ລາວໂຕໂຢຕ້າ ຈັດກິດຈະກຳກີລາສີ ສະຫຼອງຄົບຮອບ 26 ປີ

321 27 ກ.ຍ. 2018 ວົງຈອນກີລາ
ລາວໂຕໂຢຕ້າ ຈັດກິດຈະກຳກີລາສີ ສະຫຼອງຄົບຮອບ 26 ປີ

    ບໍ­ລິ­ສັດ ລາວ​ໂຕ​ໂຢ​ຕ້າ​ບໍ­ລິ­ການ ຈຳ­ກັດ ຈັດ​ກິດ­ຈະ­ກຳ​ກີ­ລາ​ສີ ປະ­ຈຳ​ປີ 2018 ເພື່ອ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ບໍ­ລິ­ສັດ ຄົບ­ຮອບ 26 ປີ ຂຶ້ນ​ວັນ​ທີ 22 ກັນ­ຍາ 2018 ຢູ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ ໂດຍ​ມີ​ທ່ານ ວິ­ລະ​ຈິດ ພິ­ລາ​ພັນ​ເດ​ຊ ປະ­ທານ​ທີ່​ປຶກ­ສາ​ບໍ­ລິ­ສັດ ລາວ​ໂຕ​ໂຢ​ຕ້າ​ບໍ­ລິ­ການ ຈຳ­ກັດ ທ່ານ ປະ­ສາດ​ໄຊ ພິ­ລາ​ພັນ​ເດ​ຊ ຜູ້­ອຳ­ນວຍ­ການ​ບໍ­ລິ­ສັດ ລາວ​ໂຕ​ໂຢ​ຕ້າ​ບໍ­ລິ­ການ ຈຳ­ກັດ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ບົວ­ລອຍ ສິ​ຣິ​ປັນ­ຍາ ຜູ້​ຈັດ­ການ​ຝ່າຍ​ບຸ​ຄະ­ລາ​ກອນ ແລະ ໄອ​ຊີ​ທີ ບໍ­ລິ­ສັດ ລາວ​ໂຕ​ໂຢ​ຕ້າ​ບໍ­ລິ­ການ ກ່າວ​ວ່າ: ການ​ແຂ່ງ­ຂັນ​ກີ­ລາ​ສີ ເປັນ​ກິດ­ຈະ­ກຳ​ໜຶ່ງ​ທີ່​ບໍ­ລິ­ສັດ​ໃຫ້​ຄວາມ​ສຳ­ຄັນ ແລະ ໄດ້​ປະ­ຕິ­ບັດ​ມາ​ແຕ່​ປີ 2006 ຮອດ​ປັດ­ຈຸ­ບັນ ເຊິ່ງ​ປີ 2018 ແມ່ນ​ຄັ້ງ​ທີ 12 ຈັດ​ຂຶ້ນ​ພາຍ​ໃຕ້​ຄຳ​ຂວັນ “ສຸ­ຂະ­ພາບ​ຈິດ​ດີ ສຸ­ຂະ­ພາບ​ໃຈ­ດີ ແລະ ສຸ­ຂະ­ພາບ​ກາຍ​ດີ ມີ​ຢູ່​ທີ່​ລາວ​ໂຕ​ໂຢ​ຕ້າ​ເທົ່າ​ນັ້ນ” ໂດຍ​ມີ​ຈຸດ­ປະ­ສົງ​ເພື່ອ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ ແລະ ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ບໍ­ລິ­ສັດ ລາວ​ໂຕ​ໂຢ​ຕ້າ​ບໍ­ລິ­ການ ຈຳ­ກັດ ສ້າງ​ຄວາມ​ສາ­ມັກ­ຄີ​ຮັກ­ແພງ​ລະ­ຫວ່າງ​ຄະ­ນະ​ຜູ້​ບໍ­ລິ­ຫານ ພະ­ນັກ­ງານ​ຂອງ​ບໍ­ລິ­ສັດ​ໃຫ້​ມີ​ຄວາມ​ແໜ້ນ​ແຟ້ນ ແລະ ເພື່ອ​ອອກ­ກຳ­ລັງ​ກາຍ​ໃຫ້​ມີ​ສຸ­ຂະ­ພາບ​ແຂງ­ແຮງ ແລະ ປ່ຽນ​ບັນ­ຍາ­ກາດ​ຂອງ​ການ​ເຮັດ​ກິດ­ຈະ­ກຳ​ຮ່ວມ​ກັນ.

    ສຳ­ລັບ​ກິດ­ຈະ­ກຳ​ໃນ​ປີ​ນີ້ ໄດ້​ປ່ຽນ​ຮູບ​ແບບ​ຈາກ 4 ສີ ເປັນ 2 ສີ ຄື: ສີ­ແດງ ແລະ ສີ­ຟ້າ ເພື່ອ​ໃຫ້​ກະ­ທັດ​ຮັດ ແລະ ມີ​ຄວາມ​ແປກ​ໃໝ່​ຈາກ​ທຸກ​ປີ ໃນ​ນີ້​ມີ​ກີ­ລາ​ແລ່ນ​ມິ​ນິ​ມາ​ຣາ​ທອນ​ລວມ​ໝູ່ ແລະ ບານ­ເຕະ ນອກ​ນີ້​ຍັງ​ມີ​ກິດ­ຈະ­ກຳ​ອື່ນໆ​ອີກ​ທີ່​ສ່ອງ​ແສງ​ໃຫ້​ເຫັນ​ເຖິງ​ຄວາມ​ສາ­ມັກ­ຄີ ການ​ຮ່ວມ​ມື​ຊ່ວຍ­ເຫຼືອ​ເຊິ່ງ​ກັນ ແລະ ກັນ ການ​ເຮັດ​ວຽກ​ເປັນ​ທີມ ແລະ ຄວາມ​ຍາກ​ງ່າຍ​ຂອງ​ການ​ເຮັດ​ວຽກ​ຮ່ວມ​ກັນ​ຫຼາຍ​ຄົນ.

ຂ່າວທີ່ກ່ຽວຂ້ອງ