ຂ່າວຫຼ້າສຸດ

ໃຫ້ຄວາມຮູ້ດ້ານວຽກງານໂພຊະນາການ

197 26 ກ.ຍ. 2018 ຂ່າວໜ້າ​ໜຶ່ງ
ໃຫ້ຄວາມຮູ້ດ້ານວຽກງານໂພຊະນາການ

    ພິ­ທີ​ເປີດ​ຊຸດ​ເຝີກ​ອົບ­ຮົມ​ກ່ຽວ​ກັບ​ວຽກ​ງານ​ໂພ­ຊະ​ນາ​ການ​ອາ­ຫານ​ທ່ຽງ​ໃນ​ໂຮງ­ຮຽນ ແລະ ນຳ​ໃຊ້​ໂປຣ​ແກຼມ​ຄອບ​ພິວ​ເຕີ ເພື່ອ​ຕິດ­ຕາມ​ການ​ປະ​ເມີນ​ຜົນ​ດ້ານ​ໂພ­ຊະ​ນາ​ການ​ຂອງ​ເດັກ​ອະ­ນຸ­ບານ ໃນ​ນະ­ຄອນ­ຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 25-27 ກັນ­ຍາ 2018 ຢູ່​ເຮືອນ​ຮັບ­ແຂກ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ໂດຍ​ມີ​ທ່ານ ມີ​ທອງ ສຸ­ວັນ​ມີ​ໄຊ ຫົວ­ໜ້າ​ກົມ​ການ​ສຶກ​ສາ­ກ່ອນ​ໄວ​ຮຽນ ກະ­ຊວງ​ສຶກ​ສາ​ທິ​ການ ແລະ ກິ­ລາ ທ່ານ ກິ​ຕິ ສັນ​ຈະ­ເລີນ​ພົງ ຮອງ​ຜູ້­ອຳ­ນວຍ­ການ​ສະ​ຖາ​ບັນ​ໂພ­ຊະ​ນາ​ການ ມະ­ຫາ­ວິ­ທະ­ຍາ­ໄລ​ມະ­ຫິ​ດົນ ປະ­ເທດ​ໄທ ພ້ອມ​ດ້ວຍ​ຜູ້­ຕາງ­ໜ້າ​ກະ­ຊວງ​ສາ­ທາ­ລະ­ນະ​ສຸກ ກະ­ຊວງ​ສຶກ​ສາ​ທິ​ການ ແລະ ກີ­ລາ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ມີ​ທອງ ສຸ­ວັນ​ມີ​ໄຊ ໄດ້​ກ່າວ​ວ່າ: ຊຸດ​ເຝິກ­ອົບ­ຮົມ​ຄັ້ງ​ນີ້ ຖື​ເປັນ​ຊຸດ​ອົບ­ຮົມ​ສຳ­ຄັນ ທີ່​ໄດ້​ເຕົ້າ­ໂຮມ​ເອົາ​ບັນ­ດາ​ວິ­ຊາ​ການ​ແພດ​ໝໍ​ຈາກ​ໂຮງ­ໝໍ​ສູນ​ກາງ ຜູ້​ອຳ­ນວຍ ແລະ ຄູ​ສອນ​ໂຮງ­ຮຽນ​ພາກ​ລັດ ແລະ ເອ­ກະ​ຊົນ ໃນ​ເມືອງ​ສີ​ໂຄດ​ຕະ­ບອງ ຈັນ­ທະ​ບູ​ລີ ໄຊ​ເຊດ​ຖາ ແລະ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ 40 ທ່ານ ພ້ອມ​ທັງ​ໄດ້​ເຊີນ​ເອົາ​ວິ­ທະ­ຍາ­ກອນ​ຜູ້​ທີ່​ມີ​ປະ­ສົບ​ການ​ດ້ານ​ວຽກ​ໂພ­ຊະ​ນາ​ການ​ຂອງ​ມະ­ຫາ­ວິ­ທະ­ຍາ­ໄລ​ມະ­ຫິ​ດົນ ເພື່ອ​ມາ​ໃຫ້​ຄວາມ​ຮູ້​ຄວາມ​ເຂົ້າ­ໃຈ​ກ່ຽວ​ກັບ​ວຽກ​ງານ​ດັ່ງ­ກ່າວ ແລະ ສ້າງ​ສຳ​ມະ​ນາ​ກອນ​ໃຫ້​ເປັນ​ຄູ​ເຝີກ​ໃນ­ຕໍ່­ໜ້າ ໂດຍ​ສະ­ເພາະ​ວິ­ທີ​ການ​ດູ​ແລ​ເບິ່ງ­ແຍງ​ເດັກ­ນ້ອຍ ການ​ກຳ­ນົດ ແລະ ຈັດ​ຫາ​ອາ­ຫານ​ທ່ຽງ​ທີ່​ມີ​ຄຸນ­ຄ່າ​ທາງ​ດ້ານ​ໂພ­ຊະ​ນາ​ການ ແລະ ເໝາະ​ສົມ​ຕາມ​ຄວາມ​ຕ້ອງ­ການ​ຂອງ​ເດັກ ເພື່ອ​ສົ່ງ­ເສີມ​ໃຫ້​ເດັກ​ມີ​ການ​ຈະ­ເລີນ​ເຕີບ​ໃຫຍ່​ທີ່​ດີ ແລະ ພັດ­ທະ­ນາ​ການ​ທາງ​ສະ­ຕິ​ປັນ­ຍາ​ຢ່າງ​ມີ​ປະ​ສິດ­ທິ​ຜົນ ຮັບ­ປະ­ກັນ​ໃຫ້​ເດັກ­ນ້ອຍ​ໄດ້​ຮັບ​ສານ​ອາ­ຫານ​ທີ່​ຄົບ​ຖ້ວນ​ຕາມ​ໄວ ເພື່ອ​ໃຫ້​ເຂົາ­ເຈົ້າ​ຈະ­ເລີນ​ເຕີບ​ໃຫຍ່​ໄດ້​ດີ ແລະ ເປັນ​ອະ­ນາ­ຄົດ​ຂອງ​ຊາດ.

    ການ​ເຝີກ​ອົບ­ຮົມ​ຄັ້ງ​ນີ້ ຍັງ​ເປັນ​ຈຸດ​ເລີ່ມ​ຕົ້ນ​ການ​ພັດ­ທະ­ນາ​ຄຸ­ນະ­ພາບ​ຂອງ​ອາ­ຫານ​ທ່ຽງ​ໃນ​ໂຮງ­ຮຽນ​ອະ­ນຸ­ບານ ແລະ ຍັງ​ມີ​ໂຄງ­ການ​ສືບ­ຕໍ່​ຮ່ວມ​ມື​ກົບ​ທາງ​ສະ​ຖາ​ບັນ​ໂພ­ຊະ​ນາ​ການ ມະ­ຫາ​ໄລ​ມະ­ຫິ​ດົນ ເພື່ອ​ດຳ­ເນີນ​ວຽກ​ງານ​ໃນ​ຫຼາຍ​ຫົວ­ຂໍ້​ກ່ຽວ​ກັບ​ທາງ​ດ້ານ​ໂພ­ຊະ​ນາ​ການ ເພື່ອ​ໃຫ້​ໝັ້ນ​ໃຈ​ວ່າ​ເດັກ­ນ້ອຍ​ທຸກ​ຄົນ​ຈະ​ມີ​ໂອ­ກາດ ໄດ້​ຮັບ​ສານ​ອາ­ຫານ​ທີ່​ຄົບ​ຖ້ວນ​ເໝາະ​ສົມ​ຕາມ​ໄວ ເພື່ອ​ໃຫ້​ເຂົາ­ເຈົ້າ​ມີ​ການ​ຈະ­ເລີນ​ເຕີບ​ໃຫຍ່ ແລະ ພັດ­ທະ­ນາ​ການ​ທີ່​ມີ​ປະ­ສິດ​ຕິ​ພາບ​ຕໍ່​ໄປ.

ຂ່າວທີ່ກ່ຽວຂ້ອງ