ຂ່າວຫຼ້າສຸດ

ຮ້ານ​ສັບພະ​ສິນຄ້າ​ຂະໜາດ​ໃຫຍ່​ໃນ​ອັງກິດ ຈະ​ເລີ່ມ​ຫ້າມ​ໃຊ້​ຖົງ​ຢາງ

182 26 ກ.ຍ. 2018 ຂ່າວຕ່າງປະເທດ
ຮ້ານ​ສັບພະ​ສິນຄ້າ​ຂະໜາດ​ໃຫຍ່​ໃນ​ອັງກິດ ຈະ​ເລີ່ມ​ຫ້າມ​ໃຊ້​ຖົງ​ຢາງ

      ຮ້ານ​ສັບພະ​ສິນຄ້າ​ໃນ​ເຄືອ​ຂອງ Co-op ຊຶ່ງ​ມີ​ຂະໜາດ​ໃຫຍ່​ສຸດ​ຢູ່​ໃນ​ອັງກິດ ຈະ​ເລີ່ມ​ຫ້າມ​ໃຊ້​ຖົງ​ຢາງ​ປະເພດ​ຕ່າງໆ​ທີ່​ໃຊ້​ເທື່ອ​ດຽວ ນັບ​ແຕ່​ປີ 2023 ເປັນຕົ້ນ​ໄປ ເພື່ອ​ເປັນ​ການ​ປະກອບສ່ວນ​ເຂົ້າ​ໃນ​ການ​ແກ້​ໄຂ​ສະພາບ​ເຊື່ອມ​ພິດ​ຈາກ​ພລາ​​ສ​ຕິກ (ຢາງ).

    ໃນ​ແຈ້ງ​ການ​ທີ່​ມີ​ອອກ​ມາ​ເມື່ອ​ວັນ​ທີ 23 ກັນຍາ​ນີ້ ຜູ້ອຳນວຍການ​ຮັບຜິດຊອບ ຝ່າຍ​ຂາຍຍ່ອຍ​ຂອງ Co-op ເວົ້າ​ວ່າ: “ລາຄາ​ຂອງ​ພວກ​ອາຫານ​ທີ່​ຖືກ​ຫຸ້ມ​ຫໍ່​ດ້ວຍ​ຢາງ ໄດ້​ມີ​ສູງ​ເກີນ​ໄປ​ແລ້ວ ແລະ​ ນັບ​ແຕ່​ມື້ນີ້​ເປັນຕົ້ນ​ໄປ  Co-op ຈະ​ຄ່ອຍໆ​ລຶບລ້າງ​ສິ່ງ​ທີ່​ນຳ​ມາ​ຫຸ້ມ​ຫໍ່ ທີ່​ບໍ່​ສາມາດ​ກັບ​ໄປ​ໃຊ້​ໄດ້​ອີກ​ນັ້ນ​ໄປ.”

    ບາດກ້າວ​ທຳ​ອິດ​ເພື່ອ​ຍົກເລີກ​ຖົງ​ຢາງ​ທີ່​ໃຊ້​ເທື່ອ​ດຽວ ນັ້ນ​ກໍ​ແມ່ນ​ການ​ເລີ່ມ​ໃຊ້​ຖົງ​ທີ່​ເປັນ​ມິດ​ກັບ​ສິ່ງແວດລ້ອມ ຢູ່​ໃນ​ຮ້ານ​ຄ້າ​ແຫ່ງ​ຕ່າງໆ​ຂອງ​ຕົນ.  ການ​ໃຊ້​ຖົງ​ທີ່​ເປັນ​ມິດ​ກັບ​ສິ່ງແວດລ້ອມ ເປັນ​ວິທີ​ທີ່​ງ່າຍດາຍ ແຕ່​ມີ​ປະ​ສິດທິ​ຜົນ ເພື່ອ​ສະໜອງ​ວິທີ​ການ​ແກ້​ໄຂ​ທີ່​ເປັນ​ມິດ​ກັບ​ສິ່ງແວດລ້ອມ ແທນ​ທີ່​ໃຫ້​ແກ່​ຖົງ​ຢາງ. Co-op ໃຫ້​ຮູ້​ວ່າການ​ເຮັດ​ຄື​ດັ່ງກ່າວ ຈະ​ເປັນ​ການ​ຊ່ວຍ​ປັດ​ເປົ່າ​ຖົງ​ຢາງ​ໄດ້ 60 ລ້ານ​ຖົງ.

    ຖົງ​ເຈ້ຍ​ເພື່ອ​ບັນຈຸ​ສິນຄ້າ​ຂະໜາດ​ເບົາ ສາມາດ​ນຳ​ໃຊ້​ເພື່ອ​ການ​ຈັດ​ຊື້​ສິນຄ້າ ຫຼັງ​ຈາກ​ນັ້ນ​ກໍ​ກັບ​ມາ​ນຳ​ໃຊ້​ເປັນ​ຖົງ​ບັນຈຸ​ຂີ້​ເຫຍື້ອ ແມ່ນ​ຈະ​ໄດ້​ສະໜອງ​ໃຫ້​ຮ້ານ​ຄ້າ​ປະມານ 1.400 ແຫ່ງ​ຂອງ Co-op ຢູ່​ໃນ​ທົ່ວ​ອັງກິດ ພາຍ​ໃນ​ຫຼາຍ​ອາທິດ​ຕໍ່ໜ້າ ແລະ​ຫຼັງ​ຈາກ​ນັ້ນ Co-op ກໍ​ຈະ​ເປີດ​ກວ້າງ​ໄປ​ໃຫ້​ຮ້ານ​ຄ້າ​ຂອງ​ຕົນ​ທັງ​ໝົດ  2.600 ແຫ່ງ. Co-op ກໍ​ໃຫ້​ຮູ້​ວ່າ ຖົງ​ປະເພດ​ຕ່າງໆ ຂອງ​ບໍລິສັດ​ນີ້ ຈະ​ມີ​ຄວາມ​ງ່າຍດາຍ​ໃນ​ການ​ກັບ​ຄືນ​ມາ​ປຸງ​ແຕ່ງ​ໃໝ່ ພາຍ​ໃນ​ປີ  2023. ໃນ​ຂະນະ​ດຽວ​ກັນ Co-op  ກໍ​ໃຫ້​ສັນຍາ​ວ່າ ຈະ​ນຳ​ໃຊ້​ຢາງ​ປະເພດ​ຕ່າງໆ ກັບ​ມາ​ປຸງ​ແຕ່ງ​ເປັນ​ຂວດ ໂຖ ພາ​ຖາດ ແລະ​ກະຕ່າ ໃຫ້​ໄດ້​ຢ່າງ​ໜ້ອຍ 50% ພາຍ​ໃນ​ປີ 2021.

    ຕົວ​ເລກ​ຂອງ​ກະຊວງ​ສິ່ງ​ແອວດ​ລ້ອມ ສະບຽງ​ອາຫານ ແລະ​ຊົນນະບົດ​ຂອງ​ອັງກິດ ຊຶ່ງ​ນຳ​ອອກ​ມາ​ເປີດເຜີຍ​ເມື່ອ​ເດືອນ​ກໍລະກົດ​ທີ່​ຜ່ານ​ມາ ໃຫ້​ຮູ້​ວ່າ ຕົວ​ເລກ​ລາຍ​ຮັບ ຈາກ​ການຈຳໜ່າຍ​ຖົງ​ຢາງ ຂອງ​ຮ້ານ​ສັບພະ​ສິນຄ້າ​ຂະໜາດ​ໃຫຍ່​ສຸດ​ຈຳນວນ 7 ແຫ່ງ ຢູ່​ໃນ​ອັງກິດ ໄດ້​ຫຼຸດ​ລົງ 86% ນັບ​ແຕ່​ລັດຖະບານ​ປະເທດ​ນີ້ ເກັບ​ຄ່າ​ໃຊ້​ຈ່າຍ 5 ເພນ ( ເທົ່່າ​ກັບ 0,07 ໂດ​ລາ​ສະຫະລັດ) ເປັນຕົ້ນ​ມາ.

 

ຂ່າວທີ່ກ່ຽວຂ້ອງ