ການນຳ ພັກ-ລັດ ຮ່ວມໄວ້ອາໄລຕໍ່ການຈາກໄປຂອງສະຫາຍ ເຈິ່ນ ດ໋າຍ ກວາງ

649 27 ກ.ຍ. 2018 ຂ່າວໜ້າ​ໜຶ່ງ
ການນຳ ພັກ-ລັດ ຮ່ວມໄວ້ອາໄລຕໍ່ການຈາກໄປຂອງສະຫາຍ ເຈິ່ນ ດ໋າຍ ກວາງ

    ສະ­ຫາຍ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່ ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ປະ­ທານ​ປະ­ເທດ ສປປ ລາວ ພ້ອມ​ດ້ວຍ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ສະ­ຫາຍ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ສະ­ຫາຍ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ສູນ​ກາງ​ແນວ​ລາວ​ສ້າງ​ຊາດ ອົງ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ກະ­ຊວງ ແລະ ອົງ​ການ­ຈັດ­ຕັ້ງ​ຕ່າງໆ ເຂົ້າ​ວາງ​ພວງ­ມາ­ລາ ແລະ ຂຽນ​ປື້ມ​ໄວ້­ອາ­ໄລ ຕໍ່​ການ​ເສຍ​ຊີ­ວິດ​ຂອງ​ສະ­ຫາຍ ເຈິ່ນ ດ໋າຍ ກວາງ ອະ­ດີດ​ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ອະ­ດີດ​ປະ­ທານ​ປະ­ເທດ ສສ ຫວຽດ­ນາມ ໃນ​ວັນ​ທີ 26 ກັນ­ຍາ 2018 ຢູ່​ສະ­ຖານ­ທູດ ສສ ຫວຽດ­ນາມ ປະ­ຈຳ ສປປ ລາວ.

    ສະ­ຫາຍ ບຸນ​ຍັງ ວໍ­ລະ​ຈິດ ໄດ້​ຕາງ­ໜ້າ​ໃຫ້​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ​ປະ­ຊາ­ຊົນ ປະ­ຕິ­ວັດ​ລາວ ສະ­ພາ​ແຫ່ງ​ຊາດ ລັດ­ຖະ­ບານ ສປປ ລາວ ແລະ ສູນ​ກາງ​ແນວ​ລາວ​ສ້າງ​ຊາດ ຂຽນ​ປື້ມ​ໄວ້­ອາ­ໄລ ຕໍ່​ການ​ເສຍ​ຊີ­ວິດ​ຂອງ​ສະ­ຫາຍ ເຈິ່ນ ດ໋າຍ ກວາງ ອະ­ດີດ​ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ອະ­ດີດ​ປະ­ທານ​ປະ­ເທດ ສສ ຫວຽດ­ນາມ ໂດຍ​ມີ​ເນື້ອ​ໃນ​ວ່າ: ຮູ້­ສຶກ​ສະ­ເທືອນ​ໃຈ ແລະ ເສົ້າ​ໂສກ​ເສຍ­ດາຍ​ເປັນ​ຢ່າງ​ຍິ່ງ ເມື່ອ​ໄດ້​ຮັບ​ຂ່າວ​ການ​ຈາກ​ໄປ ໂດຍ​ບໍ່​ມີ​ວັນ​ກັບ​ຄືນ​ມາ​ຂອງ​ສະ­ຫາຍ ເຈິ່ນ ດ໋າຍ ກວາງ ການ​ຈາກ​ໄປ​ໃນ​ຄັ້ງ​ນີ້​ບໍ່​ພຽງ​ແຕ່​ເປັນ​ການ​ສູນ​ເສຍ​ຜູ້­ນຳ​ທີ່​ເຄົາ­ລົບ​ຮັກ​ຂອງ​ພັກ ລັດ ປະ­ຊາ­ຊົນ​ຫວຽດ­ນາມ ແຕ່​ຍັງ​ເປັນ​ການ​ສູນ​ເສຍ​ເພື່ອນ​ມິດ​ສະ­ຫາຍ​ທີ່​ໃກ້­ຊິດ ແລະ ສະ­ໜິດ­ສະ­ໜົມ​ທີ່​ສຸດ​ຂອງ​ພັກ​ລັດ ແລະ ປະ­ຊາ­ຊົນ​ລາວ.

    ສະ­ຫາຍ ເຈິ່ນ ດ໋າຍ ກວາງ ເປັນ​ຜູ້​ໜຶ່ງ​ທີ່​ປະ­ກອບ­ສ່ວນ​ສຳ­ຄັນ​ໃນ​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ສສ ຫວຽດ­ນາມ ໃນ​ຕະ­ຫຼອດ​ຊີ­ວິດ​ຂອງ​ການ­ເຄື່ອນ­ໄຫວ​ປະ­ຕິ­ວັດ​ຂອງ​ຕົນ ໂດຍ​ສະ­ເພາະ​ໃນ​ຂົງ­ເຂດ​ວຽກ​ງານ​ປ້ອງ​ກັນ​ຄວາມ​ສະ­ຫງົບ ແລະ ຄວາມ​ເປັນ​ລະ­ບຽບ​ຮຽບ​ຮ້ອຍ​ພາຍ​ໃນ​ຂອງ​ສະ­ຫາຍ ເຈິ່ນ ດ໋າຍ ກວາງ ຍັງ​ເປັນ​ຜູ້​ໜຶ່ງ​ທີ່​ໄດ້​ປະ­ກອບ­ສ່ວນ​ສຳ­ຄັນ​ໃນ​ການ​ຮັດ​ແໜ້ນ ແລະ ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ​ອັນ​ຍິ່ງ​ໃຫຍ່ ຄວາມ​ສາ­ມັກ­ຄີ​ແບບ​ພິ­ເສດ ແລະ ການ​ຮ່ວມ​ມື​ຮອບ­ດ້ານ ລະ­ຫວ່າງ ລາວ ແລະ ຫວຽດ­ນາມ ຕະ­ຫຼອດ​ມາ.

    ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ປະ­ຊາ­ຊົນ​ປະ­ຕິ­ວັດ​ລາວ ສະ­ພາ​ແຫ່ງ​ຊາດ ລັດ­ຖະ­ບານ ສປປ ລາວ ສູນ​ກາງ​ແນວ​ລາວ​ສ້າງ​ຊາດ ແລະ ປະ­ຊາ­ຊົນ​ລາວ ຂໍ​ສະ­ແດງ​ຄວາມ​ອາ­ໄລ​ອາ​ວອນ​ຢ່າງ​ສຸດ​ຊຶ້ງ ແລະ ຂໍ​ແບ່ງ​ເບົາ​ຄວາມ­ທຸກ​ໂສກ​ເສຍ​ໃຈ​ມາ​ຍັງ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ​ກອມ​ມູ​ນິດ​ຫວຽດ­ນາມ ສະ­ພາ​ແຫ່ງ​ຊາດ ລັດ­ຖະ­ບານ ສູນ​ກາງ​ແນວ​ໂຮມ​ປະ­ເທດ​ຫວຽດ­ນາມ ແລະ ປະ­ຊາ­ຊົນ​ຫວຽດ­ນາມ ໂດຍ​ສະ­ເພາະ​ຄອບ­ຄົວ ຍາດ​ພີ່­ນ້ອງ ແລະ ເພື່ອນ​ມິດ​ຂອງ​ສະ­ຫາຍ ເຈິ່ນ ດ໋າຍ ກວາງ ມາ­ນະ​ໂອ­ກາດ​ນີ້​ດ້ວຍ.

    ສະ­ຫາຍ ພັນ​ຄຳ ວິ­ພາ​ວັນ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ຜູ້​ປະ­ຈຳ­ການ​ຄະ­ນະ​ເລ­ຂາ­ທິ­ການ​ສູນ​ກາງ​ພັກ ຮອງ​ປະ­ທານ​ປະ­ເທດ ຕາງ­ໜ້າ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ສະ­ພາ​ແຫ່ງ​ຊາດ ລັດ­ຖະ­ບານ ສປປ ລາວ ສູນ​ກາງ​ແນວ​ລາວ​ສ້າງ​ຊາດ ແລະ ປະ­ຊາ­ຊົນ​ລາວ​ບັນ­ດາ­ເຜົ່າ ນຳ­ພາ​ຄະ­ນະ​ເຂົ້າ​ຮ່ວມ​ໄວ້­ອາ­ໄລ​ຕໍ່​ສະ­ຫາຍ ເຈິ່ນ ດ໋າຍ ກວາງ ອະ­ດີດ​ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ປະ­ທານ​ປະ­ເທດ ສສ ຫວຽດ­ນາມ ຢູ່​ນະ­ຄອນ­ຫຼວງ​ຮ່າ​ໂນ້ຍ ວັນ​ທີ 26-27 ກັນ­ຍາ​ນີ້.

ຂ່າວທີ່ກ່ຽວຂ້ອງ