ປະລິນຍາ ຂາຍຄວາຍ

366 01 ຕ.ລ. 2018 ນານາສາລະ

    ໄລ­ຍະ​ນີ້​ຍັງ​ຢູ່​ໃນ​ບັນ­ຍາ­ກາດ​ການ​ສະ­ຫຼອງ​ຮັບ​ໃບ​ປະ­ກາດ ເຊິ່ງ​ຜູ້​ຂຽນ​ສັງ­ເກດ​ເຫັນ​ຂີ່​ລົດ​ຜ່ານ​ບາງ​ສະ​ຖາ​ບັນ​ການ​ສຶກ​ສາ ທັງ​ພາກ​ລັດ ແລະ ເອ­ກະ​ຊົນ ຮິມ​ທາງ​ມີ​ການ​ຂາຍ​ດອກ​ໄມ້ ແລະ ຕຸກ­ກະ­ຕາ​ກັນ​ຢ່າງ​ມີ​ສີ­ສັນ ຄິດ​ວ່າ​ມັນ​ເປັນ​ບັນ­ຍາ­ກາດ​ຄຶກ­ຄື້ນ ເຮັດ​ໃຫ້​ຜູ້​ຮຽນ​ຈົບ​ກຳ­ລັງ​ຮັບ​ໃບ​ປະ­ກາດ ຮູ້­ສຶກ​ອົບ​ອຸ່ນ​ດີ­ໃຈ ນອກ­ຈາກ​ນີ້​ກໍ່​ຍັງ​ມີ​ຂ່າວ​ຮິດ​ຕິດ​ໃຈ​ຂອງ​ສັງ­ຄົມ ຊ້ອນ​ຂຶ້ນ​ມາ​ຄຽງ​ຄູ່​ກັນ ກໍ່​ຄື ເລື່ອງ​ຂ້ອຍ​ບໍ່​ມີ​ເງິນ​ຈ້າງ​ເຂົ້າ​ເຮັດ​ວຽກ.

    ຫາກ​ພວກ​ເຮົາ​ຄິດ​ໃຫ້​ດີໆ ກໍ່​ຈະ​ຮູ້​ເຖິງ​ຫຼາຍ​ສາ­ເຫດ​ກວ່າ​ນັກ­ຮຽນ​ແຕ່­ລະ­ຄົນ​ຈະ​ຮຽນ​ຈົບ​ໄດ້​ໃບ​ປະ­ລິນ­ຍາ ຫຼາຍ​ຄົນ​ພໍ່​ແມ່​ທຳ​ມາ​ຄ້າ­ຂາຍ​ເກັບ​ອອມ ເພື່ອ​ສົ່ງ​ເງິນ​ຄ່າ​ເທີມ​ໃຫ້​ລູກ​ຮຽນ​ຈົບ​ສູງໆ ເພື່ອ​ປະ­ກອບ​ອາ­ຊີບ ເຊິ່ງ​ຄວາມ​ຫວັງ​ພໍ່​ແມ່​ສ່ວນ​ໃຫຍ່​ກໍ່​ແມ່ນ​ບໍ່​ຢາກ​ໃຫ້​ລູກ​ຫຼານ​ເປັນ​ຄື​ຕົນ​ເອງ ເພາະ​ຍຸກ​ຂອງ​ພວກ​ເພີ່ນ​ເງື່ອນ­ໄຂ​ການ​ຮຽນ​ຕໍ່​ສູງ ຫາ​ໂອ­ກາດ​ໄດ້​ຍາກ ເງື່ອນ­ໄຂ​ແບບ​ນີ້ ຄອບ­ຄົວ​ຜູ້​ຂຽນ​ກະ­ຖືກ​ມາ​ແລ້ວ ແລະ ເຂົ້າ­ໃຈ​ວ່າ​ສ່ວນ​ໃຫຍ່ ນັກ­ຮຽນ​ຈາກ​ຕ່າງ​ແຂວງ ກໍ່​ຄົງ​ຈະ​ມີ​ຊາ­ຕາ­ກຳ​ຄ້າຍ​ກັນ​ນີ້ ດັ່ງ­ນັ້ນ ຫຼາຍ​ຄົນ​ຈຶ່ງ​ໄດ້​ຕັ້ງ­ໃຈ​ສຶກ​ສາ​ຮຽນ​ຮູ້ ສູ້​ຊົນ​ຈົນ​ຈົບ​ຮັບ​ໃບ​ປະ­ກາດ​ຢ່າງ​ພາກ­ພູມ​ໃຈ ສົມ​ກັບ​ພໍ່​ແມ່​ຫວັງ​ໄວ້ ແຕ່​ກໍ່​ອາດ​ຍັງ​ມີ​ນັກ­ຮຽນ​ຈຳ­ນວນ​ໜ້ອຍ​ໜຶ່ງ​ທີ່​ຕິດ​ໄພ​ສັງ­ຄົມ (ໄຟ​ແສງ​ສີ) ຫຼົງ​ເຫີ່​ກະ­ແສ​ສັງ­ຄົມ​ຫຼີ້ນ​ກິນ​ຟຸມ​ເຟືອຍ ຮຽນ​ບໍ່​ຈົບ​ດັ່ງ­ນັ້ນ ບັນ­ຫາ​ບາງ​ປະ­ເພດ ຈຶ່ງ​ມີ​ທີ່​ມາ​ລະ­ອຽດ​ອ່ອນ ແລະ ສັບ​ຊ້ອນ​ເຊິ່ງ​ສັງ­ຄົມ​ບໍ່​ຄວນ​ເໝົາ​ລວມ​ກັນ​ວ່າ​ຊິ​ເປັນ​ຄື​ກັນ​ອ້ອຍ­ຕ້ອຍ ບາງ​ຄົນ​ຮຽນ​ຈົບ​ໄດ້​ປະ­ກອບ​ວຽກ​ງານ ບາງ​ຄົນ​ກັບ​ທ້ອງ­ຖິ່ນ ອົດ­ທົນ​ລໍ­ຖ້າ​ວຽກ​ບາງ​ຄົນ​ບຸກ​ບືນ​ຢູ່​ໃນ​ເມືອງ​ຕໍ່​ເພື່ອ​ລໍ​ວຽກ​ທີ່​ຕົນ​ມັກ ແລະ ຖືກ​ກັບ​ສາຍ​ຮຽນ​ທີ່​ຕົນ​ຈົບ​ມາ ແນວ­ໃດ​ກໍ່​ຢ່າ​ລືມ​ບຸກ​ບືນ ອົດ­ທົນ​ຂຽນ​ມາ​ຮອດ​ນີ້ ຄິດ​ເຫັນ​ຄຳ​ເວົ້າ ທ່ານ ພັນ​ຄຳ ວິ­ພາ​ວັນ ທີ່​ເນັ້ນ​ຢາກ​ໃຫ້​ນັກ­ຮຽນ​ຕັ້ງ­ໃຈ​ຮຽນ​ຈິງ​ຈັງ ໃຫ້​ໄດ້​ຄວາມ​ຮູ້​ແທ້​ຈິງ ເພື່ອ​ປະ­ກອບ​ອາ­ຊີບ ພ້ອມ​ນີ້​ເພີ່ນ​ເນັ້ນ​ໃຫ້​ຜູ້​ບໍ­ລິ­ຫານ​ການ​ສືກ​ສາ​ເອົາ­ໃຈ­ໃສ່​ຕື່ມ.

    ສຳ­ລັບ​ປະ­ເດັນ​ເລື່ອງ​ບໍ່​ມີ​ເງິນ​ຈ້າງ​ເຂົ້າ​ເຮັດ​ວຽກ​ນັ້ນ ເຂົ້າ­ໃຈ​ວ່າ​ມັນ​ແມ່ນ​ເລື່ອງ​ສະ­ທ້ອນ​ໂຄງ​ສ້າງ​ສັງ­ຄົມ ເຊິ່ງ​ມັນ​ກະ​ຕ້ອງ​ມີ​ທີ່​ມາ​ຈາກ​ເງື່ອນ­ໄຂ​ທີ່​ມີ​ຈິງ ດັ່ງ​ບູ­ຮານ​ສອນ​ວ່າ ໝາ​ຂີ້​ຍ່ອມ​ມີ​ຝອຍ (ຂີ້​ເຫຍື້ອ) ຖ້າ​ຍອມ­ຮັບ​ກັນ​ວ່າ ບັນ­ຫາ​ດັ່ງ­ກ່າວ​ເກີດ​ຈາກ​ຂັ້ນ​ລຸ່ມ ຂັ້ນ​ເທິງ ກ່ຽວ­ຂ້ອງ​ຮັບ­ຜິດ­ຊອບ​ໂດຍ​ກົງ ຍ່ອມ​ຕ້ອງ​ຮ້ອນ­ໃຈ​ແກ້​ໄຂ ເລື່ອງ​ແບບ​ນີ້​ບໍ່​ເວົ້າ​ຍາວ​ກະ​ໄດ້​ແນວ​ຮູ້​ຢູ່​ແກ່​ໃຈ​ນໍ !

    ສະ­ຫຼຸບ​ວ່າ: ພວກ​ທີ່​ຮຽນ​ຈົບ​ຮັບ​ໃບ​ປະ­ກາດ ກໍ່​ຕ້ອງ​ໄດ້​ທົບ​ທວນ​ຄື​ກັນ​ວ່າ ໄດ້​ຕັ້ງ­ໃຈ​ຮຽນ​ແທ້​ບໍ? ລຸ້ນ​ນ້ອງ​ຕໍ່​ມາ​ເດ​ຄວນ​ປັບ­ປຸງ​ໂຕ​ເອງ​ແນວ­ໃດ? ຢ່າ​ລືມ​ວ່າ​ພໍ່​ແມ່​ພີ່­ນ້ອງ​ເບີດ​ເງິນ​ຄຳ​ສົ່ງ​ຄ່າ​ເທີມ ບາງ​ຄົນ​ຍອມ​ຂາຍ​ຄວາຍ ງົວ ເພື່ອ​ໄດ້​ເງິນ​ສົ່ງ​ລູກ​ໃຫ້​ຮຽນ​ຈົບ... ຮຽນ​ແທ້​ໃຫ້​ໄດ້​ຄວາມ​ຮູ້​ໃຫ້​ສົມ​ກັບ​ຊັ້ນ​ຮຽນ​ດີ​ກວ່າ​ເຫີ່​ອວດ​ປະ­ລິນ­ຍາ !

ຂ່າວທີ່ກ່ຽວຂ້ອງ