ນັກກີລາຍິງປືນສັ້ນ IPSC ລາວ ສ້າງຜົນງານລະດັບສາກົນ

96 26 ກ.ຍ. 2018 ວົງຈອນກີລາ
ນັກກີລາຍິງປືນສັ້ນ IPSC ລາວ ສ້າງຜົນງານລະດັບສາກົນ

    ນັກ­ກີ­ລາ​ຍິງ​ປືນ​ສັ້ນ IPSC ຈາກ​ລາວ ສ້າງ​ຜົນ­ງານ​ໄດ້​ຢ່າງ​ໂດດ​ເດັ່ນ​ໃນ​ກີ­ລາ​ຍິງ​ປືນ​ສາ­ກົນ ໂດຍ​ສາ­ມາດ​ຍາດ​ມາ​ໄດ້​ອັນ​ດັບ​ທີ 3 ປະ­ເພດ​ທີມ 2 ລາຍ­ການ ແລະ ຫຼຽນ​ຄຳ ປະ­ເພດ​ຊາຍ​ດ່ຽວ​ອາ­ວຸ­ໂສ ລາຍ­ການ Far East Asia Handgun Championship 2018 Level 4 ຢູ່​ພັດ​ທະ​ຍາ ປະ­ເທດ​ໄທ ວັນ​ທີ 16-22 ກັນ­ຍາ 2018.

    ການ​ແຂ່ງ­ຂັນ​ຄັ້ງ​ນີ້ ມີ​ນັກ­ກີ­ລາ​ຈາກ 30 ກວ່າ​ປະ­ເທດ​ເຂົ້າ​ຮ່ວມ ສະ­ເພາະ ສປປ ລາວ ສົ່ງ​ນັກ­ກີ­ລາ​ເຂົ້າ​ຮ່ວມ 10 ຄົນ ຍິງ 1 ຄົນ ຜ່ານ​ການ​ແຂ່ງ­ຂັນ​ປະ­ເພດ​ຊາຍ​ດ່ຽວ ຮຸ່ນ​ອາ­ວຸ­ໂສ ທ່ານ ສຸ​ນັນ ວັດ­ທະ­ນະ​ບູນ ຄວ້າ​ຫຼຽນ​ຄຳ ດ້ວຍ​ຄະ­ແນນ 1.461 ຄະ­ແນນ ທີ 2 ນັກ­ກີ­ລາ​ຈາກ​ໄທ 1.347 ຄະ­ແນນ ທີ 3 ນັກ​ກີ ລາ​ຈາກ​ອິນ​ໂດ​ເນ​ເຊຍ 1.250 ຄະ­ແນນ ລາຍ­ການ​ນີ້ ມີ​ນັກ­ກີ­ລາ ເຂົ້າ​ຮ່ວມ 7 ຄົນ ຈາກ 4 ປະ­ເທດ ຄື: ສປປ ລາວ ໄທ ອິນ​ໂດ​ເນ​ເຊຍ ແລະ ອົດ​ສະ​ຕຣາ​ລີ.

    ສຳ­ລັບ​ປະ­ເພດ​ທີມ​ຊາຍ ລາຍ­ການ Production Optics Division ລາວ​ຍາດ​ໄດ້​ອັນ​ດັບ​ທີ 3 ຫຼຽນ​ທອງ ດ້ວຍ​ຄະ­ແນນ 3.749 ຄະ­ແນນ ເຊິ່ງ​ປະ­ກອບ​ມີ: ສຸ​ນັນ ວັດ­ທະ­ນະ​ບູນ ອາ​ໂນ​ໄທ ເມືອງ​ມະ­ນີ ສິງ​ຄຳ ສີ​ປະ­ເສີດ ແລະ ອາ​ນຸ​ໄຊ ແສງ​ດາ­ລາ ສ່ວນ​ທີ 1 ຟີ​ລິບ​ປິນ 5.283 ຄະ­ແນນ ທີ 2 ໄທ 5.161 ຄະ­ແນນ.

    ສ່ວນ​ອີກ 1 ຫຼຽນ​ທອງ ໄດ້​ຈາກ​ປະ­ເພດ​ທີມ ລາຍ­ການ Revolver Division ໂດຍ​ມີ​ນາງ ກອງ​ຄຳ ບົວ​ແສງ​ພະ­ຈັນ ທ້າວ ຕຸ້ຍ ພາ­ນຸ​ວົງ ແລະ ທ້າວ ທະ­ນູ​ໄຊ ທຳ​ມະ​ວົງ ດ້ວຍ​ຄະ­ແນນ 3.088 ຄະ­ແນນ ຫຼຽນ​ຄຳ​ເປັນ​ຂອງ​ໄທ 5.593 ຄະ­ແນນ ຫຼຽນ​ເງິນ ຟີ​ລິບ​ປິນ 4675 ຄະ­ແນນ ພິ­ເສດ​ປີ 2021 ສປປ ລາວ ຈະ​ໄດ້​ຮັບ​ກຽດ​ເປັນ​ເຈົ້າ­ພາບ​ລາຍ­ການ​ນີ້​ຄັ້ງ​ທຳ​ອິດ.

ຂ່າວທີ່ກ່ຽວຂ້ອງ