ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 26/09/2018

227 26 ກ.ຍ. 2018 ຫົວຂໍ້ຂ່າວອື່ນໆ

    ເລື່ອງ​ເດັດໆ​ປະ­ຈຳ​ວັນ​ນີ້ ລວມ​ມີ​ຂ່າວ​ກ່ຽວ​ກັບ​ທາງ​ການ​ຈີນ ເອົາ​ຈິງ​ເອົາ​ຈັງ​ກັບ​ການ​ປະ­ພຶດ​ຂອງ​ນັກ​ທ່ອງ​ທ່ຽວ​ຈີນ​ຢູ່​ຕ່າງ​ແດນ ຕໍ່​ໃສ່​ມາດ​ຕະ­ການ​ຫ້າມ​ຂາຍ​ນົມ​ແມ່­ລູກ­ອ່ອນ​ໄປ​ຕ່າງ­ປະ­ເທດ​ຢູ່​ກຳ­ປູ­ເຈຍ.

    ທີ່ ສປ ຈີນ: ເລື່ອງ​ອຸດ­ສາ­ຫະ­ກຳ​ທ່ອງ​ທ່ຽວ​ນີ້ ຄົງ​ຍາກ​ຈະ​ມີ​ປະ­ເທດ​ໃດ​ໜຶ່ງ​ສາ­ມາດ​ແຊງ​ໜ້າ​ຈີນ​ໄປ​ໄດ້ ເພາະ­ວ່າ​ການ​ເຕີບ​ໃຫຍ່​ຂອງ​ການ­ທ່ອງ­ທ່ຽວ​ຈີນ​ນັ້ນ ລວມ​ເອົາ​ທັງ​ຈຳ­ນວນ​ນັກ​ທ່ອງ​ທ່ຽວ​ຕ່າງ­ປະ­ເທດ​ທີ່​ເຂົ້າ​ໄປ​ທ່ອງ​ທ່ຽວ​ຈີນ ແລະ ນັກ​ທ່ອງ​ທ່ຽວ​ຈີນ​ທີ່​ອອກ​ໄປ​ທ່ອງ​ທ່ຽວ​ຢູ່​ຕ່າງ­ປະ­ເທດ ແລະ ທ່ອງ​ທ່ຽວ​ຢູ່​ພາຍ​ໃນ​ປະ­ເທດ​ຂອງ​ຕົນ​ເອງ​ທີ່​ເດັດໆ ອີກ​ອັນ​ໜຶ່ງ ກໍ່​ຄື ທາງ​ການ​ຈີນ​ມີ​ມາດ​ຕະ­ການ​ເດັດ­ຂາດ​ໃນ​ການ​ຄຸ້ມ​ຄອງ​ນັກ​ທ່ອງ​ທ່ຽວ​ຈີນ ທີ່​ອອກ​ໄປ​ທ່ອງ​ທ່ຽວ​ຕ່າງ­ປະ­ເທດ​ບໍ່​ໃຫ້​ເຮັດ​ແນວ​ແຕກ​ປອກ​ນອກ​ທາງ ແນວ​ເສຍ­ໜ້າ ເສຍ​ຕາ ແລະ ພາບ​ພົດ​ຂອງ​ປະ­ເທດ​ຊາດ ສ່ວນ​ຢູ່​ພາຍ​ໃນ​ປະ­ເທດ​ເອງ​ຈີນ ກໍ່​ມີ​ກົດ​ລະ­ບຽບ​ເຫຼັກ​ເພື່ອ​ຄຸ້ມ​ຄອງ​ບັນ­ດາ​ບໍ­ລິ­ສັດ​ປະ­ກອບ​ການ​ການ­ທ່ອງ­ທ່ຽວ ຕະ­ຫຼອດ​ຮອດ​ເລື່ອງ​ຄຸນ­ສົມ­ບັດ ແລະ ຈັນ​ຍາ​ບັນ​ຂອງ​ຜູ້­ນຳ​ທ່ຽວ​ຂອງ​ບັນ­ດາ​ເຈົ້າ​ຂອງ​ຮ້ານ​ຄ້າ ຮ້ານ​ຂາຍ­ເຄື່ອງ​ຂອງ​ທີ່​ລະ​ລຶກ ບໍ່​ໃຫ້​ເອົາ​ລັດ​ເອົາ​ປຽບ​ນັກ​ທ່ອງ​ທ່ຽວ​ຕ່າງ­ປະ­ເທດ ສຳ­ລັບ​ນັກ​ທ່ອງ​ທ່ຽວ​ຈີນ ທຸກ​ຄົນ​ທີ່​ຈະ​ອອກ​ໄປ​ທ່ຽວ​ຕ່າງ­ປະ­ເທດ​ນັ້ນ ແມ່ນ​ຕ້ອງ​ຍົກ​ສູງ​ສະ­ຕິ​ເຄົາ­ລົບ​ກົດ­ໝາຍ​ຮີດ­ຄອງ​ປະ­ເພ­ນີ​ຂອງ​ປະ­ເທດ ຫຼື ເຂດ​ທີ່​ໄປ​ທ່ອງ​ທ່ຽວ ສ່ວນ​ຜູ້​ລະ­ເມີດ​ນັ້ນ ທາງ​ການ​ຈີນ​ກໍ່​ມີ​ບົດ​ລົງ­ໂທດ​ຢ່າງ​ສະ​ສົມ ເຊັ່ນ: ກໍ­ລະ­ນີ​ນັກ​ທ່ອງ​ທ່ຽວ​ຈີນ​ຄົນ​ໜຶ່ງ ຄຸມ​ອາ­ລົມ​ບໍ່​ຢູ່​ຍ້ອນ​ບໍ່​ໄດ້​ນັ່ງ​ຕັ່ງ​ໃນ​ຍົນ​ໄທ​ທີ່​ຕົນ​ຕ້ອງ­ການ ກໍ່​ເລີຍ​ເກີດ​ມີ​ປາກ​ສຽງ ແລ້ວ​ສາດ​ນ້ຳ​ຮ້ອນ​ໃສ່​ໜ້າ​ນາງ​ອາ­ກາດ ຈົນ​ເປັນ​ເລື່ອງ​ໃຫຍ່ ແລະ ຖືກ​ທາງ​ການ​ຈີນ​ລົງ​ວິ­ໄນ​ຢ່າງ​ເດັດ­ຂາດ ເມື່ອ 3-4 ປີ​ກ່ອນ​ໜ້າ​ນີ້ ກໍ່​ມີ​ຂ່າວ​ວ່າ​ນັກ​ທ່ອງ​ທ່ຽວ​ຍິງ​ຈາກ​ຈີນ​ສອງ​ຄົນ ພາ­ກັນ​ຟ້ອນ​ລຳ​ຢ່າງ​ເພີດ­ເພີນ​ເກີນ​ເຫດ​ຢູ່​ໃກ້ໆ​ໂບດ​ແຫ່ງ​ໜຶ່ງ ທີ່​ເກາະ ຊາ​ບາ ທີ່ ມາ​ເລ​ເຊຍ ຈົນ​ຖືກ​ທາງ​ການ​ຂອງ​ປະ­ເທດ​ນີ້ ຈັບ​ກຸມ​ໃນ​ຕົ້ນ​ເດືອນ​ສິງ­ຫາ​ປີ​ກາຍ ກໍ່​ມີ​ນັກ​ທ່ອງ​ທ່ຽວ​ຈີນ​ສອງ​ຄົນ​ຖືກ​ເຈົ້າ​ໜ້າ­ທີ່ ເຢຍ​ລະ​ມັນ​ຈັບ​ກຸມ ຢູ່​ນະ­ຄອນ­ຫຼວງ​ແບກ​ແລງ ຍ້ອນ​ທັງ​ສອງ​ເຮັດ​ແນວ​ຈັງ­ໄຮ ຄື​ອອກ­ທ່າ​ທາງ​ຄຳ­ນັບ​ແບບ​ຈອມ​ຜະ­ເດັດ­ການ ຮິດ​ເລີ ຢູ່​ໃກ້ໆ​ຫໍ​ລັດ​ຖະ​ສະ­ພາ​ເຢຍ​ລະ​ມັນ ມີ​ກົດ­ໝາຍ​ຫ້າມ​ທຸກ​ການ​ນຳ​ໃຊ້​ສັນ­ຍະ­ລັກ​ທຸງ ເຄື່ອງ­ໝາຍ​ຮູບ​ການ­ຈັດ­ຕັ້ງ​ການ­ສະ­ແດງ​ທ່າ​ທີ ທີ່ ຮິດ​ເລີ ແລະ ພວກ​ນາ​ຊີ ເຄີຍ​ນຳ​ໃຊ້​ໃນ​ເມື່ອ​ກ່ອນ ໃຜ​ລະ­ເມີດ​ມີ​ໂທດ​ຖືກ​ປັບ​ໃໝ ຫຼື ຕິດ​ຄຸກ​ສູງ​ສຸດ 3 ປີ ນັກ​ທ່ອງ​ທ່ຽວ​ຈີນ​ທັງ​ສອງ​ຄົນ ທີ່​ຖືກ​ຈັບ​ນັ້ນ ບອກ​ວ່າ​ພວກ​ຕົນ​ບໍ່​ມີ​ເຈດ​ຕະ​ນາ​ລະ­ເມີດ​ກົດ­ໝາຍ​ເຢຍ​ລະ​ມັນ ທີ່​ເຮັດ​ໄປ​ແມ່ນ​ເພື່ອ​ສ້າງ​ບັນ­ຍາ­ກາດ​ມ່ວນ­ຊື່ນ ຕະ­ຫຼົກ​ເຮ​ຮາ​ຊື່ໆ ແຕ່​ກົດ­ໝາຍ​ເປັນ​ກົດ­ໝາຍ ທັງ​ສອງ​ຖືກ​ປັບ​ໃໝ່​ຜູ້​ລະ 500 ເອີ​ໂຣ (600 ໂດ​ລາ​ສະ­ຫະ­ລັດ) ແລະ ຕ້ອງ​ໄດ້​ອອກ​ຈາກ​ເຢຍ​ລະ​ມັນ​ໄປ ທາງ​ສະ­ຖານ­ທູດ​ຈີນ ຢູ່ ເຢຍ​ລະ​ມັນ ໄດ້​ອອກ​ມາ​ເຕືອນ​ນັກ​ທ່ອງ​ທ່ຽວ​ຈີນ​ທຸກ​ຄົນ ໃຫ້​ເຄົາ­ລົບ​ລະ­ບຽບ​ກົດ­ໝາຍ ແລະ ຮີດ­ຄອງ​ປະ­ເພ­ນີ​ຂອງ​ປະ­ເທດ ທີ່​ໄປ​ທ່ຽວ​ຢ່າງ​ເຄັ່ງ​ຄັດ ຕ້ອງ​ລະ­ມັດ­ລະ­ວັງ​ຄຳ​ປາກ ແລະ ການ​ກະ­ທຳ ເພາະ​ຄຳ​ແກ້​ຕົວ​ທີ່​ວ່າ: “ເຮັດ​ໄປ​ຍ້ອນ​ບໍ່​ຮູ້​ນັ້ນ” ໃຊ້​ການ​ບໍ່​ໄດ້​ອີກ​ແລ້ວ.

    ທີ່ ກຳ­ປູ­ເຈຍ: ໃນ​ທ້າຍ​ໄຕ​ມາດ​ທີ 1 ປີ­ຜ່ານ­ມາ ທາງ​ການ​ກຳ­ປູ­ເຈຍ ໄດ້​ສັ່ງ​ຫ້າມ​ສົ່ງ​ນົມ​ແມ່​ໄປ​ສະ­ຫະ­ລັດ​ອາ​ເມ​ຣິ​ກາ ເດັດ­ຂາດ ກ່ອນ​ໜ້າ​ນັ້ນ ມີ​ຂ່າວ​ວ່າ ທາງ​ບໍ­ລິ­ສັດ ແອມ​ໂບຼ​ຊີ​ແລັບ ໄດ້​ເຮັດ​ໜ້າ­ທີ່​ຊອກ​ຊື້​ນ້ຳ​ນົມ​ນຳ​ແມ່­ລູກ­ອ່ອນ​ກຳ­ປູ­ເຈຍ ເພື່ອ​ສົ່ງ​ໄປ​ຂາຍ​ໃຫ້​ແມ່­ຍິງ​ອາ​ເມ​ຣິ​ກາ ທີ່​ຕ້ອງ­ການ​ລ້ຽງ​ລູກ​ດ້ວຍ​ນ້ຳ​ນົມ​ແມ່ ລາ­ຄາ​ທີ່​ຊື້​ຈາກ​ແມ່­ລູກ­ອ່ອນ ຢູ່​ກຳ­ປູ­ເຈຍ ນັ້ນ ແມ່ນ 20 ໂດ​ລາ ຕໍ່ 1 ແພ໋ກ ທີ່​ບັນ­ຈຸ​ນ້ຳ​ນົມ 147 ມິນ​ລີ​ລິດ ໃນ​ຄຳ​ສັ່ງ​ຫ້າມ​ນັ້ນ ທາງ​ການ​ກຳ­ປູ­ເຈຍ ບອກ​ວ່າ ກຳ­ປູ­ເຈຍ ເປັນ​ປະ­ເທດ​ທຸກ​ຍາກ​ກໍ່​ຈິງ ແຕ່​ກໍ່​ບໍ່​ທຸກ​ເຖິງ​ຂັ້ນ​ຕ້ອງ​ໄດ້​ຊື້-ຂາຍ ນ້ຳ​ນົມ​ແມ່­ລູກ­ອ່ອນ​ດອກ ທາງ​ບໍ­ລິ­ສັດ ແອມ​ໂບຼ​ຊີ​ແລັບ ໄດ້​ອອກ​ມາ ຕອບ​ໂຕ້​ຄືນ​ວ່າ ທຸ­ລະ​ກິດ​ນີ້ ຊ່ວຍ​ສົ່ງ­ເສີມ​ໃຫ້​ແມ່­ຍິງ​ລ້ຽງ​ລູກ​ດ້ວຍ​ນົມ​ແມ່ ແລະ ທັງ​ເປັນ​ການ​ສ້າງ​ລາຍ​ຮັບ​ໃຫ້​ແມ່­ຍິງ​ກຳ­ປູ­ເຈຍ​ອີກ​ດ້ວຍ ສ່ວນ​ອົງ­ການ ອຸຍ​ນີ​ເຊັບ ແລະ ກຸ່ມ​ປົກ​ປ້ອງ​ສິດ­ທິ​ຂອງ​ແມ່­ຍິງ​ໃນ​ກຳ­ປູ­ເຈຍ ນັ້ນ ຕ່າງ​ກໍ່​ອອກ​ມາ​ສະ­ໜັບ­ສະ­ໜູນ​ມາດ​ຕະ­ການ​ຂອງ​ລັດ­ຖະ­ບານ​ກຳ­ປູ­ເຈຍ ໂດຍ​ໄດ້​ບອກ​ວ່າ: “ນ້ຳ​ນົມ​ແມ່­ຍິງ​ກຳ­ປູ­ເຈຍ ຕ້ອງ​ໃຊ້​ລ້ຽງ​ເດັກ​ກຳ­ປູ­ເຈຍ ທີ່​ຍັງ​ຂາດ​ສານ​ອາ­ຫານ​ຢ່າງ​ຫຼວງ­ຫຼາຍ”.

ຂ່າວທີ່ກ່ຽວຂ້ອງ