ລວມຍອດຜະລິດຕະພັນພາຍໃນຂອງ ນວ ເພີ່ມຂຶ້ນສະເລ່ຍ 10,28%

179 26 ກ.ຍ. 2018 ຂ່າວໜ້າ​ໜຶ່ງ
ລວມຍອດຜະລິດຕະພັນພາຍໃນຂອງ ນວ ເພີ່ມຂຶ້ນສະເລ່ຍ 10,28%

    ທ່ານ ບຸນ​ປອນ ບຸດ​ຕະ​ນະ​ວົງ ຮອງ​ປະ­ທານ​ສະ­ພາ​ແຫ່ງ​ຊາດ ພ້ອມ​ດ້ວຍ​ຄະ­ນະ ລົງ​ເຄື່ອນ​ໄຫວ​ຕິດ­ຕາມ​ກວດ­ກາ ແລະ ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ ຢູ່​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ (ສປ.ນວ) ວັນ​ທີ 25 ກັນ­ຍາ 2018 ໂດຍ​ມີ​ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງ​ເຈົ້າ​ຄອງ ນວ ທ່ານ ອາ­ນຸ­ພາບ ຕຸ​ນາ​ລົມ ປະ­ທານ ສປ.ນວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ແກ້ວ​ພິ­ລາ​ວັນ ອາ​ໄພ​ລາດ ໄດ້​ລາຍ​ງານ​ສະ­ພາບ​ພົ້ນ​ເດັ່ນ ໃນ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 6 ເດືອນ​ຕົ້ນ​ປີ ແລະ ບາງ​ທິດ​ທາງ​ແຜນ­ການ​ປີ 2019 ໂດຍ​ຍົກ​ໃຫ້​ເຫັນ​ການ​ເຕີບ​ໂຕ​ທາງ​ດ້ານ​ເສດ­ຖະ­ກິດ ການ​ລົງ­ທຶນ ລາຍ​ຮັບ-ລາຍ​ຈ່າຍ ລວມ​ຍອດ​ຜະ­ລິດ​ຕະ​ພັນ​ພາຍ​ໃນ​ຂອງ ນວ ໄລ­ຍະ​ກາງ​ເພີ່ມ​ຂຶ້ນ​ສະ­ເລ່ຍ 10,28% ທຽບ­ໃສ່​ແຜນ­ການ 5 ປີ ຫຼຸດ​ຄາດ­ໝາຍ 0,73% ດ້ານ​ການ​ລົງ­ທຶນ​ໄລ­ຍະ 2 ປີ­ຜ່ານ­ມາ ສາ­ມາດ​ຂຸດ​ຄົ້ນ​ແຫຼ່ງ​ທຶນ​ເຂົ້າ​ໃນ​ການ​ພັດ­ທະ­ນາ 43.156,21 ຕື້​ກວ່າ​ກີບ ເທົ່າ​ກັບ 51,62% ດ້ານ​ການ​ເກັບ​ລາຍ​ຮັບ​ປະ­ຕິ­ບັດ​ໄດ້ 8.518,85 ຕື້​ກີບ ເທົ່າ​ກັບ 39,62% ດ້ານ​ລາຍ​ຈ່າຍ​ປະ­ຕິ­ບັດ​ໄດ້ 1.343,73 ຕື້​ກີບ ເທົ່າ​ກັບ 59,07%.

    ກອງ​ປະ­ຊຸມ​ຍັງ​ໄດ້​ທົບ​ທວນ​ການ​ສະ­ຫຼຸບ​ກາງ​ສະ­ໄໝ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ແຫ່ງ​ລັດ 5 ປີ ຄັ້ງ​ທີ VIII ການ­ຈັດ­ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ສະ­ພາ​ແຫ່ງ​ຊາດ ກ່ຽວ​ກັບ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ງົບ­ປະ­ມານ​ແຫ່ງ​ລັດ ປະ­ຈຳ​ປີ 2018 ການ​ກະ­ກຽມ​ສ້າງ​ແຜນ​ປີ 2019 ແລະ ວຽກ​ງານ​ກວດ​ສອບ ໂດຍ​ສຸມ​ໃສ່​ວຽກ​ງານ​ຊົນ­ນະ­ບົດ ແລະ ລຶ­ບລ້າງ​ຄວາມ­ທຸກ​ຍາກ ວຽກ​ງານ​ພັດ­ທະ­ນາ​ຊາຍ​ແດນ ການ​ແກ້​ໄຂ​ໄພ­ພິ­ບັດ ເພື່ອ​ເປັນ​ຂໍ້​ມູນ​ພື້ນ­ຖານ​ໃຫ້​ແກ່​ຄະ­ນະ​ປະ­ຈຳ​ສະ­ພາ​ແຫ່ງ​ຊາດ ໃນ​ການ​ກະ­ກຽມ​ຮັບ​ໃຊ້​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ນອກ­ຈາກ​ນີ້ ຜູ້​ເຂົ້າ​ຮ່ວມ​ກໍ່​ໄດ້​ພ້ອມ​ກັນ​ປະ­ກອບ​ຄຳ​ຄິດ​ເຫັນ​ໃສ່ ແລະ ແລກ­ປ່ຽນ​ບົດ­ຮຽນ​ເຊິ່ງ​ກັນ ແລະ ກັນ​ໃນ​ບັນ­ຫາ​ທີ່​ໃຫ້​ຄວາມ​ສົນ­ໃຈ ອີກ​ດ້ວຍ.

ຂ່າວທີ່ກ່ຽວຂ້ອງ