ່າງປະເທດ ເລືອກ​ການ​ລົງທຶນ​ຮ່ວມ​ກັບ​ຄົນ​ພາຍ​ໃນ​ຜູ້ກ່ຽວ​ສາມາດ​ຖື​ຫຸ້ນ​ຢ່າງ​ໜ້ອຍ 20% ແລະ ຕ້ອງ​ໄດ້​ເງິນ​ລົງທຶນ​ໃນ​ຂັ້ນ​ຕົ້ນ​ຢ່າງ​ໜ້ອຍ 2 ລ້ານ​ໂດ​ລາ​ສະຫະລັດ ສຳລັບ​ທຸລະ​ກິດ​ຂາຍຍ່ອຍ ນັກ​ລົງທຶນ​ຕ່າງປະເທດ ຕ້ອງ​ໄດ້​ລົງທຶນ ຢ່າງ​ໜ້ອຍ 3 ລ້ານ​ໂດ​ລາ​ສະຫະລັດ ຈຶ່ງ​ຈະ​ສາມາດ​ເປັນ​ເຈົ້າ​ຂອງ​ກິດຈະການ​ໄດ້​ສຳລັບ​ນັກທຸລະກິດ​ຮ່ວມ ຖ້າ​ນັກທຸລະກິດ​ພາຍ​ໃນ​ຖື​ຫຸ້ນ​ຢ່າງ​ໜ້ອຍ 20% ນັກ​ລົງທຶນ​ຕ່າງປະເທດ​ສາມາດ​ຮ່ວມ​ທຶນ​ຢ່າງ​ໜ້ອຍ 700.000 ໂດ​ລາ​ສະຫະລັດ ນອກຈາກ​ການ​ລົງທຶນ​ໃຫຍ່ໆ​ແລ້ວ ນັກ​ລົງທຶນ​ຕ່າງປະເທດ ຍັງ​ສາມາດ​ຮ່ວມ​ທຶນ​ກັບ​ນັກທຸລະກິດ​ພາຍ​ໃນ ໃນ​ຂະແໜງ​ສົ່ງ​ອອກ ແລະ ນຳ​ເຂົ້າ​ສິນຄ້າ.

     ທີ່​ມາ​ເລ​ເຊຍ:  ຢູ່​ມາ​ເລຍ​ເຊຍ ທາງ​ການ​ໃດ້​ເອົາໃຈໃສ່ ເປັນ​ພິເສດ​ເພື່ອ​ປ້ອງ​ກັນ​ບໍ່​ໃຫ້​ແພດ​ໝໍ ກໍ່​ຄື​ຊຽວ​ຊານ ດ້ານ​ການ​ປິ່ນປົວ ເຮັດ​ວຽກ​ເກີນ​ເວລາ​ຊິ່ງ​ຈະ​ພາໃຫ້ ອິດເມື່ອຍ ຂາດ​ສະມັດ​ຕະ​ພາບ​ໃນ​ການ​ບໍລິການ ໃນ​ທ້າຍ​ປີ 2017 ທາງ​ກະຊວງ​ສາທາລະນະ​ສຸກ ມາ​ເລ​ເຊຍ ໄດ້​ອອກ​ຂໍ້​ລິ​ເລີ່ມ ສ້າງ​ລະບົບ​ວິໄຈ​ກ່ຽວ​ກັບ​ວິທີ​ເຮັດ​ວຽກ​ຂອງ ແພດ-ໝໍ ແລະ ຊຽວ​ຊານ ດ້ານ​ການ​ປິ່ນປົວ  ກັບ​ໃຫ້​ບໍລິການ​ເຖິງ​ຄົວ​ເຮືອນ​ແນໃສ່​ປ້ອງ​ກັນ​ສະຫວັດດີ​ພາບ ແລະ ຄວາມ​ປອດ​ໄພ ຂອງ​ພວກ​ເຂົາເຈົ້າ ລະບົບ​ດັ່ງກ່າວ​ແມ່ນ​ແນໃສ່​ແກ້​ໄຂ​ແບບ​ຍາວ​ນານ ບັນຫາ​ການ​ເຮັດ​ວຽກ ເກີນ​ເວລາ ຂອງ​ແພດ-ໝໍ ໃນ​ປັດຈຸບັນ ມາ​ເລ​ເຊຍ​ໄດ້​ມີ ລະບຽບ​ການ​ສະເພາະ​ໜ້າ​ເພື່ອ​ປ້ອງ​ກັນ​ບໍ່​ໃຫ້​ແພດ-ໝໍ ທີ່​ໃຊ້​ການ​ບໍລິການ​ຕາມ​ສາຍ​ເອີ້ນ​ເຮັດ​ວຽກ​ເກີນ​ເວລາ ແຕ່​ເພື່ອ​ຮອງ​ຮັບ​ກັບ​ຈຳນວນ ແພດ-ໝໍ ທີ່​ເພີ່ມ​ຂຶ້ນ​ນັ້ນ ເຫັນ​ຈຳເປັນ​ຕ້ອງ​ມີ​ລະບົບ​ແບບ​ຖາວອນ ທີ່​ສາມາດ​ແກ້​ໄຂ​ບັນຫາ​ແບບ​ຍາວ​ນານ-ຕາມ​ລະບຽບ​ການ ສະບັບ​ປັດຈຸບັນ ແພດ-ໝໍ​ທີ່​ໃຫ້​ບໍລິການ​ຕາມ​ສາຍ​ເອີ້ນ​ຂອງ​ຄົນ​ເຈັບ​ນັ້ນ​ມີ​ກຳນົດ​ການ​ປະຕິບັດ​ງານ ບໍ່​ເກີນ 65-75 ຊົ່ວໂມງ ຕໍ່​ອາທິດ ແລະ ບໍ່​ກາຍ 16 ຊົ່ວໂມງ​ຕໍ່​ວັນ ນອກ​ນັ້ນ ຍັງ​ຕ້ອງ​ມີ​ເວລາ​ພັກ 1 ວັນ ຕໍ່​ອາທິດ ແພດ-ໝໍ ທີ່​ໃຫ້​ບໍລິການ​ຕາມ​ສາຍ​ເອີ້ນ​ນີ້​ຍັງ​ຕ້ອງ​ໄດ້​ຮັບ​ການ​ເຝິກອົບຮົມ​ດ້ານ​ວິຊາ​ການ​ໃຫ້​ມີ​ຄວາມ​ຊຳນິ​ຊຳນານ ໃນ​ການ​ປະຕິບັດ​ງານ ເພາະ​ຖ້າ​ຫຼຸດຜ່ອນ​ຊົ່ວໂມງ​ເຮັດ​ວຽກ​ລົງ​ໂດຍ​ບໍ່​ເພີ່ມ​ເວລາ​ສຳລັບ​ການ​ເຝິກອົບຮົມ​ແລ້ວ ແພດ-ໝໍ​ເຫຼົ່າ​ນີ້​ອາດ​ຂາດ​ຄວາມ​ຊຳນານ​ງານ ໃນ​ກໍລະນີ​ທີ່​ແພດ-ໝໍ ຕ້ອງ​ໄດ້​ເຮັດ​ວຽກ​ເປັນ​ເວລາ​ຍາວ​ນານ ທາງ​ກະຊວງ​ກໍ່​ໃດ້​ມີ​ວິທີ​ການ​ເພື່ອ​ປ້ອງ​ກັນ​ບໍ່​ໃຫ້​ພວກ​ເຂົາເຈົ້າ​ອິດເມື່ອຍ ໂດຍ​ໄດ້​ກະກຽມ​ສະຖານທີ່ພັກຜ່ອນ​ໄວ້​ຢ່າງ​ພຽງພໍ ພາຍ​ໃນ​ຮົ້ວ​ຂອງ​ໂຮງພະຍາບານ ຢູ່​ມາ​ເລ​ເຊຍ​ຄົນ​ເຈັບ​ທີ່​ອາໄສ​ປິ່ນປົວ ຢູ່​ຕາມ​ໂຮງ​ພະຍາ ບານ​ຂອງ​ລັດ​ນັ້ນ​ໄດ້​ເພີ່ມ​ຂຶ້ນ​ຫຼາຍ​ກວ່າ 24 ລ້ານ​ຄົນ (ສະຖິຕິ​ແຕ່​ເດືອນ 1-8  ປີ 2017)  ໃນ​ນັ້ນ​ເປັນ​ຄົນ​ຕ່າງປະເທດ 3,21% ຫຼື ເທົ່າ​ກັບ 790.655 ຄົນ ໃນ​ປີ 2016 ຄົນ​ເຈັບ​ທີ່​ເຂົ້າ​ປິ່ນ ປົວ​ຢູ່​ໂຮງພະຍາບານ​ຂອງ​ລັດ​ມີ​ຈຳນວນ​ສູງ​ເຖິງ 35,2 ລ້ານ​ຄົນ ໃນ​ນັ້ນ​ເປັນ​ຄົນ​ຕ່າງປະເທດ 1,37 ລ້ານ​ຄົນ.

 

ຂ່າວທີ່ກ່ຽວຂ້ອງ