ຂ່າວ​ສັ້ນ

    ​ສປ ກົງ​ໂກ: ມີ​ຜູ້​ເສຍ​ຊີວິດ​ຢ່າງ​ໜ້ອຍ 16 ຄົນ ໃນ​ນັ້ນ​ເປັນ​ສາມັນ​ຊົນ 12 ຄົນ ແລະ​ ທະຫານ ຫຼື​ມື​ປືນ​ອີກ 4 ຄົນ ລວມ​ເຖິງ​ມີ​ຜູ້​ບາດເຈັບ 8 ຄົນ ຈາກ​ເຫດການ​ໂຈມ​ຕີ​ຂອງ​ກຸ່ມ​ມື​ປືນ ເຂົ້າ​ໃສ່​ບ້ານ​ແຫ່ງ​ໜຶ່ງ ຢູ່​ໃນ​ເຂດ​ພາກ​ຕາເວັນ​ອອກ ຂອງ​ສາທາລະນະ​ລັດ ປະຊາທິປະໄຕ ກົງ​ໂກ  (​ສປ ກົງ​ໂກ) ຊຶ່ງ​ເປັນ​ພື້ນ​ທີ່ໆ​ເກີດ​ການ​ພິພາດ​ຢູ່​ເປັນ​ປະຈຳ ເພື່ອ​ຍາດ​ແຍ່ງ​ເອົາ​ທີ່​ດິນ ລະຫວ່າງ​ຊຸມ​ຊົນ ເຮີ​ມາ ທີ່​ປະກອບ​ການ​ສ້ຽງ​ສັດ ກັບ​ກະສິກອນ​ຊາວ​ເລນ​ດູ. ເຫດການ​ໂຈມ​ຕີ​ດັ່ງກ່າວ​ມີ​ຂຶ້ນ​ເມື່ອ​ຄ່ຳ​ຄືນ ຂອງ​ວັນ​ທີ 22 ກັນຍາ​ທີ່​ຜ່ານ​ມາ.

    ຕັງ​ຊາ​ນີ: ສື່ສານ​ໃນ​ປະເທດ​ຕັງ​ຊາ​ນີ ລາຍ​ງານ​ວ່າ ໄລ່​ມາ​ຮອດ​ວັນ​ທີ 23 ຈຳນວນ​ຜູ້ ເສຍ​ຊີວິດ ຈາກ​ເຫດການ​ເຮືອ​ຂ້າມ​ຟາກ​ຫຼົ້ມ ຢູ່​ໃນ​ໜອງ ວິກ​ຕໍ​ເຣຍ ທີ່​ເປັນ​ໜອງ​ໃຫຍ່ ທີ່​ສຸດ​ຢູ່​ໃນ​ທະວີບ ອາ​ຟະ​ຣິກ​ກາ ຊຶ່ງ​ເກີດ​ຂຶ້ນ​ກ່ອນ​ໜ້າ​ນັ້ນ​ສາມ​ວັນ ໄດ້​ເພີ່​​ີມ​ຂຶ້ນ​ເປັນ 224 ຄົນ ຈາກ​ຈຳນວນ​ຜູ້​ທີ່​ມີໜ້າ​ຢູ່​ໃນ​ເຮືອ​ປະມານ 265 ຄົນ ໃນ​ຂະນະ​ທີ່​ວຽກ​ງານ​ກູ້​ໄພ ຍັງ​ສືບຕໍ່​ດຳເນີນ​ຢູ່. ໃນ​ຂະນະ​ດຽວ​ກັນ ເຈົ້າ​ໜ້າທີ່​ກ່ຽວຂ້ອງ​ໃຫ້​ຮູ້​ວ່າ ກອງ​ກຳລັງ​ກູ້​ໄພ ໄດ້​ຊ່ວຍເຫຼືອ​ຜູ້​ປະສົບ​ໄພ ຂຶ້ນ​ມາ​ໄດ້​ຕື່ມ 1 ຄົນ ເຮັດ​ໃຫ້​ຍອດ​ຜູ້​ເອົາ​ຊີວິດ​ລອດ​ມາ​ໄດ້​ເພີ່ມ​ຂຶ້ນ​ເປັນ 41 ຄົນ.

    ອີ​ຣານ: ໂທລະພາບ​ແຫ່ງ​ລັດ​ອີ​ຣານ ຊ່ອງ al-Alam ລາຍ​ງານ​ເມື່ອ​ວັນ​ທີ 22 ກັນຍາ​ວ່າ ມີ​ຜູ້​ເສຍ​ຊີວິດ 29 ຄົນ ​ແລະ ​ບາດເຈັບ​ອີກ 57 ຄົນ ຈາກ​ເຫດການ​ທີ່​ກຸ່ມ​ມື​ປືນ ໂຈມ​ຕີ​ເຂົ້າ​ໃສ່​ພິທີ ເດີນ​ສວນສະໜາມ​ຂອງ​ທະຫານ ຢູ່​ໃນ​ເມືອງ ອາ​ວາ​​ສ ທີ່​ຂຶ້ນ​ກັບ​ແຂວງ ຄູ​ເຊ​​ສ​ຕານ (ພາກ​ຕາເວັນຕົກ ສ່ຽງ​ໃຕ້​ອີ​ຣານ). ໃນ​ຈຳນວນ​ຜູ້​ເສຍ​ຊີວິດ​ນັ້ນ ມີ​ແມ່ຍິງ ແລະ ເດັກນ້ອຍ​ລວມ​ຢູ່​ນຳ​ຫຼາຍ​ຄົນ.