ຂ່າວຫຼ້າສຸດ

ແສງເພັດ ຄອງຂັນຊະນະເລີດ ເຮືອຍາວທີ່ສວນນ້ຳອິນແປງ

436 02 ຕ.ລ. 2018 ວົງຈອນກີລາ
ແສງເພັດ ຄອງຂັນຊະນະເລີດ ເຮືອຍາວທີ່ສວນນ້ຳອິນແປງ

    ເຮືອ​ບໍ­ລິ­ສັດ ແສງ​ເພັດ​ກໍ່­ສ້າງ ແລະ ເກັບ​ກູ້​ລະ­ເບີດ ຈຳ­ກັດ ຄອງ​ຂັນ​ເຈົ້າ​ທ່າ​ໃນ​ງານ​ປະ­ເພ­ນີ​ແຂ່ງ­ຂັນ​ຊ່ວງ​ເຮືອ​ສູດ​ຍາວ​ປະ­ເພດ 55 ສີ­ພາຍ ແລະ ງານ​ຕະ­ຫຼາດ­ນັດ (ວາງ­ສະ­ແດງ​ສິນ­ຄ້າ) ເພື່ອ​ອະ­ນຸ​ຮັກ​ຮັກ­ສາ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ຈັດ​ຂຶ້ນ​ວັນ​ທີ 24-30 ກັນ­ຍາ 2018 ທີ່​ສວນ​ນ້ຳ​ອິນ​ແປງ​ຣີ​ເວີ​ໄຊ້ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ.

    ສຳ­ລັບ​ການ​ແຂ່ງ­ຂັນ​ເຮືອ​ສູດ​ຍາວ​ຄັ້ງ​ນີ້ ມີ​ທັງ​ໝົດ 8 ລຳ ແບ່ງ​ອອກ​ເປັນ 2 ກຸ່ມ ແຂ່ງ­ຂັນ​ຄັດ​ເອົາ​ອັນ​ດັບ 1-2 ເຂົ້າ​ຮອບ​ຕໍ່​ໄປ ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ: ຊະ­ນະ​ເລີດ​ໄດ້­ແກ່​ເຮືອ​ບໍ­ລິ­ສັດ ແສງ​ເພັດ​ກໍ່­ສ້າງ ແລະ ເກັບ​ກູ້​ລະ­ເບີດ ຈຳ­ກັດ (ສີ­ພາຍ-ເຮືອ​ນາ­ວາ​ສັກ­ສິດ) ໄດ້​ຮັບ​ຂັນ 1 ໜ່ວຍ ພ້ອມ​ເງິນ­ສົດ 13 ລ້ານ​ກີບ ຮອງ​ຊະ­ນະ​ເລີດ​ເຈົ້າ​ແມ່​ແກ້ວ​ມັງ­ກອນ (ສີ­ພາຍ​ທະ­ຫານ​ແຂວງ​ສາ­ລະ​ວັນ) ໄດ້​ຮັບ​ຂັນ 1 ໜ່ວຍ ພ້ອມ​ເງິນ­ສົດ 11 ລ້ານ​ກີບ ອັນ​ດັບ 3 ເຮືອ​ພອນ​ພະ­ແກ້ວ ບ້ານ​ສີ​ຖານ​ໃຕ້ ເມືອງ​ຫາດ​ຊາຍ​ຟອງ ໄດ້​ຮັບ​ຂັນ 1 ໜ່ວຍ ພ້ອມ​ເງິນ­ສົດ 9 ລ້ານ​ກີບ ແລະ ອັນ​ດັບ 4 ເຮືອ​ສາຍ­ຟ້າ ບ້ານ​ທ່າ​ພະ ເມືອງ​ຫາດ​ຊາຍ​ຟອງ ໄດ້​ຮັບ​ລາ­ງວັນ​ເງິນ­ສົດ 7 ລ້ານ​ກີບ ນອກ​ນີ້​ເຮືອ​ທີ່​ເຂົ້າ​ຮ່ວມ​ຍັງ​ຈະ​ໄດ້​ຮັບ​ລາ­ງວັນ​ນອນ​ທ່າ ຫຼື ຄ່າ​ລາກ​ແກ່ ຈຳ­ນວນ 5 ລ້ານ​ກີບ.

    ເປັນ​ກຽດ​ເຂົ້າ​ຮ່ວມ ແລະ ມອບ​ລາ­ງວັນ​ຂອງ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ ແກ່ນ ວໍ­ລະ​ສານ ເຈົ້າ­ເມືອງ​ຫາດ​ຊາຍ​ຟອງ ທ່ານ ແອັດ ພັນ​ນີ​ວົງ ປະ­ທານ​ບໍ­ລິ­ສັດ ອິນ​ແປງ​ກຣຸບ ຈຳ­ກັດ ມີ​ຜູ້­ຕາງ­ໜ້າ​ຈາກ​ສະ­ຫະ­ພັນ​ກີ­ລາ​ເຮືອ​ຊ່ວງ ນວ ພ້ອມ​ດ້ວຍ​ຄະ­ນະ​ຮັບ­ຜິດ­ຊອບ​ຄະ­ນະ​ກຳ­ມະ­ການ ເຕັກ­ນິກ​ຈັດ­ການ​ແຂ່ງ­ຂັນ​ຊ່ວງ​ເຮືອ ຄະ­ນະ​ເຮືອ​ຊ່ວງ ນັກ­ທຸ­ລະ­ກິດ ຜູ້​ປະ­ກອບ​ການ ແລະ ປະ­ຊາ­ຊົນ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ