ທ່ານຮອງນາຍົກ ຊີ້ນຳການແກ້ໄຂວຽກງານຟື້ນຟູໄພພິບັດ ຢູ່ເມືອງສະໜາມໄຊ

559 27 ກ.ຍ. 2018 ຂ່າວໜ້າ​ໜຶ່ງ

    ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ສະ­ເພາະ​ກິດ ແກ້​ໄຂ​ໄພ­ພິ­ບັດ​ລະ­ດັບ​ຊາດ ລົງ​ຊີ້​ນຳ​ວຽກ​ງານ​ລວມ​ໃນ​ການ​ແກ້​ໄຂ​ໄພ­ພິ­ບັດ​ນ້ຳ​ຖ້ວມ ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ໃນ​ວັນ​ທີ 25 ກັນ­ຍາ 2018 ຢູ່​ຫ້ອງ​ວ່າ­ການ​ປົກ­ຄອງ​ແຂວງ​ອັດ​ຕະ​ປື.

    ທ່ານ ອຸ່ນ​ຫຼ້າ ໄຊ​ຍະ​ສິດ ຮອງ​ເຈົ້າ­ແຂວງ ປະ­ທານ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ ແຂວງ​ອັດ​ຕະ​ປື ກ່າວ​ວ່າ: ຜ່ານ​ການ​ເກັບ​ກຳ​ຂໍ້​ມູນ ແລະ ແກ້​ໄຂ​ວຽກ​ງານ ມາ​ຮອດ​ປັດ­ຈຸ­ບັນ ສາ­ມາດ​ສັງ​ລວມ​ຂໍ້​ມູນ​ເບື້ອງ​ຕົ້ນ​ໄດ້​ຄື: ເຫດ­ການ​ຄູ​ກັ້ນ​ນ້ຳ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ​ແຕກ ໄດ້​ສົ່ງ​ຜົນ​ກະ­ທົບ​ຕໍ່​ປະ­ຊາ­ຊົນ 19 ບ້ານ 3.081 ຫຼັງ­ຄາ​ເຮືອນ 3.657 ຄອບ­ຄົວ ພົນ­ລະ­ເມືອງ 14.108 ຄົນ ຍິງ 7.705 ຄົນ ມູນ​ຄ່າ​ເສຍ​ຫາຍ​ເບື້ອງ​ຕົ້ນ 400 ກວ່າ​ຕື້​ກີບ (ບໍ່​ນັບ​ມູນ​ຄ່າ​ການ​ເສຍ​ຫາຍ​ດ້ານ​ພື້ນ­ຖານ​ໂຄງ​ລ່າງ ພື້ນ­ຖານ​ເສດ­ຖະ­ກິດ-ສັງ­ຄົມ ແລະ ສິ່ງ­ແວ­ດລ້ອມ) ໃນ​ນີ້​ໄດ້​ຮັບ​ຜົນ​ກະ­ທົບ​ໜັກ 6 ບ້ານ 1.124 ຄອບ­ຄົວ ພົນ­ລະ­ເມືອງ 4.571 ຄົນ ຍິງ 2.224 ຄົນ ຈຳ­ນວນ​ທີ່​ໄດ້​ຮັບ​ແຈ້ງ​ສູນ­ຫາຍ​ເບື້ອງ​ຕົ້ນ 131 ຄົນ ແມ່ນ​ໄດ້​ກັບ​ຄືນ​ສູ່​ຄອບ­ຄົວ​ແລ້ວ 66 ຄົນ ຊອກ​ຄົ້ນ​ພົບ​ຜູ້​ເສຍ​ຊີ­ວິດ 34 ສົບ (ຍັງ​ບໍ່​ຮູ້​ຍາດ​ພີ່­ນ້ອງ 2 ສົບ) ແລະ ຍັງ​ຊອກ​ບໍ່​ເຫັນ 31 ຄົນ ນອກ​ນີ້​ຍັງ​ມີ​ຜູ້​ໄດ້​ຮັບ​ຜົນ​ກະ­ທົບ​ທີ່​ໄປ​ປິ່ນ­ປົວ​ຢູ່​ໂຮງ­ໝໍ ແລະ ເສຍ​ຊີ­ວິດ​ໃນ​ເວ­ລາ​ຕໍ່​ມາ 6 ຄົນ ການ​ຟື້ນ​ຟູ​ພື້ນ­ຖານ​ໂຄງ​ລ່າງ​ຄົມ­ມະ­ນາ­ຄົມ ໄດ້​ສຳ­ເລັດ​ການ​ກໍ່­ສ້າງ​ຂົວ​ເຫຼັກ 4 ແຫ່ງ ກຳ­ລັງ​ກໍ່­ສ້າງ 8 ແຫ່ງ ການ​ປຸກ​ສ້າງ​ທີ່­ຢູ່​ຊົ່ວ­ຄາວ​ຢູ່​ຈຸດ​ບ້ານ​ຫາດ​ຍາວ ມີ 140 ຫ້ອງ ແມ່ນ​ສຳ­ເລັດ 100% ໄດ້​ຍົກ­ຍ້າຍ​ປະ­ຊາ­ຊົນ​ເຂົ້າ​ໄປ​ຢູ່​ແລ້ວ ແລະ ຈຸດ​ດົງ​ບາກ ມີ​ແຜນ​ກໍ່­ສ້າງ 468 ຫ້ອງ ຄືບ​ໜ້າ 38% ເຊິ່ງ​ສອງ​ຈຸດ​ດັ່ງ­ກ່າວ​ແມ່ນ​ບໍ­ລິ­ສັດ SK ເປັນ​ຜູ້​ຈັດ​ຕັ້ງ​ປະ­ຕິ­ບັດ ສ່ວນ​ຢູ່​ຈຸດ​ຕະ​ມໍ​ຢອດ ແລະ ດອນ​ບົກ ແມ່ນ​ປຸກ​ສ້າງ​ແບບ​ເຮືອນ​ສຳ­ເລັດ​ຮູບ ມີ 450 ຫຼັງ ປັດ­ຈຸ­ບັນ ໄດ້​ນຳ​ເຂົ້າ​ມາ​ຮອດ​ພື້ນ​ທີ່​ປຸກ​ສ້າງ​ແລ້ວ 24 ຫຼັງ ສຳ­ເລັດ​ການ​ປະ­ກອບ ແລະ ຕິດ​ຕັ້ງ​ແລ້ວ 12 ຫຼັງ ຍັງ​ເຫຼືອ 426 ຫຼັງ ແມ່ນ​ກຳ­ລັງ​ນຳ​ເຂົ້າ​ມາ​ຈາກ​ຕ່າງ­ປະ­ເທດ ວຽກ​ບຸກ­ເບີກ​ທີ່­ຢູ່​ຖາ­ວອນ ມີ 4 ຈຸດ​ຄື: ຈຸດ​ດົງ​ບາກ ຄືບ​ໜ້າ 25% ຈຸດ​ດອນ​ບົກ 30% ຈຸດ​ປິນ​ດົງ 30% ແລະ ຈຸດ​ຕະ​ມໍ​ຢອດ 40% ນອກ​ນີ້​ຍັງ​ໄດ້​ຮັບ​ຟັງ​ການ​ປະ­ກອບ​ຄຳ​ຄິດ​ເຫັນ ແລະ ຂໍ້​ສະ­ເໜີ​ຕ່າງໆ​ຈາກ​ພາກ­ສ່ວນ​ຕ່າງໆ ຕື່ມ​ອີກ.

    ທ່ານ ສອນ​ໄຊ ສີ​ພັນ​ດອນ ໄດ້​ຊີ້​ນຳ​ຕໍ່​ອົງ­ການ​ປົກ­ຄອງ​ແຂວງ​ອັດ​ຕະ​ປື ກໍ່​ຄື​ຄະ­ນະ​ຮັບ­ຜິດ­ຊອບ​ຟື້ນ​ຟູ ແລະ ແກ້​ໄຂ​ຜົນ​ກະ­ທົບ​ຈາກ​ໄພ­ພິ­ບັດ​ເມືອງ​ສະ­ໜາມ​ໄຊ ໂດຍ​ເນັ້ນ​ໃຫ້​ເອົາ­ໃຈ­ໃສ່​ໄປ​ພົບ​ປະ​ໂອ້​ລົມ ປຸກ­ລະ­ດົມ ລົງ​ໃກ້­ຊິດ­ຕິດ­ແທດ ສະ­ໜອງ​ຂໍ້​ມູນ​ຂ່າວ­ສານ ແລະ ອະ­ທິ­ບາຍ​ຊີ້​ແຈງ​ໃຫ້​ປະ­ຊາ­ຊົນ​ເຂົ້າ­ໃຈ​ແຈ້ງ​ຕໍ່​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຕ່າງໆ ໂດຍ​ສະ­ເພາະ​ແຜນ­ການ​ພັດ­ທະ­ນາ​ການ​ປະ­ຕິ­ບັດ​ນະ­ໂຍ­ບາຍ ການ​ມີ​ສ່ວນ​ຮ່ວມ​ຂອງ​ປະ­ຊາ­ຊົນ​ຄວາມ​ຄືບ​ໜ້າ​ຕ່າງໆ ບົນ​ພື້ນ­ຖານ​ສອດ­ຄ່ອງ​ກັບ​ແນວ­ທາງ​ຂອງ​ພັກ ນະ­ໂຍ­ບາຍ​ຂອງ​ລັດ ແລະ ສະ­ພາບ​ຄວາມ​ເປັນ​ຈິງ ມີ​ຄວາມ​ໂປ່ງ​ໃສ ຍຸ­ຕິ​ທຳ ແລະ ສົມ​ເຫດ​ສົມ​ຜົນ ຮັບ­ປະ­ກັນ​ໄດ້­ຜົນ​ປະ­ໂຫຍດ​ລວມ​ຂອງ​ປະ­ເທດ​ຊາດ ແລະ ປະ­ຊາ­ຊົນ ສຸມ​ໃສ່​ຊຸກ­ຍູ້​ການ​ປຸກ​ສ້າງ​ເຮືອນ​ພັກ­ຊົ່ວ­ຄາວ ແລະ ພື້ນ­ຖານ​ໂຄງ​ລ່າງ ທີ່​ຕິດ​ພັນ​ກັບ​ການ​ດຳ­ລົງ​ຊີ­ວິດ​ປະ­ຈຳ​ວັນ​ຂອງ​ປະ­ຊາ­ຊົນ​ໃຫ້​ສຳ­ເລັດ​ໂດຍ​ໄວ ເອົາ­ໃຈ­ໃສ່​ປັບ­ປຸງ​ແກ້​ໄຂ​ບາງ​ວຽກ​ງານ​ທີ່​ຍັງ​ຄົງ​ຄ້າງ ລວມ​ທັງ​ຂໍ້​ສະ­ເໜີ​ຕ່າງໆ​ຂອງ​ປະ­ຊາ­ຊົນ​ໃຫ້​ມີ​ຜົນ­ສຳ­ເລັດ​ຕາມ​ລະ­ດັບ​ຄາດ­ໝາຍ ອັນ​ສຳ­ຄັນ​ຕ້ອງ​ພ້ອມ​ກັນ​ຈັດ​ຕັ້ງ​ຜັນ​ຂະ­ຫຍາຍ​ບັນ­ດາ​ວຽກ​ງານ ທີ່​ໄດ້​ຕົກ­ລົງ​ເປັນ​ເອ­ກະ​ພາບ​ກັນ​ແລ້ວ ໃຫ້​ປາ­ກົດ​ຜົນ​ເປັນ​ຈິງ ແລະ ທັນ​ຕາມ​ກຳ­ນົດ​ເວ­ລາ.

ຂ່າວທີ່ກ່ຽວຂ້ອງ