ເຕັກໂນໂລຊີ ມີຜົນຕໍ່ການດຳລົງຊີວິດໃນປັດຈຸບັນ

306 27 ກ.ຍ. 2018 ຫົວຂໍ້ຂ່າວອື່ນໆ

    ນັບ​ແຕ່​ອະ­ດີດ­ຕະ­ການ​ເຖິງ​ປັດ­ຈຸ­ບັນ ມະ­ນຸດ​ມີ​ການ​ດຳ­ລົງ​ຊີ­ວິດ​ຜ່ານ​ມາ​ໃນ​ຮຸບ​ແບບ​ຕ່າງໆ ຕາມ​ຍຸກ​ຕາມ​ສະ­ໄໝ ແລະ ມີ​ການ​ດຳ­ລົງ​ຊີ­ວິດ​ໃນ​ແຕ່​ລະ​ຍຸກ​ທີ່​ບໍ່​ຄື​ກັນ ອາດ​ຈະ​ມີ​ຄ້າຍ­ຄື​ກັນ​ແດ່ ແຕ່​ກໍ່​ບໍ່​ຄື​ກັນ​ທັງ​ໝົດ ຊຶ່ງ​ໃນ​ການ​ດຳ­ລົງ​ຊີ­ວິດ​ຂອງ​ມະ­ນຸດ​ນັ້ນ ຕ້ອງ​ມີ​ການ​ປະ­ສົບ​ພົບ​ເຫັນ​ກັບ​ເລື່ອງ ຫຼື ບັນ­ຫາ​ຕ່າງໆ ເຮັດ​ໃຫ້​ມະ­ນຸດ​ເກີດ​ການ​ຄິດ ຄິດ​ທີ່​ຈະ​ເຮັດ​ອັນ​ໃດ​ຈັກ­ຢ່າງ​ເພື່ອ​ແກ່​ບັນ­ຫາ​ນັ້ນໆ ເລີ່ມ​ຕົ້ນ​ທຳ​ອິດ ອາດ​ຈະ​ຄິດ​ແກ້​ບັນ­ຫາ​ສະ­ເພາະ​ໜ້າ​ໄປ​ກ່ອນ ແລ້ວ​ຈາກ​ນັ້ນ ຈຶ່ງ​ມີ​ການ​ພັດ­ທະ­ນາ ແລະ ຕໍ່​ຍອດ​ຄວາມ​ຄິດ​ນັ້ນ ໃຫ້​ສາ­ມາດ​ແກ້​ບັນ­ຫາ​ໄດ້​ດີ​ຂຶ້ນ​ກວ່າ​ເດີມ ຈົນ​ສາ­ມາດ​ແກ້​ບັນ­ຫາ​ນັ້ນ​ໄດ້ ແລະ ມະ­ນຸດ​ກໍ່​ມີ​ການ​ຄິດ​ຢູ່​ຕະ­ຫຼອດ​ເວ­ລາ ຈຶ່ງ​ເຮັດ​ໃຫ້​ມະ­ນຸດ​ມີ​ພັດ­ທະ­ນາ​ການ​ເກີດ​ຄວາມ​ຄິດ​ປະ­ດິດ​ໃນ​ເລື່ອງ​ຕ່າງໆ ຊຶ່ງ​ມີ​ຫຼວງ­ຫຼາຍ​ຕາມ​ຍຸກ​ສະ­ໄໝ.

    ເຕັກ​ໂນ​ໂລ​ຊີ​ເອງ ກໍ່​ເປັນ​ສິ່ງ​ໜຶ່ງ​ທີ່​ເກິດ​ຈາກ​ຄວາມ​ຄິດ ແລະ ການ​ພັດ­ທະ­ນາ​ຂຶ້ນ​ຂອງ​ມະ­ນຸດ ເຕັກ​ໂນ​ໂລ​ຊີ ມີ​ຄວາມ​ສຳ­ພັນ​ກັບ​ການ​ດຳ­ລົງ​ຊີ­ວິດ​ຂອງ​ມະ­ນຸດ​ມາ​ເປັນ​ເວ­ລາ​ດົນ​ນານ ເປັນ​ສິ່ງ​ທີ່​ມະ­ນຸດ​ໃຊ້​ໃນ​ການ​ແກ້​ບັນ­ຫາ​ພື້ນ­ຖານ​ໃນ​ການ​ດຳ­ລົງ​ຊີ­ວິດ ບໍ່​ວ່າ​ຈະ​ເປັນ​ການ​ປູກ​ການ​ສ້າງ​ບ່ອນ­ຢູ່​ອາ­ໄສ ເຄື່ອງ­ນຸ່ງ​ຫົ່ມ ຢາ​ປິ່ນ­ປົວ​ພະ­ຍາດ ໃນ​ໄລ­ຍະ​ທຳ​ອິດ ເຕັກ​ໂນ​ໂລ​ຊີ ທີ່​ນຳ​ມາ​ໃຊ້​ເປັນ​ເຕັກ​ໂນ​ໂລ​ຊີ​ພື້ນ­ຖານ​ບໍ່​ສະ­ຫຼັບ­ຊັບ­ຊ້ອນ​ເໝືອນ​ດັ່ງ​ປັດ­ຈຸ­ບັນ ການ​ເພີ່ມ​ຈຳ­ນວນ​ຂອງ​ປະ­ຊາ­ກອນ ແລະ ຂໍ້​ຈຳ­ກັດ​ດ້ານ​ຊັບ­ພະ­ຍາ­ກອນ​ທຳ​ມະ​ຊາດ ລວມ​ທັງ​ມີ​ການ​ພັດ­ທະ­ນາ​ຄວາມ​ສຳ­ພັນ​ກັບ​ຕ່າງ­ປະ­ເທດ ເປັນ​ປັດ​ໄຈ​ສຳ­ຄັນ​ໃນ​ການ​ນຳ ແລະ ພັດ­ທະ­ນາ​ເຕັກ​ໂນ​ໂລ​ຊີ ມາ​ໃຊ້​ຫຼາຍ​ຂຶ້ນ ເຕັກ​ໂນ​ໂລ​ຊີ​ກັບ​ວິ­ທະ­ຍາ­ສາດ​ເອງ ກໍ່​ມີ​ຄວາມ​ສຳ­ພັນ​ກັນ​ຫຼາຍ ເພາະ​ເຕັກ​ໂນ​ໂລ​ຊີ​ເກີດ​ຈາກ​ພື້ນ­ຖານ​ທາງ​ວິ­ທະ­ຍາ­ສາດ ທີ່​ມະ­ນຸດ​ໄດ້​ສຶກ​ສາ​ຄົ້ນ­ຄວ້າ​ທິດ​ສະ​ດີ​ທາງ​ວິ­ທະ­ຍາ­ສາດ​ມາ​ຢ່າງ​ຕໍ່​ເນື່ອງ ເຮັດ​ໃຫ້­ການ​ພັດ­ທະ­ນາ​ເຕັກ​ໂນ​ໂລ​ຊີ​ຈະ­ເລີນ​ກ້າວ­ໜ້າ ຊຶ່ງ​ຄວາມ​ຮູ້​ທາງ​ວິ­ທະ­ຍາ­ສາດ ກໍ່​ເປັນ­ຄວາມ​ຮູ້​ທີ່​ເກີດ​ຈາກ​ປາ­ກົດ­ການ​ທາງ​ທຳ​ມະ​ຊາດ​ທີ່​ມະ­ນຸດ​ໄດ້​ສັງ­ເກດ​ເຫັນ ໂດຍ​ຫຼັກ​ສຳ­ຄັນ​ຄື​ສິ່ງ​ທີ່​ມະ­ນຸດ​ໃຊ້​ອະ­ທິ­ບາຍ​ວ່າ ເປັນ​ຫຍັງ​ຈຶ່ງ​ເກີດ​ຢ່າງ​ນັ້ນ ໃນ​ປັດ­ຈຸ­ບັນ ເຕັກ​ໂນ​ໂລ​ຊີ​ໄດ້​ມີ​ການ​ພັດ­ທະ­ນາ​ເປັນ​ຢ່າງ​ສູງ ແລະ ໃນ​ການ​ດຳ­ເນີນ​ຊີ­ວິດ​ໃນ​ປັດ­ຈຸ­ບັນ​ນີ້ ເຕັກ​ໂນ​ໂລ​ຊີ​ເຂົ້າ​ມາ​ມີ​ສ່ວນ​ກ່ຽວ­ຂ້ອງ​ຫຼວງ­ຫຼາຍ ບໍ່​ວ່າ​ຈະ​ເປັນ​ການ​ໃຊ້​ເຕັກ​ໂນ​ໂລ​ຊີ​ໃນ​ການ​ສື່­ສານ ເຊັ່ນ: ການ​ໃຊ້​ໂທລະ­ສັບ ຫຼື ອິນ​ເຕີ​ເນັດ ສັງ­ຄົມ​ເຄືອ​ຂ່າຍ (Social Network) ການ​ໃຊ້​ເຕັກ​ໂນ​ໂລ​ຊີ​ໃນ​ດ້ານ​ການ​ສຶກ​ສາ ຈັດ​ລະ­ບົບ​ໃນ​ໜ່ວຍ​ງານ​ຕ່າງໆ ເຊິ່ງ​ມັນ​ເປັນ​ສິ່ງ​ທີ່​ເຮັດ​ໃຫ້​ເຕັກ​ໂນ​ໂລ​ຊີ​ມີ​ບົດ­ບາດ​ກັບ​ມະ­ນຸດ ຈົນ​ເຕັກ​ໂນ​ໂລ​ຊີ​ກາຍ­ເປັນ​ສ່ວນ​ໜຶ່ງ​ຂອງ​ຊີ­ວິດ​ມະ­ນຸດ​ໄປ​ແລ້ວ ທີ່​ເຕັກ​ໂນ​ໂລ​ຊີ​ເຂົ້າ​ມາ​ເປັນ​ສ່ວນ​ໜຶ່ງ​ຂອງ​ສັງ­ຄົມ​ມະ­ນຸດ ຈຶ່ງ​ໃຫ້​ທັງ​ຜົນ​ດີ ແລະ ຜົນ​ເສຍ​ຕ່າງໆ​ຕາມ​ມາ ເພາະ​ມະ­ນຸດ​ຢູ່​ກັນ​ເປັນ​ສັງ­ຄົມ ເຊິ່ງ​ສັງ­ຄົມ​ນັ້ນ ກໍ່​ຄື ຄົນ​ໝູ່​ຫຼາຍ ແລ້ວ​ເມື່ອ​ມີ​ຄົນ​ຫຼາຍ​ກໍ່​ຕ້ອງ​ມີ​ຜົນ​ຕ່າງໆ​ຕາມ​ມາ ການ​ນຳ​ເຕັກ​ໂນ​ໂລ​ຊີ​ມາ​ໃຊ້ ຈຶ່ງ​ໃຫ້​ທັງ​ຜົນ​ດີ ແລະ ຜົນ​ເສຍ​ນັ້ນ​ເອງ ຈຶງ​ຕ້ອງ​ມີ​ຄວາມ​ຮູ້ ແລະ ເລືອກ​ໃຊ້​ເຕັກ​ໂນ​ໂລ​ຊີ ທີ່​ເໝາະ​ສົມ​ກັບ​ສະ­ພາບ​ສັງ­ຄົມ ເສດ­ຖະ­ກິດ ແລະ ຄວາມ​ຕ້ອງ­ການ​ຂອງ​ປະ­ເທດ ພ້ອມ​ທັງ​ກຽມ​ແນວ­ທາງ​ໃນ​ການ​ຮັບ​ມື​ກັບ​ບັນ­ຫາ​ທີ່​ພ້ອມ​ຈະ​ເກີດ​ຂຶ້ນ​ໄດ້​ທຸກ­ເມື່ອ ຈາກ​ການ​ໃຊ້​ເຕັກ​ໂນ​ໂລ​ຊີ​ທັງ​ທີ່​ນຶກ​ເຖິງ ແລະ ຄາດ​ບໍ່​ເຖິງ.

ຂ່າວທີ່ກ່ຽວຂ້ອງ